Markus 14
14
Riy ma tambəla Yesu
(Mat 26.1-5; Luk 22.1-2; Yhw 11.45-53)
1A mba ka wan gbak a gwaygwaya Paska abə gwaygwaya wəda ndə həji ŋkula ɗalə abə faŋtər a mən a ɗal. Dəba magulakwakw maɗal kwakus aagi abə masərək ma ma garagar aagi, aa kagas təf ta mbəla Yesu abə wirwir, aska aagi a dzə ka. 2Aa kazlap, aagi iŋgaya: «Həji ɗiw a mbələ a taba həji aagi vah gwaygwaya səku, ara ndə a kaadaa ma ka a taba həji aagi.»
Wala ma bəz ꞌurdi a ha Yesu
(Mat 26.6-13; Luk 12.1-8)
3Yesu a Baytaniya, a wata Simun ala fagwalakw, ndə a kazəm wəda, wala minja taa tə, abə gambaram ndə zləm a ɗa «albatərə», ꞌurdi mkpef a mən, ꞌurdi watsa aa də abə mpi ndə zləm tə a ɗa «nar», sulay dagala a heɗe. Mpaŋ a dəɗ gambaram watsa, shak a zanə ꞌurdi watsa a ha Yesu. 4Həji ndiɓi aagi aa kazlap a walaŋ ta, aagi iŋgaya: «Kat tə ndə a kagəy ꞌurdi watsə ka me! 5Amcana ci, həji ber ꞌurdi watsə bəza, dəy aha sulay teemeri mahkaɗ, aska həji a vəlatana a həji titikw aagi!» Aa kazlap ma gamak ata wala watsa. 6Ama, Yesu zlap a zlapatana, iŋgaya: «Huni mbasl wala watsə ka, huni ɗiw ara veme?» Səkən ndə a ɗal meni, a ɗa səkən ma ŋtan ata nja naka. 7Ara ndə a ɗa, həji titikw aagi, aagi andza a ɗi abəra huni kwa vepiy, huni aɗalatana təwah andza ndə huni mayə. Ama sa, huni kaagəraka abəra huni pal akas. 8Wala watsə taɗal səkən ndə a ɗa teete a ɗalə. Tabəzaka zlikusəm naka bəza abə ꞌurdi, aska a kahaka. 9Sa zlapahuni a ɗa ŋter, la ndə aa kaaɗaf Ma wiyə ma təwah Bizlaf a heɗe a manahayak, aagi aghal səkən ndə wala watsə a ɗalə, həji aagi adeŋi a heɗe.
Gas təf ta ber Yesu ara Yahuda
(Mat 26.14-16; Luk 22.3-6)
10Yahuda, ala minja a taba magəli Yesu ma wam aha gbak aagi, tsaw a nda ara magulakwakw maɗal kwakus aagi, aska a beratana Yesu. 11Ndə aa zlima ma watsa ikwa, aa kaɓas, aa ghalanə dala aka aagi avəlanə. Mbara, Yahuda dəba a agas vah ma ŋtan ndə a kaaberatana Yesu a heɗe.
Maɗ zəm wəda Paska
(Mat 26.17-25; Luk 22.7-23; Yhw 13.21-30)
12Diw vah gwaygwaya wəda ndə həji ŋkula ɗalə abə faŋtər a mən, vah ndə həji aagi kafat wəzhi ŋcimi aagi aska Paska, magəli Yesu aagi, zlap aa zlapanə, aagi iŋgaya: «Hwa may a ni a nda lamahu la zəm wəda gwaygwaya Paska a vata?» 13Zlən a zlən magəli tə aagi gbak atama, zlap a zlapatana, iŋgaya: «Huni nda a hayak ma dzamadzam, huni kaagəra ala minja, a katiw duguzl yəm. Huni səbarə, 14la ndə a kaakiɗim a heɗe, huni zlapanə a cina jak: “Masərək iŋgaya: La ndə sa kaazəm wəda gwaygwaya Paska abə magəli naka aagi a vata?” huniy kəsha. 15A kaaghalahuni la, a wəzəm ata ha jak, jak ma dagal, səkən aagi tiwtiw taslaya a mən, a tsutsa abə huni alamaŋkwa la zəm wəda gwaygwaya.» 16Magəli tə aagi, aa tsaka nda ta, peteŋ aagi a hayak ma dzamadzam watsa. Gəra, aa gəra andza ndə a ghalatana, dəba aagi a lam la zəm wəda gwaygwaya Paska ka.
17Ndə ŋtsəɓahw a ɗal tə, Yesu taa tə abə magəli tə ma wam aha gbak aagi. 18Ndə aa kazəm wəda, Yesu zlap a zlapatana, iŋgaya: «Sa zlapahuni ŋter: ala minja a taba kuni, a aɓin a beraka bəza, ala ndə ni kazəm wəda abə sha.» 19Dəba magəli tə aagi aghuɗek, aa kaɗiwzə ŋtaɗ ŋtaɗ: «Sa par vəw?» 20Zlap a zlapatana: «Ala minja a taba huni ma wam aha gbak watsə aagi, ndə ni kaza ra a ɗeŋ abə sha, ata la ma ŋtaguleŋ. 21Ara ndə a ɗa Mbə həji ma dəgnak a anda a mca andza ndə a ŋtiraya a ɗerewal. Ama azha, dadawər ata ala ma ber Mbə həji ma dəgnak bəza! Galaɓa ndə a ŋkula mbəwha.»
Wəda Bay Madagal
(Mat 26.26-30; Luk 22.15-20; 1Kr 11.23-25)
22Ndə aa kazəm səkən, Yesu leŋ a ji wəda, a diwzha ndə a ɗalanə wasiy bəza a Bizlaf, teŋ a teŋ ka a mən, pa a vəlatana a magəli tə aagi, zlap a zlapatana, iŋgaya: «Huni ji, watsə ana zlikusəm naka.» 23A diwzha tə, leŋ a ji zlərkuɗ mavə, ndə a ɗalanə wasiy bəza a Bizlaf, pa a vəlatana, dəba aagi a sə tiwtiw. 24Zlap a zlapatana, iŋgaya: «Watsə ana ampəs naka, ampəs ta dzəv ma abə Bizlaf, ma zah ka, aska həji aagi vərəm. 25Sa zlapahuni ŋter, sa kaazhin a sa mavə watsə kwa akas, a vaŋ ata vah ndə sa kaasa wiyə tə a la ndza bay Bizlaf.»
Yesu a kaghal ndə Piyer a kaazlap a kasənə səku
(Mat 26.31-35; Luk 22.31-34; Yhw 13.36-38)
26Ndə aa kəɗaŋ ya dərəf gwaygwaya bəza, tsaw aa nda ta a ha wəzəm Jaytun. 27Yesu zlap a zlapatana, iŋgaya: «Huni aɓin a mbaslaka ka tiwtiw, ara ndə a ɗa, taŋtiraya a ɗerewal ma ghwaɗeɗe: Sa adza mbə njin aka, ŋcimi aagi awiɗ ta ŋtaguleŋ ŋtaguleŋ.» 28Ama, Yesu zlap a zlapatana zhana: «Ndə sa kaazhina naka a bəza a jiɓ, sa anda a tehahuni a Galili.» 29Piyer zhin a zhinanə, iŋgaya: «Kwa andza ndiɓi aagi aa mbaslahu ka tiwtiw, sa kaambaslahu səku!» 30Yesu zlap a zlapanə, iŋgaya: «Sa zlapahu ŋter, akacihwa, abə zaɗə watsə, gwamzakw a adza wəla gbak, hwa tazlap zhin mahkaɗ, hwa kasənakas.» 31Ama Piyer a kavas a zlap abə ɓərɓər tə zhana, iŋgaya: «Kwa a ɗa mci, mə amca abə hwa, kwa sa kaazlap, sa kasənahu səku səy akas.» Magəli tə ndiɓi aagi zlap andza sha tiwtiw.
Tarha Yesu a Gecemane
(Mat 26.36-46; Luk 22.39-46)
32Peteŋ aa ata la minja zləm tə Gecemane. Yesu zlap a zlapatana a magəli tə aagi, iŋgaya: «Huni ndza kuni ka a ɗi, sa nda tarha.» 33Daŋ a yazə tiw Piyer, Yakuba, abə Yahwana aara, tsaw aa nda abə təmta. Ŋzliŋ a kadiw a dzə, azha, a kanaana. 34Azha, zlap a zlapatana, iŋgaya: «ꞌunəf naka tazla tə abə ghuɗek tə a kaɗiw a dzaka ka. Huni ndza kuni ka a ɗi, huni ndza abə nja.» 35Kərəɗ a kərəɗ tə bəza kajik. Fak i ha tə ka ata hayak aska tarha, iŋgaya: «Andza a kaɗal, kərəɗzaka wan yaka watsa bəza.» 36Iŋgaya: «Aba, Vava, kala səkən tiwtiw a kaɗal ara hwa, pewaka a bəza abəra yaka watsə. Ama, abə may nakas, maɗal abə may kwa.»
37A zhinha ya, magəli ma mahkaɗ watsa aagi, aa tawan ta, zlap a zlapanə a Piyer, iŋgaya: «Simun, hwa wanɓa vəw? Hwa kula a ndza abə nja kwa ler ŋtaɗ səkwa! 38Huni ndza abə nja, huni tarha, ara ndə huni kaandəv kuni ata laghut həji aagi. Ŋkwaɓ a kamayɓa, ama, ŋgalaŋ ara zlikusəm akas.»
39Kərəɗ a kərəɗ tə bəza zhana, dəba a atarha, a zhin a zlap ma watsa. 40A diwzha tə zhana, a zhinha a gərata aa tawan ta, ara ndə aa ŋkula ndza bəza abə nja. Aa kasən səkən ndə aa kazlapanəs.
41A zhinha a mahkaɗ tə, ndaha zlap a zlapatana, iŋgaya: «Pa anawatsə huni wanɓa vəw? Huni kanəp vəw? Tiw azha! Ler taɗal tə: Aŋgha Mbə həji ma dəgnak, tavəlaya ata ra həji ma gəy ma aagi. 42Huni gar a wəzəm! Kiytakwa, huni taŋzə ala ma beraka bəza taa tə.»
Mbəla Yesu
43A tsutsa a tsutsa ndə Yesu a ɗa ndza tə kazlap, ala ndə zləm tə Yahuda, a taba magəli tə ma wam aha gbak aagi, taa tə. Həji aagi vərəm aska abə ŋgezle ma dagal, abə dambəy. Madagal maɗal kwakus aagi, masərək ma ma garagar aagi, abə magulakwakw aagi ma zlənhata. 44Yahuda ma ber Yesu bəza taghalatana səkən ndə a kaaɗalə, i təmta iŋgaya: «Ala ndə sa kaazlapzanə andza ŋgwanambə naka, watsa, a ɗa sha. Huni mbələ, huni jaɓi, huni həbarə katkadək,» iy. 45Mbara, ndə Yahuda a gwara tə abəra Yesu, kərəɗ a kərəɗha, a zlapzanə: «Masərək!» iy. Azha, dəba a azlapzanə andza ŋgwanambə tə. 46Dəba həji ma səbarazə aagi atsa ra a heɗe aska a mbələ. 47Ama azha, ala minja a taba həji ma a tsutsa aagi, mpat i ŋgezle ma dagal, dəba a adza ala ma ɗal zlən ataa madagal maɗal kwakus, raɗ a zləranə zləm bəza. 48Yesu leŋ a ji zlap, iŋgaya: «Huni ndaha abə ŋgezle ma dagal aagi abə dambəy a mbəlaka andza mbəla ŋhil vəw? 49Kala pish ma mbirha, həji tiwtiw abə huni a jak kwakus Bizlaf, sa kasərəkahuni səkən aagi, huni tambəlaka akas. Ama, a ɗal andza watsə aska a kəliy ma ma ŋtirha ka a wəzaha a ɗerewal ma ghwaɗeɗe.» 50A tsutsa, magəli tə aagi mbasl aa mbasl ka, aa tsaa kashi ta. 51Magəla tə minja a kasəbarə, gidiwri gagagha ana ma ndza a heɗe. Kaw aa mbələ bəza, reh a reh tə, 52wərət a pəlatana gidiwri ka, tsaa kashi tə, delewlew.
Yesu atama həji ma zla guma aagi
(Mat 26.57-68; Luk 22.54-55, 63-71; Yhw 18.13-14; 19.24)
53Leŋ aa daaha Yesu atama madagal maɗal kwakus, ata la ndə magulakwakw maɗal kwakus aagi, magulakwakw aagi, abə masərək ma ma garagar aagi aa kadzam tiwtiw. 54Piyer a kasəbarha Yesu abə gədək tə, tsaw a nda a gi ataa madagal maɗal kwakus. Ka a ndza tə ka ata biygi abə həji ma həbar jak aagi a njiw kwahu.
55Magulakwakw maɗal kwakus aagi abə həji ma ndza ata la dzam guma ma dagal aagi tiwtiw, aa kagas a təkakənə ma a Yesu, aska aagi a dzə ka, ama aa tagəra ma ndə a gəyə akas. 56Ara ndə a ɗa, vərəm ana həji ma kakarakənə ma a Yesu aagi, ama a taba ta, tək ma ta watsa tambəla aaras. 57Ndiɓi aagi, takaw aa gar a wəzəm a karakənə ma abə gaɗaɗaŋ, aagi iŋgaya: 58«Ni tazlima, a kazlap: “Sa azah jak kwakus Bizlaf ma ꞌun ara həji aagi watsə ka, ata wan mahkaɗ, sa aꞌun minja zhana, ma ŋkula ꞌun ata ra həji aagi,” iy.» 59Ama ma ta parpar parpar. Ata la watsa, ma ta tadzəv səku.
60Madagal maɗal kwakus takaw a gar a wəzəm a taba həji ma dzam ta ka aagi, dəba a ɗiwzə Yesu: «Hwa kazhin zlap wəra? Hwa tazlima ma ndə həji watsə aagi kazlapə ata hwa wəra?» 61Ama Yesu kaagha tə, a kazhinanə kwa zlap akas. Azha, madagal maɗal kwakus ɗiw a ɗiwzə zhana, i kəsha, iŋgaya: «Hwa ɗa Kərist, Mbə Bizlaf, ndə bəzla Bizlaf ma təwah a heɗe, nana vəw?» 62Yesu zhin a zhinanə, iŋgaya: «Ayəw, sa, huni aɓin a gəra Mbə həji ma dəgnak, a kaandza ata guva zəm Bizlaf ma ɓərɓər, zhana, a kaandaha a gwazlavay ma ndza a wəzlaf.» 63Madagal maɗal kwakus ŋhwak a ŋhwak rəkuts tə aagi ka, iŋgaya: «Kwa həji kazhina a gas ala gəra ma ma ndza a heɗe akas! 64Huni tazlima dahalay ndə a ranə a Bizlaf watsə. Deŋ kuni avaŋga?» Aa zanə mpət tiwtiw, madza ka a mci, aagiy. 65Həji ndiɓi aagi kaŋtif majignek a heɗe, dəp aa dəpanə wənək aka, dəba aagi adzə, aa kazlapanə, aagi iŋgaya: «Sən ala ma dzahu bəza!» Maɗal zlən ma kahəbar aagi, leŋ aa ji, dəba aagi aɗanə ra a zləm.
Piyer a kazlap: «Sa kasən Yesu səku»
(Mat 26.69-75; Luk 22.56-62; Yhw 18.15-18)
66Tiɗa ndə Piyer a wəzaha ata biygi, wala minja a taba wali ma ɗal zlən ataa madagal maɗal kwakus aagi taa tə. 67Ndə a gəra Piyer a kanjiw kwahu, tizh a sarzə, i kəsha iŋgaya: «Hwa yəm, hwa tandzaha abə Yesu ndə Nasaratu!» 68Ama, tik a meɗ aka ana Piyer, iŋgaya: «Sa kasənəs, sa, sa kazlima ma ndə hwa kamay a ghaləs.» Tsaa kandaa tə a bəza aha bəza majigjigi. [Azha, gwamzakw dəba a adza wəla.] 69Ndə wala ma ɗal zlən watsa a gəra, dəba a azhin a zlapatana a həji ma ndza a tsutsa aagi: «Ala watsə a ɗa ala ta,» iy! 70Ama azha, Piyer ŋkal a ŋkalzə zlap watsa zhana. A diwzha kajik, həji ma ndza a tsutsa aagi, dəba aagi azlapanə a Piyer zhana, aagi iŋgaya: «Səbakw akas, hwa ɗa ala ta! Zhana ya, hwa ndə Galili.» 71Ama tik i meɗ, iŋgaya: «Andza sa zla gaɗaɗaŋ, Bizlaf masaka yaka. Sa kasən ala ndə huni kazlap a heɗe watsas!» 72A tsutsa azha, tiɗa gwamzakw a kadza wəla a magbak tə. Deŋ Piyer a deŋzə ata ma ndə Yesu a zlapanə: «Gwamzakw a adza wəla gbak, hwa tazlap zhin mahkaɗ, hwa kasənakas.» Tsaa kanda tə a bəza kahkah aha bəza, dəba a ahan.
ទើបបានជ្រើសរើសហើយ៖
Markus 14: GOU
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល