Markus 13
13
Yesu a kaghal ghurəm jak kwakus Bizlaf
(Mat 24.1-2; Luk 21.5-6)
1Ndə Yesu a kandaa tə a bəza a jak kwakus Bizlaf, ala minja a taba magəli tə aagi, zlap a zlapanə, iŋgaya: «Masərək, taŋzə! Təwah ŋkəɗaŋ watsə aagi, abə dagal ꞌun jak watsə!» 2Yesu zhin a zhinanə: «Hwa kagəra dagal ꞌun jak watsə səkwa? Kwa ŋkəɗaŋ a kaaɓinha ŋtaɗ a ɗi aha minja akas, aagi aghurəm ta tiwtiw.» 3Ndə a kandza a dawən Jaytun səksək abə jak kwakus Bizlaf, Piyer, Yakuba, Yahwana abə Andire ata paŋ, ɗiw aa ɗiwzə: 4«Ghalani, a andaha vepe, ma kaaghalani ɗal shiŋ səkən watsa aagi tiwtiw veme?» aagiy.
Ghal yaka ma kaaɗal
(Mat 10.17-22; 24.4-14; Luk 12.11-12; 21.8-19)
5Yesu dəba a azlapatana: «Huni mbəla ŋkwaɓ, ara ndə ala a kaaghutahuni ka.» 6Həji ndiɓi aagi vərəm, aagi andaha ata zləm naka, aagi azlapahuni: «Sa ana Kərist!» Aagi aghut həji aagi ka vərəm. 7Huni aɓin a zlima zlap ma ndza ata ghəm aagi, ma kaɗa slaɓ slaɓ abəra huni, abə ma gədək abəra huni, huni ɗiw a ɗal ŋzliŋ səku, səy sha maɗal ikwa, ama sha ana kəɗaŋ manahayak kwagwa səku. 8Həji ndiɓi aagi, aagi adza kusəm abə shiŋ həji ndiɓi aagi, hayak minja a adza kusəm abə hayak minja, hayak a anaana dagala, mintish a aɗal, a andza andza yaka ndə wala a kaɗiw a mbəw tə. 9Huni mbəla ŋkwaɓ aska ha kuni. Aagi avəlahuni a madzam guma aagi, aagi agəzlahuni a ŋge a jak ta tarha Yahuda aagi, aagi ajaɓahuni atama həji ma ndza aha hayak aagi, abə bay aagi dawna sa. Huni ana ma kaghal səkən ndə huni gəra abə səkən ndə huni zlima ata sa aagi atama ta. 10Səy həji aagi aa mazlima Ma wiyə ma təwah bəza tiwtiw. 11Ndə aa kaajaɓahuni ata guma, huni ɗiw deŋ ma ndə huni kaazlapəs. Ma ndə huni kaaghalə a tsutsa, a andaha ara hunis, ama ma ndə Bizlaf a avəlahuni, huni alima a tsutsa tsutsa. Ara ndə a ɗa, ma ndə huni kazlapə, a andaha ara Miɗ ma ghwaɗeɗe. 12Ala a avəla zliŋgin tə a dza ka, vava a aɗal andza sha abə mbə tə, wəzhi aagi azhinaktana ha a həji ma mbəwata aagi, aagi avəlatana a həji aagi, a dzata ka a mci. 13Həji aagi atsakhuni wən tiwtiw dawna sa. Ama ala ma sakw ꞌunəf bəza, a vaŋ ata kwakuɗaŋ tə, ala watsa a aɗa reh.
Ghurəm Wərusalima
(Mat 24.15-28; Luk 21.20-24)
14«Huni aɓin a gəra, Ala badaway ma kagəy la, ma ŋkula zhiva a gəra tagar tə ka ata la ma ŋkula ɗa aŋtə. Ala ma kaya ma watsə, mateh katkadək! A tsutsa, həji ma ndza a hayak Yahudiya aagi, aŋta aa mashi ta a ha wəzəm. 15Ala ma ndza a wəzəm a ha jak a ɗiw a tadukha, a nda a jak a daa səkən səku. 16Ala ma ndza a la a damə, a kaazhinha abə ma a diwzha a ji rəkuts tə səku. 17Ma vah watsa, dadawər ata wali ma ndza abə dəməs aagi, abə ndə wəzhi ata ŋꞌwa aagi! 18Huni tar Bizlaf ara ndə shiŋ səkən watsa a kandaa tə a va dadawər. 19Ara ndə aagi aɗa vah yaka aagi, yaka ndə həji ŋkula va a gərazə, ghala ndə Bizlaf a ba manahayak, minja a kaazhinha ikwa akas. 20Andza Bay Madagal tahahayahəji vah watsa ka aka səku, həna ala ma kaandza abə nja akas. Ama, hahay i vah watsa ka, dawna həji tə ndə a dəmata aagi. 21A tsutsa, andza ala tazlapahuni: “Tsakwa ana Kərist! A ɗi,” aka səku: “Tsa a ŋge a ɗi!” Huni ɗiw a jis. 22Kərist ma gamak aagi abə maɗaf ma Bizlaf ma gamak aagi, aagi andaha, aagi aɗal tsaɓan abə səkən ndə həji kaghərəŋ a heɗe aagi, aska a ghutahuni, andza aa kula meni, kwa həji ndə Bizlaf a dəmata aagi. 23Huni azha, huni mbəla ŋkwaɓ aska ha kuni, sa tadiw a ghalahuni bəza ata səkən ma kaandaha aagi tiwtiw.»
Ndaha Mbə həji ma dəgnak
(Mat 24.29-35; Luk 21.25-33)
24«Ama ma vah watsa, a diwzha yaka watsa, pish a adzəɓ tə, ŋtəra a kaaɓal aka zhanas, 25gəmzla aagi azaha ta a bəza a wəzəm a wəzlaf, ɓərɓər ma ndza a wəzlaf aagi akusah. 26A tsutsa, həji agəra Mbə həji ma dəgnak a kandaha a gwazlavay, abə sləf abə ɓərɓər dagala. 27A tsutsa, a azlənha matəf Bizlaf aagi, a nda dzamha həji tə ndə a dəmata aagi a ŋge ata ghala manahayak ma ŋfaɗ tiwtiw, ꞌwa aka ata la ndekw manahayak a vaŋ ata la ndekw manabizlaf.»
Maŋgəla ma ata shikiɗ
(Mat 24.32-35; Luk 21.29-33)
28«Huni zlima maŋgəla ndə shikiɗ a kamay a ghalahuni: andza huni tagəra a kaza ra, vajiɗ tə tadza tə dagala meni, huni sən ka ci, a ɗa ŋtəra ta nda a damə huk. 29Andza ikwa yəm, andza huni tagəra səkən watsa taa tə, huni sən ka ci, Mbə həji ma dəgnak slaɓ, ama majak kuni. 30Sa zlapahuni a ɗa ŋter, həji ma ndza akacihwa watsə aagi, aa kaabazl ta tiwtiw abə səkən watsa a andaha səku. 31La ma ndza a wəzlaf abə la ma ndza ata hayak, aagi akəɗaŋ ta, ama ma naka a kaakəɗaŋ səku.»
Bizlaf ŋtaɗ tə ana ma kasən vah kwakuɗaŋ
(Mat 24.36-44)
32Ama, ma vah watsa, aka səku, ler watsa, kwa ala a kasən akas, kwa matəf Bizlaf ma ndza a wəzlaf aagi, kwa Mbə həji ma dəgnak, ala a kasən akas, səy Vava. 33Yesu iŋgaya: «Huni mbəla ŋkwaɓ, huni ɗiw a wan kuni səku, ara ndə a ɗa, huni kasən vah watsa səku. 34A ndza andza ala ma kanda tə a ciwirha: mbasl i jak tə ka, pa a vəlatana zlən aka a maɗal zlən tə aagi, kwa vaye abə aŋtə. Ghal a ghalanə ka ana ala ma ndza a ma jak aska a ndza abə nja. 35Ikwa azha meni, huni ndza abə nja, ara ndə huni ŋkula sən vah ndə cina jak a kaandaha, kata ma ŋtsəɓahw, aka səku bay zaɗə, kata, ndə gamzakw a kadza wəla ataa dəylakwaf, kata a kwaf biŋ. 36Andza a zhinha hək, ara a andaha a gərahuni, huni tawan kuni. 37Səkən ndə sa kaghalahuni watsə, sa ghalatana ikwa a həji aagi tiwtiw, huni ɗiw a wan kunis.»
ទើបបានជ្រើសរើសហើយ៖
Markus 13: GOU
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល