Yahwana 12
12
1A finha wan ŋkwah a gwaygwaya Paska ataa Yahuda aagi a ɗal, Yesu tsaw a nda a Baytaniya ata la ndza Lazarus, ala ndə a səfənazə bəza a taba həji ma bazl ta aagi. 2A tsutsa pa aa vəlanə wəda ma daha ata sləf ataa Yesu, Marta ana ma kaɓizh wəda watsa. Lazarus yəm, a taba həji ma kazəm wəda abə Yesu aagi. 3Mariyama leŋ a ji ꞌurdi ndə dala dagala a heɗe a gaŋ gambaram, ndə a də abə nar, dəba a abəz ata ŋgas Yesu, zhana tərəɗ tərəɗanə bəza abə dzuguɗ ha tə. La ma ndza a jak watsa a nji tiwtiw ara mali watsa. 4Azha, Yahuda Iskariyut, ŋtaguleŋ a taba magəli Yesu aagi, ala ma kaaɓin a ber bəza, iŋgaya: 5«Ara veme, ndə həji ŋkula ber mali watsə bəza sulay teemeri mahkaɗ, a vəlatana dala tə a həji titikw aagi?» iy.#12.5 A ɗal bəza burəw teemeri dzaŋfaɗ abə radzamahkaɗ aha ŋfaɗ 6A zlap ikwa ya, ara ndə a kaza hahər ata həji titikw aagis, ama a va a ɗa ŋhil. Sha, ana ma kambəla slibi dala, tsa a kaŋhil bəza a mən. 7Ama Yesu, iŋgaya: «Mbasl wala watsə aka, a ɗal ikwa aska vah ma ndza atama ndə aa kaatsaka a jiɓ. 8Həji titikw aagi andza abə huni kwa vepiy, ama sa, sa kandza abə huni kwa vepiy akas,» iy. 9Ndə ŋgaɓa Yahuda aagi zlima Yesu a hayak Baytaniya ya, aa tsaa kanda a tsutsa, ci, gagagha aska Yesus səku, ama yəm, aska aagi agərazə Lazarus ndə Yesu a garazə a wəzəm a bəza a jiɓ a taba həji ma bazl ta aagi. 10ꞌWa aka a tsutsa abə magulakwakw maɗal kwakus aagi tagar bəza a dza Lazarus aka a mci yəm. 11Dawna sha, abə Yahuda aagi vərəm aa ta ta bəza abəra təmta aska ɗalanə awa a Yesu.
Vaŋ Yesu abə sləf a Wərusalima
(Mat 21.1-11; Mrk 11.1-11; Luk 19.29-40)
12Apat tə, ŋgaɓa həji ma vərəm ma ndaha aska gwaygwaya Paska, aa zlima ya, Yesu a kandaha a Wərusalima. 13Kwa vaye, aa bəzlaha maram sliba aagi, aska aagi ndaa a lima abə sha. Aa kadza wəla, aagi iŋgaya: «Sləf a Bizlaf! Bəzla ma təwah ata ala ma kandaha ata zləm ataa Bizlaf Bay Madagal, Bay Isərayila!» aagiy. 14Yesu gəra a gəra mbə madambərzhahw, takaw a taf tə a heɗe, andza ma ma ŋtiraya: 15Ŋzliŋ a dzahu səku, həla Siyuna! Tsakwa taŋzə, bay kwa a kandaha, a kandza ata mbə ghəl madambərzhahw. 16Ata diw nda ta mampər, magəli tə aagi tazlima səkən ma kaɗaləs. Ama ndə Yesu a lima sləf Bizlaf bəza, aa kasənakənə ata ma ma ŋtiraya a heɗe, sha ana ndə a ɗalə ikwa a heɗe. 17Ndə Yesu a ya Lazarus, gar a garazə a wəzəm a bəza ata la mca, həji aagi vərəm a tsutsa ata vah watsa. Təmta ana ma kaghal ma ma heɗe. 18Dawna sha, abə ŋgaɓa həji aagi vərəm aa ndaha a lima abə Yesu, ara ndə aa zlima ya, taɗal tsaɓan watsə. 19Azha Farisa aagi dəba aagi azlap a taba ta, aagi iŋgaya: «Huni kagəra, huni ŋkula a ɗalɓa səkən minja kwa akas: Həji tiwtiw aska,» aagiy.
Sləf abə mpi ma gəzlaŋgarak
20Gərek ndiɓi aagi yəm, aa tataf a Wərusalima aska nda həmənha Bizlaf a gwaygwaya. 21Ɗiw aa ɗiwzə Filip, ala ndə hayak ma dzamadzam Baytisayda, ma ndza a hayak Galili, aagi iŋgaya: «Madagal, ni may a gərazə Yesu,» aagiy. 22Filip tsaw a nda a ghalanə a Andire, təmta gbak gbak tsaw aa nda a zlapanə a Yesu. 23Yesu zhin a zhinatana, iŋgaya: «Vaŋ ana vah ndə Mbə həji ma dəgnak a kaalima sləf, iy. 24Sa zlapahuni, a ɗa ŋter: mbə səkən ma kasaɓ andza ndiri, ŋtaguleŋ ma ndəv tə a hayak, tarəɗa akas, a andza ŋtaguleŋ tə, ama andza tarəɗa tə, a ba mbə dagala. 25Ala ma kamay miɗ tə, a afəcak bəza. Ama kwa vaye ma kaŋkalzə miɗ tə ata manahayak watsə, a ɓah ka aska miɗ ma ŋkula kəɗaŋ kwa vepiy. 26Andza ala a kamay a ɗalaka zlən, masəbaraka. Azha ata la ndə sa kaɗa, a ɗa maɗalaka zlən. Ala ma kaɗalaka zlən a alima sləf ara Vava,» iy.
27«Anawatsə ꞌunəf naka tazla tə. Azha sa azlap avaŋga? Ya Vana rehaka bəza vəw? Ama, dawna ler watsə abə sa ndaha. 28Vana sləf zləm kwa!» Azha, wəla minja a dzaha a wəzlaf: «Sa tasləfə, azha, sa azhina a sləfə wəruk,» iy. 29Ŋgaɓa ma ndza a tsutsa, ndə a zlima wəla watsa, iŋgaya: «Rəv manavan,» aagiy. Ndiɓi aagi, iŋgaya: «Matəf Bizlaf ma kazlapanə,» aagiy. 30Yesu leŋ a ji zlap zhana, iŋgaya: «Wəla watsə tadzaha dawna sa səku, ama dawna huni. 31A ɗa anawatsə ana vah ta zla guma ma ndza ata manahayak. Anawatsə mbə bay ma ndza ata manahayak watsə a afak tə, a aɗa mba a bəza. 32Ataa naka, ndə Bizlaf a kafaka ka a manahayak watsə, sa anjiwha həji aagi tiwtiw ara sa.» 33Abə zlap watsə, a kaghalatana avaŋgəy abə a mca. 34Ŋgaɓa həji aagi dəba azhinanə, iŋgaya: «Ni tazlima a ɗerewal ataa ma ma garagar ci, Mesi a andza kwa vepiy. Ara veme, ndə hwa iŋgaya Mbə həji ma dəgnak a kaf tə ara Bizlaf? Mbə həji ma dəgnak tə vaya?» aagiy. 35Yesu zhin a zhinatana, iŋgaya: «Weɗ la a taba kuni, kajik kwagwa. Huni nda tiɗa ndə huni a weɗ la, ara ndə ləvaŋ a kanda aha huni, ara ndə ala ma kanda a ləvaŋ a kasən la ndə a kanda a heɗes. 36Tiɗa ndə huni abə weɗ la, huni ɗal awa a weɗ la aska huni a ɗa wəzhi weɗ la aagi,» iy. A diwzha ndə a zlapatana bəza ikwa, Yesu kərəɗ a kərəɗ tə a bəza abəra təmta, ɓah a ɓah tə.
Ŋkalzə ɗal awa Yahuda aagi a Yesu
37Kwa ndə Yesu a ɗal səkən tsaɓan aagi dagala ata nja ta, aa taɗal awa aska ma tə akas. 38Ikwa abə zlap ala ma ɗaf ma ndə a zlimazə ara Bizlaf Isaya a kəliy, iŋgaya: Bizlaf Bay Madagal, ma ɗal awa aska ma ndə ni ghalə ndə həji aagi zlima vaya? A vaya abə Bizlaf Bay Madagal a ghalanə ɓərɓər tə? 39Aa ŋkula ɗal awa səku ara ndə Isaya a zlap zhana, iŋgaya: 40Tawələfatana nja aka, zhana tabəwatana ꞌunəf ta aka ɓərɓər, ara ndə aa kagəra abə nja ta, ara ndə aa zlima, ara ndə aagi kazhinha pəl mpət ta. Andza aa taɗal ikwa, həna sa tarehata bəza, iy. 41Isaya a zlap ikwa ara ndə a gəra sləf ataa Yesu, azha a zlap a heɗe. 42Azha a tsutsa, a taba bay Yahuda aagi abə ha ta, vərəm, taɗalanə awa a Yesu. Ama dawna Farisa aagi, aa taji a ghalha ha ta ata varvara ata nja həji aagi səku, ara ndə aa kagamata aara a jak ta tarha Yahuda aagi. 43Ara ndə aa mayɓa sləf ma ndza ara həji aha sləf ma ndza ara Bizlaf.
44Azha tsutsa Yesu a kazlap abə ɓərɓər tə, iŋgaya: «Ala ma ɗal awa aska sa, a ɗal awa aska sa səku ama a ɗal awa aska ala ma zlənaka. 45Ala ma kagəraka, a gəra ala ma zlənaka yəm. 46Sa, ma ɗa weɗ la, sa ndaha a manahayak aska kwa vaye, ma ɗalaka awa a kandza a ləvaŋ akas. 47Andza ala a kazlima ma naka aagi azha taɗal andza ndə aa may a ghalə akas, sa ma kadzawəs, ara ndə sa, sa ndaha a reh manahayak, ama sa tandaha aska dzaw manahayak akas. 48Ala ma ŋkalzaka zhana taji ma naka aagi səku, guma a heɗe. Ma ndə sa sərəkata aagi ana ma dzaw ala ma vah kwakuɗaŋ manahayak. 49Ma ndə sa zlap tandaha a dəməs naka akas, ama Vava ma zlənaka ma ghalaka abə ha tə ana ma ndə sa kazlapə abə ndə sa kasərəkə. 50Azha sa kasənə: ma ndə a dzaw ka, sha ana miɗ ma ndza ka kwa vepiy. Ikwa azha, ma ndə sa kazlap, sa zlapə andza ndə Vana a ghalaka,» iy.
ទើបបានជ្រើសរើសហើយ៖
Yahwana 12: GOU
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
