Yahwana 13
13
Maɗ wəda abə ban ŋgas magəli Yesu aagi
1A mba aka wan ŋtaɗ a ɗal ana Paska, gwaygwaya ataa Yahuda aagi, Yesu a kasən ya, wan tə taɗal tə, wan ndə a kambasl manahayak aska a nda tə ara Cin. Sha ma may həji tə ma ndza a manahayak aagi, tamayata a gwar ata kwakuɗaŋ vah. 2Tiɗa ndə Yesu a kazəm wəda abə magəli tə aagi, njagaɗa wəliɓi tatsə ka a ꞌunəf Yahuda Iskariyut mbə ataa Simun, aska a ber Yesu bəza. 3Yesu a kasən ya, Cin tavəlanə səkən aagi aka tiwtiw a ra tə, a ndaha ara Bizlaf, a azhin tə ara Bizlaf. 4Takaw a gar tə a wəzəm aha tizhimzla, səɗ a səɗha rəkuts ma ndza aha dəɓa bəza, dzaw a dzaw gaŋ tə ka abə patak. 5A diwzha, bət a bət yəm a daŋwdaŋw, dəba a aban ŋgas magəli tə aagi, zhana tərəɗ a tərəɗatana bəza abə patak ma ndza a gaŋ tə watsa.
6Ikwa azha abə a gwarha abəra Simun Piyer. Azha dəba Simun Piyer a azlapanə, iŋgaya: «Bay Madagal, hwa, hwa abanaka ŋgas azha vəw?» iy. 7Yesu zhin a zhinanə, iŋgaya: «Səkən ndə sa, sa kaɗalə anawatsə, hwa, hwa kasənə anawatsə səku, ama hwa azlima atama,» iy. 8Piyer zhin a zhinanə iŋgaya: «Aŋghə, kwa tep hwa kaban ŋgas naka akas,» iy. Yesu zhin a zhinanə, iŋgaya: «Andza sa tabanahu ŋgas aka səku, hwa kaalima səkən ndə sa kaɓizh səku,» iy. 9Simun Piyer a zlapanə, iŋgaya: «Mbara andza ikwa meni Bay Madagal, hwa ɗiw a banaka ŋgas aagi gagaghas, ama ban ra naka aagi abə ha naka yəm,» iy. 10Yesu zhin a zhinanə iŋgaya: «Ala ma ban bəza ci, may tə həji zhin a ban akas, ara ndə a ɗa zlikusəm ghwaɗeɗe, azha, huni ci, huni zlikusəm ghwaɗeɗe, ama huni tiwtiw səku.» 11Ara ndə Yesu a kasən ya, ala ana makaaɓin a beri, sha ana ndə a zlap, iŋgaya: «Huni ɗa ghwaɗeɗe a guɗaŋ tiwtiw səku,» iy.
12A diwzha ndə, a banatana ŋgas ta aagi bəza ya, pa Yesu a zhin rəkuts tə aka ata zlikusəm, a ndaha aka a ndza tə ata la zəm wəda, azha a zlapatana, iŋgaya: «Huni tazlima səkən ndə sa ɗalahuni azha vəw? 13Huni kayaka, “Masərək səkən” abə “Bay Madagal”, ma kuni, a ɗa gber a heɗe a heɗe, ara ndə a ɗa, sa ana ala watsa. 14Andza sa Bay Madagal zhana Masərək səkən, sa tabanahuni ŋgas kuni aagi bəza, huni yəm, səy huni abanatana ŋgas ataa ndiɓi aagi yəm a taba kuni. 15Sa taghalahuni ɗal tə ka ŋtaɗ, huni yəm, huni ɗalə andza sha. 16Ayəw, sa zlapahuni, a ɗa ŋter: Ala ma ɗal zlən a kadəy madagal tə səku, zhana ala ma zlənhazlən a kadəy ala ma zlənazəs. 17Anawatsə huni sən ka, huni aɓas, andza huni taɗal zlən abə sha kajik. 18Sa zlap ata huni tiwtiw səku, sa kasən həji ndə sa dəmata aagi. Ama ikwa abə a kəliy ana Ɗerewal ma ghwaɗeɗe ndə a zlap: Ala ndə ni kazəm wəda abə sha watsə, tabəw tə ana ala jaga naka. 19Sa kazlapahuni ka anawatsə, tiɗa awli kwagwa a gwarha ana səkən watsa. Ndə a kaanda tə, huni ɗal awa, sa, “A ɗa sa.” 20Ayəw, sa zlapahuni, a ɗa ŋter: kwa vaye ma lamzə ala ndə sa zlənazə, sa tə ana ndə a lamzə. Yəm zhana, kwa vaye ma lamzaka, a lamzə ala ma zlənaka.»
Yesu a kaghal ndə Yahuda a kaaber bəza
(Mat 26.20-25; Mrk 14.17-21; Luk 22.21-23)
21A diwzha ndə Yesu a zlap bəza ikwa, ŋkwaɓ tə tadzəvəɗ tə a guɗaŋ, azha a zlap ŋgəra, iŋgaya: «Sa kazlapahuni, a ɗa ŋter, ala ŋtaguleŋ a taba kuni a aɓin a beraka bəza,» iy. 22Dəba magəli aagi ataŋ la a nja nja, dəba aagi aɗiwi a taba ta aska səkən ala ndə a kazlap a heɗe. 23Ŋtaguleŋ a taba magəli tə aagi, ala ndə Yesu a kamayə, tandza tə ka abəra Yesu. 24Simun Piyer dəba a aŋtiheɗi aska a ɗiwzə ata vaye abə a zlap ma watsa. 25Mbara azha, magəla watsa herik a herik ha gwara a ma ꞌunəf Yesu, iŋgaya: «Bay Madagal, ala tə azha vaya?» iy. 26Yesu zhin a zhinanə, iŋgaya: «Ala ndə sa abə ha naka, teŋ sa teŋ wəda, bahw sa bahwha wiri a heɗe, pa sa vəlanə, a ɗa sha,» iy. Teŋ Yesu a teŋ wəda, azha bahw a bahw wiri a heɗe, pa a vəlanə a Yahuda Iskariyut, mbə ataa Simun. 27A tsutsa azha, ndə a bahwanə wəda bəza, azha Gətili a ndanə ka a ꞌunəf a Yahuda. Yesu zlap a zlapanə, iŋgaya: «Səkən ndə hwa kaaɗalə watsa, ɗalə bəza kahkah,» iy. 28Kwa ala ŋtaguleŋ a taba həji ma ndza a tsutsa aagi, ma zlima a zlapanə ikwa ara veme akas. 29Andza ndə Yahuda, ma kambəla slibi dala, həji ndiɓi aagi deŋ ka ya, Yesu a zlapanə a nda a səkəmha səkən gwaygwaya, aka səku a ɓizhatana səkən a həji titikw aagi. 30Ndə Yahuda a ji wəda watsa bəza, kahkah a nda tə a bəza. Zaɗə taɗal tə.
Wiyə ma ma dzawadzaw
31A diwzha ndə Yahuda a ndaa tə bəza aha bəza, Yesu iŋgaya: «Anawatsə Bizlaf tavəlanə sləf a Mbə həji ma dəgnak, zhana sləf Bizlaf a ndaha gwara ara. 32[Bizlaf a asləfə abə ha tə] azha atama kajik abə a asləfə. 33Wəzhi naka ma fashiɗ aagi, ndza naka abəra huni dagala aka zhana səku. Huni agasaka, azha, sa ghalahuni yəm anawatsə andza ndə sa zlapatana a magulakwakw Yahuda ndiɓi aagi: “La ndə sa, sa kanda a heɗe, huni, huni kaɗa kula nda a tsutsa səku.”
34Sa vəlahuni wiyə ma ma dzawadzaw minja: huni may ha kuni kwa vaye kuni. Andza ndə sa mayahuni, huni may ha kuni kwa vaye kuni. 35Andza huni, huni kamay ha kuni kwa vaye kuni, azha ya, həji tiwtiw aagi asənə ka, huni magəli naka aagi,» iy.
(Mat 26.31-35; Mrk 14.27-31; Luk 22.31-34)
36Simun Piyer ɗiw a ɗiwzə, iŋgaya: «Bay Madagal, hwa anda a vata?» iy. Yesu zhin a zhinanə, iŋgaya: «Hwa kaɗa kula a səbaraka anawatsə ata la ndə sa kanda səku ama galaɓa pish minja abə hwa asəbaraka,» iy. 37Piyer zlap a zlapanə, iŋgaya: «Bay Madagal, ara veme abə sa ŋkula səbarahu bəza anawatsə səku watsa? Sa kula a vəla miɗ naka dawna hwa,» iy. 38Yesu zhin a zhinanə, iŋgaya: «Hwa kaɗa kula a vəla miɗ kwa dawna sa azha vəw? Ayəw, sa ghalahu, a ɗa ŋter: gwamzakw a anda dza wəla, hwa azlap, zhin mahkaɗ hwa kasənakas,» iy.
ទើបបានជ្រើសរើសហើយ៖
Yahwana 13: GOU
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
