Yahwana 11
11
Zhinha Lazarus a jiɓ
1Ala dawər minja aka. Zləm tə Lazarus, a ndza a hayak Baytaniya, hayak ma dzuk ndə tiw Mariyama abə həla mamən Marta aa ndza a mən. 2A ɗa Mariyama wala ma va a bəzanə ꞌurdi ka ata ŋgas Bay Madagal, zhana saɗ a saɗanə bəza abə dzuguɗ ha tə. Lazarus ala ma kadawər watsa a ɗa zliŋgin. 3Hildimi watsa aagi zlən aa zlən ma ata Yesu, aagi iŋgaya: «Bay Madagal, ŋgwanambə kwa ndə hwa kamay a kadawər,» aagiy.
4Ndə Yesu a zlima ma watsa ya, iŋgaya: «Dawər ataa Lazarus watsa a kaagwar a dzə bəza a mcis, ama aska a ghal sləf Bizlaf, gwara ara, zhana abə a tsa sləf ata Mbə Bizlaf yəm,» iy. 5Mbara Yesu a kamay Marta abə həla mamən abə zliŋgin ta Lazarus. 6Mbara azha ndə a kasənə Lazarus a kadawər, tandza zhana wan gbak a tsutsa, 7azha, zlap a zlapatana a magəli tə aagi: «Kiyzaŋkwa a zhin takwa a hayak Yahudiya,» iy. 8Magəli tə aagi zhin aa zhinanə, aagi iŋgaya: «Masərək, slaɓ slaɓ watsə, magulakwakw Yahuda aagi kagasahu a ŋgwafahu abə ŋkəɗaŋ a tsutsa ya, hwa may a zhin a tsutsa zhana vəw?» aagiy. 9Yesu zhin a zhinatana, iŋgaya: «Ata vah ci, ler wam aha gbak aɓa wəra? Andza ala a nda a bishkit meni, ŋtsəɓən a kadzəs, ara ndə a kagəra la a kaweɗ ata manahayak. 10Ama andza ala a nda abə zaɗə, ŋtsəɓən a dzə, ara ndə la ŋkula weɗ atama tə» iy.
11A diwzha ndə a zlap ma watsə bəza ikwa, zhana iŋgaya: «Ŋgwanambə takwa Lazarus tawan tə, ama sa anda a fəɗah ka,» iy. 12Magəli tə aagi, zlap aa zlapanə, aagi iŋgaya: «Bay Madagal, andza a wan tə ci, a ambəl tə,» aagiy. 13Arə ndə Yesu a may a zlap ata mci ataa Lazarus, ama ataa aŋta, aa deŋ ka ci, Yesu a zlap ata ŋter wan. 14Mbara azha, Yesu zlap a zlapatana a heɗe a heɗe, iŋgaya: «Lazarus tamca tə, 15azha, sa kaɓas dawna huni ndə sa ŋkula a ndza a tsutsa, ikwa ci, huni aɗalaka awa. Ama kiyzaŋkwa ara,» iy. 16Mbara azha, Tumas ala ndə həji kayə Ŋhul, zlap a zlapatana a magəli ndiɓi aagi, iŋgaya: «Kiyzaŋkwa yəm a tsutsa, a həji a nda mcaŋkwa tiwtiw abə sha!» iy.
17Tiɗa ndə Yesu a ɗa gwar, a zlima Lazarus takahaya a ɗal bəza wan ŋfaɗ a jiɓ. 18Ndza ndə Baytaniya huk abəra Wərusalima, walaŋ a taba ta slaɓ abə kilumeter mahkaɗ. 19Vərəm ana Yahuda aagi taha ara tiw Marta abə Mariyama a zlapzatana ata mci zliŋgin ta Lazarus. 20Ndə Marta a zlima Yesu a kandaha ya, tsaw a nda ara, aska aagi lima abə sha, tiɗa Mariyama ana aŋtə, a wata a kandza. 21Marta zlap a zlapanə a Yesu, iŋgaya: «Bay Madagal, andza hwa taɗa a ɗi avəli ci, zlina a kaamca səku. 22Ama kwa anawatsə, sa kasənə, kala səkən ndə hwa kaaɗiw ara Bizlaf, Bizlaf a aɓin a vəlahu.» 23Yesu zlap a zlapanə, iŋgaya: «Zlinahw a agara tə a wəzəm a jiɓ,» iy. 24Zhin a zhinanə ana Marta, iŋgaya: «Ayəw, sa kasən ci, a aɓin a gara tə a wəzəm vah ta zhinha həji ma bazl ta aagi a bəza a jiɓ, vah ta kəɗaŋ manahayak,» iy. 25Yesu zlap a zlapanə, iŋgaya: «Sa ana garha a wəzəm a jiɓ, sa ana miɗ. Ala ma ɗalaka awa, kwa andza tamca tə, a andza abə nja; 26azha kala ala ma ndza abə nja, taɗalaka awa, a kaamca kwa vepiy akas. Hwa taɗal awa aska vəw?» iy. 27Marta i kəsha iŋgaya: «Ayəw Bay Madagal, sa taɗal awa hwa ana Kərist, Mbə Bizlaf, ala ma kaandaha a manahayak,» iy. 28A diwzha zlap watsa aagi, Marta tsaa kanda tə a yaha həla mamən Mariyama, azha dəba a ahahashanə hahash, iŋgaya: «Masərək a ɗi, a kayahu,» iy. 29Ndə Mariyama a zlima ma watsa, takaw a gar tə a wəzəm kahkah a ndaha ara Yesu. 30Mbara azha, Yesu tanaka a gwar kwagwa a hayak ma dzuk səku, ama ndza tə wəruk ata la ndə Marta a gəra a tsutsa watsa. 31Ndə Yahuda ma ndaha a zlapzatana a tiw Mariyama aagi, ndə aa gəra, a gara tə a wəzəm kahkah a jak ya, dəba aagi asəbarə. Deŋ ta ci, a nda han a ma jiɓ. 32Ndə Mariyama a ɗa gwar ata la ndə Yesu a tsutsa, ndə nja tə a ɗa mgbəf a heɗe, ɓərah a fak ha tə ka aska ŋgas tə, a zlapanə, iŋgaya: «Bay Madagal, andza hwa taɗa a ɗi ci, zlina a kaagwar a mca səku,» iy. 33Yesu a gəra a kadza ha ka ata lahan, kwa Yahuda ma lahzə aagi kadza ha yəm, a tsutsa ŋkwaɓ tə tawərəzl tə, tandərimanə bəza, 34azha a ɗiwzata, iŋgaya: «Huni kahə a vata?» iy. Zhin aa zhinanə, aagi iŋgaya: «Bay Madagal, ndaha a sarzə ma,» aagiy. 35Azha Yesu dəba a ahan. 36Yahudiya aagi azha, aagi iŋgaya: «Huni taŋzə abə a kamayə azha ma!» aagiy. 37Ama ndiɓi a taba ta zhana, aagi iŋgaya: «Sha ana ma dəɗ nja ala wələf, kula yəm a tak mci ma ndaha a dza Lazarus səku azha vəw?» aagiy. 38Azha ŋkwaɓ Yesu taghərganay tə zhana wəruk, peteŋ a ma jiɓ. Jiɓ tə ya, bədəm ndə mabaleleŋ a ɗa bay geŋ. 39Azha Yesu zlap a zlap, iŋgaya: «Huni pələmha mabaleleŋ a bəza,» iy. Marta zliŋgina mci watsa, iŋgaya: «Bay Madagal, kwa vaŋgəy a kanji tiw, ara ndə taɗal bəza wan ŋfaɗ a jiɓ,» iy. 40Ama Yesu i kəsha iŋgaya: «Sa tazlapahu, andza hwa taɗal awa, hwa agəra sləf Bizlaf səy wəra?» iy. 41Pələm aa pələmha mabaleleŋ bəza. Azha Yesu kaf i nja a wəzlaf, iŋgaya: «Vava, sa kaɗalahu wasiy dawna ndə hwa kateh tarha naka. 42Sa kasən ŋter meni, hwa kateh tarha naka kwa vepiy, ama sa zlap ma watsə, dawna həji ma dzəsl aska sa watsə aagi, aska aagi a ɗal awa ci, hwa ma zlənaka,» iy. 43A diwzha ndə a zlap bəza ikwa, dəba a azlap abə ɓərɓər tə, iŋgaya: «Lazarus, nda kwa a bəza!» iy. 44Azha, Lazarus ma mca tə, tsaw a ndaa bəza aha bəza, ŋgas tə abə ra tə aagi tacaɗaya abə patak, wənək tə tapaɗaya. Yesu azha, iŋgaya: «Huni pəlanə bəza, huni mbasl ka manda,» iy.
Riy ma ndza ata mbəla Yesu
(Mat 26.1-5; Mrk 14.1-2; Luk 22.1-2)
45Vərəm ana Yahuda aagi a taba ma ndaha ara Mariyama aagi, ana ma gəra səkən ndə Yesu a kaɗalə, dəba aagi aɗalanə awa. 46Ama ndiɓi aagi a taba ta, aa tsaa kanda ara Farisa aagi, aa ghalatana səkən ndə Yesu a ɗalə. 47Mbara azha, magulakwakw maɗal kwakus aagi abə Farisa aagi dzam aa dzam aka dagala, aagi iŋgaya: «Həji ɗalzə avaŋga? Ala watsə a kaɗal tsaɓan aka dəy a guɗaŋ. 48Andza həji tambasl ka a ɗalə ikwa meni, həji aagi tiwtiw aagi aɗalanə awa, azha həji ma ndza aha hayak Ruma aagi aɗa səɗakw a ma tə, zhana aagi aghurəmaŋkwa jak kwakus aka abə hayak takwa,» aagiy. 49Ala minja aka ŋtaguleŋ a taba ta, zləm tə, Kayafas ma ɗa madagal ata va watsa a taba maɗal kwakus aagi, iŋgaya: «Huni kazlima səkən ma kapew kwa akas! 50Huni kagəra ya, galaɓa ala ŋtaguleŋ mamcaɓa mavəy həji aagi ndə həji tiwtiw aa kaabazl ta, zhana aha ndə hayak tiwtiw a kaghurəm tə wəra?» iy. 51A zlap ma watsa ata ha təs, ama ndə a ɗa madagal maɗal kwakus ata va watsa. Sha ana ndə a kaɗafə ci, Yesu a amca dawna manahayak Yahuda aagi tiwtiw. 52Gagagha dawna həji ma ndza a hayak watsa aagis, ama zhana aska a dzəv wəzhi Bizlaf ma wiɗ ta aagi ka ata la ma ŋtaguleŋ. 53A ꞌwa aka ata vah watsa, abə magulakwakw Yahuda aagi, aa gar bəza a dza Yesu aka a mci. 54Ataa Yesu ya, mbasl a mbasl ciwir aka ata nja magulakwakw Yahuda aagi. Sha ana ndə a nda tə vah watsa a hayak ma huk abəra dərzləm, a hayak ma dzamadzam ndə həji kayə Efərayim, azha ka aa ndza ta ka a tsutsa abə magəli tə aagi.
55Vah ta kwaf la gwaygwaya ataa Yahuda aagi, ma ɗa Paska, həji aagi vərəm a hayak watsa, ana ma taf a Wərusalima aska a nda banha dadawər bəza. 56Aa kagas Yesu, azha aa kazlap a taba ta a jak kwakus, aagi iŋgaya: «Deŋ kuni avaŋga? A kadzaha ŋgas tə a gwaygwaya watsə tep akas!» 57Magulakwakw maɗal kwakus aagi abə Farisa aagi tagar ka ci, andza ala a kasən la ndə Yesu a heɗe, maghal aska həji anda mbəlazə.
ទើបបានជ្រើសរើសហើយ៖
Yahwana 11: GOU
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
