Markus 16
16
Lagwarzamha Yesu aza ata lamac
1Aya, a dəwze pes ma ata zazak wese ca, Marəyama ma ŋ Magdala, Marəyama man Yakuba, leŋ Salawme, əy səkamha mel ma kenjef feŋfeŋ, ndar əy nda ŋ kwecene ata mce Yesu. 2A pes luma buwal, beŋ mala mapat, maa pes a kadamha ca, əy nda a ma jeɓ. 3Əy zlap ŋ taba tata, əy ŋgaya: «Ma kanatatəŋgwalazaheje beleler ma dakal ma a ma jeɓ anta ka vayay?» 4Cemey, beleler anta ca, mbəy dakala mambaza. Aya, kəɗe əy sar la ca, beleler anta kétetəŋgweleye aza. 5Aya, əy dam ŋ jeɓ anta, əy ndewzene a mba darlaŋw wende kénjeye kəɗa ata kəva ra zam, rəgwac ma ata kusam anta ca, cap, pepeɗek. A təwse ca, əy kálalak tata.
6Cemey, mba darlaŋw wese, a zlepetene, a ŋgaya: «Hune lalak səkwaw, hune mpam Yesu ɗala Nasaratu maa əy dar ka ata mpe gafaŋgal, kágwarzamha aza ata lamac, mbəy ete ŋghe, askwaw. Hune sarza la maa əy wanza may. 7Na ŋgha ca, hune nda, ŋ zlepetene, ŋ madarlaŋw anta ege leŋ ŋ Pəyer ca, a nanda mpar aha hune ŋ Galəyləy, hune negəre a təwse ana maa a zlapahune.» 8A təwse ca, əy damha aza ŋ jeɓ wese, əy hey tata, əy yakza jeɓ aka, əy kanana mavəday əy kálalak tata mambaza. Aya, əy kézlepene ma anta ŋ kaw vayay, səkwaw, mavəday əy kalalak.
Yesu a ghwelene kusam ŋ Marəyama ma ŋ Magdala
9A pes luma buwal, beŋ mala mapat, a dəwze maa Yesu kágwarzamha aza ata lamac ca, a ghwelene kusam mpar ca, ŋ Marəyama ma ŋ Magdala. Wala anta ca, Yesu kágamata zəwet malula ege aza ŋsəleɗ ŋ mbe. 10Aya, a nda, a ghwelzetene ŋ hejəye maa əy njaha tewtew a mbe ege, a ndewzetene ca, əy kejejekw, əy kahan. 11Cemey, maa əy zləme Marəyama a zlepetene, a ŋgaya: «Yesu mbəy a nje, sa kégəre!» wese ca, əy kalamza ma anta səkwaw.
Yesu a ghwelzetene kusam ŋ madarlaŋw anta ege gbak
12A dəwze anta, maa əy kanda ata taf kəɗa ŋ uzam ca, Yesu a ghwelzetene kusam parpar a ma ŋcəne anta ŋ madarlaŋw anta ma gbak ege. 13Aya, əy zenha aza, əy ghwelzetene ŋ madarlawŋ ege vedəye, cemey, kaw əy kalamza səkwaw war.
Yesu a ghwelzetene kusam ŋ madarlaŋw anta ege ma wam aha teŋguleŋ
14A dəwze anta ca, Yesu a ghwelzetene kusam ŋ madarlaŋw anta ma wam aha teŋguleŋ ege, maa əy kazam uda. Aya, a gulakzata, mavəday lalam tata, askwaw. A gulakzata zeney, mavəday unaf tata ege ɓarɓar, əy kálamza ma mala hejəye ma gəre ege, a dəwze maa kágwarzamha aza ata lamac, askwaw. 15A təwse ca, a zlepetene, a ŋgaya: «Hune nda ŋ manhayak tewtew, hune ghwelzene Ma Mewe ma Taŋtaŋ ŋ kaw vayay 16Ɗala ma lamza aza, ma lem laban aza a yam baptəysma ca, a nereh. Cemey, ɗala ma lamza səkwaw ca, guma a nambalaw.» 17Ŋghe səkan ma kanaghwalzata hejəye ma lamza ma naka aza ege. Əy nagamata zəwet malula ege aza, a zlam naka, əy nazlap a ma mewe ege, 18əy nambal zezekw ege a ra tata, kaw əy sa menjevek ma kajahəje ca, kaw səkan wende a keneletene, askwaw, əy naca ra ata hejəye ma kadawar ege, əy nerehzata aza. 19A dəwze maa Bay Madakal Yesu a zlepetene aza ana ebe ŋghe ca, a tev anta mgba ata uzlaf, a nja ka ata ra zam mala Gazlavay. 20A dəwze anta ca, madarlaŋw anta ege, əy nda ŋ ghwalza Ma Mewe ma Taŋtaŋ, kaw a katay. Bay Madakal a kecekzetene ata lala zlan anta, a kalamza laghwal zlap tata ka ta ŋ zaɓəla ege maa əy kalata.
ទើបបានជ្រើសរើសហើយ៖
Markus 16: BHS
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2025 CABTAL