Markus 15
15
Yesu mbəy a tama Pəylatu
1Mala mapat beŋ ca, madakal dakal mala kwakwas ege, əy jav a madakal dakal ma a tama ege ey maghwal ma maŋkanaŋkan ege leŋ Lajav ma dakal ma ata ja guma ege tewtew ŋ zenza zlap. Əy ŋkan Yesu, əy jeɓza, əy valza ka asa ra Pəylatu. 2Pəylatu, a ɗawza Yesu, a ŋgaya: «Hwa ca, hwa bay mala Yahudu ege vaw?» Yesu a zenene, a ŋgaya: «Ana maa hwa zlap.» 3Madakal dakal mala kwakwas ege, əy ŋkəɗaw Yesu ca, ata ma ege vedəye vəram. 4A təwse ca, Pəylatu a ɗawza zeney, a ŋgaya: «Kaw hwa kezenetene zlap, askwaw vaw? Hwa kezləme maa əy kaŋkəɗawahwaw ata ma ege vedəye vəram ŋghe, səkwaw vaw?» 5Cemey, kaw Yesu kézenene zlap, askwaw, ha Pəylatu anta ŋga ŋkwaɓ.
6Mada gwaygwaya Paska mala Yahudu ege, a kaja tew ca, a kepeletene ɗala teŋguleŋ ma a ujek daŋgay aka. Əy peletene ca, ɗala maa hejəye əy kaɗawaw. 7Cemey, heje wende aka, maa əy kayaɓa Barabas, mbəy a ujek daŋgay zlaɓa hejəye vedəye maa əy ja ɗala ata lambaw ma ege. 8Aya, hejəye vəram əy nda, əy ɗawza Pəylatu ŋ letene səkan ana maa a keletene a mpat a mpat.
9Pəylatu a zenetene, a ŋgaya: «Hune ɗaw ca, sa palahune bay Yahudu ege, vaw?» 10Mavəday a gəre ca, madakal dakal mala kwakwas ege əy valza Yesu ca, ata sərah. 11Cemey, madakal dakal mala kwakwas ege wese, əy ŋcakwzata hejəye ŋ zlepene ŋ Pəylatu ca, mepeletene Barabas aka. 12Pəylatu a zlap zeney, a ŋgaya: «Ca, hune ɗaw sa lene ŋ heje maa hune kayaɓa bay mala Yahudu ege ca, vemey?» 13Əy zen ŋ ja ula, a mazlazlay, əy ŋgaya: «Dar ka ata mpe gafaŋgal!» 14Pəylatu a ɗawzata, a ŋgaya: «A laha gay vekey?» Aya, əy vas ŋ ja ula, a mazlazlay, əy ŋgaya: «Dar ka ata mpe gafaŋgal!»
15Pəylatu a ɗaw ŋ sasamzata hejəye, mavəday anta, a peletene Barabas aka. Aya, a dəwze maa káŋtaw Yesu aza ca, a veletene ŋ sawje anta ege, ŋ dar ka ata mpe gafaŋgal.
Sawje ege əy ɓas ata Yesu
16Sawje ege əy jeɓza Yesu ata varvara ge mala wata bay Pəylatu. A təwse ca, əy yahata sawje ege vedəye tewtew. 17Əy cene rəgwac ma vəre ma cap mala bay ege ata kusam. Əy ja patak mala jəkeɗ, əy cene ata ha. 18Aya, əy zlepzene, əy ŋgaya: «Nene kazlapzahwaw, bay mala Yahudu ege.» 19A təwse ca, əy gazlaw, a ŋkem ŋ ha, əy ŋtefene mejəkəne ata kusam, əy gəleɓene ka a tama, əy həmanza. 20A dəwze maa əy káɓas aza a heɗe ca, əy cekwene rəgwac ma vəre ma cap ma ata kusam wese aza, əy cene rəgwac anta ege. Əy jeɓza a bəza ŋ daraza aka ata mpe gafaŋgal.
Sawje ege əy dar Yesu ka ata mpe gafaŋgal
21Heje wende aka, zlam anta Səymawn, ɗala ma ŋ Səyrene, cen ata Aleksandəyre ey Rufus, a ndaha aka a damaw, əy ŋgel ma. A təwse ca, əy cene mpe gafaŋgal ata gwaya ŋ tewew. 22Əy jeɓza Yesu ata la maa əy kayaɓa Gwalgwata, ana zlap ca, «La kerŋgesl ha.» 23Aya, əy ɗaw ŋ velene mavaw makəvaɗakəvaɗ a dama məyr, cemey, a kalamza ŋ sa səkwaw. 24A təwse ca, əy dar ka ata mpe gafaŋgal. A dəwze anta, əy ɓez rəgwac anta ege aza, a laja caca, ŋ san maa kaw vayay a kenelemew. 25Əy dar ata mpe gafaŋgal ca, ata ler jafaɗ mala mapat. 26Ma maa əy ja Yesu a heɗe wese ca, əy kéŋter ka ata mpe, əy ŋgaya: «Bay mala Yahudu ege.» 27Əy kádarata ŋhel ege ka gbak ata mpe gafaŋgal ege a həzlar Yesu wese yam, wende ata kəva ra zam anta, wende yam, ata kəva ra gula anta. [28Ana ebe ŋghe, səkan anta kála anta, ana maa kéŋtereye ŋ Ɗerewel ma keweɗ, a ŋgaya: «Əy káŋgaɗ ara, ŋ taba hejəye dadawar ege.»] 29Hejəye ma kanda ta a təwse ege, əy gaŋgazl ha, əy raɓa, əy ŋgaya: «Hey! Hwa ya: Hwa naghwaramza ujek kwakwas aza, hwa nezen ŋ lam ka ata wan mahkaɗ anta! 30Ca, tadakwha aza ata mpe gafaŋgal, rehza ha ŋkwa aza, eze.»
31A zeney, madakal dakal mala kwakwas ege leŋ maghwal ma maŋkanaŋkan ege, əy ɓas ata Yesu, əy zlap ŋ taba tata, əy ŋgaya: «Kérehzata hejəye vedəye aza, ca mbəy kula ŋ rehza ha anta aza, səkwaw vaw? 32Mada mbe, ara Almasəyhu, Bay mala Əysərayəyla ege ca, matadakwha aza ata mpe gafaŋgal na ŋgha, ndar nene gəre, aya, nene lamza.» Hejəye madaradar ata mpe gafaŋgal ege a həzlar Yesu wese, əy raɓa yam.
Lamac Yesu
33A pes wereywerey ca, kuzle a jaɓ ata hayak tewtew ha hwas ata ler mahkaɗ mala mackwahw. 34Ata ler mahkaɗ wese ca, Yesu a ja ula a mazlazlay, a ŋgaya: «Elawhəy, Elawhəy, lema sabaktanəy?» Ana zlap ca: «Gazlavay naka, Gazlavay naka, hwa yekzekey ka ŋ vay?» 35Hejəye vedəye ma a təwse ege, əy kézləme laja ula anta, əy ŋgaya: «Ŋghe, a kayaɓa Eləya.» 36Ɗala teŋguleŋ ŋ taba tata, a hey kəcaŋ, a təkaɗ maslaga ata ŋkem, a cughwaɓaw ŋ yam mba mpe ma kwəycacaŋ, a velene ŋ saw, a ŋgaya: «Ŋ həbarakwaw, heje negəre, ketegəre Eləya a nandaha ŋ tadakwaza aza ka vaw?»
37Cemey, Yesu a ja ula a mazlazlay zeney, aya, a mac anta. 38A təwse ca, jakar ma ŋ ujek kwakwas, a slah anta, a ŋtez aka ŋ gbak, mbal aka mgba hwas, ata hayak.
39A təwse ca, madakal sawje ma ata ha sawje Rawma ege temere magaragar a tama anta, maa gəre maa Yesu a mac ca, a zlap, a ŋgaya: «Njenjəwen, heje ŋghe ca, ara Mba Gazlavay.» 40Weləye vedəye a təwse aka yam, əy kasarza səkan anta ma kala ata gədak. Ŋ taba weləye anta ege ca, ata Marəyama ma ŋ Magdala, Marəyama man ata Yakuba ma pəzekw ey Yawses leŋ Salawme. 41Weləye anta ege ca, ara ma səbaraza Yesu ara ŋ hayak Galəyləy, ara tata ma kelene zlan a ata vah maa mbəy ŋ hayak Galəyləy, weləye vedəye vəram yam, əy ndaha aka ata Yesu ŋ Urusaləyma.
Lampas Yesu
42A təwse ca, Mackwahw kála anta tew, ara pes ma ata sla, ana zlap ca, a mapat anta ca, ara pes ma ata zazak. 43Aya, heje wende aka, zlam anta Yusufu, ɗala ma ŋ hayak Arəymatəya, ɗala ma kadak ma ata Lajav ma dakal ma ata ja guma, a ndaha. Mbe yam, a kahəbar Lazam bay mala Gazlavay. A mbal unaf, a nda ara Pəylatu, a ɗawza mce Yesu. 44A təwse ca, ŋkwaɓ kéŋgene aza ŋ Pəylatu mavəday maa a zləme kámac anta kəcaŋ. Aya, a yaɓa madakal sawje Rawma ege, a ɗawza, a ŋgaya: «A mac ca, walaŋ anta aka vaw?» 45A dəwze maa madakal sawje ege wese a ghwelzene ma anta ca, a pelzene taf ŋ Yusufu ŋ ŋta mce Yesu anta.
46Aya, Yusufu a səkamha rəgwac ma pepeɗek, a tadakwa aza mce anta. A təwse ca, a mbahw ka a rəgwac wese, a jeɓza ŋ jeɓ marara ŋ kefe. A dəwze anta ca, a tatəŋgwalha beleler ma dakal, a mpak ma jeɓ anta aka a mbe. 47Ata Marəyama ma ŋ Magdala ey Marəyama man Yawses, əy kasarza la maa əy kawanza Yesu a təwse.
ទើបបានជ្រើសរើសហើយ៖
Markus 15: BHS
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2025 CABTAL