Markus 11
11
Yesu a dam ŋ Urusaləyma
1Maa əy slaɓ ŋ hwas ŋ Urusaləyma mbermber ŋ uzam Baytəyfajəy ey Baytanəya a ma barla Mpe Jaytun ca, Yesu a laɓzata madarlaŋw anta ege gbak ŋ taba madarlaŋw anta ege, 2a zlepetene, a ŋgaya: «Hune nda ŋ uzam ma a tama ŋkune ŋghe. Mada hune hwas a təwse ca, hune nendewzene a mba berjeŋ kéjeweye kaw ɗala kánja a heɗe kwagwa, askwaw. Hune palaza, hune daza. 3Aya, mada ɗala a ɗawzahune, a ŋgaya: “Hune la ana ebe ŋghe ŋ vay, ca?” hune zenzene, huney: “Ara Bay Madakal ma kaɗawaw, a nezenaza ka ata la ŋgha na na ŋgha”.»
4Aya, əy nda, əy ndewzene a mba berjeŋ kéjeweye a bəza, mbermber a ma ujek wende aka ata taf. Aya, əy palaza. 5Hejəye vedəye ma a təwse ege, əy zlepetene, əy ŋgaya: «Hune pal mba berjeŋ anta ca, ŋ vay?» 6Əy zenetene ana maa Yesu a zlepetene wese, aya, əy pelzetene ma, əy nda. 7Əy daza mba berjeŋ wese ara Yesu. Əy bəlek rəgwac tata ege aka a heɗe, aya, Yesu a nja a heɗe. 8Hejəye vəram, əy kébəlek rəgwac tata ege aka ata taf, aya, vedəye, əy bawha vejeɗ mpe ma ndendeɓek ŋ la ege, əy bəlekew. 9Hejəye ma kanda a tama ege ey hejəye ma kasəbar ege, əy kaja ula ara, əy ŋgaya: «Awzana! Bəzla manja ata heje ma ndaha a zlam mala Gazlavay Madakal. 10Bəzla manja ata bay ma kandaha, bay mala Dawuda, vana ŋtakwaw. Awzana ŋ Gazlavay ma a mgba ata uzlaf.» 11Aya, Yesu a dam ŋ Urusaləyma, a nda ŋ ujek kwakwas. A dəwze maa a sarzata səkan ma a ujek kwakwas wese ege aza tewtew ca, tel a nda anta zlaɓa madarlaŋw anta ege wam aha gbak ŋ Baytanəya, mavəday mackwahw tew.
Yesu a gayza səke aka
12Aya, a mpat anta, a dəwze maa əy káyakza Baytanəya aka ca, metes a ja Yesu. 13A təwse ca, a gəre səke wende aka ata gədak, vejeɗ kéjeye a heɗe mambaza. A nda ŋ sarza ketegəre a nendew mba a heɗe aka ka vaw. Cemey, maa a nda mbermber ara mpe anta ca, a ndew ca, vejeɗ gagaha, mavəday, ara ŋtəra maa səke ege əy kambaw, səkwaw. 14Aya, Yesu a zlepene ŋ səke wese, a ŋgaya: «Kaw ɗala a ɗaw ŋ zam səke ata hwa səkwaw kaw vepey.» A təwse ca, madarlaŋw anta ege, əy kézləme ma maa a zlap anta aza.
Yesu mbəy a ujek kwakwas
15Maa əy hwas ŋ Urusaləyma ca, Yesu a dam ŋ ujek kwakwas, a gamata hejəye ma kasəkam səkan ege ey hejəye ma kasəkamha səkan ege ma ŋ ujek kwakwas aza. A jaɓata tabəla ege mala hejəye ma kambaɗ səlay ege leŋ lanja mala hejəye ma kesəkemetene məyɗanak ege ŋ hejəye. 16Cemey, kaw káyakza ɗala teŋguleŋ ŋ damha aza a bəza zlaɓa səkan ma asa ra anta ŋ ujek kwakwas ca, askwaw. 17A dəwze anta ca, a sasərakzata hejəye, a zlepetene a ŋgaya: «Kéŋtereye ŋ Ɗerewel ma keweɗ ende ŋghe: “Ujek naka ca, ara ujek maa hejəye ma ŋ manhayak ege tewtew əy nerekekey ŋma. Cemey, hune kábawza aza ŋ bədam masulah ege”.» 18Madakal dakal mala kwakwas ege ey maghwal ma maŋkanaŋkan ege, əy zləme səkan ma laha anta. A təwse ca, əy mpam taf ma ata ja Yesu aza, cemey, əy kalalak a heɗe mavəday, lasasərak anta ca, a kendəremzetene ŋ hejəye tewtew. 19Maa mackwahw a jaɓha aza ca, Yesu ey madarlaŋw anta ege əy dam aza a uzam.
Yesu ey səke maŋhwalaŋhwal
20Mpat anta mala mapat, maa əy kanda ca, əy gəre səke wese, káŋhwal anta calah ata slaslalay anta ege. 21Pəyer a senzene, a zlepene ŋ Yesu, a ŋgaya: «Masasərak ŋcene, sarza səke maa hwa gayza aka wese, káŋhwal anta tewtew.» 22Aya, a zenetene, a ŋgaya: «Hune lamza Gazlavay. 23Sa kazlapahune, njenjəwen, mada ɗala a zlepene ŋ barla ŋgha: “Kese aza ata la ŋgha, nah ŋkwa ŋ ŋtele”, mada heje anta kédeŋ ŋkwaɓ gbak gbak askwaw, cemey mada kálamza səkan maa a zlap mala wese aza ca, səkan anta a nala. 24Mavəday anta, sa kazlapahune, səkan ege tewtew maa hune kaɗawza a larak ca, hune san ka, hune kélem aza, Gazlavay a navalahune. 25Aya, mada hune kégereye ŋ rak Gazlavay, mada səkan ŋ taba ŋkune a ɗala aka ca, hune pelzene gay anta aka, ndar cehw ŋkune ma mgba ata uzlaf a palzahune gay ŋkune ege aka yam. 26[Cemey, mada hune kepelzetene gay mala hejəye ma lahune dadawar ege aka askwaw ca, Cehw ŋkune, ma mgba ata uzlaf a kanapalzahune gay ŋkune ege aka, askwaw yam.]»
Ɓardakw Yesu a ndaha aka ca, a katay?
27Əy zenha aza ŋ Urusaləyma. Aya, maa Yesu a katawar ŋ ujek kwakwas ca, madakal dakal mala kwakwas ege, maghwal ma maŋkanaŋkan ege leŋ madakal dakal ma a tama Yahudu ege, əy ndaha ara mbe. 28Əy ɗawza, əy ŋgaya: «Ma zlapahwaw ŋ lata səkan ŋghe anta ege ca, vayay? Ma valahwaw taf ŋ lata ca, vayay?» 29Yesu a zenetene, a ŋgaya: «Sa naɗawzahune səkan teŋguleŋ, mada hune zenekey aza ca, sa nazlapahune, sa lata səkan ŋgha anta ege ca, a ɓardakw vekey. 30Ma laɓaza Yuhana ŋ banata hejəye a yam baptəysma ca, vayay? Gazlavay vaw, hejəye vaw? Hune zenekey.» 31Aya, əy zen zlap ŋ taba tata, əy ŋgaya: «Mada heje zlepene ara Gazlavay ma laɓaza, a nazlap: “Ca, hune lamza səkwaw ca, ŋ vay?” 32Mada heje zlap, hejey: “Ara hejəye ma laɓaza ca.”» Əy kalalak ata hejəye mavəday, hejəye tewtew əy deŋza ca, Yuhana ca, ara mba ma zlap ma mala Gazlavay njenjəwen. 33Aya, əy zenene ŋ Yesu, əy ŋgaya: «Nene kasan səkwaw.» Aya, Yesu a zenetene, a ŋgaya: «Sa yam, sa kanazlapahune, sa lata səkan ŋghe anta ege a ɓardakw vekey ca, askwaw.»
ទើបបានជ្រើសរើសហើយ៖
Markus 11: BHS
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2025 CABTAL