Luka 10
10
Yesu a laɓzata madarlaŋw anta ege reŋsəleɗ aha gbak
1A dəwze anta ca, Bay Madakal Yesu, a may madarlaŋw ege vedəye reŋsəleɗ aha gbak. A laɓzata gbak gbak a tama anta ŋ uzam ege tewtew leŋ ŋ kəva ege tewtew maa mbe a ha anta a nanda ŋma yam. 2A təwse ca, a zlepetene, a ŋgaya: «Səkan kála dakala ŋ la, cemey, hejəye parham ŋ pet səkan anta. Hune jene mbahw ŋ heje la anta malaɓaha hejəye mala zlan ege zeney, ŋ pet səkan anta. 3Ana ebe ŋghe, hune nda! Sa laɓzahune ana uzəye ŋtəməye ŋ taba menjernjer ege. 4Hune ɗaw ŋ ŋta kaw səlay ara asa ra səkwaw, kaw bakatar ara səkwaw, kaw ŋte ara səkwaw. Mada hune kanda ata taf cemey, hune ɗaw ŋ deŋ ŋ zlepzetene ŋ hejəye səkwaw.»
5«Mada hune kadam a wata ɗala kaw vekey ca, hune zlap aza kwagwa: “Zəhay manja ata ge ŋghe.” 6Mada ɗala a kaɗaw ŋ lem zəhay a wata anta ca, zəhay ŋkune a nanja ata heje anta, mada ɗala a kaɗaw zəhay anta səkwaw ca, zəhay anta a nezenha aza ata hune. 7Mada heje ujek anta kálamzahune aza a wata anta ca, hune nja ka a təwse, hune zam səkan, hune sa səkan maa əy kavalahune, mavəday ɗala mala zlan ca, laŋtar gef anta ca, aka. Hune ɗaw ŋ nda ata ujek, ata ujek səkwaw.»
8«Mada hune nda ŋ uzam kaw vekey, hejəye ma a təwse ege əy kálamzahune aza ca, hune zam səkan maa əy kanavalahune. 9Hune rehzata hejəye ma kadawar ege a təwse, hune zlepetene ŋ hejəye tewtew cemey: “Lazam bay mala Gazlavay kándaha aza hwas ara hune!” 10Cemey, mada hune nda ŋ uzam kaw vekey maa hejəye əy kalamzahune səkwaw ca, hune nda ŋ hubakw ma a təwse, hune zlepetene ca: 11“Kaw berdeberde mala uzam ŋkune ma ata ŋgas ŋcene ege ca, nene ŋtawahune aka ndar ŋ ghwalza ca, hune kála səkan ma kadak səkwaw! Cemey, hune san ka kadak kadak, Lazam bay mala Gazlavay kándaha aza hwas ara hune.”» 12Aya, Yesu a zlap zeney, a ŋgaya: «Njenjəwen, a pes laja guma cemey, guma mala uzam anta a nala pa ŋ ma dadawar aha guma mala uzam Sawdawma.»
Hejəye ma ŋ uzam ege ma kaɗaw ŋ lamza ma mala Gazlavay səkwaw
13Aya, Yesu a zlap, a ŋgaya: «Hune hejəye ma ŋ uzam Kwarajəyŋ ege, dadawar a nendewzahune! Hune hejəye ma ŋ uzam Baytəysayda ege, dadawar a nendewzahune! Mada keɗe zaɓəla ege maa Gazlavay a lata ŋ taba ŋkune ŋghe ege, əy la ŋ uzam Təyrus ey ŋ uzam Səydaŋw ca, hejəye ma a təwse ege, əy nabawza lanja tata ege aza zlezle, əy naca rəgwac bakatar serek ege ata kusam tata, əy neteteŋgel ŋ wenjek ŋ ghwalza ca, əy kája mbahw aza a tama Gazlavay, əy kábawza unaf tata ege aza. 14Mavəday anta, a pes laja guma ca, Gazlavay a naŋgwavahune day aha ata uzam Təyrus ey uzam Səydaŋw. 15Ca, hune hejəye ma ŋ uzam Kafarnahum ege, hune cakza ca, Gazlavay a nagalzahune mgba ata uzlaf vaw? Kaw askwaw! Hune nanda ata lanja hejəye mamacamac ege.»
16Yesu a zlepetene ŋ madarlaŋw anta ege zeney, a ŋgaya: «Kaw vayay ma tehzahune zlam ata zlap ŋkune ca, a teh ca, zlap naka yam. Kaw vayay ma lamza zlap ŋkune səkwaw ca, a lamza səkwaw ca, zlap naka yam. Kaw vayay ma lamza zlap naka səkwaw ca, a lamza səkwaw ca, zlap a ɗala ma leɓekey.»
Madarlaŋw Yesu ege ma reŋsəleɗ aha gbak wese, əy zenha aka ata laghwal zlap mala Gazlavay
17Aya, maa madarlaŋw Yesu ma reŋsəleɗ aha gbak ege wese, əy zenha aza ca, əy kasasam dakala, əy zlepene ŋ Yesu, əy ŋgaya: «Bay Madakal, maa nene kazlap a zlam ŋkwa ca, kaw zəwet malula ege yam, əy ketehzeney zlam.» 18A təwse ca, a zenetene, a ŋgaya: «Sa kégəre Sayɗanu#10.18 Sayɗanu a ma pəysar ca, ara malula, a ma nasara yam ca, Satan. Ana zlap ca, ara zlam anta ma dakal., a ndavha aka mgba ata uzlaf ana van ma kazam. 19Hune teh zlam kadak kadak ata zlap ŋgha. Sa kavalahune ɓardakw ŋ dak ŋgas ata zezekw ege ey reje ege leŋ ata ɓardakw Sayɗanu tewtew, ma kaɗaw ŋ gərehune ata nje səkwaw. Kaw səkan wende a kanalahune askwaw. 20Hune ɗaw ŋ sasam, mavəday maa zəwet malula ege əy ketehzahune zlam səkwaw, cemey, hune sasam, mavəday maa zlam ŋkune ege əy kéŋtereye mgba ata uzlaf.»
Yesu a kasasam
21A təwse ca, Zəwet ma keweɗ, a velene sasam dakala ŋ Yesu, a həmanza Gazlavay, a ŋgaya: «Vana, Bay Madakal, la ma mgba ata uzlaf ey la ma ata hayak tewtew mala ŋkwa. Sa kalahwaw wasay mavəday hwa kéghwelzetene taŋtaŋ ŋkwa ŋ hejəye ma kasan səkan səkwaw ege ana uzəye veɗekw ege. Cemey, ŋ hejəye kəleŋ ege ey hejəye ma san səkan ege ca, hwa káɓahza səkan anta ka ata tata. Ayaw, Gazlavay, hwa káɗawza ŋ law, ana ebe ŋghe anta.»
22Aya, Yesu a zlepetene ŋ hejəye ma a təwse ege tewtew, a ŋgaya: «Vana Gazlavay kévelekey səkan ege aza tewtew asa ra naka. Kaw ɗala teŋguleŋ ma kesenekey, sa, sa Mba Gazlavay ca, askwaw, səy Vana teŋguleŋ anta. A zeney, kaw ɗala ma kasan Gazlavay, ara Vana ca, askwaw yam, səy sa, sa Mba Gazlavay anta teŋguleŋ naka leŋ hejəye maa sa kaɗawata ŋ ghwelzetene ŋ san ege yam.»
23A dəwze anta ca, a bawha tama kəɗe aha madarlaŋw anta ege wese, a zlepetene ŋ tata gagaha, a ŋgaya: «Zəhay Gazlavay mbəy ata hune, hune ma gəre səkan maa Gazlavay a la ata nje ŋkune ege ŋghe! 24Ayaw, sa kazlapahune, uzəye ma zlap ma mala Gazlavay ege ma zlezle ey bay hayak ma zlezle ege vəram, əy káɗaw ŋ gəre səkan maa hune gəre a nje ŋkune ege ŋghe, cemey, əy kégəre askwaw! Əy káɗaw ŋ zləme ma maa hune kezləme ŋghe ege, cemey, əy kézləme askwaw!»
Laslaŋgal ma ata ɗala Samarəya
25Aya, a təwse ca, maghwal ma maŋkanaŋkan wende aka, a gwarzam, a ɗaw ŋ slanza Yesu, a ɗawza, a ŋgaya: «Madakal, səkan maa sa kanalaw, ŋ lem lanja ma katuwaɗ səkwaw kaw vepey ca, vemey?» 26Yesu a zenene, a ŋgaya: «Ma kéŋtereye ŋ ma maŋkanaŋkan ŋtakwaw ca, vemey? Hwa jəŋge ŋma ca, vemey?» 27A təwse ca, heje wese a zenene, a ŋgaya: «Ma maŋkanaŋkan anta a zlap ca, ɗaw Bay Madakal, Gazlavay ŋkwa, a unaf ŋkwa tewtew, a zəwet ŋkwa tewtew, a ɓarɓar ŋkwa tewtew, leŋ a ŋkwaɓ ŋkwa tewtew. A zeney, səy hwa ɗaw mesleje ŋkwa ana ha ŋkwa.» 28Aya, Yesu a zlepene, a ŋgaya: «Hwa kézenha zlap a heɗe a heɗe. Nda, la ana mbe, hwa nelem lanja ma katuwaɗ səkwaw kaw vepey.»
29Cemey, heje anta, a ɗaw ŋ ŋta hawa aza ata nje anta. A təwse ca, a ɗawza Yesu zeney, a ŋgaya: «Ca, mesleje naka anta ca, vayay?»
30Aya, Yesu a zlepene zeney, a ŋgaya: «Heje Yahudu wende aka, a gwarzamha aka ŋ Urusaləyma, a nda ŋ Yerəykaw. Maa a kanda ata taf ca, ŋhel ege əy takaw, əy mbalaw, əy cekwene rəgwac ma ata kusam aza, gazl gazl əy gazl ka, əy yakza aka, mbəy slaɓ ŋ mac, tel əy nda tata. 31A dəwze anta ca, mala kwakwas wende aka, a nda ta ŋ taf anta yam. Cemey, maa a gəre heje wese ca, pəla a baw anta ta ata zlaŋgal, a nda anta. 32A dəwze anta zeney, ɗala Leweŋkaw ege wende aka, a nda ta ŋ taf wese zeney, a ndewzene, mbe yam, pəla a baw ata zlaŋgal, a nda anta war. 33Cemey, ɗala Samarəya wende aka, a nda ta ŋ taf wese ŋ ŋcəwerha, a hwasha ara mbe, a gəre heje anta ca, a lene hahar. 34Aya, a zenha ara mbe, a benene mbəlah anta ege aza a mel#10.34 Heje Samarəya a paɗ mbəlah mala heje wese a mel ey mavaw. A vah anta ca, hejəye əy kala zlan a səkan ŋghe anta ege ana menjevek, a zeney, ana səkan ma ata da urey. leŋ a mavaw, paɗ a peɗene ka a maslaga. A dəwze anta, a tew ata berjeŋ anta, a jeɓza ŋ ujek mbəlakw ege, a tal ŋ rehza. 35A mapat anta maa a kananda anta ata leŋcəwer anta ca, a velene səlay ŋ madakal ujek mbəlakw ege wese, a zlepene, a ŋgaya: “Tal ŋ rehza heje ŋghe, mada hwa kágay səlay day aha maa sa valahwaw ŋgha ca, sa nezenzahwaw aka maa sa kenezenaha ete ŋghe.”»
36Aya, Yesu a zlap zeney, a ɗawza maghwal ma maŋkanaŋkan wese, a ŋgaya: «Ara hwa ca, ŋ taba hejəye ma mahkaɗ ŋghe ege wese ca, mesleje mala ɗala maa ŋhel ege əy gazl ka ata taf wese ca, ara vayay?» 37Maghwal ma maŋkanaŋkan wese, a zenene, a ŋgaya: «Mesleje anta ca, ara ɗala ma san hahar ŋ lene taŋtaŋ ŋ rehza wese.» Aya, Yesu a zlepene a ŋgaya: «Nda, hwa la ana mbe yam.»
Yesu mbəy a wata ata Marta ey Marəyama
38Ata Yesu ey madarlaŋw anta ege, əy kanda ata taf. Aya, əy dam ŋ uzam wende aka, wala wende aka, zlam anta Marta, a lamza Yesu a wata anta. 39Marta anta ca, zlaŋgan haldəma aka, zlam anta Marəyama. A təwse ca, Marəyama wese, a ndaha, a nja ka a həzlar Bay Madakal, a keteh zlam ata ma maa a kazlap. 40Marta a kala zlan ege vedəye vedəye ma ata da səkan ege ma ata zam. Aya, a ndaha, a zlepene ŋ Yesu, a ŋgaya: «Bay Madakal, zlana ŋgha a geɓzekey zlan aka tewtew ŋ sa teŋguleŋ naka ana ebe ŋghe ca, a kandəramzahwaw vaw? Zlepene mandaha ŋ cekzekey!»
41Aya, Bay Madakal a zenene, a ŋgaya: «Hey Marta, hey Marta, hwa kaŋga ha ŋkwa aka ata səkan ege vedəye vedəye vəram, 42cemey, səkan teŋguleŋ ma dakal ma pa ma tuwah ŋ la ca, aka. Marəyama kámay səkan ma pa ma tuwah ŋ law, maa kaw ɗala a keneŋtene aza ca, askwaw.»
ទើបបានជ្រើសរើសហើយ៖
Luka 10: BHS
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2025 CABTAL
