Yuhana 17
17
Yesu a rak Gazlavay ata madarlaŋw anta ege
1A dəwze maa Yesu kázlap ma ŋghe ege aza ca, a kaf nje mgba ata uzlaf, a rak Gazlavay, a ŋgaya: «Vana, vah naka kándaha aza. Ghwalza ɓardakw Mba ŋkwa, ndar Mba ŋkwa a ghwalza ɓardakw ŋkwa yam. 2Hwa kévelene ɓarɓar aza ata hejəye tewtew, ndar a veletene lanja ma kaŋtakw səkwaw ŋ hejəye maa hwa velene ege tewtew. 3Lanja ma kaŋtakw səkwaw ca, hejəye əy masanahwaw, hwa, hwa Gazlavay ma teŋguleŋ njenjəwen, əy masan Yesu Almasəyhu ca, ɗala maa hwa laɓaza. 4Sa kághwalza ɓardakw ŋkwa ata hayak, sa kátuwaɗza zlan maa hwa velekey ŋ law, aza. 5Aya, na ŋgha ca, Vana, velekey ɓardakw a tama ŋkwa, ɓardakw maa sa ŋma ara hwa, mar manhayak ana baha.»
6«Sa kéghwelzetene zlam ŋkwa ŋ hejəye maa hwa daɗata aza ŋ manhayak ŋ velekey ata ege. Ara hejəye ŋkwa ege kəɗe, hwa kévelekey ata aza, əy kásəbar zlap ŋkwa aza. 7Na ŋgha ca, əy kasan səkan tewtew maa hwa velekey ca, a ndaha aka ara hwa, 8Mavəday, sa kéghwelzetene ma ege maa hwa ghwelzekey ege aza, əy kálamzata aza. Əy kasan, njenjəwen sa ndaha aka ara hwa, əy kálamza aza, hwa ma leɓekey.»
9«Sa rakahwaw, mavəday tata. Sa rakahwaw mavəday hejəye mala manhayak ege səkwaw, cemey, mavəday hejəye ŋghe maa hwa velekey ata ege, mavəday, ara hejəye ŋkwa ege. 10Səkan ma ara sa tewtew ca, ara mala ŋkwa. Səkan ma ara hwa tewew yam, ara mala naka, ɓardakw naka a kaghwalha ŋ tata. 11Mar aka ma na ŋgha, sa ŋ manhayak zeney, askwaw. Cemey, tata ca, əy ŋ manhayak. Sa ca, sa kanda naka ara hwa. Vana ma keweɗ, həbarata aka a ɓarɓar zlam ŋkwa, zlam ŋkwa maa hwa velekey, ndar əy la tata teŋguleŋ, ana maa hwa ey sa, mamaw, teŋguleŋ. 12Ata vah maa sa ara tata ca, sa kahəbarata aka a ɓarɓar zlam ŋkwa, zlam maa hwa velekey, sa kasla aka ata tata, kaw ɗala teŋguleŋ ŋ taba tata kéfətek, askwaw, səy ɗala ma kenefətek, ndar ma meŋtereŋter a la anta. 13Na ŋgha ca, sa kanda naka ara hwa. Sa zlap ma ŋghe ege ŋ manhayak ca, ndar sasam naka a ghef ŋ tata. 14Sa kéveletene zlap ŋkwa aza. Cemey, manhayak kécecefzata səkwaw, mavəday tata ca, tata hejəye manhayak ege səkwaw, ana sa, sa ɗala manhayak səkwaw yam. 15Vana, sa kaɗawzahwaw, ndar hwa daɗata aza ŋ manhayak ca, askwaw, cemey, hwa həbarata aka ata Ɗala ma kala dadawar. 16Ara hejəye mala manhayak ege səkwaw, ana sa, sa ɗala mala manhayak səkwaw yam. 17Bawzata aza ŋ hejəye ŋkwa ege njenjəwen, ta ŋ zlap ŋkwa ma njenjəwen. 18Ana maa hwa leɓekey ŋ manhayak, sa kalaɓzata ŋ manhayak. 19Sa kávalza ha naka aka tewtew ŋ hwa mavəday tata, ndar əy baw tata ŋ hejəye ŋkwa ege ta ŋ zlap ŋkwa ma njenjəwen.»
20«Sa rakahwaw ca, mavəday tata gagaha səkwaw, cemey, sa rakahwaw ca, ata hejəye ma kenelemzekey ege yam, mavəday ma maa əy kenezləme. 21Sa karakahwaw, ndar tata tewtew, əy la tata teŋguleŋ, ana hwa, Vana, hwa ŋ sa leŋ sa ŋ hwa. Tata yam, əy manja ŋ mamaw, ndar manhayak a lamza ca, hwa ma leɓekey. 22A naka ca, sa kéveletene ɓardakw maa hwa velekey aza, ndar əy la tata teŋguleŋ, ana maa hwa ey sa, mamaw, teŋguleŋ. 23Sa kénjeye ŋ tata, ana maa hwa kénjeye ŋ sa, ndar əy lem lajav ma ma njenjəwen. Ana ebe ŋghe, manhayak masan ca, ara hwa ma leɓekey, aya, hwa káɗawata aza ana maa hwa kéɗewekey aza yam. 24Vana, sa ɗaw ca, ata la maa sa a təwse ca, hejəye maa hwa velekey ata ege, tata yam, əy manja a sa. Aya, əy masarza ɓardakw maa hwa velekey. Mavəday, hwa kéɗewekey aza mpar aha labaha manhayak. 25Vana ma taŋtaŋ, hejəye ma ŋ manhayak ege ca, əy kásanahwaw, askwaw. Cemey, sa ca, sa kásanahwaw aza, aya, madarlaŋw naka ege ca, əy kásan aza, ara hwa ma leɓekey. 26Sa kéghwelzetene zlam ŋkwa leŋ sa neghwelzetene zeney, ndar laɗaw maa hwa ɗewekey a nja ŋ tata, aya, sa yam, sa nanja ŋ tata.»
ទើបបានជ្រើសរើសហើយ៖
Yuhana 17: BHS
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2025 CABTAL
