Juáán 7
7
Jesús tsíniña-mine̱e̱ꞌ rí mi̱ꞌxná-ñájwíi̱n gúne̱ dxíyo̱o̱
1Nda̱wa̱á a̱ꞌkhue̱n ngrigo̱o̱ꞌ Jesús ná numbaa Galiléa̱. Tsíyoo̱ gángrigo̱o̱ꞌ ná numbaa Judéa̱, numuu rí ikhín nduꞌyáa̱ xa̱bo̱ ñajun judío̱ rí mu̱xíya̱a̱. 2Nangiyuu máꞌ ma̱ga̱jnúu ndxa̱a̱ ído̱ rí xa̱bo̱ judío̱ nune̱ guꞌwá iná. 3A̱ꞌkhue̱n waꞌtháán Jesús nene̱ dxíyo̱o̱:
―Dójngó tsígájnaaꞌ mi̱dxo̱ꞌ ná numbaa Judéa̱, kajngó xa̱bo̱ tsí narasngúún ikhín mbuyáá mangiin rí phú wáá rí nathane̱ róꞌ. 4Nimbáa xa̱bo̱ tsí nandoo rí ma̱gu̱ma-nuwiin, tsíꞌnii̱ ná ngu̱ꞌwa̱ rí na̱ma̱ñuu̱ naꞌnii̱. Numuu rí nathane̱ rí phú wáá, atasngájma-mina̱ꞌ ná inúú mbá xúgíin xa̱bo̱ kajngó mbuyáa̱ rí nathane̱.
5Xkuaꞌnii nithan dxíyo̱o̱ Jesús, numuu rí asndo ni máꞌ ikhii̱n tsínimbúu̱n juyáa̱. 6A̱ꞌkhue̱n Jesús niꞌthúún dxíyo̱o̱:
―Xóó máꞌ tága̱nú mbiꞌi rí jaꞌyoꞌ ikhúúnꞌ. Xómáꞌ ikháanꞌlaꞌ asndo náá máꞌ mbiꞌi máján rí mu̱ꞌgualaꞌ. 7Numuu nda̱a̱ máꞌ numuu rí ikháanꞌlaꞌ ma̱xáxúún xa̱bo̱ gúyalaꞌ. Xómáꞌ ikhúúnꞌ tsíñúu̱ gúyeꞌ, numuu rí na̱tha̱nlo̱ꞌ rí ra̱máján rí nuni̱i̱. 8Aꞌgua ikháanꞌlaꞌ ná ndxa̱a̱. Ma̱xáꞌgá xóó ikhúúnꞌ ná ndxa̱a̱ rúꞌkhue̱n, numuu rí xóó máꞌ tága̱nú mbiꞌi rí jaꞌyoꞌ ikhúúnꞌ.
9Ído̱ wámbo̱o̱ Jesús niꞌthúún ríge̱ꞌ dxíyo̱o̱, ninguanúu̱ ná numbaa Galiléa̱.
Jesús naꞌsngáá ná ndxa̱a̱ rí xa̱bo̱ judío̱ nune̱ guꞌwá iná
10A̱ꞌkhue̱n rí dxíyo̱o̱ nigóó ná ndxa̱a̱. Nda̱wa̱á ni̱ka̱ Jesús mangaa ná ndxa̱a̱, i̱ndo̱ó máꞌ numuu rí táꞌgee̱ ná pa̱jnu, rí ni̱ke̱e̱ ngu̱ꞌwa̱. 11Xómáꞌ xa̱bo̱ ñajun judío̱ nduꞌyáa̱ Jesús ná ndxa̱a̱, jamí nu̱ra̱xe̱-mijnée̱: «Náá lá ngrigo̱o̱ꞌ xa̱bo̱ tsúꞌkhue̱n rá». 12Maphú mbaꞌiin xa̱bo̱ nuthan-mijná ga̱jma̱á numuu Jesús. Mbá tikhuun nuthan: «Mbáa xa̱bo̱ májáan ñajuu̱n». Xómáꞌ i̱ꞌwíin nuthan: «Na̱nguá, ra̱ꞌkhá xa̱bo̱ májáan ñajuun tsúꞌkhue̱n, numuu rí naꞌne-nduwii̱n xa̱bo̱». 13I̱ndo̱ó máꞌ numuu rí nimbáa tsíꞌthán ná inúú xa̱bo̱ ga̱jma̱á numuu Jesús, numuu rí namíñúu̱ ene̱ xa̱bo̱ ñajun judío̱.
14Ído̱ ninújngoo máꞌ ti̱kua̱pha̱a̱ ndxa̱a̱, a̱ꞌkhue̱n Jesús ni̱ka̱ gáꞌsngáá ná guꞌwá dxákuun. 15A̱ꞌkhue̱n maphú nimakúún xa̱bo̱ ñajun judío̱, jamí nithan-mijnée̱: «Xáne lá kajngó na̱ma̱ñuu guéñuu tsíge̱ꞌ, rí táꞌne-gajma̱a̱ rá».
16Xómáꞌ Jesús niriꞌñúu̱:
―Ra̱ꞌkhá ikhúúnꞌ e̱ne̱ ku̱maalo̱ꞌ rí na̱sngáálo̱ꞌ. Tsí nixúngu̱únꞌ nasngájmeꞌ rí jaꞌyoo ma̱tha̱nlo̱ꞌ. 17Xí mbáa nandoo ma̱ꞌne-mbánuu rí nandoo Ana̱ꞌlóꞌ, ma̱goo mba̱ꞌyoo̱ xí ná inuu Ana̱ꞌlóꞌ na̱ꞌkha̱ rí na̱sngáálo̱ꞌ o xí na̱tha̱n máꞌ rí nandoꞌ ikhúúnꞌ mbo̱ꞌ. 18Tsí naꞌsngáá rí nandoo, tsúꞌkhue̱n nandoo rí ma̱gu̱ma-mba̱a̱ gúne̱ xa̱bo̱. Xómáꞌ tsí waxúngua̱a̱ꞌ, nandoo̱ rí ma̱gu̱ma-mba̱a̱ tsí nixúngua̱a̱ꞌ, ikhaa jngó naꞌthée̱n rí gakon, jamí nitháan tsíꞌne-nduwee̱. 19Á ra̱ꞌkhá Moisés ñajuun tsí nixnálaꞌ xtángoo dxe̱ꞌ. Jamí nimbáa tsí ikháanꞌlaꞌ tsíꞌne-mbánuu ne̱. Náá numuu kajngó nandalaꞌ gúxíñu̱ú róꞌ.
20Xómáꞌ xa̱bo̱ tsí mbaꞌiin ni̱riꞌña:
―Ikháánꞌ xtaꞌdáá gíñá ꞌguéen. Tsáa ñajuun nandoo gáxíña̱áꞌ róꞌ.
21A̱ꞌkhue̱n Jesús niꞌthúu̱n:
―Ikhúúnꞌ ne̱ne̱ mbá rí phú wáá awúun mbiꞌi rí nduꞌyáa xa̱ꞌlóꞌ, jamí mbá xúgiáanꞌlaꞌ namakualaꞌ. 22Numuu rí Moisés nixnálaꞌ xtángoo ga̱jma̱á numuu tsina jndi, maske máꞌ ra̱ꞌkhá ikhaa̱ nigíꞌdu̱u̱n niꞌnii̱ rúꞌkhue̱n, rí táta̱-xi̱ꞌñálóꞌ tsí nijúwa̱ꞌ wajyúú mbiꞌi ni̱gíꞌdi̱ín rúꞌkhue̱n. Ikhaa jngó ikháanꞌlaꞌ nu̱xnu̱úlaꞌ tsina jndi i̱jña̱ꞌlaꞌ, maske máꞌ asndo mbiꞌi rí nduꞌyáa xa̱ꞌlóꞌ ñajuun ne̱. 23Xí ga̱jma̱á numuu rí mu̱ne̱-mbáníílaꞌ xtángawoo Moisés, asndo mbiꞌi rí nduꞌyáa xa̱ꞌlóꞌ nu̱ne̱laꞌ tsina jndi, náá numuu kajngó najiꞌnáaꞌlaꞌ rí ikhúúnꞌ ne̱ne̱-thanuu mbá xúgíí xuyuu mbáa xa̱bo̱ awúun mbiꞌi rí nduꞌyáa xa̱ꞌlóꞌ róꞌ. 24Ikhaa jngó mu̱xútha̱nlaꞌ rí ra̱máján eꞌne mbáa xa̱bo̱ numuu rí xkuaꞌnii i̱ya̱á ikháanꞌlaꞌ, rí a̱gu̱ya̱á májánlaꞌ xí gakon rí ra̱máján niꞌnii̱.
Nu̱ra̱xe̱-mijná xa̱bo̱ xí Jesús ñajuun Krísto̱
25Mbá tikhuun xa̱bo̱ tsí júwa̱ꞌ ná Jerusalén ni̱gíꞌdíi̱n nithee̱n: «Á ra̱ꞌkhá tsíge̱ꞌ ñajuun tsí ngrigu̱ún ruꞌyáa xa̱bo̱ rí mu̱xíya̱a̱ dxe̱ꞌ. 26A̱ꞌkhue̱n wíji̱i̱ naꞌthée̱n ná inúú xa̱bo̱, jamí nimbáa nda̱a̱ rí iꞌthúu̱n. Ra̱ꞌkhá ninimbu̱únꞌ máꞌ xa̱bo̱ ñajun rí ikhaa̱ ñajuu̱n Krísto̱ ráanꞌ. 27Xómáꞌ ikháánꞌlóꞌ nduꞌyáálóꞌ náá i̱ꞌkha̱ xa̱bo̱ tsíge̱ꞌ, jamí ído̱ gáꞌkha̱ Krísto̱, nimbáa ma̱xáꞌyoo náá gáꞌkhe̱e̱».
28Ikhaa jngó awúun máꞌ rí naꞌsngáá Jesús ná guꞌwá dxákuun, a̱ꞌkhue̱n niꞌthée̱n gakhe̱: «¡Áan, nu̱ne̱-nuwúúnlaꞌ jamí ndu̱ya̱álaꞌ náá iꞌkhalo̱ꞌ janꞌ! Ra̱ꞌkhá ikhúúnꞌ ndi̱ya̱ idxu̱ꞌ rí niꞌkhalo̱ꞌ, rí mbáa tsí kuwiin nixúngu̱únꞌlo̱ꞌ, ikhaa tsí tsíne̱-nuwiin ikháanꞌlaꞌ. 29Xómáꞌ ikhúúnꞌ na̱ne̱-núwíi̱nlo̱ꞌ numuu rí ná xtáa̱ ikhaa̱ niꞌkhalo̱ꞌ, jamí ikhaa̱ nixúngúu̱nꞌlo̱ꞌ».
30A̱ꞌkhue̱n rí xa̱bo̱ tsí júwa̱ꞌ ná Jerusalén neꞌne a̱kuíi̱n rí mu̱rtuwii̱n Jesús, jamí nimbáa táꞌne-magatuwii̱n, numuu rí xóó máꞌ tága̱nú mbiꞌi rí ma̱khuáa̱. 31Maske máꞌ xúꞌkhue̱n, maphú mbaꞌiin xa̱bo̱ ninimbu̱únꞌ juyáa̱, jamí nuthee̱n: «Ído̱ gáꞌkha̱ Krísto̱, á i̱tha̱án ma̱ꞌnii̱ rí phú wáá xómá rí naꞌne tsíge̱ꞌ rá».
Xa̱bo̱ fariséo̱ nu̱xu̱ꞌmii̱ tsí mu̱rtuwiin Jesús
32Xómáꞌ xa̱bo̱ fariséo̱ ni̱dxawíi̱n rí nuthan xa̱bo̱ ga̱jma̱á numuu Jesús. A̱ꞌkhue̱n nimbáxúu̱n gajmíi̱ dxakuun tsí gíꞌdoo numúú, jamí ni̱xu̱ꞌmii̱ tsí nu̱ña̱wa̱án guꞌwá dxákuun rí mu̱rtuwii̱n Jesús. 33A̱ꞌkhue̱n niꞌthán Jesús: «I̱mbá lájwíin xóó gáxtáá ga̱jma̱á nindxa̱ꞌlaꞌ. Nda̱wa̱á ma̱thangu̱únꞌlo̱ꞌ ná xtáa̱ tsí nixúngu̱únꞌlo̱ꞌ. 34Ikháanꞌlaꞌ mbu̱ꞌñúuꞌlaꞌ, jamí mu̱xúxkamúúlaꞌ, numuu rí ikháanꞌlaꞌ ma̱xáxóo mu̱ꞌgualaꞌ ná ma̱ꞌgálo̱ꞌ».
35A̱ꞌkhue̱n xa̱bo̱ ñajun judío̱ ni̱gíꞌdíi̱n ni̱ra̱xe̱-mijnée̱: «Náá lá iꞌgí-mina̱ꞌ tsíge̱ꞌ ma̱ꞌga rí mu̱xúxkamaalóꞌ rá. Á naꞌgí-mine̱e̱ꞌ rí ma̱ꞌgee̱ gáꞌñúu̱ xa̱bo̱ judío̱ tsí júwa̱ꞌ ni̱drúꞌúún ná i̱ꞌwá xuajen jamí maꞌsngúu̱n xa̱bo̱ tsí ra̱ꞌkháa judío̱ ñajúún dxe̱ꞌ. 36Dí lá ñajuun ndiyoo̱ gáꞌthée̱n nákhí rí niꞌthée̱n: “Ikháanꞌlaꞌ mbu̱ꞌñúuꞌlaꞌ, jamí mu̱xúxkamúúlaꞌ, numuu rí ikháanꞌlaꞌ ma̱xáxóo mu̱ꞌgualaꞌ ná ma̱ꞌgálo̱ꞌ” rá».
Jesús naꞌsngáá ná awúun mbiꞌi rí ndámba̱ ndxa̱a̱
37Ído̱ ni̱ga̱nú mbiꞌi rí phú i̱tha̱án gíꞌdoo numuu, ído̱ ndámba̱ ndxa̱a̱, a̱ꞌkhue̱n ni̱we̱je̱ Jesús jamí niꞌthée̱n gakhe̱ inúú xa̱bo̱: «Xí mbáa xa̱bo̱ najándawoo, ga̱ꞌkhe̱e̱ gágáa̱n iya ná inuꞌ ikhúúnꞌ. 38Xómá ka̱ma naꞌthán ná i̱yi̱i̱ꞌ ajngóo Ana̱ꞌlóꞌ, tsí nanimbo̱o̱ꞌ jaꞌyeꞌ “ma̱ngujwíi iya rí jayá mbiꞌñúú xa̱bo̱ ná xo̱xto̱o̱”».
39Nákhí niꞌthán Jesús ríge̱ꞌ, naꞌthée̱n ga̱jma̱á numuu Xu̱u̱ꞌ Ana̱ꞌlóꞌ tsí mu̱dri̱guíi nda̱wa̱á tsí ma̱nimbu̱únꞌ juyáa̱. Numuu rí xóó máꞌ táꞌkha̱ Xu̱u̱ꞌ Ana̱ꞌlóꞌ nákhí mbiꞌi rúꞌkhue̱n, numuu rí xóó máꞌ tájáñuu jamí táyáa mbiꞌyuu Jesús.
Nu̱xpi̱ꞌtha̱-mijná xa̱bo̱ ga̱jma̱á numuu Jesús
40Ído̱ ni̱dxawíín xa̱bo̱ tsí mbaꞌiin ajngóo Jesús, a̱ꞌkhue̱n rí mbá tikhuu̱n nuthee̱n: «Gakon rí xa̱bo̱ tsí na̱gu̱wíjnga̱a ajngóo Ana̱ꞌlóꞌ ñajuun tsíge̱ꞌ, tsí wéje̱ máꞌ rí maxúngua̱a̱ꞌ Ana̱ꞌlóꞌ». 41I̱ꞌwíin xa̱bo̱ nuthan: «Krísto̱ ñajuun tsíge̱ꞌ». Xómáꞌ i̱ꞌwíin xa̱bo̱ nuthan: «Na̱nguá, ra̱ꞌkhá ná numbaa Galiléa̱ gáꞌkha̱ Krísto̱. 42Ná i̱yi̱i̱ꞌ ajngóo Ana̱ꞌlóꞌ ka̱ma naꞌthán rí ná ri̱jyu̱u̱ꞌ Dabíd ma̱ꞌkha̱ Krísto̱, jamí ná Belén gágu̱maa̱, ná xuajñuu máꞌ Dabíd».
43Xkuaꞌnii neꞌne rí na̱nguá niwa̱a rí nuthan xa̱bo̱, a̱ꞌkhue̱n ni̱xpi̱ꞌtha̱-mijnée̱ ga̱jma̱á numuu Jesús. 44Jamí mbá tikhuun xa̱bo̱ ndiñúú gúrtuwii̱n rí mu̱xu̱da̱a̱ꞌ géjwa̱nꞌ. I̱ndo̱ó máꞌ numuu rí asndo nimbáa táxkajmaa̱ nitháan.
Tsínimbu̱únꞌ xa̱bo̱ ñajun judío̱ juyáá Jesús
45Tsí nu̱ña̱wa̱án guꞌwá dxákuun niguwáa̱n ná inúú xa̱bo̱ fariséo̱ jamí dxakuun tsí gíꞌdoo numúú. A̱ꞌkhue̱n ikhii̱n ni̱ra̱xúu̱n tsí nu̱ña̱wa̱án guꞌwá dxákuun:
―Náá numuu kajngó táguwa-ju̱ya̱a̱laꞌ xa̱bo̱ tsúꞌkhue̱n róꞌ.
46Xómáꞌ tsí nu̱ña̱wa̱án guꞌwá dxákuun ni̱riꞌña:
―Asndo ni miꞌtsú nimbáa xa̱bo̱ numbaa táꞌthán xómá naꞌthán xa̱bo̱ tsúꞌkhue̱n.
47A̱ꞌkhue̱n nithan xa̱bo̱ fariséo̱, nithúu̱n tsí ku̱ra̱tuun ajwa̱nꞌ:
―Ni̱ni̱ꞌñá-mijnálaꞌ rí ma̱gu̱ma-nduwáanꞌ mangáanꞌlaꞌ ráanꞌ. 48Á xtáa mbáa xa̱bo̱ ñajun o mbáa xa̱bo̱ fariséo̱ tsí ninimbo̱o̱ꞌ jaꞌyoo̱ dxe̱ꞌ. 49Xómáꞌ xa̱bo̱ tsí nanimbu̱únꞌ juyáa̱, tsíne̱-nuwii̱n xtángawoo Moisés, ikhaa jngó waꞌxná-máꞌíi̱n.
50A̱ꞌkhue̱n Nikodémo̱, ikhaa máꞌ xa̱bo̱ fariséo̱ tsí ni̱ꞌkha̱ gáꞌyoo Jesús mbá mbroꞌon, niꞌthúu̱n a̱nguii̱n:
51―Ná xtángoo dríga̱ꞌlóꞌ naꞌthán rí ma̱xáxóo mu̱ꞌthánlóꞌ rí nixuda-mina̱ꞌ aꞌkhán mbáa xa̱bo̱ xí tsídxawíi̱nlóꞌ ginii, jamí xí tsíxkamaalóꞌ rí niꞌnii̱.
52A̱ꞌkhue̱n waꞌtháán Nikodémo̱ nene̱ a̱ngui̱in:
―Á xa̱bo̱ numbaa Galiléa̱ ñajwaanꞌ mangáánꞌ dxe̱ꞌ. Athane̱-gajma̱a̱-májáanꞌ ajngáa rawuun Ana̱ꞌlóꞌ kajngó ma̱tha̱ya̱á rí ná Galiléa̱ ni miꞌtsú tágájnuu nimbáa xa̱bo̱ tsí na̱gu̱wíjnga̱a ajngóo Ana̱ꞌlóꞌ.
A̱ꞌgo̱ tsí nixmáxi̱i̱ ga̱jma̱á i̱mba̱a̱ꞌ xa̱biya̱#7.53 Ríga̱ mbá tikhu i̱yi̱i̱ꞌ griégo̱ rí wayuu ná na̱nguá i̱ꞌkha̱ ajngáa rí júgua-raꞌa ga̱jma̱á [...].
[ 53A̱ꞌkhue̱n rí mbámbáa ni̱ka̱a ná guꞌwóo nini̱i̱.
ទើបបានជ្រើសរើសហើយ៖
Juáán 7: tcf
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2025 SIL Global. Creative commons license CC BY-SA.
