Juáán 8
8
1Xómáꞌ Jesús ni̱ka̱ ná júba̱ rí mbiꞌyuu Olíbo̱. 2Jamí ído̱ ni̱mbiꞌi rí i̱mba̱ mbiꞌi, ni̱ꞌkhaa̱ ná guꞌwá dxákuun. Mbá xúgíin xa̱bo̱ niguwá gúyáa̱, jamí ikhaa̱ ni̱gi̱ꞌi̱i̱ maꞌsngúu̱n. 3Awúun máꞌ rúꞌkhue̱n niguwá xa̱bo̱ tsí nusngáá xtángoo gajmíi̱ xa̱bo̱ fariséo̱. Niguwá juya̱a̱ mbáa a̱ꞌgo̱ tsí waxkamaa jabóo ga̱jma̱á xa̱bo̱ tsí táyáa, ni̱tsijii̱ a̱ꞌgo̱ tsíge̱ꞌ ná majñu̱ú xa̱bo̱. 4A̱ꞌkhue̱n nitháa̱n Jesús: «Táta̱ naꞌsngáá, waxkamaa a̱ꞌgo̱ tsíge̱ꞌ jabóo ga̱jma̱á xa̱bo̱ tsí táyáa, inu kri̱ga̱a̱ ga̱jmáa̱ xa̱bo̱ waꞌyáa̱. 5Ná xtángoo rí nixnáxo̱ꞌ Moisés naꞌthán rí a̱ꞌgo̱ tsí xkuaꞌnii eꞌne gíꞌmaa rí mi̱ꞌxnáa̱ ga̱jma̱á itsí ma̱ja̱ñúu̱. Dí irathán ikháánꞌ rá».
6Graxe̱ ríge̱ꞌ niñíi̱ Jesús kajngó mbuyáa̱ dí gáꞌthán, jamí xí ra̱máján iriꞌñee̱, ma̱goo muni̱i̱ aꞌkhúun. Xómáꞌ Jesús nidrákee̱ idxu̱u̱ mbayíí, a̱ꞌkhue̱n nigíꞌdu̱u̱n niꞌtháa̱n ná inuu ju̱ba̱ꞌ ga̱jma̱á a̱dée ñawúu̱n. 7Jamí tsíni̱ꞌñáa̱-ru̱ra̱xíi̱, ikhaa jngó Jesús ni̱wi̱ji̱i jamí niriꞌñúu̱: «Ikhaa tsí nda̱a̱ mbá jayu aꞌkhúun rí ikháanꞌlaꞌ, ikhaa tsúꞌkhue̱n ginii jayu gáda itsí rí maxnúu̱».
8A̱ꞌkhue̱n Jesús nidrákaa̱ mbu̱júꞌ idxu̱u̱ mbayíí, jamí nigíꞌmaa̱ niꞌtháa̱n ná inuu ju̱ba̱ꞌ. 9Xómáꞌ tsí niguwá juya̱a̱ a̱ꞌgo̱, ído̱ ni̱dxawíi̱n rí niꞌthán Jesús, mbámbáa máꞌ xúꞌkhue̱n nigájna̱a ni̱ka̱a nini̱i̱. Ginii jayu nigúun xa̱bo̱ buanii, asndo nda̱wa̱á jayu nigúun tsí jñáma máwáa, xkuaꞌnii asndo ninguanúu i̱mba̱wíi Jesús jamí a̱ꞌgo̱ wíji̱i̱ máꞌ xóó tikhuíí. 10Ído̱ ni̱wi̱ji̱i mbu̱júꞌ Jesús, ndiꞌyoo̱ rí i̱mba̱wíi a̱ꞌgo̱ wéje̱. A̱ꞌkhue̱n niraxu̱u̱:
―Nána̱, náá nigóó xa̱bo̱ tsí nune̱ aꞌkháanꞌ rá. Nimbáa táxná-máꞌáán rí ma̱ja̱ñáaꞌ ráanꞌ.
11―Nimbáa̱, Táta̱, ―niriꞌña a̱ꞌgo̱.
A̱ꞌkhue̱n Jesús niꞌthúun a̱ꞌgo̱:
―Ni máꞌ ikhúúnꞌ tsíxna̱-máꞌáánlo̱ꞌ rí ma̱ja̱ñáaꞌ. Ma̱goo mi̱dxu̱uꞌ, jamí náxátha̱ne̱ aꞌkhán rá.]
Jesús ñajuun aguu numbaa
12A̱ꞌkhue̱n Jesús niꞌthúún mbu̱júꞌ xa̱bo̱: «Ikhúúnꞌ ñajunꞌ aguu numbaa. Tsí na̱ꞌkha̱ tsu̱du̱ꞌ ma̱xángrigo̱o̱ꞌ ná mijína, rí ma̱ngrigo̱o̱ꞌ ga̱jma̱á agu rí jayá mbiꞌñúú xa̱bo̱».
13Xómáꞌ xa̱bo̱ fariséo̱ nitháán Jesús:
―Ikháánꞌ narathán rí máján ga̱jma̱á numaaꞌ máꞌ ikháánꞌ, ikhaa jngó ra̱gíꞌdoo numuu rí narathán.
14A̱ꞌkhue̱n Jesús niriꞌñúu̱:
―Maske máꞌ ikhúúnꞌ ñajunꞌ tsí na̱tha̱n rí máján ga̱jma̱á numuꞌ, gakon rí na̱tha̱nlo̱ꞌ, numuu rí ikhúúnꞌ nda̱yo̱o̱ náá niꞌkhalo̱ꞌ jamí náá ika̱aꞌlo̱ꞌ. Xómáꞌ ikháanꞌlaꞌ tsíya̱alaꞌ náá niꞌkhalo̱ꞌ, ni máꞌ náá ika̱aꞌlo̱ꞌ. 15Ikháanꞌlaꞌ nu̱xu̱ꞌdáa awan ga̱jma̱á numúú xa̱bo̱ xómá nune̱ jayu xa̱bo̱ numbaa. Xómáꞌ ikhúúnꞌ tsíxu̱ꞌdáa awan ga̱jma̱á numuu nimbáa xa̱bo̱. 16Jamí xí ikhúúnꞌ ma̱xu̱ꞌdáa awan ga̱jma̱á numúú xa̱bo̱, rí na̱ra̱jwa̱ꞌ ma̱nindxu̱u̱ rí gakon, numuu rí ra̱ꞌkhá i̱ndo̱ó ikhúúnꞌ ma̱ra̱jwa̱ꞌlo̱ꞌ, rí ma̱ra̱jwa̱ꞌ ga̱jmi̱ꞌ Tátéꞌ tsí nixúngu̱únꞌlo̱ꞌ. 17Ná xtángoo dríga̱ꞌlaꞌ ka̱ma naꞌthán: xí mbéꞌtháán rí nuthan a̱jmi̱i xa̱bo̱ tsí ndiyáá, gakon rí nuthee̱n. 18Ikhaa jngó, ikhúúnꞌ ñajunꞌ tsí na̱tha̱n rí máján ga̱jma̱á numuꞌ, jamí Tátéꞌ tsí nixúngu̱únꞌ naꞌthán rí máján ga̱jma̱á numuꞌ mangaa.
19Xómáꞌ xa̱bo̱ fariséo̱ ni̱ra̱xi̱í Jesús:
―Náá xtáa Tátiáaꞌ róꞌ.
A̱ꞌkhue̱n Jesús niriꞌñúu̱:
―Xí ikháanꞌlaꞌ nu̱ne̱-nuwúúnlaꞌ, nu̱ne̱-nuwiinlaꞌ máꞌ Tátéꞌ mangaa. I̱ndo̱ó máꞌ numuu rí tsíne̱-nuwúúnlaꞌ, ikhaa jngó ni máꞌ Tátéꞌ tsíne̱-nuwiinlaꞌ.
20Ajngáa ríge̱ꞌ niꞌthán Jesús nákhí niꞌsngáa̱ ná awúun guꞌwá dxákuun, ná mijngi nati mbúkha̱a̱ xúwán. Jamí nimbáa xa̱bo̱ táꞌne-magatuwii̱n, numuu rí xóó máꞌ tága̱nú mbiꞌi rí ma̱khuáa̱.
Jesús naꞌthán rí ra̱ꞌkhá xa̱bo̱ ná numbaa ríge̱ꞌ ñajuu̱n
21A̱ꞌkhue̱n Jesús niꞌthúún xóó xa̱bo̱: «Ikhúúnꞌ naka̱aꞌlo̱ꞌ, xómáꞌ ikháanꞌlaꞌ mbu̱ꞌñúuꞌlaꞌ, jamí ma̱ja̱ñálaꞌ ga̱jma̱á numuu aꞌkhánlaꞌ. Ma̱xáxóo mu̱ꞌgualaꞌ ná naka̱aꞌlo̱ꞌ ikhúúnꞌ».
22Xómáꞌ xa̱bo̱ ñajun judío̱ nu̱ra̱xe̱-mijná: «Á nandxaꞌwá-mina̱ꞌ xa̱bo̱ tsíge̱ꞌ rí maxíya̱-mina̱ꞌ dxe̱ꞌ. Á gáꞌne xí numuu rúꞌkhue̱n kajngó naꞌthée̱n: “Ma̱xáxóo mu̱ꞌgualaꞌ ná naka̱aꞌlo̱ꞌ ikhúúnꞌ”».
23A̱ꞌkhue̱n Jesús niꞌthúún xa̱bo̱: «Ikháanꞌlaꞌ ñajwanlaꞌ xa̱bo̱ mbayíí ge̱jyoꞌ, xómáꞌ ikhúúnꞌ ñajunꞌ xa̱bo̱ tsí ni̱ꞌkha̱ ri̱jma̱á. Ikháanꞌlaꞌ ñajwanlaꞌ xa̱bo̱ numbaa ríge̱ꞌ, ikhúúnꞌ ra̱ñájunꞌ xa̱bo̱ ná numbaa ríge̱ꞌ. 24Ikhaa jngó ni̱tha̱nꞌlaꞌ rí ma̱ja̱ñálaꞌ ga̱jma̱á numuu aꞌkhánlaꞌ. Xí tsínimba̱ꞌlaꞌ rí Ikhúúnꞌ Ñajunꞌ, a̱ꞌkhue̱n rí ma̱ja̱ñálaꞌ ga̱jma̱á numuu aꞌkhánlaꞌ».
25A̱ꞌkhue̱n rí xa̱bo̱ judío̱ ni̱ra̱xíi̱ Jesús:
―Tsáa ñajwaanꞌ ikháánꞌ róꞌ.
Xómáꞌ Jesús niriꞌñúu̱:
―Ikhaa máꞌ tsí ni̱tha̱nꞌlaꞌ rí ñajunꞌ asndo nákhí ginii. 26Phú mbaꞌa rí gúꞌdo̱ꞌ ma̱tha̱n jamí ma̱ne̱-mbánuu ga̱jma̱á numalaꞌ. I̱ndo̱ó máꞌ numuu rí ma̱xátha̱n ni máꞌ ma̱xáxu̱ꞌdáa awan ga̱jma̱á numalaꞌ, numuu rí kuwiin tsí nixúngu̱únꞌlo̱ꞌ, jamí ikhúúnꞌ na̱thu̱únlo̱ꞌ xa̱bo̱ numbaa i̱ndo̱ó máꞌ rí ni̱dxawuun rí naꞌthée̱n.
27Xómáꞌ xa̱bo̱ judío̱ táfruꞌúu̱n rí Jesús naꞌthán ga̱jma̱á numuu Ana̱ꞌlóꞌ Mikhuíí. 28Ikhaa jngó Jesús niꞌthán xóó: «Ído̱ gámba̱ꞌlaꞌ ni̱drákamaalaꞌ A̱dée Xa̱bo̱ Numbaa ná ixe̱, a̱ꞌkhue̱n mbu̱ya̱álaꞌ rí Ikhúúnꞌ Ñajunꞌ tsí na̱tha̱n rí ñajunꞌ, jamí tsíya̱ idxu̱ꞌ mbáwúún rí ma̱ne̱ mbá xúgíí rí na̱ne̱lo̱ꞌ, rí i̱ndo̱ó máꞌ rí niꞌsngéꞌ Tátéꞌ, rúꞌkhue̱n i̱tha̱nlo̱ꞌ. 29Tsí nixúngu̱únꞌ xtáa̱ ga̱jma̱á nindxu̱ꞌ. Tániñiꞌ mbáwúún Tátéꞌ, numuu rí jámba̱ miꞌtsú na̱ne̱lo̱ꞌ rí na̱ni̱gu̱u̱ꞌ».
30Awúun máꞌ rí naꞌthán xóó Jesús ríge̱ꞌ, maphú mbaꞌiin xa̱bo̱ ninimbu̱únꞌ juyáa̱.
Tsí ñajúún i̱ji̱in Abraám jamí tsí ñajúún i̱ji̱in gixa̱a̱
31A̱ꞌkhue̱n Jesús niꞌthúún xa̱bo̱ judío̱ tsí ninimbu̱únꞌ juyáa̱:
―Xí ikháanꞌlaꞌ tsíni̱ꞌñáá-ranimba̱ꞌlaꞌ rí na̱sngáálo̱ꞌ, ma̱nindxa̱ꞌlaꞌ xa̱bo̱ tsí phú gakon rí na̱sngúúnlo̱ꞌ. 32A̱ꞌkhue̱n mu̱ne̱-nuwiinlaꞌ rí gakon, jamí rí gakon ma̱ꞌne-jríñáaꞌlaꞌ.
33Xómáꞌ ikhii̱n ni̱riꞌñee̱:
―I̱jín-xíñu-egoo Abraám ñajwan ikháanꞌxo̱ꞌ. Nimbá miꞌtsú tánindxa̱ꞌxo̱ꞌ yumbáá waꞌtsi̱in drígo̱o̱ nimbáa xa̱bo̱. Xáne kajngó narathán ikháánꞌ rí ma̱jríñáaꞌxo̱ꞌ róꞌ.
34A̱ꞌkhue̱n Jesús niꞌthúún xa̱bo̱ judío̱:
―Na̱tha̱nꞌ-jmbalaꞌ rí jámba̱a̱ tsí naꞌne aꞌkhán, yumbáá waꞌtsi̱i̱ drígo̱o̱ aꞌkhán ñajuu̱n. 35Jamí yumbáá tsí waꞌtsi̱i̱ ra̱ꞌkhá jámba̱ miꞌtsú xtáa̱ ná guꞌwóo ña̱ꞌñii̱, i̱ndo̱ó máꞌ tsí ñajuun ada̱ guꞌwáá jámba̱ miꞌtsú xtáa̱ ikhín. 36Ikhaa jngó, xí A̱dée Ana̱ꞌlóꞌ gáꞌne-jríñáaꞌlaꞌ, gakon rí nijríñáaꞌlaꞌ xúꞌkhue̱n rá. 37Nda̱yo̱o̱ máꞌ rí i̱jín-xíñu-egoo Abraám ñajwanlaꞌ, xómáꞌ ikháanꞌlaꞌ nandalaꞌ gúxíñu̱ú numuu rí tsíyalaꞌ gúdrígú rí na̱sngáálo̱ꞌ. 38Ikhúúnꞌ na̱tha̱nꞌlaꞌ ga̱jma̱á numuu rí ndi̱yo̱o̱ rí naꞌne Tátéꞌ, xómáꞌ ikháanꞌlaꞌ nu̱ne̱laꞌ rí ni̱dxawíínlaꞌ naꞌthán ana̱ꞌlaꞌ.
39A̱ꞌkhue̱n ni̱riꞌña xa̱bo̱ judío̱:
―Táta̱ Abraám ñajuun tátiáxo̱ꞌ.
Jamí Jesús niꞌthúu̱n:
―Xí gakon rí táta̱ Abraám ñajuun tátiálaꞌ, mu̱ne̱laꞌ rí neꞌne Abraám. 40Xómáꞌ ikháanꞌlaꞌ nandalaꞌ gúxíñu̱ú, maske máꞌ ni̱tha̱nꞌlaꞌ rí gakon, rí ni̱dxawuun niꞌthán Ana̱ꞌlóꞌ. ¡Ni miꞌtsú táꞌne Abraám rí nu̱ne̱ ikháanꞌlaꞌ! 41Ikháanꞌlaꞌ nu̱ne̱laꞌ xómá naꞌne ana̱ꞌlaꞌ.
A̱ꞌkhue̱n xa̱bo̱ judío̱ nitháa̱n Jesús:
―Ra̱ꞌkhá i̱mba̱a̱ꞌ xa̱bo̱ ñajuun ana̱ꞌ ikháanꞌxo̱ꞌ, rí mbáwíi Ana̱ꞌlóꞌ Mikhuíí ñajuun ana̱ꞌxo̱ꞌ.
42Xómáꞌ Jesús niꞌthúu̱n:
―Xí gakon rí Ana̱ꞌlóꞌ Mikhuíí ñajuun ana̱ꞌlaꞌ, ma̱galaꞌ ju̱yo̱ꞌ, numuu rí ikhúúnꞌ niꞌkhalo̱ꞌ ná xtáa̱ Ana̱ꞌlóꞌ. Táya̱ idxu̱ꞌ ikhúúnꞌ rí niꞌkhalo̱ꞌ, rí ikhaa̱ nixúngúu̱nꞌlo̱ꞌ. 43Náá numuu kajngó tsífraꞌa̱ꞌlaꞌ rí na̱tha̱nlo̱ꞌ róꞌ. Numuu rí tsíyalaꞌ gúdrígú rí na̱sngáálo̱ꞌ. 44Ikháanꞌlaꞌ ñajwanlaꞌ i̱ji̱in gixa̱a̱, ikhaa jngó nandalaꞌ gúne̱ rí nandoo̱ ikhaa̱. Asndo nákhí ni̱gi̱ꞌdu̱u̱n-muu, na̱gu̱díin xa̱bo̱ tsí gixa̱a̱, jamí tsíꞌthée̱n rí gakon, numuu nda̱a̱ rí gakon ná xo̱xto̱o̱. Ído̱ naꞌthée̱n, tsíyoo maꞌthée̱n rí gakon numuu rí xa̱bo̱ mi̱nduwaa ñajuu̱n. Ikhaa̱ ñajuu̱n anu̱ú xa̱bo̱ tsí nune̱-nduwa. 45Jamí ikhúúnꞌ tsúún na̱tha̱nꞌlaꞌ rí gakon, tsínimba̱ꞌlaꞌ ju̱yo̱ꞌ. 46Nimbáa tsí ikháanꞌlaꞌ ma̱xáxóo maꞌthán rí gúꞌdo̱ꞌ aꞌkhán. Xí ikhúúnꞌ na̱tha̱nlo̱ꞌ rí gakon, náá numuu kajngó tsínimba̱ꞌlaꞌ ju̱yo̱ꞌ róꞌ. 47Tsí ñajúún i̱ji̱in Ana̱ꞌlóꞌ, nu̱dxawíi̱n ajngóo Ana̱ꞌlóꞌ. Ikhaa jngó tsídxawíínlaꞌ ajngóo Ana̱ꞌlóꞌ ikháanꞌlaꞌ, numuu rí ra̱ꞌkhá i̱jii̱n ñajwanlaꞌ.
Tsáa phú ñajuun Jesús
48A̱ꞌkhue̱n xa̱bo̱ judío̱ nitháa̱n Jesús:
―Gakon máꞌ i̱tha̱nxo̱ꞌ rí xa̱bo̱ i̱ndi̱i̱ Samária̱ ñajwaanꞌ, jamí xtaꞌdáá gíñá ꞌguéen.
49Xómáꞌ Jesús niriꞌñúu̱:
―Na̱nguá gíꞌdúún nimbáa gíñá ꞌguéen, rí Tátéꞌ i̱ya̱-makuulo̱ꞌ. Xómáꞌ ikháanꞌlaꞌ tsíya̱-makuꞌlaꞌ. 50Ra̱ꞌkhá ikhúúnꞌ nda̱ꞌyá rí ma̱gu̱ma-mbu̱únꞌ. Xtáa mbáa tsí nandoo rí ma̱gu̱ma-mbu̱únꞌ, jamí ikhaa̱ naꞌne-mbánuu̱ ga̱jma̱á numúú xa̱bo̱. 51Na̱tha̱nꞌ-jmbalaꞌ rí ni miꞌtsú ma̱xájáñuu tsí naꞌne-mbánuu rí na̱tha̱n ikhúúnꞌ.
52A̱ꞌkhue̱n xa̱bo̱ judío̱ nitháa̱n Jesús:
―Xúge̱ꞌ rí ndu̱ya̱á májánxo̱ꞌ rí gíñá ꞌguéen xtaꞌdáá rá. Nijáñuu máꞌ táta̱ Abraám, jamí mbá xúgíin tsí ni̱rawíjnga̱a ajngóo Ana̱ꞌlóꞌ, xómáꞌ ikháánꞌ narathán: “ni miꞌtsú ma̱xájáñuu tsí naꞌne-mbánuu rí na̱tha̱n ikhúúnꞌ”. 53Á phú i̱tha̱án gíꞌdoo numaaꞌ ikháánꞌ xó rí tátiálóꞌ Abraám rá dxe̱ꞌ. Ikhaa̱ nijáñuu̱, jamí tsí ni̱rawíjnga̱a ajngóo Ana̱ꞌlóꞌ mangaa. Tsáa phú ñajwaanꞌ ikháánꞌ i̱ju̱ma̱a̱ꞌ róꞌ.
54Xómáꞌ Jesús niriꞌñúu̱:
―Xí ikhúúnꞌ na̱tha̱n máján numa-mina̱ꞌ ná inalaꞌ, nda̱a̱ rí gíꞌdoo numuu rúꞌkhue̱n. Jmína̱a̱ꞌ máꞌ Tátéꞌ ñajuun tsí naꞌthán rí máján ga̱jma̱á numuꞌ ná inalaꞌ, ikhaa tsí nu̱tha̱nlaꞌ rí Ana̱ꞌlaꞌ ñajuun, 55maske máꞌ tsíne̱-nuwii̱nlaꞌ. Xómáꞌ ikhúúnꞌ na̱ne̱-núwíi̱nlo̱ꞌ. Xí ma̱tha̱nlo̱ꞌ rí tsíne̱-núwíi̱nlo̱ꞌ, ma̱ꞌne xtutúúnꞌ xómá ikháanꞌlaꞌ. Gakon rí na̱ne̱-núwíi̱nlo̱ꞌ jamí na̱ne̱-mbánuu rí naꞌthée̱n. 56Táta̱ xi̱ꞌñálaꞌ Abraám maphú nidxuu̱ rí mba̱ꞌyoo̱ mbiꞌi rí ma̱ꞌkhalo̱ꞌ ná numbaa. Ndiꞌyoo̱ ne̱ jamí phú nidxu a̱kuii̱n.
57A̱ꞌkhue̱n xa̱bo̱ judío̱ nitháa̱n Jesús:
―Asndo ni xóó máꞌ tsíꞌne a̱jma̱ skíñú gu̱wa̱ꞌ (50) tsiguaaꞌ, jamí narathán rí nithayáá Abraám ráanꞌ.
58Xómáꞌ Jesús niꞌthúu̱n:
―Na̱tha̱nꞌ-jmbalaꞌ rí ikhúúnꞌ ñajunꞌ tsí xtáá máꞌ nákhí rí ni̱gu̱maa Abraám.
59A̱ꞌkhue̱n xa̱bo̱ judío̱ ni̱ra̱tuu̱n itsí muxnáa̱. Xómáꞌ Jesús nirkaꞌu-mine̱e̱ꞌ, jamí nigájnaa̱ ná awúun guꞌwá dxákuun, ni̱ke̱e̱ i̱mba̱ janíí.
ទើបបានជ្រើសរើសហើយ៖
Juáán 8: tcf
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2025 SIL Global. Creative commons license CC BY-SA.
