Juáán 6
6
Jesús naxníꞌtsúún mbá witsu míl wáa xa̱bekha
(Mt 14.13-21; Mc 6.30-44; Lc 9.10-17)
1I̱mba̱ nda̱wa̱á ni̱ka̱ Jesús ná i̱mba̱ kri̱doo ñañuu a̱pha̱ rí mbiꞌyuu Galiléa̱, ikhaa máꞌ ne̱ mbiꞌyuu Tibéria̱s mangaa. 2Maphú mbaꞌiin xa̱bo̱ igóó tsu̱du̱u̱, numuu nduyáa̱ rí phú wáá xó rí naꞌne-thanúu̱ tsí najáñúú. 3A̱ꞌkhue̱n nitsimuu Jesús mbá júba̱, jamí ni̱gi̱ꞌi̱i̱ gajmíi̱ tsí naꞌsngúu̱n. 4Nangiyuu máꞌ ndxa̱a̱ Páskua̱ mbiꞌi rúꞌkhue̱n, ndxa̱a̱ rí nu̱ri̱ya̱ꞌ xa̱bo̱ judío̱.
5Ído̱ niyaxe̱ Jesús jamí ndiꞌyoo̱ rí maphú mbaꞌiin xa̱bo̱ niguwá tsu̱du̱u̱, a̱ꞌkhue̱n niraxu̱u̱ Felípe̱:
―Náá gúꞌtse̱lóꞌ guma rí mu̱pho̱ mbá xúgíin xa̱bo̱ tsíge̱ꞌ róꞌ.
6Niraxu̱u̱ ríge̱ꞌ Felípe̱ kajngó mba̱ꞌyoo̱ dí gáriꞌña, xómáꞌ Jesús ndaꞌyoo̱ mújúu̱n máꞌ rí ma̱ꞌnii̱.
7Xómáꞌ Felípe̱ niriꞌña:
―Ni ma̱xáꞌngo̱o̱ rí mbá gu̱wa̱ꞌ skíñú (200) mbúkha̱a̱ ajwa̱nꞌ#6.7 Mbúkha̱a̱ ajwa̱nꞌ rúꞌkhue̱n mbiꞌyuu «denário̱» ná ajngáa griégo̱. Mbá mbúkha̱a̱ rúꞌkhue̱n nadaa numuu xa̱bo̱ rí nañajun mbá mbiꞌi. rí me̱ꞌtse̱ mbaꞌa guma, kajngó ma̱janáá lájwíin mbámbáa xa̱bo̱ me̱kho̱.
8A̱ꞌkhue̱n mbáa máꞌ tsí naꞌsngúún Jesús, tsí ñajuun dxíyo̱o̱ Simón Pédro̱, ikhaa tsí mbiꞌyuu Andrés niꞌthán: 9«Ge̱jyoꞌ xtáa mbáa dxáma tsí jago̱ witsu guma sebáda̱ jamí a̱jmi̱i i̱gi̱ꞌ. Dí lá gáꞌngo̱o̱ rúꞌkhue̱n rí mu̱pho̱ xa̱bo̱ tsí mbaꞌiin rá».
10Jesús niꞌthúún tsí naꞌsngúún: «Gu̱thu̱únlaꞌ mbá xúgíin xa̱bo̱ rí ma̱trigi̱in».
A̱ꞌkhue̱n nitrigi̱in xa̱bo̱ tsu̱du̱u̱ ra̱xa̱, numuu rí phú ríga̱ ra̱xa̱ ikhín. Naꞌne máꞌ xí mbá witsu míl (5 000) wáa xa̱bekha nitrigi̱in. 11Jesús niwatuun guma rúꞌkhue̱n jamí niríguu̱ la gamaku inuu Ana̱ꞌlóꞌ. Wámba̱ rúꞌkhue̱n nixpíꞌtháa̱ ne̱, nixnúu̱ ne̱ tsí naꞌsngúu̱n. Xómáꞌ tsí naꞌsngúu̱n ni̱xpi̱ꞌtha̱a̱ ne̱ kajngó mu̱pho̱ xa̱bo̱ asndo wátha̱ máꞌ neꞌne a̱kui̱ín. Xúꞌkhue̱n máꞌ niꞌnii̱ ga̱jma̱á i̱gi̱ꞌ mangaa.
12Ído̱ wámbu̱ún xa̱bo̱ nipeꞌtso ni̱gi̱ꞌmúú, a̱ꞌkhue̱n Jesús niꞌthúún tsí naꞌsngúún: «Gu̱raxi̱ilaꞌ xkuꞌxí rí nipíduun, kajngó ma̱xága̱díí nitháan». 13Tsí naꞌsngúún Jesús ni̱raxi̱i xkuꞌxúu rí witsu guma sebáda̱ rí nipíduun niꞌpho̱ xa̱bo̱, jamí nene̱-matíi̱ mbá gu̱wa̱ꞌ i̱jma̱ (12) ixtu. 14Ído̱ ndiyáá xa̱bo̱ rí phú wáá rí neꞌne Jesús, a̱ꞌkhue̱n ni̱gíꞌdíi̱n nithee̱n: «Maphú gakon rí ikhaa tsíge̱ꞌ ñajuun tsí na̱gu̱wíjnga̱a ajngóo Ana̱ꞌlóꞌ, tsí wéje̱ máꞌ rí maxúngua̱a̱ꞌ Ana̱ꞌlóꞌ ná numbaa».
15Xómáꞌ Jesús, ído̱ ndiꞌyoo̱ rí nuꞌgí-mijná xa̱bo̱ rí magóó juya̱a̱ ga̱jma̱á tsiakhe̱ rí ma̱nindxu̱u̱ thúngaa, a̱ꞌkhue̱n ni̱ke̱e̱ mbáwíi̱ mbu̱júu̱ ná inuu júba̱.
Jesús na̱ka̱ nakhúu ná inuu ñañuu a̱pha̱
(Mt 14.22-27; Mc 6.45-52)
16Ído̱ neꞌne wakhíí niwáta̱an tsí naꞌsngúu̱n ná rawuun ñañuu a̱pha̱. 17A̱ꞌkhue̱n nitsimúu̱ mbá ixe̱-rguwa, jamí ni̱gíꞌdíi̱n máꞌ na̱ki̱dii̱n rí magóo̱ ná xuajen Kapernaúm. Neꞌne jína guéño máꞌ rúꞌkhue̱n rá, jamí na̱nguá xóó ni̱ꞌkha̱a Jesús ga̱jma̱á nindxúu̱n. 18Awúun máꞌ rí na̱ki̱dii̱n, a̱ꞌkhue̱n ni̱gi̱ꞌdu̱u̱n nimbúxu̱u̱ꞌ ñañuu a̱pha̱ numuu rí phú gakhe̱ ixnúu gíñá. 19Nigóo̱ juñúu̱ máꞌ ixe̱-rguwa xí mbá witsu kilóme̱tro̱ wáa,#6.19 Ná ajngáa griégo̱ naꞌthán «25-30 estadios», jamí mbá «estádio̱» gíꞌdoo mbá 185 wáa métro̱. ído̱ ndiyáa̱ rí na̱ka̱ nakhúu Jesús ná inuu ñañuu a̱pha̱ jamí naxuꞌma-mine̱e̱ꞌ ná ixe̱-rguwa rí gatii̱n, a̱ꞌkhue̱n phú nimíñúu̱. 20Xómáꞌ Jesús niꞌthúu̱n: «¡Ikhúúnꞌlo̱ꞌ, ma̱xámíñalaꞌ!». 21A̱ꞌkhue̱n phú gagi a̱kuíi̱n ni̱dri̱guíi̱ Jesús ná ixe̱-rguwa, jamí mbégo xúge̱ꞌ ni̱ga̱nú ixe̱-rguwa jaguu̱n ná rawuun ñañuu a̱pha̱ ná nagóo̱.
Nagóó xa̱bo̱ gúꞌyáa Jesús ná Kapernaúm
22I̱mba̱ mbiꞌi, xa̱bo̱ tsí ninguanúú ná i̱mba̱ kri̱doo ñañuu a̱pha̱ ndiyáa̱ rí tsí naꞌsngúún Jesús nigúu̱n máꞌ awúun mbá ixe̱-rguwa. Jamí ni̱rmáꞌáan a̱kuíi̱n rí mbóó máꞌ ixe̱-rguwa ni̱we̱je̱ ikhín, jamí tátsimuu Jesús ma̱ꞌga̱a gajmíí tsí naꞌsngúún. 23Awúun máꞌ rúꞌkhue̱n ni̱ga̱nú mbaꞌa ixe̱-rguwa rí na̱ꞌkha̱ ná xuajen Tibéria̱s, ná mijngi nirígu̱u gamaku Táta̱ inuu Ana̱ꞌlóꞌ ga̱jma̱á numuu guma rí niꞌpho̱ xa̱bo̱. 24Ikhaa jngó ído̱ ndiyáá xa̱bo̱ rí ni máꞌ Jesús ni máꞌ tsí naꞌsngúu̱n ndawi̱in ikhín, a̱ꞌkhue̱n nitsimúu̱ mbaꞌa ixe̱-rguwa nigóo̱ ágúꞌyáa̱ Jesús ná xuajen Kapernaúm.
Jesús ñajuun guma rí jayá mbiꞌñúú xa̱bo̱
25Ído̱ niguáꞌnú xa̱bo̱ ná i̱mba̱ kri̱doo ñañuu a̱pha̱, ikhín ni̱xkamaa̱ Jesús jamí ni̱ra̱xíi̱:
―Táta̱ naꞌsngáá, nguáná ni̱dxa̱ꞌnú ge̱jyoꞌ róꞌ.
26A̱ꞌkhue̱n Jesús niriꞌñúu̱:
―Na̱tha̱nꞌ-jmbalaꞌ rí ikháanꞌlaꞌ ndu̱ꞌñúuꞌlaꞌ numuu rí nipeꞌtso asndo ni̱gi̱ꞌmalaꞌ, ra̱ꞌkhá numuu nifraꞌa̱ꞌlaꞌ rí phú wáá ndi̱ya̱álaꞌ. 27Mu̱xúñajunlaꞌ ga̱jma̱á numuu ganitsu rí ndámba̱. Gu̱ñajunlaꞌ ga̱jma̱á numuu ganitsu rí ríga̱ jámuu jamí naꞌne rí ma̱juwalaꞌ jámuu. Ganitsu rúꞌkhue̱n ñajuun rí maxnálaꞌ A̱dée Xa̱bo̱ Numbaa, numuu rí tsúꞌkhue̱n wasngájmaa neꞌne Tátéꞌ tsí ñajuun Ana̱ꞌlóꞌ rí maxná ne̱.
28A̱ꞌkhue̱n rí xa̱bo̱ ni̱ra̱xíi̱ Jesús:
―Dí jaꞌyoo mu̱ne̱xo̱ꞌ kajngó mu̱ne̱xo̱ꞌ rí nandoo Ana̱ꞌlóꞌ róꞌ.
29A̱ꞌkhue̱n Jesús niriꞌñúu̱:
―Ga̱nimba̱ꞌlaꞌ ju̱ya̱á tsí nixúngua̱a̱ꞌ, rúꞌkhue̱n iyoo Ana̱ꞌlóꞌ rí mu̱ne̱laꞌ.
30A̱ꞌkhue̱n rí xa̱bo̱ ni̱ra̱xi̱í Jesús:
―Náá lá rí phú wáá gátha̱ne̱ mbu̱ya̱áxo̱ꞌ kajngó ma̱nimba̱ꞌxo̱ꞌ ju̱ya̱a̱ꞌ rá. Dí gátha̱ne̱ rá. 31Táta̱ xi̱ꞌñálóꞌ tsí nijúwa̱ꞌ wajyúú niꞌphi̱i̱ ganitsu rí mbiꞌyuu maná ná mbaa niníí, xómá ka̱ma naꞌthán ná i̱yi̱i̱ꞌ ajngóo Ana̱ꞌlóꞌ: “Nixnúu̱ guma rí na̱ꞌkha̱ mikhuíí mu̱phi̱i̱”.
32Xómáꞌ Jesús niꞌthúún xa̱bo̱:
―Na̱tha̱nꞌ-jmbalaꞌ rí ra̱ꞌkhá Moisés nixnálaꞌ guma rí na̱ꞌkha̱ mikhuíí, rí Tátéꞌ ñajuun tsí naxnálaꞌ guma rí phú gakon rí guma rí na̱ꞌkha̱ mikhuíí ñajuun. 33Guma rí naxná Ana̱ꞌlóꞌ ñajuun tsí ni̱ga̱taa mikhuíí jamí ikhaa̱ jayée̱ mbiꞌñúú xa̱bo̱ numbaa.
34A̱ꞌkhue̱n rí xa̱bo̱ nitháán Jesús:
―Táta̱, araxnáxo̱ꞌ jámba̱ miꞌtsú guma rúꞌkhue̱n mu̱phóxo̱ꞌ.
35A̱ꞌkhue̱n Jesús niꞌthúún xa̱bo̱:
―Ikhúúnꞌ ñajunꞌ guma rí jayá mbiꞌñúú xa̱bo̱. Tsí na̱ꞌkha̱ ná inuꞌ, ni miꞌtsú náxáxki̱dxu̱u̱. Jamí tsí nanimbo̱o̱ꞌ jaꞌyeꞌ, ni miꞌtsú náxájándawoo̱. 36I̱ndo̱ó máꞌ numuu rí xómáꞌ ni̱tha̱nꞌlaꞌ jáma̱, maske máꞌ ndi̱yo̱ꞌlaꞌ, tsínimba̱ꞌlaꞌ ju̱yo̱ꞌ. 37Mbá xúgíin tsí naxníꞌ Ana̱ꞌlóꞌ, naguwée̱ꞌ ná inuꞌ. Jamí tsí naguwá ná inuꞌ, ma̱xáxkúu̱nlo̱ꞌ janíí. 38Numuu rí tágátáalo̱ꞌ mikhuíí rí ma̱ne̱lo̱ꞌ rí nandoꞌ ikhúúnꞌ, rí nigátáalo̱ꞌ rí ma̱ne̱lo̱ꞌ rí nandoo Ana̱ꞌlóꞌ, numuu rí ikhaa̱ nixúngúu̱nꞌlo̱ꞌ. 39Ríge̱ꞌ ñajuun rí nandoo tsí nixúngu̱únꞌ: rí ma̱xáne̱-mbáti̱ga̱a̱ nimbáa tsí ikhaa̱ nixníꞌ, rí ikhúúnꞌ ma̱ne̱ rí mbuyaa̱ mbiꞌñúu̱ mbá xúgíi̱n ído̱ gága̱nú mbiꞌi rí ndámba̱wóo. 40Ríge̱ꞌ ñajuun rí nandoo Tátéꞌ: rí jámba̱a̱ tsí ndaꞌyeꞌ jamí nanimbo̱o̱ꞌ jaꞌyeꞌ ikhúúnꞌ tsúún ñajunꞌ A̱dée̱, mba̱ꞌyee̱ jámuu. Jamí ikhúúnꞌ ma̱ne̱ rí mbayáa̱ mbiꞌyuu̱ ído̱ gága̱nú mbiꞌi rí ndámba̱wóo.
41A̱ꞌkhue̱n rí xa̱bo̱ judío̱ ni̱gíꞌdíi̱n nithan-ri̱ge̱e̱ numuu Jesús, numuu rí ikhaa̱ niꞌthée̱n: «Ikhúúnꞌ ñajunꞌ guma rí ni̱ga̱taa mikhuíí». 42Xáꞌnii ni̱gíꞌdi̱ín xa̱bo̱ judío̱ nithan-mijná: «Á ra̱ꞌkhá Jesús a̱dée José ñajuun tsíge̱ꞌ dxe̱ꞌ. Ikháánꞌlóꞌ nu̱ꞌne̱-nuwiinlóꞌ tátée̱ jamí nánée̱. Xáne kajngó naꞌthée̱n rí mikhuíí ni̱ga̱taa̱ róꞌ».
43Xómáꞌ Jesús niꞌthúu̱n: «Gu̱ni̱ꞌñáálaꞌ rí nu̱tha̱n-ríga̱laꞌ. 44Nimbáa xa̱bo̱ ma̱xáxóo ma̱ꞌkha̱ ná inuꞌ, xí ra̱ꞌkháa Tátéꞌ tsí nixúngu̱únꞌ na̱ꞌkha̱ jayáa̱. Jamí xúgíin tsí naguwá ná inuꞌ, ma̱ne̱ rí mbuyaa̱ mbiꞌñúu̱ ído̱ gága̱nú mbiꞌi rí ndámba̱wóo. 45Xáꞌnii ka̱ma naꞌthán ná i̱ñu̱úꞌ tsí ni̱rawíjnga̱a ajngóo Ana̱ꞌlóꞌ wajyúú: “Xúgíin mi̱ꞌsngúún gáꞌne Ana̱ꞌlóꞌ”.#6.45 Ajngáa ríge̱ꞌ na̱ꞌkha̱ ná I̱yu̱u̱ꞌ Isaía̱s 54.13. Ikhaa jngó jámba̱a̱ tsí nadxawuun jamí na̱ma̱ñuu rí naꞌsngáá Tátéꞌ, na̱ꞌkhe̱e̱ ná inuꞌ.
46»Tsítha̱nꞌlaꞌ rí xtáa mbáa xa̱bo̱ tsí ndiꞌyoo Tátéꞌ, rí i̱ndo̱ó máꞌ ikhúúnꞌ tsúún waxúngu̱únꞌ neꞌne Ana̱ꞌlóꞌ, ndi̱yo̱o̱lo̱ꞌ Tátéꞌ. 47Na̱tha̱nꞌ-jmbalaꞌ ríge̱ꞌ: tsí nanimbo̱o̱ꞌ jaꞌyeꞌ,#6.47 Ríga̱ mbá tikhu i̱yi̱i̱ꞌ griégo̱ rí wayuu ná na̱nguá i̱ꞌkha̱ ajngáa «jaꞌyeꞌ». ndaꞌyee̱ jámuu. 48Ikhúúnꞌ ñajunꞌ guma rí jayá mbiꞌñúú xa̱bo̱. 49Nákhí wajyúú táta̱-xi̱ꞌñálaꞌ niꞌpho̱ guma rí mbiꞌyuu maná ná mbaa niníí. Maske máꞌ xkuaꞌnii rá, mbá xúgíi̱n ikhii̱n nijáñúu̱. 50Xómáꞌ ikhúúnꞌ na̱tha̱nꞌlaꞌ ga̱jma̱á numuu guma rí na̱ga̱taa mikhuíí. Tsí me̱kho̱ guma ríge̱ꞌ, ma̱xájáñuu̱. 51Ikhúúnꞌ ñajunꞌ guma ndaꞌya rí ni̱ga̱taa mikhuíí. Xí mbáa gékho̱ guma ríge̱ꞌ, mba̱ꞌyee̱ jámuu. Guma rúꞌkhue̱n ñajuun xuyuꞌ, jamí ikhúúnꞌ ma̱xna̱xí ne̱ kajngó ma̱ju̱wá xa̱bo̱ numbaa».
52A̱ꞌkhue̱n ni̱gíꞌdi̱ín xa̱bo̱ judío̱ ni̱tsa̱ñu̱ú jamí nu̱ra̱xe̱-mijnée̱: «Xáne gáꞌne tsíge̱ꞌ rí maxnálóꞌ xuyuu mu̱ꞌpholóꞌ róꞌ».
53Xómáꞌ Jesús niꞌthúu̱n: «Na̱tha̱nꞌ-jmbalaꞌ, xí tsípholaꞌ xuyuu A̱dée Xa̱bo̱ Numbaa ni máꞌ tsíwanlaꞌ iꞌdiuu̱, ma̱xáxóo ma̱juwalaꞌ jámuu. 54Tsí naꞌkho̱ xuyuꞌ jamí naꞌña̱a̱ iꞌdiuꞌ, ndaꞌyee̱ jámuu. Jamí ikhúúnꞌ ma̱ne̱ rí mbayáa̱ mbiꞌyuu̱ ído̱ gága̱nú mbiꞌi rí ndámba̱wóo. 55Rí xuyuꞌ, ganitsu rí phú gakon ñajuun ne̱, jamí rí iꞌdiuꞌ, iya rí phú gakon ñajuun ne̱. 56Tsí naꞌkho̱ xuyuꞌ jamí naꞌña̱a̱ iꞌdiuꞌ, ikhaa̱ xtáa̱ jayu ga̱jma̱á nindxu̱ꞌ jamí ikhúúnꞌ xtáá jayu ga̱jma̱á nindxu̱u̱ ikhaa̱. 57Tátéꞌ tsí nixúngu̱únꞌ xtáa̱ ndaꞌyee̱, jamí ikhúúnꞌ xtáá nda̱ya̱ ga̱jma̱á numuu̱ ikhaa̱. Xkuaꞌnii máꞌ mangaa tsí naꞌkhu̱ꞌ ikhúúnꞌ mba̱ꞌyee̱ ga̱jma̱á numuꞌ ikhúúnꞌ. 58Ríge̱ꞌ ñajuun guma rí ni̱ga̱taa mikhuíí. Ra̱jáꞌnii ne̱ xómá maná#6.58 Ríga̱ mbá tikhu i̱yi̱i̱ꞌ griégo̱ rí wayuu rí na̱nguá iꞌthán «maná». rí niꞌpho̱ táta̱-xi̱ꞌñálaꞌ ná mbaa niníí, jamí nda̱wa̱á nijáñúu̱. Tsí naꞌkho̱ guma ríge̱ꞌ, ma̱xtáa̱ jámuu».
59Mbá xúgíí ríge̱ꞌ niꞌthán Jesús nákhí naꞌsngáa̱ ná guꞌwá rí na̱gi̱mbíin xa̱bo̱ judío̱ ná xuajen Kapernaúm.
Maphú mbaꞌiin xa̱bo̱ tsí naꞌsngúún máꞌ Jesús nu̱ni̱ꞌñáa̱
60Ído̱ ni̱dxawíín ríge̱ꞌ xa̱bo̱ tsí naꞌsngúún Jesús, a̱ꞌkhue̱n phú mbaꞌii̱n nithee̱n: «Phú mingíjyúu rí ma̱nimba̱ꞌlóꞌ rí naꞌsngáa̱. Tsáa gáꞌngo̱o̱ a̱kui̱in ma̱grui̱gú rúꞌkhue̱n rá».
61Ndiꞌyoo mújúun máꞌ Jesús rí xa̱bo̱ tsí naꞌsngúu̱n nuthan-ri̱ga̱ ga̱jma̱á numuu rí niꞌthée̱n, a̱ꞌkhue̱n niraxúu̱n: «Nandalaꞌ gúni̱ꞌñúꞌ ga̱jma̱á numuu ajngáa rí na̱tha̱nlo̱ꞌ ráanꞌ. 62Dí gáꞌne xí mbu̱ya̱álaꞌ rí ma̱tsima̱a A̱dée Xa̱bo̱ Numbaa ná xtáa̱ nákhí ginii rá. 63Xu̱u̱ꞌ Ana̱ꞌlóꞌ ñajuun tsí naꞌne rí ma̱ju̱wá jámuu xa̱bo̱. Tsí xa̱bo̱ numbaa ma̱xáꞌngo̱o̱ ma̱ꞌne rúꞌkhue̱n. Ajngáa rí ikhúúnꞌ ni̱tha̱nꞌlaꞌ, naꞌne ne̱ rí ma̱ꞌkha̱ ga̱jma̱á nindxa̱ꞌlaꞌ Xu̱u̱ꞌ Ana̱ꞌlóꞌ tsí naꞌne rí ma̱ju̱wá xa̱bo̱. 64I̱ndo̱ó máꞌ numuu rí júwa̱ꞌ mbá tikhuun tsí tsínimbu̱únꞌ juyeꞌ ná majña̱ꞌlaꞌ».
Xkuaꞌnii niꞌthán Jesús numuu rí asndo nákhí máꞌ ginii ndiꞌyoo̱ tsíin ñajúún tsí tsínimbu̱únꞌ juyáa̱, jamí tsáa ñajuun tsí maxnáxi̱i̱. 65A̱ꞌkhue̱n niꞌthán xóó Jesús: «Ikhaa jngó na̱tha̱nꞌlaꞌ rí asndo nimbáa ma̱xáxóo ma̱ꞌkha̱ ná inuꞌ xí tsíjanáa̱ ma̱ꞌkhe̱e̱ eꞌne Tátéꞌ».
66Asndo nákhí máꞌ mbiꞌi rúꞌkhue̱n, maphú mbaꞌiin xa̱bo̱ tsí naꞌsngúún máꞌ Jesús nithangii̱n, jamí nánguá ngrigúu̱n ga̱jma̱á nindxu̱u̱. 67A̱ꞌkhue̱n Jesús niraxúu̱n tsí mbá gu̱wa̱ꞌ i̱jmi̱i (12) niraꞌwíi̱n maꞌsngúu̱n:
―Á nandalaꞌ gúꞌgua̱aꞌ mangáanꞌlaꞌ dxe̱ꞌ.
68Xómáꞌ Simón Pédro̱ niriꞌña:
―Táta̱, tsáa lá i̱mba̱a̱ꞌ gúꞌguáxo̱ꞌ inuu rá. I̱ndo̱ó máꞌ ajngáaꞌ ikháánꞌ naꞌne rí ma̱juwaxo̱ꞌ jámuu. 69Ikháanꞌxo̱ꞌ nanimba̱ꞌxo̱ꞌ ju̱ya̱a̱ꞌ, jamí ndu̱ya̱áxo̱ꞌ rí ikháánꞌ ñajwaanꞌ Krísto̱,#6.69 Ríga̱ mbá tikhu i̱yi̱i̱ꞌ griégo̱ rí wayuu rí naꞌthán: «tsí Jaꞌwii nixúngua̱a̱ꞌ Ana̱ꞌlóꞌ». jamí A̱dée Ana̱ꞌlóꞌ tsí ndaꞌya jámuu ñajwaanꞌ.
70A̱ꞌkhue̱n niꞌthán Jesús:
―Á ra̱ꞌkhá ikhúúnꞌ ni̱ra̱ꞌwáanꞌlaꞌ mbá gu̱wa̱ꞌ i̱jma̱áꞌlaꞌ dxe̱ꞌ. Maske máꞌ xúꞌkhue̱n, mbáa tsí ikháanꞌlaꞌ xómá gixa̱a̱ jaꞌnii.
71Nákhí Jesús niꞌthán ríge̱ꞌ, naꞌthée̱n ga̱jma̱á numuu Júda̱s Iskarióte̱, a̱dée Simón, numuu rí tsíge̱ꞌ ñajuun tsí maxnáxi̱i̱ nda̱wa̱á, maske máꞌ mbáa tsí gu̱wa̱ꞌ i̱jmi̱i niraꞌwíin Jesús ñajuu̱n.
ទើបបានជ្រើសរើសហើយ៖
Juáán 6: tcf
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2025 SIL Global. Creative commons license CC BY-SA.
