Mateyo 6
6
Kuiisha makani a kupa
1A muchenjele mutatondezhi bululami bwanu ku menso a bantu kwaamba ba mubone. Naa mwachita ubo mulakubula bulumbu kuli Ishi wanu waku julu.
2“Ono naa mwapa batachite, mutaambilizhi a kulizha mpeta, mbuli bashikupaupa amenso mbubachita mu ma sinagogo a mu manzhila, balachita ubo nkubayanda kulumbaizhigwa ku bantu. Kashimpe ndamwambila abo, batambula kale bulumbu bwabo buzwile. 3Pesi naa mwapa ku batachite lyaanza lyakulumweshi litazhibi nchilyachita lyanza lyakululyo, 4Kwaamba kupa kwako kube kwa maseseke. Kuchita kwaamba Ishi wanu ubona nzhimwakachita mu maseseke, akamupe bulumbu.
Kuiisha a mupailo
5“Chiindi nimupaila, mutabi mbuli bashikupaupa amenso! Balayanda kupaila kabainvi muma sinagogo a mu manzhila kwaamba ati bababone bantu. Kashimpe ndamwambila, ba tambula kale bulumbu bwabo buzwile. 6Pesi chiindi mwayanda kapaila amunjila mu ng'anda, a kujala mulyango, a kupaila kuli Ishi wanu utaboneki. Alimwi Ishi wanu ubona zhisisilwe ulamuupa bulumbu.
7“Ono Chiindi mwayanda kupaila mutanakwindulukila kupaila, mbuli bakunze mbubayeeya kaamba ati balabanva kuli Leza wabo. Balo balayeeya ati baamba majwi aanji, balanvika kuli Leza wabo. 8Mutabi mbuli mbabo, nkambo Ishi wanu ulizhi kale nchimuyanda kamutana kulomba. 9Mbobu ono mbumwelele kupaila,
Tata esu uli ku julu
liina lyanu lya bulemu a lilemekwe,
10bulelo bwanu a buze,
luyando lwanu a luchitwe anshi ano bweenke mbuli julu.
11Tupe sunu chankulya chalyoonse.
12Tujatile kulubizha kwesu
mbuli mbotulekelela ba tulubizhila.
13Mutatunjizhi mu masunko,
pesi a mutugushe ku mubiibi.’ Nkambo bwami mbubwanu alimwi anguzu abulemu kukabe kutamani.’
14“Naa mwalekelela ba mubulubizhila, Ishi wanu uli ku julu ulakumulekelela. 15Pesi nakamutalekeleli bamwi awalo ishi wanu takamulekeleli nzhibyabi zhanu.
Kuiisha akuliimya
16“Alimwi chiindi mwana kuliimya mutanokuboneka mbuli ba shikupaupa a menso mbu bachita. Balo balazhoola machu abo kubonwa kwaamba ba laliimya, kashimpe ndamwabila, ba tambula kale bulumbu bwabo buzwile. 17Pesi chiindi mwana kuliimya, amusambe ku menso a kunana mafuta kumutwi. 18Kwaamba bantu ba tazhibi ati mulaliimya, pesi Ishi wanu boo eenka, utaboneki, alimwi Ishi wanu ubona zhichitika mu maseseke ulakumupa bulumbu.
Buvubi mukati ka julu
(Luuka 12.33-34)
19Mutabiki buvubi bwanu ano a nyika, walo munswa andala mpuzhinyonyola, kwalo uko bafumpi nku banjila akwibba. 20Pesi a mubike buvubi bwanu ku Julu, kwalo uko munswa a ndala nkuzhitanyonyoli naba mubbi ku njila a kwibba. 21Nkambo uko kuli buvubi bwanu nkukuli moyo wanu.
Mumuni wamubili
(Luuka 11.34,36)
22“Menso ndilampi lya mubili, naa menso anu kabona kabotu, mubili oonse ulazula mumuni. 23Pesi naa menso anu katali kabotu, mubuli oonse ulazula mushinzhe. Naa mumuni mulindimwe waba mushinzhe, ino mushinzhe ulaba unene buti!
Leza abuvubi
(Luuka 16.13; 12.22-31)
24Taaku muzhike winga waba aba shimalelo bobilo, inga wabula kuyanda omwi, omwi inga wamuyanda, ulakushomeka kuli omwi pesi kuli umwi takashomeki. Ono inga tosebezeli Leza alimwi a maali.
Mutalibiliki
25Ono ndamwambila ati, “Mutalibiliki a buumi bwanu naa nchishimukulye naa kunwa, naa a zha kumibili yanu naa chakusama. Amana saa buumi tabuyandiki kwiinda chakulya alimwi mubili kuyandika kwiinda zhakusama? 26Amulange bayuni bamujulu, tabashangi, naa kutebula a kubika zhakulya mumatala, pesi Ishi wanu wakujulu ulabasanina zhakulya! Saa ntamuyandiki nkwiinda bayuni? 27Saa imwe mukulibilika kwanu kuli winga wabikila kaindi kashonto kubuumi bwakwe?
28“Nkambo nzhi chimulibilika a zhakusama? Amulange malubaluba a mushonkwe mbwakomena, tasenbezi naa kulibambila zhakusama. 29Pesi ndamwaambila a mwami Solomon mu buvubi bwakwe boonse taaku nakalinga kuchite zhisani zhibotu mbuli malubaluba aaya. 30Naa mbubobo Leza mbwasamika bwiizu bwamushokwe, ubo buliko sunu alimwi jilo bwawaalwa mumulilo, saa takamusamiki kwiinda imwe, imwe nimuchite lushomo lushonto!
31“Ono mutalibiliki akwaamba ati, ‘Tula kulya nzhi?’ Naa ‘Tulakunwa nzhi’ naa ‘Tulakusama nzhi?’ 32Pesi bakunze balazhibalikila zhintu izhi zhoonse, Pesi imwe Ishi wanu waku julu ulizhi ati mulayandika kuba a zhoonse izhi. 33Anu, amutagune kulangaula bwami bwa Leza, a bululami bwakwe, zhintu zhoonse neshi akamupe. 34Abobo mutalibiliki a buzuba bwajilo, bwajilo bulakulibilika bwiine. Buzuba a buzuba bulichite mapenzhi ambubo.
ទើបបានជ្រើសរើសហើយ៖
Mateyo 6: STP
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The Word For The World International
