Mateyo 5
5
Kukambauka kwa Jesu a mulundu
1Ono Jesu nakabona mbunga wakatanta ashoonto a mulundu, waakkala anshi, amane bashichiiya bakwe bakamubunganina. 2alimwi wakatalika kubaiisha ati,
Kukomana kwanchobeni
(Luuka 6.20-23)
3“Balilelekelwe abo bachete mu Muuya,
nkambo bwami bwa ku julu mbubwabo.
4“Balilelekelwe abo balila
nkambo balakumbuluzhigwa.
5“Balilelekelwe abo baboombu mu myoyo,
nkambo balakukona nyika.
6“Balilelekelwe abo banva nzala a nyotwa yabululami,
nkambo bala kukuta.
7“Balilelekelwe abo bachite luzhalo kuli bamwi
nkambo Leza ulakubabela a luzhalo abalo!
8“Balilelekelwe abo basalala mu myoyo,
nkambo balakubona Leza.
9“Balilelekelwe abo baleta lumuno,
nkambo balakwiitwa ati bana ba Leza.
10“Balilelekelwe abo ba penzhegwa nkambo ka bululami,
bulelo bwa ku julu mbubwabo!
11Walelekwa iwe na bantu ba kutukana, ba kupenzha aku kwaamba zhi biibi zhoonse a nkambo kakuchilila ndime. 12Amusekelele a kukomana kwiindilile, nkambo bulumbu bwanu mukati ka Julu mbunene, munzhila yenka ba Shinshimi bakutaguna mbubakapenzhegwa.
Sautu a mumuni
(Maako 9.50; Luuka 14.34-35)
13Alimwi muli mbuli sautu wa nyika, pesi naa sautu wachileka kulweela, inga wababuti sautu alimwi? Tauchili sautu ubotu kusebenzezha, pesi kuusowa boo akulyatauka amyeendo.
14Muli mumuni wa nyika yoonse. munzhi uyakilwe a muludu utakonzhi kusisiwa 15Taaku muntu uyasha lilampi akubika munshi a mutaanga, pesi lila bikwa a Tebuulu kwaamba lipe mumuni bantu boonse bali mu ng'anda. 16Munzhila yeenka mumuni wanu kaumunika kubantu, kwaamba babone milimo yanu ibotu a kulumbaizha Ishi wanu uli ku julu.
Kuiisha zha mulawo wa Mozesi
17“Ono mutayeye kwaamba ndaza mukunjaya Milawo ya Mozesi alimwi anjiisho zhabashinshimi, taaku ndaza mukuikusha pesi kwizuzikizha. 18Kashimpe ndamwaabila, mpaka Julu a nyika zhikainde pesi taaku nakaba kabala kashoonto kashi kakazwe ku milawo kushikila kumamanino. 19Abobo, anu ndamwaambila, uli oonse ubika ambali nakaba kashoonto ka milawo iyi akuiisha bantu kwaamba bachite chechi, uyo ulakuba mushalizhi mu bwami bwa ku julu, pesi uyo ulemeka mulawo akuiisha bamwi ulakuba munene mu bwami bwa ku julu. 20Kashimpe ndamwambila, chiita boo kusalala kwanu kwaiinda ba maii ba milawo a ba mafalisi tamukanjili mu bwami bwa ku julu.
Kuiisha a kukalala
(Luuka 12.57-59)
21Mwakanva bantu mbubakaambilwa kaiindi ati, “Utajai, uuyo uli oonse ujaya ulakubetekwa.’ 22Pesi ndamwaabila ulioonse uukalalila mukwabo musankwa naa mukaintu ulakubetekwa. Mfumbwa uyo oonse ukalalila mukwabo musankwa naa mukaintu ulakutolwa ku nkuta inene. Mfumbwa waambila mukwabo ati, ‘Taaku mbobele iwe!’ Ulakutolwa ku nkuta yama Juuda. Mfumbwa uyo waambila mukwabo ati, ‘Uli muyozhi iwe’ ulyelele kuwaalwa mukalambwe ka mulilo. 23Abobo, naulanda kupa chipo chaako a chipaililo, amana wayeeya ati wakakulubizhila mukwanu, 24Shiya chipo chako kumpela a chipaililo, wamana uunke ulekelelane a mukwanu, amana uze upe chipo chako kuli Leza.
25“Amana mubambe kambo kufambana ashinkondonyoko kamuchiya kweenda munzhila kuunka ku nkuta. Katana akukutola kubabeteshi shinkondonyoko alimwi babeteshi kabatana kukwaba mu maanza a balindizhi inga bakuwaalwa muntolongo. 26Kashimpe nda kwambila ati, uumo tokazwi mpaka ukabbadale maali elele.
Kuiisha a chimambe
27“Alimwi mwakanva mbu chakambwa ati, ‘Utachiti chimambe.’ 28Pesi ndamwaabila, mfumbwa ulanga mukaintu a mizeezo mibiibi wachita kale chimambe anguwe mu moyo wakwe. 29Naa liinso lyako lya kululyo ndilikupa kulubizha, ligushe ulisowe, nchibotu wasowekelwa chibeela chomwi chamubili wako, kwiinda mubili oonse kuwaalwa mu gehena. 30Naa lyaanza lyako lya kululyo ndilikupa kwaamba ati kolubizha, ligushe uli sowe, nchibotu kusowekelwa chibeela kwiinda mubili wako oonse kuwaalwa mu gehena.
Kuiisha makani akulekana
(Mateyo 19.9; Maako 10.11; 12; Luuka 16.18)
31“Chakaambwa ati, ‘Mfumbwa uleka mukaintu wakwe ulyelele kumupa chipepa chitondezha kulekana.’ 32Pesi ono ndamwaabila mfumbwa uuleka mukaintu wakwe, kutaashi makani a chimambe, wamuchitizha chimambe, alimwi mfumwa wakwata mukaintu wakalekwe wachita chimaambe.
Kuiisha a zhikonke
33“Mbuli mbu mwakanva chakaambwa ku bantu bakaindi ati, ‘Utaleki kuchita nchiwakashomezha, utakonkezhi chakubeja, pesi chita nchiwakakonkezha ku Mwami naa wakonkezha.’ 34Pesi ono ndamwaambila ati, utalumbili chiindi nupanga chikonke, nakuba ku julu, nkambo chi nchuno cha Leza. 35Utalumbili nakuba anshi nkambo mpa chipumunino chamyeendo yakwe, utalumbili nakuba ku Jelusalema, nkambo ngu munzhi wa mwendelezhi munene. 36Alimwi utalumbili a mutwi waako, nkambo inga tokonzhi kushizha naa kutubya mususu nauba omwi.
37Mfumbwa nchiwaamba kachiba chakuzumina boo naa kukaka, mfumbwa nchimwaamba chiinda wawa chilazwa ku mubiibi.
Kuiisha akujolela
(Luuka 6.29,30)
38“Mwakanva mbuchakaambwa ati, ‘liinso ku liinso, alimwe liino ku liino.’ 39Pesi ono ndamwaambila, mutazholi chibi ku wamulubizhila. Naumwi wakuuma kuli chiili lyakululyo, mupe alichiili lyakulumweshi alyalo. 40Alimwi naa umwi wakutola kunkuta akukwangisha alimwi kayanda chakusama chaako, mupe achakulivumba achalo. 41Alimwi naumwi wakushinikizha kunyamuna katundu maile yomwi, enda a nguwe mamaile obilo. 42Mupe uyo ukulomba, alimwi uyo uyanda kukweleta utamukashi.
Luyando kuba shinkondonyoko
(Luuka 6.27,28,32-36)
43“Mwakanva mbuchakaambwa ati, ‘Yanda mweenzhinyoko, sulaika shinkondonyoko. 44Pesi ono ndamwaambila amuyande bashinkondonyoko, a ku bapailila ba mupenzha 45Kwaamba mube bana baishi wanu uli ku julu. Nkambo walo lizuba lyakwe lila bala ku babiibi a babotu boonse. Alimwi ulaloshela mvula kubabishi abaluleme. 46Naa mwayanda boo bamuyanda ino mbulumbu nzhi mbomunjana? Ino saa bashimutelo balo tabachiti ubo! 47Alimwi naa mula ambauzha boo beenzhinyoko, nchinzhi saa kuli nchimwachita kwiinda bamwi? nkambo abalo bamashi balachita bweenka! 48Amululame bweenka Ishi wanu waku julu mbwaluleme.
ទើបបានជ្រើសរើសហើយ៖
Mateyo 5: STP
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The Word For The World International
