प्रेशित 1
1
पवित्र आत्माआं वायदो
1ए मेराला थियुफिलुस:
आंय पेल्लोअ पुस्तक तियीं आखी गोठीइ बाप्तिमेहें लेख्यो, जे ईसु तियाआ कामोअ सुरवाती रोत कोअतू आन सिकाड़तू रोयू, 2तिये दिहे जाआं जेदिहीं तो उसे होरगाम विसाइत ने गोयू. तियाआ उसे विसाइलाआ पेल जियां प्रेशितोंहों तिये निवड़्याते तियांहां पवित्र आत्मा वाअहीं सुसना आप्यी. 3मोइलाअ फासाड़ी जाअखीलाहा पाक्का पुरावा वाअहीं सोताहा तिये तियांहां जिवतु देखाड़्यू. आन सालीही दिही जाआं तो तियांहां देखाअतू रोयू, आन देवोअ राजोअ गोठी कोअतू रोयू. 4आन जेहेलाम तें टोलू वोलीत ओते, तेहेलाम तिये तियांहां आदेश आप्यू के, “येरुसालेम होयरोह मा सोड़हा, पोन बाह्हाआ तिया वायदाहा पुरो ओविइलाआ वाट जोवते रोजा, जों आंय तुमुहूं कोताप्योहो. 5योहाने तोम पाअयों वाअहीं बाप्तिस्मा आप्यो, पोन थोड़ाक दिहोम तुमाआं बाप्तिस्मा पवित्र आत्मा वाअहीं ओवे.”
ईसुउ होरगाम जाअलोअ
6जाहां प्रेशितहों ईसुउरी एक्ठा ओवा, तेहेलाम तियाहा फुशो, “प्रभु, तू यीज वेले फाशुउ इस्राएलोह राज वापिस आपी देवाड़ही के?”
7ईसु तियांहां कोयो, “तियीं वेलेहे, नेत तियां कालोहो जाइंलोअ तुमाआं काम कायनाहां, जियांहां बाह्हे सोताआज आधिकारो वाअहीं ठरवीत मिक्योहो. 8पोन जेहेलाम पवित्र आत्मा तुमापोअ आवे, तेहेलाम तुमुहूं सेक्ती जोड़े; आन येरुसालेम, आखा यहुदीयाम, शोमरोन इलाखामेहें, आन धरतीइ सेवट जाआं तुमू माआं साक्शीदार बोणहा.” 9ओं कोत कोइत तो तियांआं देखते देखतेज उसे विसाइत गोयू, आन वादले तियाहा तियांआं नजरेम रोत टापित लेदू.
10तियाआ जाअलोअ वेले जेहेलाम तें जुगोअहें एक सारकेज पालित रोयेते, तेहेलाम पाला, बेन माटी पांडे साअके पोवित रोल्या तियांआं जागे आवित उबा रोया, 11आन कोयो, “ए गालीलवाला, तुमू काहा जुगोअहें पालतेहे? ओज ईसु, जो तुमाआं जागे रोत होरगामेहें विसाइत गोयुहू, जेहें कोइत तुमू तियाहा होरगामेहें जात्लाहा देख्युहू, तेहेंज कोइत तो फाशुउ वापिस आवनारु होय.”
यहुदाआ जागापोअ बिहीरा सेलाआ निवड़
12तेहेलाम प्रेशितहों एकदू किलो मिटर एतीही सेटे जेयतुन नावोअ डोगोपोअ रोत येरुसालेम होयरोम वोलीत आया. 13जाहां ते तिहीं पोत्या, ताहां तियी उसेए एकी खुलीमेहें गोया, जिहीं पेत्र, योहान, याकोब, आंद्रिया, फिलीप, थोमा, बार्थलमय, मत्तय, आल्फेयोअ पोर्यू याकोब, शिमोन जेलोतेस आन याकोबोअ पोर्यू यहुदा ए रोताते. 14ते आखा आन थोड़ीक बोईं, ईसुउ आयही मरिया आन ईसुउ आखा पाही नेहें मिलीत एक मोन ओत कोइत एक सारखे प्रार्थना मेहें लागीत रोये.
15ताहां थोड़ाक दिहोअ फासाड़ी विश्वासी पाव्हीइलाआं विसमेहें जें एक होवेन विही जोएं एतेहे ओते, तियांम पेत्र उबू रोत कोइत कोनु वोल्यू, 16“ए माआं विश्वासी पाव्हीइला, ईसुहू तोइत लेत जानाराहां वाट देखाड़नारा यहुदाआ बाप्तिम पवित्र आत्मे दाविदोअ मुखोम रोत जों भविश्य पेलुज रोत कोयोतो, तों पुरो ओवीइलोअ गरज ओती. 17तो ते आपामेर्युउ एक ओतू, आन यी सेवामेहें सामिल ओवीइलाआ वाटू तियाहा बी जोड़्युतो.”
18यहुदा खाराब कामायी वाअहीं एक खेत वेसातो लेदो, आन निसे मुंड कोइत पोड़्यू, आन तियाआ पोटू फुटीत गोयू, आन तियाआ आखे आते निहींत गोये. 19ए गोठ आखा येरुसालेम वालाहां मुंदू पोड़ीत गोयी, आन तिया खेतोअ नाव तियांआं बाशामेहें “हकलदमा” मोन्ज्ये “रक्ताआ खेत” पोड़ीत गोयो. 20भजनोअ पुस्तकोमेहें एहें कोइत लेखाअयोहो के,
“तियाआ कोअ उजड़ीत जाअहूं जोवे,
आन तियामेहें कोडोज ने रोअहूं जोवे;”
आन एहेलोहो बी लेख्योहो के,
“तियाआ जागू एखु बिहीरो लेत लेअहूं जोवे.”
21“तियाहा काजे जेताहा दिही जाआं प्रभु ईसु आमाअरी आवतु जातु रोयू, मोन्ज्ये योहानोअ बाप्तिस्माआं परसारोअ वेले रोत ते तियाआ आमाअरी रोत उसे विसाइत जाअलोअ दिही जाआं, जे माटी बोराबर आमाअरी रोया, 22तियामेहें रोत एक माटी आमाअरी ईसुउ जिवीत उठीइलाअ साक्शीदार बोणुहूं जोवे.”#मत्तय 3:16; मार्क 1:9; लुक 3:21; मार्क 16:19; लुक 24:51
23ताहां तियां बेन जोओंहों उबा कोअया, तिहींमेएं एक होय योसेफ, जियाहा बरसब्बास बी कोतेहे, तियाआ कोर्योअ नाव यूसतुस होये, आन दुसरु होय मत्तिया. 24आन ए प्रार्थना कोअयी, “ए आखाआ मोने जांअनारा प्रभु, ओं देखाड़, के यां बेनुमेहें रोत तुमे कोडाहा निवड़्युहू, 25मोन्जे तो या प्रेशितोअ जागू लेये, जो जागू यहुदा सोड़ीत कोइत तियाआ जागे जातु रोयू.” 26तेहेलाम तियां बेनू जोओंअ बाप्तिम सिट्टी टाक्यी, आन तेहलाम सिट्टी मत्तियाआ नावोपोअ निहींयी. तिहीं वाअहीं तो तियां ईग्यार प्रेशितोंअरी गोणाअयु.
ទើបបានជ្រើសរើសហើយ៖
प्रेशित 1: NST25
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The Noiri-Bhil Bible ©The Word For The World International and Noiri-Bhil Translation Samiti, Dhadgaon, Maharashtra, India, 2025.
