LUK - NUMANA 3
3
Yɔɔna ne su aneshir ne na ankɔŋ
1Ne se kɛ wur ane tuŋ ne gli ngɔŋ kɛ Kɛsar Tiberiya, Buntus Bilatus agli Yahudiya, Hiridus ayi itum ne Galili, izumen ane Filibus a gli Ituniya bene Tarakunitas, Lisaniyas a yi itum ne Abiliya. 2ne mkpaŋ keŋ ndi Hannas bene kayafa aba ayi angɔŋgɔŋ abɛ na ndum kɛ Arik, Arik ne lɛ bene Yɔɔna izu Zakariya ne zizik. 3Ne tsin itun yi Jodan, te bla lɛ kɛ Arik te na su aneshir na sak kɛ Arik te bɛ duŋ na ki mimin te bɛ zuk ba shur. 4Ndi ne cɛr ne mplɛ kɛ cɛr kɛ Ishaya ne mplɛ shar yi Arik:
<<Ikɔr kɛ nuŋ zhɔ ne zizik,
<Naa zhin Arik ankɔŋ,
Na zhin ankɔŋɔ ne nab.
5Ate ku andǝgǝlɛk bɔbɔk,
Ate zir igbu bɔbɔk.
Ate nab nkuŋkɔŋ ayiŋ ndi ne vǝk,
Kuŋkɔŋ yi amgbɔk bǝ kɔ.
6Aneshir bɔbɔk ate yik ta shur ye Arik.>>>
7Yɔɔna ne di ntsan aneshir ndi aru nyɛ te wa bǝ su ba, <<Izhineba ane wa! Ŋɔwa ne gbaŋ zhin atɔŋ te zhin klu mfu kɛ ŋyɛ? 8Nazhin ki didik ndi te tsar duŋ zumimin min. Kǝr zhin bɛ di akpamin, <Tayi ne tetɛɛ amɔr ndi ai Ibrai.> Fe mblazhin ni min mkpaŋ yiŋɛ Arik atei Gli amumun gli ruu Ibrai. 9Ne ka tsɔm angen a sak ne kuŋkun, fe kuŋkun keŋ ndi ba te dɔ ba ate tsɔm kɛ tyak zhɔk ne lu.>>
10Aneshir aribu te di, <<Aye nii ta tei nai?>>
11Yɔɔna adi ba, <<Waŋ ndi ate yi ne nkluklu me ya bɛ baŋ azhiin nek Kpa maa ndi ba yime ne kǝ ba, ben waŋ ndi ate yi ne kili bɛ na mee.
12Abɛ ta gandu ne nyɛ te bɛ su ba. <<Ne tsar,>> Arib, <<Anii ta tei na?>>
13A diba. <<Duŋ ta naŋ zhin kiyiŋ ndi ne di zhin bǝ ta ba,>>
14Abɛ kpaakpa na rib bu te di, <<taba mɔryime tate na kikin?>>
Yɔɔna a di ba, <<Duŋ ta zhin azɔb bene abɛ lalɛ bai ki yi ŋɔk min bǝ mla zhin.>>
15Aneshir a klikli te na shur ayi te na lɛ susun men ka Yɔɔna wa yi Kristi me. 16Yɔɔna ne bla ba bɔbɔk mǝne, <<Me su zhin ne mashir. Amɛ waŋ ndi ayi ne mgbyamgbyaŋ anaŋ me ate ŋyɛ, bam tei zuk a kpaza maa yir ba. Ate su zhin ne izhu tsetser ben lu. 17A gli mumu kɛ zee ne ŋɔk maa ate zee ki didik abiŋe a shur ne wun, fe te vu atunturɔ ashur ne lu kɛ yaŋ rim.>> 18Yɔɔna ne bla lǝlɛ tetɛk tena bla lɛ didik kɛ Arik.
19Ankyak ndi Yɔɔna ne vee Hiridus ne ta Hirudiya, iwa zumen, bene kiki mimin ndi ne nayi, 20Hiridus ne biŋ kiyiŋɛ, te vuŋ Yɔɔna aku ne jaru.
Yɔɔna ne Su Yesɔ
21Ndi Yɔɔna ne su aneshir bɔbɔk ne sak kɛ Arik, ne na su Yesɔ mayi. Fe ndi ne zin ben Arik, ishu ne bu 22Ankyak izhu tsetser ne zǝǝ sɔŋ ne kpa maa ndi angu. Ankyak kɔr rɛ shu tedi: <<Waŋa ayi zu muŋ, me nyeru; me ne tanyɛmɛ bene bɔu.>>
Nga ŋli kɛ Yesɔ
23Yesɔ ne te ase sɔk tar te she vuŋ ndum maa. Ne yi vǝvǝn, ne yik tedi, ayi zu Yusuu,
Izu Heli, 24izu Mata,
Izu Levi, ne ŋli Melki,
Izu Janai, ne ŋli Yusuu,
25Izu Mataya, ne ŋli Amɔs, izu Nahum, ne ŋli Esli, izu, 26izu Maat, ne ŋli Matayas, izu Semei, ndi a yi zu Josek, izu Joda, 27ne ŋli Joanan, waŋ ndi Rhesa ne ŋliu, izu Zerubabɛl, izu shɛtiyel, ndi Neri ne ŋliu, 28Izu Melki, ne ŋli Addi, izu kɔsam, izu Elmadam, waŋ ndi Er ne ŋliu, 29Izu Joshuwa ne ŋli Eliazer, izu Jorim, izu Matat, ne ŋli Levi, 30izu Simɔn, waŋ ndi Yahuza ne ŋliu, izu Yusuu, izu Yonana, ŋli kɛ Eliyakim, 31Izu Malaya, waŋ ndi Mainana ne ŋliu, ŋli kɛ Matata, izu Natan, ŋli kɛ Doda 32izu Yese, izu Obida, ŋli kɛ Boaza, waŋ ndi Solɔmɔn ne ŋliu, izu Nashan, 33Nashan ayi zu Aminadab, ndi ayi zu Aram, izu Hesruna, ne ŋli Feresa, ndi ayi zu Yahuza. 34Yakubu ayi zu Ishaku ne ŋli Ibrai, izu Tera ne ŋli Nahor. 35Nahor ayi zu Serug, ne ŋli Reyu, izu Feleg, di ayi zu Ebɛr, Ebɛr ayi zu Shela, 36Shela ayi izu Kena izu Afashak, Afashak ayi izu Shem, Shem ayi zu Nuhu ndi ayi zu Lamek, 37ne ŋli Metusela, ndi ayi zu Anuhu, ne ŋli Jare, izu Mahalɛl, waŋ ndi ayi zu Kenan, 38Kenan ayi zu Enosh, izu Shitu, ne ŋli Ademu, Ademu Arik ne nau.
ទើបបានជ្រើសរើសហើយ៖
LUK - NUMANA 3: NAA
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The word for the World International and The word for the World Nigeria
