LUK - NUMANA 4
4
Ne ten Yesɔ
1Yesɔ, ne shak ne Izhu Tsetser, ne kama nyak rɛ nek ne Urdu, Izhu ne gliu te kɔmɔ ne zizik, 2ne te bɛr sɔk nas ndi shetan ne zen tenu, bane li kinuŋ ba ne bɛr sɔk nas te zen ben te kpa anu ni klɛtu mɔ jɔŋ ne vuŋu.
3Shetan ne diu, <<Teyi ndi uyi zu Arik, kam kpaŋ te bɛ yi borodi.>>
4Yesɔ adiu, <<Ne cɛr te di, neshir bate yi tsitsir ne borodi ankyak ba.>>
5Shetan ne gli Yesɔ te kɔmɔ ne shushu te tsa ru kiki yi gɔŋmimi. 6Fe te diu, <<me te nugu kiki yiŋɛ bɔbɔk, ne nǝm ayi bɔbɔk, me te na nek waŋ ndi ne tanyɛmɛ bene bɔu. 7Utǝ zǝǝ kur mǝ, bɔbɔk kiyiŋ teyi mi.>> 8Yesɔ adiu, <<Ne cɛr te di: <Zǝkur Arik ami te na zǝu ankyak.>>>
9Shetan ne gliu te kɔmɔ ne Urshelima te duŋu yuŋ shu kɛ Akabaŋkɔŋ. Te diu, <<Te yi ndi uyi zu Arik,>> <<Tuk zhaku ne mimi. 10Tǝ ne cɛr te di, <Arik atei duŋ abɛ shar amaa abɛ glǝu zǝǝ.> 11Tena di, <Atei glǝu nǝ shu ne ŋɔk amen tǝ duŋ kǝr ila za mi bǝ tar nǝ mkpaŋ ba.>>>
12Fe Yesɔ adiu, <<ne di: <Kǝr bɛ ten Arik ami ba.>>>
13Ndi shetan ne klɛ ten Yesɔ ne kama tibɛ te duŋu ne kpaŋ watsɔb.
Ne kyak Yesɔ ne Nazara
14Yesɔ ne kama kɔmɔ ne Galili ne mgbyamgbyaŋ kɛ izhu tsetser, fe lɛ maa ne shak kɔte me ne ntuno. 15Ne zin tsar ne Akabaŋkɔŋ, kɔte ŋɔwa ne gbaru asak.
16Fe ne gar Nazara, ndi ne tǝ ngɔŋ amɔ, fe ne bɛr Sɔŋ sik ne gar akaba, ndi na mǝne. Fe alu akli te bla lɛ kɛ Arik. 17Ankyak ne baŋ icɛr yi Ishaya ne bla shar yi Arik anugu ta Gli na ŋɔk ma. Ndi ne bui, ne yik akpa awaŋ ndi ne cɛr te di:
18<<Izhu yi Arik iyi bene bɛm,
Amɛ ndi ne ka shur me anyɛ tu
Te bɛ mbla lɛ didik bene bɛ yaŋ ki yi gɔŋmimi.
Ne shar me te me bla abɛ kur ne jaru ilɛ kɛ men,
Te na duŋ abɛ amfik ayik,
Te bɛ zuk abaŋ ndi ne kpa ba shur,
19Abɛ na bla ne ise kɛ Arik nyɛ ta aneshir zhɔk.>>
20Fe aŋyen icɛre, te baŋǝ nek a baŋ ndi ne ye amkpama te zie sɔŋ. A bɛ baŋ ndi ayi ne Akaba ma ne shur Yesɔ ayi, 21akɔ diba te di, <<Aliŋ cɛr yiŋɛ ne shaga ne wɔ atɔŋɔ amin.>>
22Bɔbɔk mǝne ne bla lɛ didik ne tu maa te na sak aŋɔk nenu ne lǝlɛ ndi ne rurɛ anu maa. Arib te di, <<Waŋ ba yi zu Yusuu kai?>>
23Yesɔ adi ba, <<Iye mee izhin tei blam nkanlɛ yiŋɛ: <Ine na kǝka, na tu mi! Izhin te na dim na ta iki yiŋ ndi tane wɔ une nayi ne kafanahum.>>>
24<<Me bla zhin lɛ didik,>> te di, <<Ne bla shar ayi Arik ba te tau ne tun ma ba. 25Mbla zhin te di amba baŋ ndi alulum amen ne ku tetɛk ne Isrela ne kpaŋ kɛ Iliya, Ndi alu bane ku ba a se me tar ne hwa tani fe ijɔŋ ŋgon ne vuŋ ba bɔbɔk ne ntuno. 26Ndi amɛ bane shar Iliya bene nuŋ ba, ne duŋɔ gar ben wa nuŋ ndi lu maa ne ku ne Zarifat ne ntun yi Sidon. 27Nǝ kpaŋa abɛ amgbyak aŋɔk ne Isrela a klɛ tetɛk ne kpaŋ kɛ Elisha ne bla shar yi Arik, ne me nuŋ ba ne rɛ ba ai Naaman a wɔ nǝ Suriya ankyak.>>
28Ndi aner abaŋ ndi ayi ne akaba ne wɔ me te te mfu ngɔŋ. 29Ne lu, te yaru agli rumɔ ne ntuno, fe te gliu te kɔmɔ ne igbu ndi ne me tun anyaŋǝ. Te bɛ turu atyak azhɔk. 30Ankyak Yesɔ ne zǝ min ntsan aneshir te naŋadɔ.
Yesɔ ne gli izhu mimin agli rumɔ
31Fe ne zie gar kɛ Kafanahum, ne tun yi Galili, ne bar sɔŋ sik te zen tsar aneshir. 32Ne sak aŋɔk ne ne ndi ne wɔ tsar maa, duŋ tsar ma yi mgbemgbeb.
33<<Ne min Akabaŋkɔŋ ner nuŋ ndi anerim ne yir kpa maa, ndi ayi ne izhu mimin. Ne zhin ne kɔr ngɔŋ te di, 34<<Kwui! Uwɔb anii bene bɛta, Yesɔ ne Nazara? Ne nyɛ ŋlɔk tei? Me ne zhi uyi ŋɔwa uyi tsetser ne Arik!>>
35Yesɔ adiu, <<ku anu!>> <<Ru ne kpa kɛ ner waŋa!>> Ankyak anerime abaŋ nɛrɛ ŋur ne mimi ne ti kɛ aneshir bɔbɔk, te ru te duŋu keke.
36Aneshir bɔbɔk abaŋ ndi ayi ne kpama ne sak aŋɔk nenu te di akpa mɛn, <<Waŋa ai tsar ta yi? Ne mgbyamgbyaŋ ben yaŋ te sisik ne lɛ ben izhu mimin te duŋǝ ru ne kpa kɛ ner waŋa!>> 37Ankyak lɛ maa ne shak ntuntun.
Yesɔ ne na aneshir tetɛk
38Yesɔ ne ru ne Akabaŋkɔŋ te gar kɔb ne Siman ndi azhɔu te Biturus. Azhi men Biturus ikpa ne vuŋu ŋgɔŋ, fe aben Yesɔ abɛ duŋu are. 39Fe Yesɔ ne zedɔ ne tu maa te tsaŋ lɔmɔ ankyak akɔ rɛ. Ne kpaa kpama akɔ lu te naa ba kili.
40Ndi arik ne ku, ne Gli aner abɛ lɔ tetɛk te nyɛ ben Yesɔ ne sak ba ŋɔk te duŋ ba rɛ. 41Neme, Anerim ne ru ne kpa kɛ aneshir tetɛk, te lɛ ne kɔr ngɔŋ te di, <<Uyi zu Arik!>> Ankyak Yesɔ ne tsaŋ ba te di ku zhin anu, ne zhi te ayi Kristi
42Ndi bɛr ne ŋan, Yesɔ ru te gar amkpa waŋ ndi ba ner nuŋ. Aneshir ne wɔb bu fe te yik amkpa awaŋ ndi ayime, bane tanyɛmɛ te bɛ kama tibɛ bene bɛba ba. 43Ankyak ne di ba, <<Ai ndum muŋ me bla aneshir lɛ kɛ men kɛ kɔb Arik ne nki ntuntun.>> 44Ankyak ne bla ba lɛ kɛ Arik ne Akabaŋkɔŋ ne Yahudiya.
ទើបបានជ្រើសរើសហើយ៖
LUK - NUMANA 4: NAA
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The word for the World International and The word for the World Nigeria
