LUK - NUMANA 2
2
Nŋli Yesɔ
1Ne mkpaŋ yuŋɔ itum Augusta ne nek lɛ ta di abɛ cɛr aneshir abaŋ ndi ayi ne ntuntun yi Roma. 2Waŋa ayi cɛr aneshir yi kuti ne mkpaŋ kɛŋ ndi Kiriniya ŋgɔŋ ne gli aneshir abɛ Asuriya. 3kɔte ŋɔɔ ne kɔmɔ ne ntun maa te abɛ cɛru.
4Fe Yusuu ne gar ntun yi Nazara ndi iyi ne Galili te kɔmɔ ne ntun yi Yahudiya, ne Batalami ntun ngɔŋ yi Doda, te are ŋli nga kɛ Doda. 5Ne gar amɔ te abɛ cɛr ba ben Meryamu, waŋ ndi ne tanyɛme te uwa ai tau ndi nnɛ maa ne te ŋli 6Ndi ne yi amɔ, mkpaŋ kɛ ŋli vǝvǝne ne te, 7ankyak ne ŋli zu maa ne kuti, ivǝvǝnlum. Ne ku ne anklu akɛ so vǝvǝn te zǝu azhɔk ne mgblɔ, te iki kɛ kur aneshir ba na yime ba.
Abɛ kyu ben abɛ shar abɛ Arik
8Ankyak abɛ kyu ayi gbahir ne amkpama, te abene blɛ awanta men ne bu. 9Ineshar ayou Arik aru klii ba, ngɔŋ kɛ Arik laŋ hrie ba, fe sǝsǝk vuŋ ba. 10Fe ne shar ayou Arik adi ba, <<duŋ te zhin sǝsǝk ba. Mǝne ngli lɛ kɛ men ngɔŋ ŋgli zhine te duŋ aneshir abɛ nyɛr bɔbɔk. 11Aliŋe ne ntun iyi Doda nɛ ŋli ine ta zhin shur; waŋ ndi wa ayi Almasihu ndi ayi Arik. 12Waŋa atei yi zhin ngir: Izhin tei yik ne nyɛn vǝvǝn te kuu ne kluŋklu te zǝu zhɔk ne mgblɔ.>>
13Ne amkpamkpama, ntsan abɛ shar Arik tetɛk nɛrɛ shu te biŋ bene abɛ mimi aru aklɛ te gbar Arik sak te di, 14<<Ŋgɔŋ bǝ yi kɛ Arik ne shu, fe ne goŋ mimi isɔŋ kɛ sik bǝ yi ben abaŋ ndi ne tanyɛme bene ba.>>
15Ndi abɛ shar ayou Arik ne duŋ ba te kɔmɔ ne shu, abɛ kyu mɔ adi akpa men, <<Duŋ tabǝ gar Batalami te kɔte tɔ ki yiŋ ndi nena, iyiŋ ndi Arik ne bla ta netu maa.>>
16Fe akɔ nama andanda te kɔte yik Meryamu ben Yusuu, ben vǝvǝne, waŋ ndi ne zǝu azhɔk ne mgblɔmɔ. 17Ndi ne ka yigu, akɔ bla lɛ keŋ ndi ne bla kɛ netu yi vǝvǝne, 18ankyak bɔbɔk aneshir abaŋ ndi ne wɔ lɛ kǝŋe ne vuŋ anu ne lɛ keŋ ndi abɛ kyu ne bla ba. 19Fe Meryamu ne aku kiki me agli ne susun maa. 20Abɛ kyu mɔ ne ŋur akam, te nek Arik ŋgɔŋ maa tena gbaru asak ne kiki bɔbɔk yiŋ ndi aba ne yigǝ, ndi ne bla ba.
Nǝk Yesɔ ne Akabaŋkɔŋ ayou Arik
21Ne bɛr yi tender, ndi mkpaŋ keŋ ndi ne kɔk vǝvǝne zǝk te suu sak te Yesɔ, sak keŋ ndi ne shar ayou Arik ne bla kɛ ndi bane zǝn kɔgu zǝk ba.
22Ndi mkpaŋ kɛ su tsetser ne te nǝ lɛ kɛ cɛr Musa, Yusuu ben Meryamu ne baŋ Yesɔ te gar Urshelima te abɛ nek Arik ne wu 23(ir keŋ ndi ne cɛr ne nkanlɛ iyi cɛr Musa, <<Vǝnlum ne kuti ŋli atei nek Arik ne wu>>), 24fe abɛ tuk amkpur ne lɛ keŋ ndi ne bla kɛ ne cɛr yi Musa: <<Angu amɛ yaa kɔ tatabara amɛ yaa.>>
25Fena iner nuŋ waŋa ayi ne Urshelima ndi a zhɔu te Saminu, waŋ ndi ana ki didik tena nǝk tu nǝ lɛ kɛ Arik. Waŋ ndi asɔŋ aŋub waŋ ndi ate Gli sik susun anyɛ me ne Isrela, ndi Izhu tsetser iyi bene bɔu. 26Neka mǝne blau ne Izhu tsetser te di ate yik Ŋgɔŋ Kristi te te kashe ku. 27Izhu tsetser ne gliu te gar Akabaŋkɔŋ ayou Arik. Ndi ane Yusuu ben Meryamu ne Gli Yesɔ te gar Akabaŋkɔŋ te abɛ nau kiyiŋ ndi ne di abɛ nayi, 28Saminu ne tau agli ne aŋɔk amaa te gbara Arik, te di: 29<<Arik Ŋgɔŋ, ir keŋ ndi uneka kpa nyak, duŋ igen ami abɛ ku ne sik susun. 30Tǝ ayi amuŋ neka yik ita zhɔk mi, 31Yiŋ ndi une men nai nyak neyi ita zhɔk aneshir bɔbɔk, 32Ilaŋ ne nyɛ abaŋ ndi ba yi ŋli Yahudawa ba ben ŋgɔŋ ne aner abɛ Isrela.>> 33Tetɛɛ maa vǝvǝne ben iya maa ne vuŋ anu ne kiyiŋ ndi ne bla ne atu amaa. 34Ankyak Saminu ne nek ba anu didik te di Meryamu, yaa maa Yesɔ: <<Vǝvǝn waŋa atei duŋ aneshir anuŋ azhaku te anuŋ tetɛk atei lu ne Isrela, atei yi waŋ ndi atei lɛlɛ maa, 35te duŋ lɛ ne susun anuŋ bɛ ru abɛm. Tena duŋ anzigba atur susun mi.>>
36Ne bla shar ayou Arik nuŋ ndi azhɔu te Ana, iva Fanuwe iŋli kɛ Ashiru. Ne ce ŋgɔŋ, ne tǝ ase taŋgba bene lu maa, 37Ndi lu maa ne ku ne sɔŋ yaŋ lulum ase sɔk tender ane nas. Ne sɔŋ ne Akabaŋkɔŋ te ben Arik ne aririk ben bu tǝ nɛ kpaanu. 38Ne kpaŋ yuŋɔ Ana ne gar, te kɔte nyer Arik tena lɛ ne atu ayi Yesɔ bene aneshir bɔbɔk abaŋ ndi ne shur ayi ben ne ta Urshelima zhɔk.
39Ndi ane Yusuu ben Meryamu ne na kiki bɔbɔk yiŋ ndi lɛ kɛ Arik kɛ cɛr Musa ne di ne kama kɔmɔ ne Galili ne tuŋ men Nazara. 40Fe vǝvǝne ne tǝ ŋɔk te yi ne mgbyamgbyaŋ; ne yi mgbemgbeb, zhɔk susun kɛ Arik ne yi bene bɔu.
Yesɔ ne Akabaŋkɔŋ ayou Arik
41Kɔte se takǝ tetɛɛ ma ben yaa maa Yesɔ agar Urushelima ne gyaŋ yi glak. 42Ndi Yesɔ ne te ase wur ne ya, ne gar gyaŋ ndi ne kpai ŋyak. 43Ndi gyaŋa ne gayir tetɛɛ maa ben yaa maa ne kama kɔmɔ ne kɔb, Yesɔ ne kama gbur akli ne Urushelima ne yaŋ zhi men. 44Ne yik te di a tsǝne zǝ ba ne tsin bɛr zhin. Fe awɔbu ne min aneshir bɛ gar kɔb men ben akpa amaa. 45Ndi ne wɔb bu alakakana, ne kam kɔmɔ ne Urushelima te gar wɔb bu. 46Ne te bɛr tar teshe wɔb bu yik ne Akabaŋkɔŋ, ne amkpa ne bla lɛ kɛ Arik. Akɔ sɔŋ ne min abɛ tsar lɛ kɛ Arik, te zǝr wɔ ba te na rib lǝlɛ. 47Waŋ ndi ne wɔu lɛ maa ne sak ŋɔk nenu ne izhi ma ben sak lɛ maa.
48Ndi tetɛɛ maa bene yaa maa ne yigu, ne sak ŋɔk nenu. Iya maa adiu te di, <<izu muŋ, Une na ta anii me? Tetɛɛ mi ben nga ta zen shurɔ ayi wɔb bu.>>
49<<Yesɔ adi ba izhin wɔb me ne ni?>> A rib. <<Ba zhin ne zhi te di me te sɔŋ ne kɔb Tetɛɛ muŋ kai?>> 50Amɛ bane zhi kiyiŋ ndi abla ba ba.
51Fe Yesɔ azǝ ba gar Nazara te zǝ lɛ mǝne. Amɛ yaa maa ne su kiki yiŋɛ yir ne susun maa. 52Amɛ Yesɔ ne te ŋgɔŋ ne zhi teyi mgbemgbeb goŋ. Ne yik ta ben Arik ben aneshir.
ទើបបានជ្រើសរើសហើយ៖
LUK - NUMANA 2: NAA
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The word for the World International and The word for the World Nigeria
