मर्कुस 11
11
यरुसलेमलं येसु राजा मान्टि उपसिनाव
मत्ती २१:१-११; लुका १९:२९-३८; युहन्ना १२:१२-१५
1येसुरं यरुसलेम सहरलो ओछ्योका जैतुन डान्डा लेवका बेठफागे सोनो बेठानिया वार्ने पोकं याकेरिव, होकाम येसुये नेभऱ्याङ उसिसनिलाई ऐ वार्डे उपरि:ङोनि, 2“जिन ङा:ङ लेव नाङखारलं नाचिन होल जेनाज़्याकं टोबो माडाहिसिव गडाहालो ओपाठालाई डैने जेले। होलाई पलाडे आकं रैचीन। 3कोइराई ‘आव कडि जेझैज़्याव?’ हैयावार्खेभने, प्रभुलाई आव चाहिज़्या, प्रभुये चानोज़ सोवल्नेले वार्डे हैडाचीनरं।”
4होकाम नोनि नेनाव, टोबो येमका ज़ी:म छ्योकं झलायेम ङा:कं नो माडाहिसिव गडाहा पाठा सुर्सिव नेडोयो, होकामटानि नोलाई नेपलाव। 5होका च्याङ्सिव मीराईलाम कोइ कोइराई नोनिलाई यापजोयोरं, “आव माडाहिसिव गडाहालाई पलाडे कडि जेझैज़्याव?” 6नोनी येसुये ओपोयोनि स्यावज़ हैनेडोवरं, होकामटानि नो मीराई नोनिलाई नाव यायोवरं। 7नोनि गडाहालाई येसु लेवकं नेरोयो, होकाम याक्वार हाइडे गडाहा तर्ट याटानो, होकाम येसु होटं उचुङो। 8भ्याबिछुराई याक्वा सोनो कोइ कोइराई बाङलाम छि ख्वान्डे रैडे येम्ल याटानो। 9होकाम येसुलो ओङा: उछिन बानेरं ऐ वार्डे याकि:व, “होसन्ना येसु के! भाग्यमानि ची, जो स्यान्टैराई भन्डा घ्योव प्रभुलो उमिन्ट रा! 10भाग्यमानि ओटाकं गेपुर्खा डाउडलो राने ओराज्य, बनै घ्योव स्वर्गटं होसन्ना!”
11येसु यरुसलेमलं राडे प्रार्ठना डोने ज़ी:मलं उपसिव। होकाम येसुये होकाला स्यान्टै बस्तरं ओरो:ङो पाना रि:म्डे कुबुला ओटावये बार जना उसिसरासं बेठानिया वार्ने नाङखारडे यानाव।
येसुये डिलो उसिङलाई सराप ओयोव
मत्ती २१:१२-१७,१८-२२; लुका १९:४५-४७; युहन्ना २:१३-१६
12ओपराटि येसु सोनो उसिसरं बेठानिया नाङखारलाम यावोलकं येसु ओकंरेव। 13होकाम टाढाङाम ओख्या लेव डीलो उसिङ र:ङडे होटं ओसै मलिज़्या वार्डे येसु सिङ खङकं ओनाव, होकाम हो सिङटं ओख्याकाम कडिज़ मालेव, नो बेलाकं डी सैने बेला मालेव। 14होकाम येसुये हो सिङ्लाई, “आबो खर्कज़ मीराई नसै टाज़्योरंकं।” वार्डे हैओडोव उसिसराई याठोयो।
येसु प्रार्ठना डोने ज़ी:मलं ओनाव
15होकाम यरुसलेमलं केडे येसु प्रार्ठना डोने ज़ी:मलं उपसिव, होकाम होलं सामान ल:ङने सोनो येनेरंलाई होलाम उपुलोयोरं पैसा टो:नेराई याटेबंल सोनो परिवा येनेर चुङसिडे यालिज़्याव पिर्कारं पल्टैडे ओयोवरं। 16येसुये प्रार्ठना डोने ज़ी:मलाम काङकालाई पनि कडि सामानज़ लाङो मायोवरंये। 17होकाम येसुये ऐलेडे ओपोयोरं, “कडा ‘ङा ङाज़ी:म स्यान्टै डेसराई यालागिटं प्रार्ठनालो ज़ी:म टानेले वार्डे सर्सिव माले?’ बुरु जेके आव पोलाई डाङ्कुरं याडुप्सिने पो ची झैडे जेनै।”
18हो रो: ठैडे मुख्या सेवा डोने मीरं सोनो सास्त्रटा न्याम पैने मीरं येसुलाई कैजैडे सै:ने वार्डे उपाय याखिम्रिव। कडालेकं होरं येसुसं छेरंये, कडालेकं माहुल्ये मीराई येसुये ओपोयोरं ठैडे अचम्ब टाडे यालिज़्याव।
19री:म्डे येसु सोनो उसिसरं सहरलाम टङडे यानाव।
ठोङो डीलो उसिङटाम पैसिने रो:
मत्ती २१:१८-२२
20छकाल्ने फरि येसु सोनो उसिसरं हो येमज़ यावोलज़्याकं डीलो उसिङलाई ओजरालामज़ रा:ङो यारो:ङो। 21होकाम पत्रुसये होछ्यामका रो: ओचेटोयो, होकामटानि पत्रुसये येसुलाई हैओडोव, “रब्बी नङ सराप झाडे नोयोव डीलो उसिङके रा:ङडेचीले।”
22येसुये नोरंलाई जबाफ याडे हैओडोवरं, “परमेस्वरटं बिस्वास नैच्यो 23डस्साज़ ङा जेलाई हैङाडाच्यो, कोइये यायुङलं सङ्खा माडाडे पाङसिव रो: पुरा टाये वार्डे बिस्वास डोडे आव डान्डा चिसिडे समन्डरलं नान हैयाडोरखे भने नोलो ओलागिटं नैटावज़ टानेले। 24हैजैडेज़ ङा जेलाई हैङाडाच्यो, जे जेप्रार्ठनालं जो जिनी:नी पनि हो गेडैडुखे वार्डे बिस्वास डाच्यो, होकाम हो जे डैने जेले। 25जे प्रार्ठना डोने जेच्याङसिव बेलाकं, कोइ मीरासं माचाव रो: यालेखे भने छेमा याच्योरं, कडावार्कं स्वर्गटा लिज़्याव जेबाबुये पनि जेसका माचाव रो: छेमा ओडाच्योवकं 26मानि छेमा जेम्योखे भने, स्वर्गटा लेने जेपरमेस्वरये पनि जेसंका अपराढरं छेमा याने माले।”#11:26 कोइ कुइये सर्सिव कितापटं आव सर्सिव माले#मत्ती ६:१४-१५
येसुलो ओअढिकार बारेलं प्रस्न
मत्ती २१:२३-२७; लुका २०:१-८
27येसुरं फरि यरुसलेमला प्रार्ठना डोने ज़ी:मलं राडे आडे होडे ओबारिज़्याकं मुख्या सेवा डोने मीरं (प्रार्ठना डोने ज़ी:मला बेडीलं सेवा डोने मुख्या सेवक) सास्त्रटा न्याम पैने मीरं, सोनो यहुडी नेतारं, येसु लेवकं याराव। 28होराई येसुलाई यापजोयो, “कडि अढिकारये नङ आव ये:नरं नोडोज़्याव? आव ये:नरं डोने अढिकार नङलाई काङ्काये ओयानो?”
29येसुये नोरंलाई हैओडोवरं, “ङा जेलाई टोबो रो: ङापजैच्यो, हो रो:लो ओजबाफ याङच्यो, होकाम कडि अढिकारये ङा आव ये:न ङाडोज़्याव, ङा जेलाई हैङाडाच्यो। 30युहन्नाये ओयोव बप्तिस्मा स्वर्गटाम सै मीराई लेवङाम, ङालाई हैगडाङच्योके।”
31होकाम नोरं ऐवार्डे या-याज़ यापाङो, “‘स्वर्गटाम’ वार्ने याटाखे भने ‘जे कडा युहन्नालाई बिस्वास जेम्डा’ ऐवार्ने ले। 32‘मीराई लेवङाम’ हैवार्ने वार्क” नोरं होला मीरासं याछेव। कडालेकं स्यान्टैरं युहन्नालाई डस्साका अगमबक्ता वार्डे बिस्वास डोरंये।
33होकाम होराई येसुलाई हैयाडोव, “गेलाई ठा माले।” येसुये होरंलाई हैओडोवरं, “ङा पनि कडि अढिकारये आव ये:न ङाडोज़्या हो ङा जेलाई हैङाम्डाच्यो।”
ទើបបានជ្រើសរើសហើយ៖
मर्कुस 11: NTWMK25
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The New Testament Books in Wale Magar Kham Language © The Word for the World International and Wale Magar Kham Translation Project, Nepal, 2025