मर्कुस 10
10
ज्यारी भासिने
मत्ती १९:१-९
1हो पोलाई रा:डे यर्डन भै होपंटं यहुडिया छेत्रलं येसु ओनाव होकाम माहुले मीरं येसु लेवकं याराव, होकाम येसुये ओचंलंन अनसार होरंलाई ओपोयोरं। 2फरिसीरं राडे येसुलाई ऐ वार्डे याजान्चीव, “होकाम कोइ खेपाये ओज्यासं भासिने चाव सै माचाव?”
3येसुये होरंलाई हैओडोवरं, “मोसाये जेलाई कडि आग्या ओयाच्योव?” 4फरिसीराई हैयावारो, “टोबो कागंटटं भर्पाइ सर्डे ज्यारी भासिने टाये वार्डे मोसाये आग्या याडेनोयो।”
5होकाम येसुये नोरंलाई हैओडोवरं, “जेलाई पैने बनै ढौ ओटावये मोसाये नो न्याम सर्डे ओयाच्योव। 6सास्त्रटं सर्सिव ले, ‘सङसार ओटावकामज़ परमेस्वरये नोनिलाई खेपा सोनो मेमा ओझोयोनि ची।’ 7हैजैडेज़ खेपा मीये ओबाबु वामालाई रा:डे ओज्यासं मिलिडे ओलेकं, 8होकाम नो ज्यारी टोबो ज्यु टानेलेनि। नो ज्यारीनि नेम्लो माङ्क, बुरु टोबो ज्युज़ टाने लेनि। 9हैजैडे परमेस्वरये जोलाई ज्यारी झैडे नोयोरं, मीराई होरंलाई टाछुटैरंकं।”
10ज़ी:मकं याराव छिन्डे आव रो: फरि येसुलाई उसिसराई यापजोयो। 11येसुये उसिसरंलाई हैओडोवरं, “जोये ओज्यालाई रा:डे छुट्टसं बिह्याँ डोव, होये ओज्यालो उबिरोडलं ब्यभिचार डोवये। 12होकाम मेमाये पनि ओरेसं भासिडे छुटं खेपासं बिह्याँ याडोवखे भने, हो मेमाये ब्यभिचार ओडोव टाये।”
आलिज़ा बाल्खरंलाई येसुये आसिक योवरंये
मत्ती १९:१३-१५; लुका १८:१५-१७
13मीराई आलिज़ा छोऱ्या लुज़ारंलाई येसुये छुडेगयासिवकं वार्डे ओङा:कं यारोयोरं, होकाम उसिसराई होरंलाई याहक्लोयोरं। 14हो र:ङडे येसु उरिसिव, होकाम उसिसरंलाई हैओडोवरं, “आलिज़ा बाल्खरंलाई ङालेवकं राव याच्योरं, नोरंलाई टावोङच्योरं, कडालेकं परमेस्वरलो ओराज्य आव स्यानावराईज़। 15डस्साज़ ङा जेलाई हैङाडाच्योज़्या, जोये परमेस्वरलो ओराज्यलाई टोबो आलिज़ा बाल्खलाई स्यानाव ग्रहन माडोव, नो खर्कज़ परमेस्वरलो ओराज्यलं पसिडुने माले।” 16होकाम येसुये बाल्खरंलाई ओघोन्ल रैडे याङैटं उकुइ नैडे आसिक ओयोवरं।
टोबो ढापा ढनी मी
मत्ती १९:१६-३०; लुका १८:१८-३०
17येसु येम्ट ओनाज़्याकं, टोबो मी ज़ोरिडे येसुलो ओङा:कं उघुन्डाये ओच्याङसिव, होकाम येसुलाई ओपजोयो, “ए चाव गुरबा, खर्कज़ मासिने जीबन डैने ङा कडि ये:न डोने टाये?”
18येसुये हो मीलाई हैओडोव, “नङ ङालाई कडाने चाव नडाङज़्याव? टोबो परमेस्वर काम काङ्काज़ चाव मालेरं। 19नङ न्यामरं के नसनये, हत्या टाडो, ब्यभिचार टाडो, टाकुङंन, झुठ गोहाई टायो, टाडुटै, नबाबु सोनो नामालाई मान योनि।”
20होकाम हो मीये येसुलाई हैओडोव, “गुरबा आव स्यान्टैके ङा आलिज़ा ङालेवकामज़ डाडे ङाराव ची।”
21येसुये हो मीलाई ओरो:ङो, होकाम मया डाडे हैओडोव “नङ नजीबनलं टोबो रो: माडुमो लिज़्या। गनानके, नाडे नङसं कडि-कडि लिज़्या स्यान्टै येडे गरिबरंलाई गोयोरंके, होकाम नङ नो सम्पति स्वर्गट डैने नले। होकाम राडे ङाजिन्ट नराके।”
22होकाम आव रो:ये हो मी डुखि ओटाव, होकाम ओसोगो हाइडे ओनाव, कडालेकं हो मीस भ्या ढन सम्पति लेव।
23होकाम आडे होडे र:ङडे येसुये उसिसरंलाई हैओडोवरं, “ढनी मीरंलाई परमेस्वरलो ओराज्यल पसिने खाडंङ ढौ लिज़्या।”
24आव येसुये हैओवारो रो:टं उसिसरं अचम्ब याटाव। होकाम येसुये फरि नोरंलाई हैओडोवरं, “ए बाल्खरं परमेस्वरलो ओराज्यलं नाने खाडंङ ढौ लिज़्या। 25ढनी मी परमेस्वरलो ओराज्यलं पसिने भन्डाके उँटलाई गपलो उकुङलं पसिने सजालो टाये।”
26येसुलो उसिसरं बनै अचम्ब टाडे येसुलाई हैयाडोव, “हो टावसं बान्चिने काङ्काखेने?”
27येसुये उसिसरंलाई र:ङडे हैओडोवरं, “मीराईङाम आव माटाडु, बुरु परमेस्वरङाम टाव ढुव, कडालेकं परमेस्वरये स्यान्टै रो: डोडुव।”
28पत्रुसये येसुलाई हैओडोव, “र:ङखेने, गे स्यान्टै रा:डे नछिन्ट गेबाज़्या।”
29येसुये हैओडोवरं, “डस्साज़ ङा जेलाई हैङाडाच्योज़्या, जोये ङालागिटं सोनो चाव सोरलो ओलागिटं, उज़ी:म ओडाज्यु भाइ, ओनाना बैनी, वामा ओबाबु ओज़ारं सोनो ओढन सम्पति रा:व, 30होसोनो हो सहटैसिव नि:नेले होकाम नोसंज़ सय गुना भ्या ज़ी:म, डाज्यु भाइ, नाना बैनी, आमा, ज़ारं सोनो जग्गा जमीन नो बेलाकंज़ डैनेले, होकाम राने जुगुलं खर्कज़ मासिने जीबन डैनेले। 31होकाम ङा:डेङारं छिन्ङ सोनो छिन्ङार ङा:ङ टानेलेरं।”
येसु सोङ्खेपका फरि उसिने बारेलं भबिस्यबानी ओडोव
मत्ती २०:१७-१९; लुका १८:३१-३३
32येसु उसिसरासं यरुसलेमडे नाने येमलाग्यान्ट यानाज़्याकं, येसु नोराई याङा-याङा ओनाज़्याव। उसिसरं अचम्ब टाव लेवर, होकाम उरु छिन्टा रानेर छेव लेवर। होकाम येसुये बार जना उसिस भरिरंलाई टङ्क लाङरंडे ओल उज्युटं टारिने रो:लो ओबारेलं उसिसरंलाई हैओडोवरं। 33येसुये हैओवारो, “र:ङच्यो, गे यरुसलेमडे गेनाज़्या। होङं मानवालो ओज़ालाई मुख्या सेवा डोनेराई सोनो सास्त्रटा न्याम पैने मीराई लेवङ सुम्पिसिने ले, होकाम नोराई होलाई सै:ने सजै यानेलेरं, होकाम नोराई यहुडीरंकाम यहुडीरंकाम उरुका मीराई याकुइटं सुम्पिड्यानेलेरं। 34होकाम होराई नोलाई उल्ली नि गिल्ली डाडे त्यु:ल्नेलेरं, होकाम कोर्राये यापो:व पाना नोलाई सै:नेलेरं। होकाम उसिव सोङलाका नो फरि ज्युङडा टाडे सोने ले।”
याकुब सोनो युहन्नानी बिन्ती नेडोव
मत्ती २०:२०-२८
35जब्डियालो ओज़ानि, याकुब सोनो युहन्नानि येसु लेवकं राडे हैनेवारो, “गुरबा गिन नङसं जो गिनी: होज़ झैड्यासि वार्ने गिइच्छया लिज़्या।” 36येसुये होनिलाई ओपजोयोनि, “जेलागिटं ङा कडि झैड्याने वार्ने जियुङलं लिज़्या?” 37होनि येसुलाई हैनेडोव, “नमहिमाला राज्यलं गिनलाई नङसज़ टोबो वो:र्डे टोबोलाई डाबर्याडे लेव यासि।” 38येसुये नोनिलाई हैओडोवनि, “जिन कडि जिनि:ज़्याव हो जिन जेम्सन। होकाम ङा जो डुखंलो कचौरालाम ङाओँ हो कचौरालाम जिन जेओँडु? होसोनो ङा जो बप्तिस्मा ङाटारिज़्या हो जिन जेटाडु?” 39नोनि येसुलाई हैनेडोव, “गिन गिढु।” येसुये नोनिलाई हैओडोवनि, “जो कचौरालाम ङा ङाओँ हो कचौरालामज़ जिन पनि ओँनेजेले, जो बप्तिस्मा ङा ङाटारिज़्या हो बप्तिस्मा जिन पनि टानेजेले। 40हैनि पनि वो:र्डे सोनो डाबर्याडे चुङो याने ङा ङाकुइटं माले, आवके जोजोराई यालागिटं तयार झैसिव लिज़्या, होराई यालागिटंज़ ची।”
41आव ठैडे डस जना उसिसरं याकुब सोनो युहन्नासं याभर्किव। 42होकाम येसुये स्यान्टै उसिसरंलाई खुल्डे हैओडोवरं, “जे जेसनये यहुडीरंकाम यहुडीरंकाम उरुका मीराई याखार्ल सासंन डोनेराई नो यहुडीरंकाम उरुका मीराई यातर्ट सासंन चलैरंये। होकाम होराई यासेरराई फरि होराई यातर्ट अढिकार चलैरंये। 43जे नेटाव टाटाच्यो। बुरु जेलाम काङ्काये घ्योव टाने पानो, हो जेसेवा डोने ओटाकं। 44होकाम जेलाम काङ्का पैला टाने बिचार डोव, हो स्यान्टैराई याकमारा ओटाकं, 45कडालेकं मानवालो ओज़ा सेवा डैने वार्डे माङ्क, बुरु सेवा डोने सोनो स्यानटैराई यापापलो ओझोलो लागिटं ओपोहोन याने ओराव ची।”
अन्डला बारटिमै ओसोमो
मत्ती २०:२९-३४; लुका १८:३५-४३
46होकाम येसु सोनो उसिसरं यरीहो सहरलं याराव, येसु उसिसरासं सोनो माहुले मीरासं यरीहोलाम उपुलुज़्याकं तिमैलो ओज़ा बारतिमै, टोबो अन्डला भिखारी, येमलो ओगोराटं चुङडे उलिज़्याव। 47नोये आवके नासरतला येसु ची ओलेव वार्डे ओठोयो, होकाम कि:डे हैओवारो, “ए येसु, डाउडलो ओज़ा, ङालाई डया डाङ।”
48होकाम भ्या मीराई हो मीलाई टापाङ्ङन वार्डे याहक्लोयो। होकाम नो अजं कस्सिडे कि:डे हैओवारो, “ए डाउडलो ओज़ा ङालाई डया डाङ।”
49होकाम येसु ठन् अडिडे हैओडोवरं, “नोलाई खुल्च्यो।” होकामटानि होराई नो अन्डलालाई ऐ वार्डे याखुलो, “हिक्मत डोडे च्याङसिडे गराङन्के, येसुये नङलाई खुल्सनज़्याव।” 50होकाम ओक्वा हुँइख्याडे नो ठरच्याङसिडे येसु लेवकं ओराव।
51येसुये नोलाई हैओडोव, “नङलाई कडि ओचाहिज़्याव, नलागिटं ङा कडि झैने?” हो मीये येसुलाई हैओडोव, “रब्बी ङामिलंङ फरि ओर:नकं।”
52होकाम येसुये नो मीलाई हैओडोव, “नयेम्डे गनानके। नबिस्वासये नङलाई ससम्डेनैसोनो।” होकाम होमान्त्राज़ नोलो उमिलंङ ओरो:नो, होकाम येम्ट येसुलो उछिन-उछिन ओनाव।
ទើបបានជ្រើសរើសហើយ៖
मर्कुस 10: NTWMK25
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The New Testament Books in Wale Magar Kham Language © The Word for the World International and Wale Magar Kham Translation Project, Nepal, 2025