मर्कुस 12
12
अङ्गुर ये:ङ अडिया वानेराई यासात्रो
मत्ती २१:३३; लुका २०:९-१२
1येसुये नोरंलाई सात्रोङाम हैओडोवरं, “टोबो मीये ये:ङलं अङ्गुर रुपिडे चारकोनाङाम बार ओबारिव, अङ्गुर पेने टोबो कोलो ओठाङो। होकाम अङ्गुरलो उरी: ठाङ्ने टोबो खाल्टा ओघोव। होकाम टोबो टान्ड झैडे नोये अङ्गुर ये:ङ अडिया वानेराई याकुइटं रा:डे, ओल छुटं डेसडे ओनाव। 2अङ्गुर फ्याने बेलाकं हो मीये टोबो ओनौकरलाई अङ्गुर ये:ङलं अडिया वानेराई लेवङं ओभागला अङ्गुर चनाव उपरि:ङो। 3होकाम होराई नो नौकरलाई क्यो:डे यापो:व होकाम रितो उकुइ यासोवलो। 4फरि नोये नोराई लेवङ छुटं ओनौकरलाई उपरि:ङो, होलाई पनि नोराई ओङै:टं पो:डे बिज्यात याझोयो। 5हो ये:ङ साहुये फरि पनि टोबो ओनौकरलाई उपरि:ङो, होकाम होलाई यासो:यो, होकाम उरु भ्यारंलाई पनि उपरि:ङोरं, नोरंलाई पनि कोइरंलाई यापो:वरं कोइरंलाई, यासो:योरं। 6ओल्स टोबो उयुङ्का ओज़ा लेव, ‘नोराई ङाज़ालाईके मान योरंके’ वार्डे स्यान्टैराई भन्डा याछिन्डे नो ओज़ालाई उपरि:ङो। 7होकाम हो अडिया वानेरं ऐ वार्डे यापाङ्सिव, ‘आवके अङ्स ज़्याने ओज़ाची। गराच्योके, आवलाई गेसै:के होकाम ओसम्पति गेमीज़ टानेले।’ 8होकाम नोराई होलाई क्यो:डे सै:डे, हो अङ्गुर ये:ङलाम पाखाङं याख्यानाव।”
9होकाम येसुये फरि हैओडोवर, “अङ्गुर ये:ङलो ओसाहु कै लेके? अङ्गुर ये:ङलो ओसाहु रानेले होकाम नो अडिया वानेरंलाई सै:नेरंले, होकाम अङ्गुर ये:ङ छुटंरंलाई यानेले। 10जे सास्त्रटा आव बचंन जिपरिव माले?
‘जो लुङलाई ज़ी:म झैनेराई फालिम याझोयो
होलुङज़ उगुर लुङ ओटाव।#भजनरं ११८:२२-२३
11आव के स्यान्टैराई भन्डा घ्योव प्रभुङाम टाव ची,
होकाम गे गेर:ङकं आव अचम्बलाची ले!’”
12होकामटानि होराई येसुलाई क्यो:ने यापानो, कडालेकं आव सात्रो येसुये नोराई याबिरोडलं हैओवारो वार्डे याबुझिव। होकाम नोरं माहुल्ये मीरासं याछेवये नोराई येसुलाई होकंज़ रा:डे यानाव।
कैसरलाई सिरमा फोने बारेलं येसुलाई यापजोयो
मत्ती २२:१५-२२; लुका २०:२०-२६
13होकाम छिन्डे येसुलाई ओल ओपाङो रो:टंज़ फसैने वार्डे नोराई फरिसीरं सोनो हेरोडीरंलाम कोइ-कोइ मीरं येसु लेवङं यापरि:ङोरं। 14नोरं होकं राडे येसुलाई हैयाडोव, “गुरबा गेलाई ठाज़ले, नङ सत्यज़ नले, होकाम नङ मिराई कै वार्रके वार्ने रो:लो ओवास्टा नम्डोये कडालेकं नङ मी र:ङडे ये:न नम्डोय बुरु परमेस्वरलो ओयेम चावसं नपैरंये। हैगवार्ङनके, कैसरलाई सिरमा फोने टाये सै माटाये? 15गे सिरमा फोने सै माफोने?” येसुये नोराई याकैफट ठा सन्डे हैओडोवरं, “जे ङालाई कडाने जेजान्चिसङज़्याव? टोबो पैसा आकं रैडे सटन्च्यो।” 16होराई टोबो पैसा यारोयो। होकाम येसुये होरंलाई हैओडोवरं, “आवटा लिज़्याव सुरुप सोनो छाप काङ्कालो?” होराई येसुलाई हैयाडोव, “कैसरलो।”
17होकाम येसुये होरंलाई हैओडोवरं, “कैसरलो कैसरलाई याच्यो, परमेस्वरलो परमेस्वरलाई याच्यो।” होरं येसुलो ओरो: ठैडे अचम्ब याटाव।
सिडे ज्युङडा टावराई याबारेलं येसुलाई यापजोयो
मत्ती २२:२३-३३; लुका २०:२७-३८
18सिवलाम ज्युङडा माटारंये वार्ने सडुकीरं येसु लेवकं याराव, होकाम येसुलाई यापजोयो, 19“गुरबा मोसाये गेलाई सर्डे नैड्यासिव, कोइ मीलो ओडाज्यु बिना सन्तान सिडे ओज्यालाई याख्यानोयोखे भने, ओभाइये नो मेमालाई लाङ्डे ओडाज्युलो ओसन्तान ओझोयोकं। 20टोबो ज़ी:मलं सात भाइ लेवरं। जेठाये टोबो ज्या ओरोयो, होकाम हो बिना सन्तानज़ उसिव। 21होकाम माइलाये हो मेमालाई बिह्याँ ओडोव, हो पनि बिना सन्तानज़ उसिव। होकाम साइलाये पनि हो मेमालाईज़ बिह्याँ ओडोव। 22होकाम सात भाइराईज़ हो मेमासं बिह्याँ याडोव हैनि पनि यासन्तान माटाये। होकाम छिन्डे हो मेमा पनि उसिव। 23आबो सिवलाम ज्युङडा याटाकं हो मेमा काङ्कालो ओज्या टा के? कडालेकं हो मेमासं सात भाइराईज़ बिह्याँ याडोव।”
24होकाम येसुये नोरंलाई हैओडोवरं, “जेअलमलिज़्याव आव कारन माङ्कडोरो, न जे सास्त्र जेसनये न परमेस्वरलो ओसक्तिलाई जेसनये? 25कडालेकं सिवलाम नोरं फरि ज्युङडा याटाकं, नोरं खेपा मेमा काङ्काराई पनि बिह्याँ माडोरंये, होकाम होरं स्वर्गटा लेने स्वर्गटा कटंवाल स्यानाव टारंये। 26सिवलाम ज्युङडा टाने रो:टं जे मोसालो ओपोस्टोकोटं जिपरिव माले? कैजैडे जे चाङज़्याव पठरक्यालो बारेलं सर्सिव खन्डलं परमेस्वरये मोसालाई हैओडोव, ‘ङा अब्राहामलो ओपरमेस्वर, इसहाकलो ओपरमेस्वर सोनो याकुबलो ओपरमेस्वर ची।’ 27परमेस्वर सिवराई यापरमेस्वर माङ्कची, ज्युङडाराई यापरमेस्वर ची, जे चब्बनैज़ अलमल टाडे जेले।”
स्यान्टैराई भन्डा घ्योव आग्या
मत्ती २२:३४-४०
28सास्त्रटा न्याम पैने मीरंलाम टोबो ओराव, होकाम नोरं या-याज़ यायुसिज़्याव ओठोयो। येसुये मीरंलाई मिलिव जबाफज़ ओयोज़्यावरं र:ङडे हो मीये येसुलाई ओपजोयो, “स्यान्टै आग्या भरिलाम घ्योव आग्या काव?”
29येसुये हैओडोव, “स्यान्टैराई भन्डा घ्योव आग्या आवज़ ‘ए इस्राएल आव ठै, स्यान्टैराई भन्डा घ्योव प्रभु गेपरमेस्वर टोबो याज़ ले। 30नङ प्रभु नपरमेस्वरलाई स्यान्टै नयुङये, स्यान्टै नज्युये, स्यान्टै नडिमाकये सोनो स्यान्टै नसक्तिये मया डो।’ 31होकाम डोस्रा मुख्या आग्या आवज़, ‘नङ नछिमेकीलाई नङस्यावज़ मया डो।’ आव भन्डा घ्योव आग्या छुटं माले।”
32नो सास्त्रटा न्याम पैने मीये येसुलाई हैओडोव, “गुरबा नङ सत्यज़ नपाङ्खे, प्रभु परमेस्वर टोबो याज़ले, हो प्रभु परमेस्वरकाम छुटं काङ्काज़ माले। 33परमेस्वरलाई स्यान्टै युङये, स्यान्टै डिमाकये, सोनो स्यान्टै सक्तिये मया डो, होसोनो नछिमेकीलाई नङलाई स्यावज़ मया डो वार्ने आग्यारं स्यान्टै होमबलि सोनो बलिडानरं भन्डा पनि बनै चाव ची।”
34नो मी बनै बुड्यालो हिसापये ओपाङो ठैडे येसुये नोलाई हैओडोव, “नङ परमेस्वरलो ओराज्यकाम टाडा नम्ले।” होकाम येसुलाई कडि रो:रं पजैने काङ्कालो उहिक्मतज़ माराये।
ख्रीस्ट काङ्कालो ओज़ा
मत्ती २२:४१-४६; २३:१-३६; लुका २०:४१-४७
35होकाम येसुये प्रार्ठना डोने ज़ी:मलं ओपैज़्यारंकं हैओवारो, “ख्रीस्ट डाउडलो ओज़ा ची वार्डे सास्त्रटा न्याम पैने मीराई कैजैडे हैयावारो? 36कडालेकं डाउडये ओल्ज़ चोखो आत्माङाम हैवार्डेले,#भजनरं ११०:१
‘स्यान्टैराई भन्डा घ्योव प्रभुये ङा प्रभुलाई हैओडोव,
नङ वो:र्डे ङाकुइडे चुङ्ङन,
जोका सम नसुतररंलाई नखङ पाइतला ढुङलं ङामनैरं।’
37होकाम डाउडये ओल्ज़ होलाई ‘प्रभु’; याडोवखे भने काङामटानि नो डाउडलो ओज़ा ओटाव?”
येसुये न्याम पैनेरंलाई चेतावनि ओयोवरं
होकाम होला माहुल्ये मीराई येसुलो ओपाङ बनै खुसि टाडे याठोयो।
38होकाम ओपैज़्यारंकं येसुये हैओवारो, “सास्त्रटा न्याम पैने मीरासं जोगैसिडे लेच्यो। नोरं खेव क्वा क्वाइसिडे आडे होडे डुलिने सोनो बजारलं ढो डैने, चाव ङप्सिरंये। 39होसोनो यहुडीरं याडुप्सिने ज़ी:मला मान डैने पो सोनो भट्यारयालं मान डैने पो खिम्रंये। 40नोराई रान्डिनिराई याज़ी:म लुटिरंये, होकाम लोकोचार झैनेलो लागिटं टब्बनखिव प्रार्ठना डोरंये। ऐटाव मीराई बनै घ्योव डन्ड डैनेलेरं।”
रान्डिनिलो ओभेटी
41होकाम येसु प्रार्ठना डोने ज़ी:मला भेटी चरैने छ्योकं उचुङो, होकाम स्यान्टैराई भेटी चरैने जालं भेटी याझाज़्याव ओरो:ङो। भ्या ढनी मीराई भ्या पैसा याचोरोयो। 42होकाम टोबो गरिब रान्डिनिये राडे ताम्बालो नेभऱ्याङ छिनछिने पैसा रैडे टपैसा झैडे ओचरोयो।
43येसुये उसिसरंलाई ओललेवकं खुल्डे हैओडोवरं, “डस्साज़ ङा जेलाई हैङाडाच्यो, भेटी चरैने जालं स्यान्टैराई भन्डा भ्या आव गरिब रान्डिनिये ओचरोयो 44कडावार्क स्यान्टैराई यासं भ्या लेव होकाम भ्याज़ याचोरोयो, हैनि पनि आव मेमायके ओल्स ओमलेवछन्डानि पनि स्यान्टै ओकमै भरि ओचरोयो।”
ទើបបានជ្រើសរើសហើយ៖
मर्कुस 12: NTWMK25
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The New Testament Books in Wale Magar Kham Language © The Word for the World International and Wale Magar Kham Translation Project, Nepal, 2025