Johane 1
1
Dama LeButjilo
1Kutanga kwakabe kuna Dama, Dama lakabe lina Ndzimu kakale Dama lakabe lili Ndzimu. 2Dama lakabe lina Ndzimu kutanga, 3zwinhu zose zwakayetiwa ndiye, asipo iye akuna tjinhu tjin'ompela tjiyapo tjakayetiwa. 4Muwunli kwaka kuna butjilo, kakale butjilo igogo gwaka guli tjedza tjebanhu. 5Tjedza tjovoneka muhhalima, hhalima alizotjikunda.
6Waka alipo umwe nlume wakatumwa neNdzimu, zina lile laka liyi Johane. 7Wakahha alinsupi, kuti asenge busupi gwetjedza, kuti nentha iye banhu bose bagalemoyo. 8Iye tjekukwe waka asi tjedza, koga wakahhila kuti awhopa busupi nekwetjedza. 9Nditjo itjetjo tjedza tjemalebeswa tjinovonekela nhu wose tjakatjihha muhango.
10Waka ali muhango, nehango yakayetiwa ndiye, koga hango ayizowunziba. 11Wakahha kuhango yakanyi kukwe, koga banhu bakanyi kukwe abazowuwamutjila. 12Koga ibabo bose bakawuwamutjila, ibo bakagalamoyo muzina lile, wakabapa masimba ekuti babe bana beNdzimu, 13bakazwagwa, kusi kwelopa, kene ngekuda kwenyama kene ngekuda kwenhu, koga ngekuda kweNdzimu.
14Dama lakabe nhu akagala pakati kwedu, alihhele mawhilangoni nelebeswa, takalinga tikabona gudzo lile, gudzo leNkololo iye yega waTate.
15Johane wakapa busupi nekukwe, akadanilila eti, “Whoyu ndiye wandakaleba nekukwe nditi, ‘Iye unohha hule kwangu unkulu pandili, nekuti waka alipo imi ndisanhu ndabepo.’ ”
16Kubva mubuhhalo gugwe tose takawamutjila, ngoni pehhugwi kwedzimwe ngoni. 17Ngobe nlayo wakapiwa ndiMozisi, koga ngoni nelebeswa kwakahha naYesu Khirisitu. 18Akuna nhu wakatongobona Ndzimu, Nkololo uyega, iye Ndzimu#1.18 Ndzimu dzimwe whalo whulukugwi dzoti Nkololo tjekukwe upamoyo waTate, ndiye wakathama bakazibgwa.
Matama aJohane Mbvubiki
(Matewu 3.1-12; Mako 1.1-8; Luka 3.1-18)
19Igogu ndigo busupi gwaJohane, maJuta pabakatuma baphirisiti nebaLevi bebva kuJerusalema kuti bawhowumbhuzwa beti, “Ndiwe yani?”
20Wakabvuma, haazotongolamba, koga wakaleba eti, “Imi andita iye Khirisitu.”
21Bakawumbhuzwa beti, “Ngono ndiwe yani? Ndiwe Elija?”
Wakati, “Andita iye.”
“Ndiwe nlebesambeli?”
Wakahandula eti, “Aa.”
22Bakakotjiti kuwunli, “Ndiwe yani? Utipe n'handulo yatinowhonopa batituma. Notini nekuko?”
23Wakati,
“Imi ndiwhi lewunodanilila ali mutjilambanyika eti,
‘Baakanyani zila yaHe,’ sekwakalebgwa nenlebesambeli Isaya.”
24Ibabo bakabatumwa nebaFarisi, 25bakawumbhuzwa beti, “Ngono unobvubikilani banhu, hapa usi Khirisitu, kene Elija, kene nlebesambeli?”
26Johane wakabahandula eti, “Imi ndomubvubika muvula, koga pakati kwenyu kuna umwe wamusingazibe, 27iye unohha hule kwangu, mitjili yehangu dzidze imi andizolizanila kuti ndiyisunungule.”
28Kose ikoku kwakayetika kuBhethani seli yaJorodani, paka pebvubikila Johane.
Mhwizana yeNdzimu
29Hhuba linotobela Johane wakabona Yesu ehha kuwunli, akati, “Lingani, Mhwizana yeNdzimu, inodusa matjinyo ehango! 30Ndiye iwhoyu wandaka ndileba nekukwe nditi, ‘Kuna umwe nlume unohha hule kwangu koga unkulu pandili, nekuti waka alipo imi ndisanhu ndabepo.’ 31Imi ndaka ndisingawunzibe, koga nentha yayikoku ndakahha ndibvubika banhu nevula, kuti iye alakidziwe kuna Isirayeli.”
32Johane wakapa busupi, eti, “Ndakabona Meya Yakayengemala ijetuka senjiba ibva kudzimu, ikagala pehhugwi kukwe. 33Imi ndaka ndisingawunzibe, koga iye wakandituma kuti ndibvubike banhu nevula wakati kundili, ‘Iwhoyo wawunowhobona Meya ijetukila pehhugwi kukwe ikagala pawunli, ndiye iwhoyo unowhobvubika banhu ngeMeya Yakayengemala.’ 34Ndabona kakale ndikapa busupi gwekuti iwhoyu ndiye Nkololo weNdzimu.”
Badiyiwa baYesu Bekutanga
35Hhuba linotobela kakale Johane waka alimile nebadiyiwa babe babili; 36akalinga Yesu paaka enangayilazwe, akati, “Lingani Mhwizana yeNdzimu!”
37Badiyiwa babili pabakawuwha eleba ikoku, bakatobela Yesu. 38Yesu wakatjebuka, akabona bewuntobela, akati kubali, “Mohakani?”
Bakati kuwunli, “Rabhi” (Kubva kuti Ndhiyi), “Mogala poni?”
39Iye wakati kubali, “Buyani mowhobona.” Bakahha bakabona paaka egala; bakahwa naye hhuba ilelo, ngobe hhuba laka latewuka kwatjibe awa yebuna masikati.
40Umwe webabili wakawha Johane elebeleka, akatobela Yesu, waka ali Andhireya, nun'una waSimoni Phethiro. 41Wakatanga ahaka nkulu uwe Simoni, akati kuwunli, “Tawuwana Mesiya” (Kubva kuti Khirisitu). 42Wakawuhhisa kunaYesu.
Yesu wakawunlinga akati, “Zina lilo ndiSimoni nkololo waJohane, koga unowhodan'wa Khefasi” (kunobva kuti Phethiro#1.42 Phethiro nange tjiGiriki kunofanana nekuti Khefasi netjiAramayiki, kubva kuti “hongwe” ).
Yesu unodana Filiphi naNathaniyeli
43Tjimuka Yesu wakakumbula yenda kuGalile. Wakawana Filiphi akati kuwunli, “Unditobele.” 44Filiphi waka ebva kuBhethisayida, nzi-nkulu kwaka kubva Andhireya naPhethiro. 45Filiphi wakawana Nathaniyeli, akati kuwunli, “Tawuwana wakakwagwa nekukwe naMozisi munlayo, nebalebesambeli bakakwala nekukwe, Yesu wekuNazaretha, nkololo waJosefa.”
46Nathaniyeli wakati kuwunli, “Kuna tjinhu tjibuya tjingabhuda kuNazaretha?”
Filiphi wakati kuwunli, “Buya uwhobona.”
47Yesu paakabona Nathaniyeli ehha kuwunli, wakati nekukwe, “Linga, nhu weku Isirayeli wakwako, usina tjengela muwunli!”
48Nathaniyeli wakati kuwunli, “Mandiziba tjini?”
Yesu wakawun'handula eti, “Filiphi asanhu akudana, uli kusi kwenkuyu, ndakubona.”
49Nathaniyeli wakawun'handula eti, “Rabhi, Munkololo weNdzimu! Ndimwi Mambo waIsirayeli!”
50Yesu wakawun'handula eti, “Nekuti ndati kukuli ndakubona uli kusi kwenkuyu, wagalamoyo? Unowhobona zwinhu zwikulu kupinda izwezwi.” 51Eba eti kuwunli, “Ndolebesa, ndolebesa, ndoti kumuli, mowhobona kudzimu kuhhuka, nebatumwa beNdzimu betanha pehhugwi nedelukila pasi kweNkololo weNhu.”
ទើបបានជ្រើសរើសហើយ៖
Johane 1: KTP
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The Word For The World International
