Johane 2
2
Nzano webukwe paKana
1Muhhuba lebutatu kwaka kunanzano webukwe kuKana muGalile, mayi baYesu baka baliko, 2naYesu bo waka akokewa kunzano webukwe, kose nebadiyiwa babe bo. 3Wayini yakati yapela, mayi baYesu bakati kuwunli, “Abatjina wayini.”
4Yesu wakati kubali, “Aa aa! mme, Ngono kuneni nami? Lubaka gwangu agwanhu gwaswika.”
5Meyabe bakati kubalanda, “Muthame tjimwe netjimwe tjaanobe amubudza itjo.”
6Kwaka kuna hali dzemabgwe dzitanhatu dzaka dzakabigwa ipapo, dzinohingisiwa panlenje wemaJuta wetjenesewa, imwe neyimwe yadzo yaka ingina malitha angaba makumi ali hhanakadzi kunoti malitha aligulu lina makumi mabili. 7Yesu wakati kubalanda, “Hhadzani hali idzedzi nevula.” Bakadzihhadza dzikati tupu. 8Akakotjiti kubali, “Tjitjelani imwe, mundopa mbhati wenzano.” Bakayeta bejalo. 9Mbhati wenzano wakati alabila vula yakayayetiwa ikabe wayini, akasaziba kuti wayini iyeyo inobva poni (nekutobe balanda ibo bakayitjela bakabeziba), mbhati wenzano wakadana nkwaha 10akati kuwunli, “Umwe newumwe nhu unopa banhu wayini inozipa kutanga, kukotjiti hapa banhu ban'wa batjilaladza, kukotjihha inoyipa; koga iwe watjengeta wayini inozipa kukadza kukabe ngwenuwali.”
11Yeli ndilo jenamiso lekutanga lakayetiwa naYesu kuKana muGalile elakidza gudzo lile, badiyiwa babe bakagalamoyo muwunli.
12Hule kwayikoku wakajetukila kuKhaphenawume, nameyabe nebanun'una babe nebadiyiwa babe, bakanogala ko kwemahhuba mahomanana.
Yesu Unoyenda kuThempeli
(Matewu 21.12,13; Mako 11.15-17; Luka 19.45,46)
13Phasika yemaJuta yaka yabe pedlo, ndizo Yesu wakayenda kuJerusalema. 14Muthempeli wakawana baka betengesa n'ombe, nemhwizi, newhukutiba, nebaka betengesa mari beligele beyendilambeli nen'hingo wabo. 15Eluka tjimi tjemitjili, wakabadusa bose, kose nemhwizi nen'ombe, muthempeli, akapitula mathebuli ebanotengesa mari etebulila pasi maloso abo. 16Wakabudza baka betengesa whukutiba eti, “Dusilani zwinhu izwezwi kutjena; musithame n'umba yaTate bangu kuti ibe n'umba yeyingidzila.” 17Badiyiwa babe bakakumbula kuti kwakakwagwa kuti, “Bilayilila n'umba yenyu kowhondidla moyo kwazo.”
18MaJuta akakoti kuwunli, “Nditjipi tjilakidzilo tjawungathama tjinolayidza kuti unamasimba ethama ikoku?”
19Yesu wakabahandula eti, “Kolomolani thempeli ileli, mumahhuba matatu ndowholimusa kakale.”
20MaJuta akati kuwunli, “Kwakatola makole makumi mana ana kutanhatu kuti thempeli ileli lipele bakiwa, ngono iwe unoti unowholibaka mumahhuba matatu?”
21Koga thempeli laaka eleba nekwalo umbili uwe. 22Wakakotjiti amusiwa kubafi, badiyiwa babe bakakumbula kuti waka akuleba ikoku, bakagalamoyo mulukwalo nedama lakalalebgwa naYesu.
Luzibo gwaYesu nekweBanhu
23Wakati ali muJerusalema panzano wePhasika, banjinji bakagalamoyo muzina lile bebona zwilakidzilo zwaaka ethama, 24koga Yesu haazozwipila kubali, ngobe waka eziba kuti banhu bose batjini, 25kakale kuwunli kwakakusingahakike kuti kube nenhu unopa busupi nekwebanhu; ngobe iye tjekukwe waka eziba kuti ini tjimunhu.
ទើបបានជ្រើសរើសហើយ៖
Johane 2: KTP
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The Word For The World International
