Málkus 16
16
Bagándɔ bámɛɛ́d agá gibɛ́l
(Mat 28.1-8; Lúk 24.1-11; Sáŋ 20.1)
1Giíndía giá bayúdɛn gimaámádɔ́mb, Malía wa gidɔŋ giá Magdala, Malía noódíe Sák na salúma ɔbɔ́nd megúd má ohind gá guɛ́d gá huénén gilɔ́ŋ giá Yésuse. 2Buɔ́sɛ buá busió buá gɛnyɛ, na nulia mbíne abɛ́d agá gibɛ́l. 3Bábígálgalɛn, bɔ́ya áneé: «Ányá ugeédídíŋílídinyeé nidányɛ inínya agá niíd niá gibɛ́l?» 4Gúu bámaágál bila, abán áneé nidányɛ níganyɛ inidíŋílídiénu, henyé nímabá giandá nsesi. 5Bémeémébíŋín uguá gibɛ́l, abán gidɛnd giá muúŋayɔ dugumine ɔmbɔ́g uhunɛ́m, na gisɔn giá fuúm, bugádɔ ubúégimbin bɔ́. 6Igíɔ́yidɛn bɔ́ gɔg áneé: «Nudibiá bugádɔ. Nuáguamba Yésuse wa Nasalɛ́d uyɔɔ́ bɔ́ndɔ́n uguá nuag a? Udibá agá, waáhám uguá gibɛ́l, ndénu hɔɔ́m ɔhɔɔ́ bémebídígínyé yɔ́ héheényé. 7Ídánánɔ gɔg nuɔyidɛn bebinene bég na Piéle áneé weébué guɛ́d gɔ́b Galilé. Hɔ́ núgánánɔ́ yɔ́ haná úmɔnúɔ́yɔ́n.» 8Abáhám, ɔbɔ́bínɔh hádɛ na gibɛ́l, ubúénimie bɔ́ meéne ebén guɔyidɛn mɔndɔ gá giagiá bémelígímín na bugádɔ.
Gubídíye guá Yésuse umaámáhám uguá gibɛ́l
9Uguá buɔ́sɛ buá busió buá gɛnyɛ, Yésuse umaámáhám uguá gibɛ́l, uwegubíéníginye Malía wa gidɔŋ giá Magdala uyɔɔ́ úmehémíe bilɔg biá bileénde bítíndádɔ nomue uguég guá nuɔ́l. 10Malía uwɛɛ́d uwɔnɔyídɛ́n begúl bá Yésuse abámabá neéneg. Bámabígúsɛ́ɛd bégíle nigué niég, bábaŋa. 11Bɔ́mɔɔ́mɔ́b gɔg Malía guɔya áneé unyɛ ɔgɔ́sɛ, usaán yɔ́, ebén guádáab buónyi buég. 12Egélém agányɛ, uwendebídíye uguá bilɔŋ bídodi agá bɔ́gɔ́b bómodi báandɛ abámídan uguá gidɔŋ. 13Obósiond, ɔbɔ́yɔn bɔ́gɔ́b, ta anagányɛ ebén guádáab. 14Egélém, Yésuse uwebídíye agá bebinene bég báad nomue bámaágányánán. Uwánsidɛn bɔ́ gá idɛ́m siɔ́b siá gulal gá giagiá bámasúguádáab guhám guég uguá gibɛ́l. 15Uwɔnduguɔyidɛn bɔ́ áneé: «Ídánánɔ uguá guísi gidigid, nuɔyɔn bandɔ Ginɔ́g giá Nsɔ́m. 16Uwanádáabánɔ́ nugálɔ nuámɛ wond ubíyuminye, wanábá aháŋánɔ. Mɔndɔ udiánadábánɔ́ bánásɔ́mb gisan giég ubia nusésényi. 17Ndénu nulinsa unuɔ́ bánálinsáninaá abánágánɔ́ ɔdɛ́m uguámɛ: Bénéhémenye bilɔg biá bileénde uguámɛ guá ɔhɛ́n, bánágálgal megélígélíe módodi. 18Bénégimben nnyɔ́g na imbɔ́g, bánábíhuán mulɔg, ta buand buá gilɔg buá gual bɔ́, bɔ́nɔ́dɔ́bígɔn banúmanuma imbɔ́g bɔ́ndúgɔn.» 19Ɔgúná Yésuse, umaámáman gugálgal nɔɔ́nɔb, Uhaluá uwɔgɔ́l yɔ́ ugumɔn, uwenedúgúmínyé yɔ́ egég gá ɔmbɔ́g uhunɛ́m. 20Bebinene abɛ́d gá guɛ́d guɔya Ginɔ́g giá Nsɔ́m, hɔɔ́m gidigid Ɔgúná ugígenin bɔ́ ɔmbɔ́g gá buóli ubugányɛ, weéŋen bɔ́ buŋaŋa buá guala biseyi ibiɛ́ bámabá báala. Uguá bilɔŋ ibigányɛ úmedíyényé áneé dugálɔ duá bebinene dúnyɛ hómohómue.
ទើបបានជ្រើសរើសហើយ៖
Málkus 16: EKM
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល