Málkus 15
15
Bámɛɛ́d na Yésuse agá Pilát
(Mat 27.1-2; 27.11-26; Lúk 23.1-5; 23.13-25; Sáŋ 18.28-40; 9.4-16)
1Budúg na budúg, bagɔ́n bá bedúmbinusámb nuá Uhaluá, bɔgɔ́ga na belinsibigodi, anagányɛ gúnya áneé idɔg ihigɔ́n gidigid, ebédugumin gá sɔ́mb gisan giá Yésuse. Abágúda yɔ́ abɛ́d neéneg agá Pilát. 2Pilát uwoóhún yɔ́ áneé: «Anyɛ ofuŋ huá bayúdɛn a?» Yésuse uwondinye yɔ́ áneé: «Aŋuá ɔyɔnɔ́ buɔ́.»
3Bagɔ́n bá bedúmbinusámb nuá Uhaluá ɔbɔ́yɔn Pilát giod giá moónyi gá busió buá Yésuse. 4Pilát uwonduguóhún Yésuse áneé: «Odióguondonyinye a? Ɔɔ́guɔ́bɔn moónyi ɔmɔɔ́ bɔ́yɔnɔ́ gáhɔ gá busió ɔmɔɔ́ a?» 5Yésuse uwahádan bém gɔg ta guondinye, Pilát uwayíka buɔ́ giod.
6Sig budɔ́mb buá Páska wa bayúdɛn, Pilát umabá uhémenye gimbɔg gímomi, igiɛ́ bandɔ bɔ́yɔnɔ́ áneé uhémie. 7Mɔndɔ hana Balábas umabá uguá giansɛ giá mbíne na biendinyi biég, bɔ́mɔ́n mɔndɔ gá gisan igiɛ́ bémégusíe na balomɛ́ŋ. 8Gimbi giá bandɔ igíól agá Pilát, bandɔ abɛ́d gá guóhún yɔ́ áneé: «Diálɛ́n buand ubuɔ́ áganyaá oól ádiálán.» 9Pilát uwoóhún bɔ́ áneé: «Mbuen nuégueleé nnúnihinɛn Ofuŋ huá bayúdɛn?»
10Umɔyɛ́d anagányɛ gá giagiá umaánaán áneé bagɔ́n bá bedúmbinusámb nuá Uhaluá bámalá yaág gá gimbin yɔ́. 11Bagɔ́n bá bedúmbinusámb nuá Uhaluá ebédídígen bandɔ áneé bóhún guhémie Balábas uguá bimbɔg. 12Pilát uwɔndɔgɔ́l nugálɔ uwoóhún bɔ́ áneé: «Yaál giagɛ gɔg naá uyɔ, uyɔɔ́ banuá núdɔ́ŋɔnaá áneé Ofuŋ huá bayúdɛn?» 13Obónduguondinye gɔg gá guánsan áneé: «Ɔ́ndɔ́n yɔ́ uguá nuag.» 14Pilát uwoóhún bɔ́ áneé: «Waál gɔg giagɛ giá gilɔg?» Ebédúmbenye na guánsan, bɔ́ya áneé: «Ɔ́ndɔ́n yɔ́ uguá nuag.» 15Haná Pilát úmambá gual bɔ́ beseé, uwehémínye bɔ́ Balábas, uwodóŋinye bugaga áneé bénúbe Yésuse. Uwedídíginin bɔ́ yɔ́ áneé bɔ́nɔɔ́ndɔ́n yɔ́ uguá nuag.
Nuɔl nuá mmaáŋa
(Mat 27.27-31; Sáŋ 19.2-3)
16Nsénsi isíédúdúle Yésuse gá guɛ́d neéneg uguadá guá íluŋke hiá ŋŋɔ́mɔna, ɔbɔ́dɔ́ŋɛ́ɛn giíŋ giá nsénsi gidigid. 17Abág yɔ́ gihuya giá manɔ́ŋɔmánɔ́ŋá, abánugɛn yɔ́ nuɔl nuá mmaáŋa abádayidɛn yɔ́ uguá ɔduá.#15.17 Bisɔn biá manɔ́ŋɔmánɔ́ŋá na nuɔl búnyɛ nibílaŋa niá ifuŋ, gúu bamág Yésuse muɔ́ gá hɔna yɔ́. 18Egélém agányɛ abɛ́d gá bígélígelie yɔ́ bɔ́ya áneé: «Mbígélíd ofuŋ huá bayúdɛn!» 19Bésúdenye yɔ́ nubalɔ uguá ɔduá, bágasan yɔ́ bidá, bégunsigen dunúnú bɔ́bɔ́mbígɔnɛn yɔ́ nudúg. 20Bámaámáman guhɔna yɔ́, obólie yɔ́ gihuya giá manɔ́ŋɔ́mánɔ́ŋá, obóndie yɔ́ bisɔn biég. Ebéhémie yɔ́ gá guɛ́d guɔnɔɔ́ndɔ́n yɔ́ uguá nuag.
Yésuse umabídúgɛ́n nuag
(Mat 27.32-44; Lúk 23.26-43; Sáŋ 19.19-27)
21Mɔndɔ omodi ɔhɛ́n áneé Símune umabá mɔndɔ wa gidɔŋ giá Silɛ́n, síe wa Alɛgsáŋdlɛ na Lufúus, umosióndón uguá mesíge, nsénsi isíégimbin yɔ́ áneé ubídúgɛn nuag nuá Yésuse. 22Abɛ́d neéneg agá hɔɔ́m ɔhɔɔ́ bɔ́dɔ́ŋɔ́naá áneé Golgóta. Anagányɛ gúnya áneé: «Hɔɔ́m há bigólógólé biá iduá.» 23Abámba gubúnse yɔ́ magɛ́b ɔmɔnɔgídɔ́n na buanyɛ, Yésuse uwɔbiɔ́b mɔ́. 24Ɔbɔ́ndɔn yɔ́ uguá nuag, abábíábidan bisɔn biég, básílígan biɛ́ gá ɔtɔ gá guán gidám igiɛ́ sig mɔndɔ ugaányánɔ́. 25Búmabá uguá bisigɛl biánímanyɛ nomue bɔ́mɔ́ndɔn Yésuse uguá nuag. 26Ɔbɔ́ŋ buand ubuɔ́ bɔ́mɔɔ́n yɔ́ gá buɔ́. Ŋŋɔ́ŋɛ yáguɔ́ yɔya áneé: «Ofuŋ huá bayúdɛn.» 27Ɔbɔ́ndɔn súsɔ́n bihánd biá bandɔ bíandɛ uguá duag agá buáyi buá Yésuse, uyɔ ɔmbɔ́g uhunɛ́m unó ɔmbɔ́g uhudádɛ. 28[Anagányɛ búmabá gubíhónye guá ɔlɔŋ huá Ŋŋɔ́ŋɛ iyɔyɔnɔ́ áneé: Bámasáyígɛ́n yɔ́ uguá ɔlɔŋ huá bahánd.] #15.28 Ɔlɔŋ uhuɔ humasábá uguá mubu múmodi. 29Bandɔ abámadúmbánɛ́n agányɛ bábíbúlímanan bábúga iduá, básiga yɔ́, bɔ́yɔn yɔ́ áneé: «Ndé unó! Adibá aŋuá agagadanɔ́ idúl ond gá hág hiɛ́ uguá mɔɔ́sɛ mádádɔ a? 30Bídúgún gɔg aŋuá muɛ́d asɔs uguá nuag uguɔ́g.» 31Bedúmbinusámb nuá Uhaluá na belinsibigodi bɔ́hɔna yɔ́ bilɔŋ bímomi bɔ́ya áneé: «Weédúgúné bɔsɔ́gá, gúu udiébídúgúne úmuanyɛ muɛ́d egéné dián a? 32Dabdab gɔg ánaá Bémeyíde, Ofuŋ huá bayúdɛn húsɔs uguá nuag, gá gueleé dián, diág ɔdɛ́m uguég gɔg.» Bandɔ ɔbɔɔ́ bɔ́mɔ́ndɔ́n uguá nuag ɔlɔŋ neéneg basíga yɔ́ súsɔ́n.
Nigué niá Yésuse
(Mat 27.45-56; Lúk 23.44-49; Sáŋ 19.28-30)
33Mbíne iyagua na ɔdɛ́m huá buɔ́sɛ uguá guísi gidigid gueneg uguá bisigɛl bídádɔ. 34Uguá bisigɛl bídádɔ ibigányɛ, Yésuse uwehéhídinye áneé: «Eloi, Eloi! Lama sabatani?» Anagányɛ gúnya áneé: «Uhaluá wamɛ, Uhaluá wamɛ! Gá giagɛ ámánihɛ́n?» 35Bandɔ bómodi abámabá hɔ́, bɔ́ya áneé: «Ahá! Ugányɛ gá dɔ́ŋɔ́n Eli!» 36Mɔndɔ omodi uwɔgɔ́l ɔdɛ́d uwenedúm giyug uguá magɛ́b amatuán uwɔdɔ́n uguá nubalɔ, uweéŋin yɔ́ gá bíhuá, wɔya áneé: «Ɔ́bɔ́nɔ́n! Digáguán mmába Eli ugésisusíe yɔ́.» 37Yésuse uwehéhídinye gɔg uwaguanɛn. 38Ndífɔn ya idúl iyasalɛg puúud biseli bíandɛ gubulin ugumɔn gueneg eguísi. 39Ɔgɔ́n wa nsénsi edín átánɔ umabá delimine egég gá busió umaámáan guguanɛn guá Yésuse, uwɔyɛd áneé: «Búnyɛ meliŋ! Mɔndɔ uyɔ waábá Muɔ́n wa Uhaluá.» 40Bagándɔ bámabá hɔ́ hádɛ enéné bábíyigan: Malía wa Magdala na Malía noódíe Sák wa ɔŋɔ́n na Yosé na Salúma, 41Bámabá bébinen Yésuse bádúmába yɔ́ agaá úmabá uguá gibéyi giá guísi giá Galilé na giod giá bagándɔ gímodi igímabúlɛ́ɛg neéneg Yelusalɛ́m.
Ginyo giá Yésuse
(Mat 27.57-61; Lúk 23.50-56; Sáŋ 19.38-42)
42Ginɛ́ŋ gímabá gímaámánagua, búmabá buɔ́sɛ buá biáŋanan gá bélie giíndía giá bayúdɛn, 43gigúmén giá mɔndɔ gímodi uguá idɔg ɔhɛ́n áneé Yɔ́sɛba wa gidɔŋ giá Alimaté igíésieg. Umabá súsɔ́n ugígan guól guá Niguili niá Uhaluá. Uwabímadɛn gá guɛ́d agá Pilát áneé wɔnɔŋɛ́n yɔ́ gilɔ́ŋ giá Yésuse. 44Pilát uwayika haná Yésuse umégué gunsáns. Uwɔdɔ́ŋɛ́ɛn ɔgɔ́n wa nsénsi edín átánɔ gá guóhún yɔ́ mmába usegué feké. 45Haná ɔgɔ́n wa nsénsi edín átánɔ úmómóndinye Pilát, uweéŋin Yɔ́sɛba bugaga bua gɔ́l gilɔ́ŋ. 46Egélém gá guɔ́nd giása, Yɔ́sɛba uwesusie gilɔ́ŋ giá Yésuse uguá nuag, uwemíŋe giɛ́ uguá giása uguɔ́g, uwenebídígínye giɛ́ uguá gibɛ́l igiɛ́ bámaduánán uguá nidányɛ, uwedíŋílidie nidányɛ agá nibíŋínín niá gibɛ́l. 47Malía wa Magdala na Malía noódíe Yosé, bábíyigan hɔɔ́m ɔhɔɔ́ bámaág gilɔ́ŋ.
ទើបបានជ្រើសរើសហើយ៖
Málkus 15: EKM
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល