Lúkas 2
2
Gubíbíén guá Yésuse
(Mat 1.18-25)
1Uguá mɔɔ́sɛ máguɔ́ amagányɛ, ofuŋ uhugɔ́n Ogúste, uwodóŋínye bugaga buá gual gihana giá bandɔ gidigid abámabá uguá ihiligine hiá gidɔŋ giá Lóm. 2Gihana giáguɔ́ igigányɛ, giá busió, gímabíal uguá ginɛŋ igiɛ́ ŋŋɔ́mɔna Kiliniúse úmabá ugimbe gibéyi giá guísi giá Silí. 3Bandɔ gidigid bámabá bídan gá gihana, sig mɔndɔ egég gá tísɔna wa mbíénye, 4Yɔ́sɛba uwadigɛn súsɔ́n Nasalɛ́d uguá gibéyi giá guísi giá Galilé, gá búlɛ́ɛg uguá Yudé, agá tísɔna wa Dáfide uyɔɔ́ bɔ́dɔ́ŋɔnaá áneé Bɛtlɛhɛ́m, gá giagiá umabá uguá niguíli niá Dáfide, unana huég. 5Umiídan gá gihana na ugányɛ weg Malía, úmuanyɛ na nihum.
6Henyé bámaágányɛ hɔ́, buɔ́sɛ buég buá bíén ubúésieg. 7Uwebíén muɔ́n weg wa buɔndɛ, ɔnúmɔndɔ, uwemíŋe yɔ́ uguá ndífɔn, uwebídíminye yɔ́ uguá gidúŋ igiɛ́ manyam mányánanaá guɔ́, gá giagiá bámasábia giásɛ uguá giansɛ giá benyi. 8Uguá gibéyi giáguɔ́ giá guísi, begíg bidúg bómodi bámabá bɔ́sɔ́dɔn uguá ohug bónd bágíga manyam mɔ́b na budúg. 9Gilúna giá Ɔgúná igíédélíminin bɔ́, nigúmi niá Ɔgúná iníéhúgígen bɔ́ na gise giég, giandá giá bugádɔ igíégimbin bɔ́. 10Gilúna igíɔ́yidɛn bɔ́ áneé: «Bídɔ́lígɔ́nɔ́nɔ́n, nudibia bugádɔ, gá giagiá, mmól gá núɔyidɛn ginɔ́g giá Nsɔ́m, igígabánɔ́ na mefunde gá buán gidigid: 11Hínen, Osódie wanɔ umébíbíén agá tísɔna wa Dáfide, búnyɛ Bémeyíde, Ɔgúná. 12Ndénu, ana núgaálinsinaá, nugégégie bugadiá míŋémíŋé uguá ndífɔn bidiminye uguadá guá gidúŋ igiɛ́ manyam mányánanaá guɔ́.» 13Hɔ́nɔhɔ́, ndíd ya bilúna guonoólín ugumɔn, iyosibínógídíe na gilúna igigányɛ, abɛ́d gá gúmenye Uhaluá bɔ́ya áneé: 14«Nigúmi níbá na Uhaluá unyaá hádɛ ugumɔn, bumbénu búbá uguísi gá busió buá bandɔ ɔbɔɔ́ wɔ́yɔnɔ́.»
15Bilúna ibíónd gɔg ugumɔn, begíg bidúg abábígálídɛn áneé: «Ánaá diɛ́d Bɛtlɛhɛ́m, dianaán buand ubúbídúmbanaá hɔ́, buand ubuɔ́ Ɔgúná úmédilinsé.» 16Begíg bidúg abɛ́d gunsáns Bɛtlɛhɛ́m, abán na Malía na Yɔ́sɛba, bugadía bidimina uguá gidúŋ igiɛ́ manyam mányánanaá guɔ́. 17Bámaámán bugadiá, abɛ́d gá guɔya moónyi ɔmɔɔ́ bɔ́mɔ́bɔn gég gá busió. 18Bandɔ gidigid ɔbɔ́mɔbídɔ́lígɔ́nɔ́n bɔ́ abáyíka ŋŋɔyida yɔb. 19Mmába hana gá Malía, umabá ubídígan moónyi amagányɛ gidigid uguég guá meéne na bíóhon ubuɔ́ mɔ́yɔnɔ́. 20Begíg bidúg obónd abɛ́d bégúmenye Uhaluá, bébúlúgenye yɔ́ gá muand gidigid umuɔ́ bámán obónd ɔbɔ́b. Muand umugányɛ, múmabá haná gilúna gímodógínyé bɔ́. 21Buɔ́sɛ buá gánímanyɛ, ubúmabá áneé bágáguans yɔ́, abálɔg yɔ́ ɔhɛ́n áneé Yésuse, ɔhɛ́n uhuɔ́ gilúna gímodóŋínyé agányɛ Malía umabá umanyɛ udigɔ́l nihum niég.
Gidíye giá Yésuse uguá idúl hiá bayúdɛn
22Ginɛŋ giá sugɔn giség giá gigodi giá Mɔ́sɛsa gímeémésieg, na Yɔ́sɛba na Malía ɔbɔ́gɔ́l Yésuse gá guɛ́d Yelusalɛ́m, gá díye yɔ́ agá Ɔgúná. 23Haná búnya ubúɔ́ŋɔ́n uguá yubu hiá gigodi giá Ɔgúná áneé: sig muɔ́n ɔnúmɔndɔ wa busió gubíbíén, béneéŋín Ɔgúná. 24Bámiídan gá dóŋinye súsɔ́n munúg muándɛ ugúnya ana baán bá mbɛŋ báandɛ na gigányɛ na ginɔ́mɛ gá nusámb unuɔ́ Ɔgúná úmagɔ́d uguég guá yubu hiá bigodi.
25Gilun giá mɔndɔ gímabá gɔg Yelusalɛ́m agányɛ, ɔhɛ́n áneé Simeyɔ́ŋ. Umabá mɔndɔ umɔɔ́sɔ́dɔ́n uguá gindényé, wɔɔ́bɔnɛn Uhaluá hómohómue, umabá ugígan guán gisódie giá Íslayɛ́l. Gileénde giá Budányɛ gímabá neéneg, 26Gileénde giá Budányɛ igigányɛ gímadambúnɛ́n yɔ́ áneé: «Edienégué kandabá áneé amán guól guá Bémeyíde uyɔɔ́ Ɔgúná úmadɔ́m.» 27Gúu Gileénde giá budányɛ giáguɔ́ gímédídígen yɔ́ gá guɛ́d uguá idúl hiá bayúdɛn. Uguá ginɛŋ giáguɔ́ igigányɛ, na Yɔ́sɛba na Malía bémebíŋén uguá idúl hiá bayúdɛn, gá gueleé bónohónyé masɔ́m má giség giá gigodi igímóhón yɔ́. 28Simeyɔ́ŋ uwebíŋín gɔg uguá idúl hiá bayúdɛn, uwasamb muɔ́n uguég guá imbɔ́g, uwehínenye Uhaluá, wɔya áneé:
29«Dabdab, Ɔgúná, aganyɛ wanihɛn edúmébi wahɔ ugué uguá bumbénu haná ámagálɛ́ɛd.»
30Gá giagiá eŋís yamɛ, yámán gisódie giáhɔ,
31gisódie igiɛ́ ámaŋán gá busió buá maán gidigid.
32Gise igígábunyanɔ́ maán gidigid amádiabá bayúdɛn, naá gá busió buá nigúmi niá buán buáhɔ Íslayɛ́l!
33Bebíényi bá Yésuse abáyíka muand gidigid umuɔ́ bámabá bɔ́ya gég gá busió. 34Símiyone uwasayɛ bɔ́. Uwabígagalɛd gɔg noódíe weg Malía gá guɔyidɛn yɔ́ áneé: «Ndé, muɔ́n wahɔ uyɔɔ́ ábíyiganaá uyɔ, wanábá mɔndɔ uwenégusenyeé wond wedigenye giod giá bandɔ uguá niguíli niá Íslayɛ́l, wanábá gilɛns giá masalasala. 35Gúu dugedie duá giod giá bandɔ udúnya uguá ninamba dúánábídambunaá. Gáhɔ gɔg Malía, giɔ́bíga gíénégús ɔdɛ́m hana nnyémél.» 36Ugándɔ omodi umabá hɔ́ ɔhɛ́n áneé Ána, ŋŋɔndɛ ya Fanuɛ́l, umabá ebunebúné, umabá uguá niíd niá giansɛ niá Asɛ́l, umasɛ́d uganyɛ gilun. Umabá gá nuɔ́ndɔ́n, uwal duɔŋ dútíndádɔ nomue, ɔnɛ́m uwegué, 37uwesíen gisí, umabá uganyɛ na duɔŋ edín éníhi na dúníhi duég duá bíbíén, umasábá wiídan hádɛ na idúl hiá bayúdɛn, udúmába Uhaluá na budúg hana na buɔ́sɛ: Ubíényenye gunyá, ubísógólonye giod. 38Uwesieg hɔ́nɔhɔ́, uguá ginɛŋ igigányɛ, uwɛɛ́d gá búlúgenye Uhaluá, uwagálgal gá busió buá muúŋayɔ gá bandɔ bem abámabá bágígan gidúgúne giá Yelusalɛ́m. 39Bebíényi bá Yésuse bámaámáman guala giség haná búmabá ubúɔ́ŋɔ́n uguá yubu hiá bigodi biá Ɔgúná, abádigɛn, gá guond Galilé, agá tísɔna wɔb Nasalɛ́d. 40Muúŋayɔ uwaguman, ugúnínan, ubianan nugedie na magɔg má Uhaluá uguég.
Yésuse na duɔŋ dúad na dúandɛ uwɛɛ́d uguá idúl hiá bayúdɛn
41Sig nuɔŋ bebíényi bá Yésuse bámabá bídan Yelusalɛ́m gá budɔ́mb buá Páska wa bayúdɛn. 42Umaágányɛ na duɔŋ dúad na dúandɛ, uwɛɛ́d nɔɔ́nɔb haná bayúdɛn bámabá ból bála. 43Budɔ́mb búmaámáman ebégugen, Yésuse gidɛnd, uwesíen Yelusalɛ́m bebíényi bég ta gulɛns. 44Bégedenye gilé áneé unyɛ uguá ɔlɔŋ huá bandɔ abámabá uguá ŋŋil imoómi nɔɔ́nɔb. Abánda ŋŋim ya buɔ́sɛ, abɛ́d gɔg gá guamba yɔ́ uguɔ́b guá duɔnd naá uguá begúl bɔ́b. 45Gɔgaá, haná bámábadián yɔ́, obónd gá guamba yɔ́ Yelusalɛ́m. 46Egélém gá mɔɔ́sɛ mádádɔ, abánaán yɔ́ uguá idúl hiá bayúdɛn, dugumine agá ɔdɛ́m na ɔdɛ́m huá belinsibigodi, ubídɔ́lígɔnɔn bɔ́, wond woóhon bɔ́ ŋŋóhúnín. 47Bandɔ gidigid abámabá bɔ́bídɔ́lígɔnɔn yɔ́, báyíka gulɛns guég na biondínyi biég. 48Bámaámánaán yɔ́ ebédúmbie guséhén, noódíe uwɔyidɛn yɔ́ áneé: «Muɔ́n wamɛ! Giagɛ igiɛ́ ámádíal igiɛ? Ndé hana naánamɛ na síe wahɔ dímámán guguamba na bugádɔ uguá idɛ́m.» 49Uwɔyidɛn bɔ́ áneé: «Gá giagɛ gɔg núŋambanɔ́ gá buɔ́? Nudiálinsan áneé ŋŋódi áneé ŋŋíga uguá giansɛ giá Síe wamɛ a?»
50Bámuanyɛ gɔg bɔ́mɔsúguɔ́b nugálɔ unuɔ́ úmagálídɛ́n bɔ́ unugányɛ. 51Uwebinidin bɔ́ gɔg obósiond Nasalɛ́d. Umabá wɔɔ́bɔnɛn bɔ́. Noódíe ubídígan muand umugányɛ gidigid egég gá ɔdɛ́m. 52Yésuse uwaguman na nugedie na ndényé na magɔg agá eŋís ya Uhaluá naá agá eŋís ya bandɔ.
ទើបបានជ្រើសរើសហើយ៖
Lúkas 2: EKM
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
