Lúkas 1
1
Magunsa má mbɔba
1Ndága yamɛ Tiófile, haná giod giá bandɔ gímagɔns guɔ́ŋa masɔ́m amámabíálá agásɔ gá eŋís, 2uguá díɔyɔn guá bamaáná abámabá hɔ́ agá magunsa, obónd abáyɛ bedúmébi gá sesenye nugálɔ nuá Uhaluá, 3gúu yaán buɔ́ beseé áneé yaŋuá súsɔ́n ŋŋuɔ́ŋɛ́ɛn muɔ́ gédúdugédúdu hana yámánábia biondínyi gidigid ibiɛ́ yɔ́gɔ́l gisigɛl gá guamba gá masɔ́m amámabíálá guenebul agá magunsa. Ndága yamɛ Tiófile, 4yaáguala buɔ́ gá gueleé alɛns hómohómue wa nuhɔ́nhɔ́n unuɔ́ ámabiá.
Gilúna gímódógie nubíényi nuá Sáŋa Eyumínyi
5Uguá ginɛŋ igiɛ́ Helód úmabá ofuŋ huá Yudé, edúmbinusámb omodi, ɔhɛ́n áneé Sakalí, umabá edúmbinusámb uguá gimbi giá Abia. Ugányɛ weg, ɔhɛ́n áneé Ilísabida, umabá uguá nugɔ́g nuá edúmbinusámb wa ɔgɔ́n Alɔ́n. 6Bámuanyɛ bem báandɛ bámabá bandɔ bá gindényé agá eŋís ya Uhaluá, bégimbe bigodi biá Ɔgúná na ŋŋenyi gidigid ta níŋilía. 7Gɔgaá, bámasábianan muɔ́n, gá giagiá Ilísabida umabá gimbígídíge, guond bámasɛ́d bilun bámuanyɛ bem báandɛ.
8Buɔ́sɛ búmodi, Sakalí umɛ́d gég gá buóli buá edúmbinusámb nuá Uhaluá. Gá giagiá búmabá buɔ́sɛ buá gimbi giég. 9Haná búmabá melélíe má bedúmbinusámb, gieyide igíáguɛn Sakalí ubugányɛ buɔ́sɛ gá guɛ́d ganahuɛ́n Uhaluá bulua uguá mugɔ́ muá Ɔgúná. 10Giíŋ gidigid gímobísógólónyé agá nígadá uguá ginɛŋ igiɛ́ bémebegésényé bulua. 11Gilúna giá Ɔgúná igíébíeníginye yɔ́ gɔg ɔmbɔ́g uhunɛ́m huá ahɔd ya nsíb agaá bébegesenyeé bulua. 12Uyɔɔ́ Sakalí úmaán gilúna, meéne még emébíbuŋulidie, uwɔɔ́b bugádɔ. 13Gilúna igíɔ́yidɛn yɔ́ gɔg áneé: «Sakalí, ɔdiɔ́b bugádɔ, gá giagiá Uhaluá wɔɔ́b mbísógóli yahɔ. Ugányɛ wahɔ Ilísabida ugebíénin muɔ́n ɔnúmɔndɔ uyɔɔ́ ágaluganɔ́ áneé Sáŋa. 14Anábia ibal na mefunde, giod giá bandɔ gíɔ́nɔ́bɔn beseé na bíbíén guég. 15Gá giagiá wanábá giyáŋáŋá giá mɔndɔ agá eŋís ya Ɔgúná. Udianábíhuán magɛ́b, wanábá ohónón na Gileénde giá Budányɛ úmanyɛ uguá nimuɛndɛ niá noódíe. 16Gúu súsɔ́n wónóndienú giod giá baán bá Íslayɛ́l uguá mɔy má Ɔgúná Uhaluá wɔb. 17Gúu wénébueneneé gá Bémeyíde, wanábia bilɔŋ na buŋaŋa buá Elí, gá gueleé wondie besíe ɔlɔŋ na baán wond wondie bandɔ bá idɛ́m gulal, bɛ́d gá gedenye hana bandɔ bá gindényé. Naá gá gueleé báluŋɛn Ɔgúná buán ubúsámanabíaŋunyaŋuɛnyɛ.» 18Sakalí uwoóhún Gilúna áneé: «Yanámuɛ́nyɛ́n buɔ́ naánanyá? Yaŋuá ŋŋanyɛ gilun giá mɔndɔ, ugányɛ wamɛ súsɔ́n uganyɛ gilun udibánd wa bíén.» 19Gilúna igíóndinye Sakalí áneé: «Nnyɛ Gabliyɛ́l ndélímeneé agá busió buá Uhaluá. Usandɔ́m gá gálgal naánahɔ naá gá gueleé ŋŋuɔyidɛn ginɔ́g giá nsɔ́m igiɛ. 20Ahá! Haná ámadiág ɔdɛ́m, uguá nugálɔ unuɔ́ mmɔ́guɔyídɛ́n, nugálɔ unúgobíhónyónú uguég guá gisigɛl, agaáyɛ gimúke, adigandagálgal gueneg hana nuónóbíhónyonú.» 21Uguá ginɛŋ giáguɔ́, buán gidigid ubúmabá agá nígadá, búgígan Sakalí, búónd búbíóhon bubuand ubuɔ́ úgíganɔ́ gá hám uguá mugɔ́. 22Sakalí umaámáhám, umasábá wa gálídɛn bɔ́, abálɛns gɔg áneé umábia nuénígie uguá mugɔ́. Ugálgal nɔɔ́nɔb na imbɔ́g ta guámbɔ́ɔn niíd. 23Ginɛŋ giég giá buóli gímaámáman, uwegúg egég gá nihiá. 24Egélém agányɛ, ugányɛ weg Ilísabida uwɔgɔ́l nihum, uwɛɛ́d gá bínambnamb uguá ihóli ítánɔ, wɔya áneé: 25«Ndénu gɔg buand ubuɔ́ Ɔgúná úmáŋal uguá ginɛŋ igiɛ́ úmɔ́nɔh igáŋ gá ŋŋólie ɔduá gunɔ́h agá eŋís ya bandɔ.»
Gidóginye giá bíbíén guá Yésuse
26Uguá ohóli huá gátíndádɔ huá nihum niá Ilísabida, Uhaluá uwadɔ́m gilúna Gabliyɛ́l agá tísɔna wa gibéyi giá guísi giá Galilé ɔhɛ́n áneé Nasalɛ́d, 27agá ŋŋɔndɛ ya ugándɔ ɔhɛ́n áneé Malía, úmaábá gisɔg giá mɔndɔ ɔhɛ́n áneé Yɔ́sɛba, uguá niíd niá giansɛ niá ofuŋ Dáfide. 28Gilúna igíébíŋín uguá giansɛ giá Malía, igíɔ́yidɛn yɔ́ áneé: «Bálágá! Anyɛ ohónón na magɔg, Ɔgúná unyɛ naánahɔ.» 29Uguá mbígélíd igányɛ, meéne még emébíbuŋulidie, uwɛɛ́d gá bíóhon bubuand ubuɔ́ mbígélíd igányɛ yɔ́yɔnɔ́. 30Gilúna igíɔ́yidɛn yɔ́ gɔg áneé: «Malía, ɔdiɔ́b bugádɔ, gá giagiá amábia magɔg agá eŋís ya Uhaluá. 31Ndé, ɔgɔgɔ́l nihum ebíén muɔ́n ɔnúmɔndɔ uyɔɔ́ ágaluganɔ́ áneé Yésuse. 32Wanábá giyáŋáŋá, gúu bɔ́nɔ́dɔ́ŋɔnaá yɔ́ áneé muɔ́n waá unyaá hádɛ ugumɔn. Ɔgúná Uhaluá wenéŋin yɔ́ igɔy hiá bufuŋ buá síe weg Dáfide. 33Wenégilebe gá ságásagá uguá niíd niá giansɛ niá Yɔ́kɔba, gugilebe guég gúdianábia nsúgie.» 34Malía uwɔyidɛn gilúna áneé: «Búgabíal naánanyá haná mmanyaá ndilɛns ɔnúmɔndɔ?» 35Gilúna igíóndinye yɔ́ áneé:
«Gileénde giá Budányɛ gígasusɛn,
buŋaŋa buá únyaá hádɛ ugumɔn búgehúgígen hana gilind,
buand buáguɔ́, ugébíbíénénú úgabánɔ́ gisámb, bɔ́gɔdɔ́ŋɔn yɔ́ áneé Muɔ́n wa mɔndɔ. 36Ndé, gisɔ́nd giáhɔ Ilísabida gíganyɛ na nihum niá muɔ́n ɔnúmɔndɔ uguég guá bulun, níganyɛ ihóli ítíndádɔ, úmuanyɛ uyɔɔ́ bábá bɔ́dɔ́ŋɔn áneé gimbígídíge, 37gá giagiá, ta buand búdiágáŋan Uhaluá.» 38Malía uwondinye gɔg áneé: «Nnyɛ edúmébi wa Ɔgúná, ánaá buá gidigid búbíál gámɛ gá busió haná ɔ́yɔnɔ́!» Gilúna igíólíginye yɔ́.
Malía umɛɛ́d gá bígélídie Ilísabida
39Uguá mɔɔ́sɛ amagányɛ, Malía uwadigɛn gunsáns gá guɛ́d agá tísɔna omodi uguá gibéyi giá guísi giá Yudé igínya uguá iŋuɛnyɛ. 40Uwebíŋín uguá giansɛ giá Sakalí, uwond uwebígélídie Ilísabida. 41Uguá ginɛŋ igiɛ́ Ilísabida úmɔɔ́b mbígélíd ya Malía, muɔ́n uwedúmbie guenébíéhídín uguá nimuɛnd, Ilísabida uwohón na Gileénde giá Budányɛ. 42Uwebísenidinye, uwehéhídinye áneé: «Anyɛ asayán gudɔ́mb bagándɔ gidigid, gúu súsɔ́n muɔ́n unyaá uguáhɔ guá nimuɛnd únya asayán! 43Naánanyá búábíal áneé noódíe wa Ɔgúná wamɛ wesiŋegín? 44Gá giagiá uguá ginɛŋ igiɛ́ mmɔ́b mbígélíd yahɔ, muɔ́n umébíéhídín uguámɛ guá nimuɛnd na mefunde. 45Anyɛ asayán, aŋuá amaág ɔdɛ́m gá ubuɔ́ Ɔgúná úmɔyɛ́d gáhɔ, gá giagiá búónóbíhónye.»
Gilɛ́l giá Malía
46Malía uwɔyɛd gɔg áneé:
«Bɔndɔ buámɛ búébúlúgenye Ɔgúná,
47súsɔ́n ɔdɛ́m huámɛ húnyɛ uhuhónón na mefunde
gá busió buá Uhaluá unyaá Osódie wamɛ,
48gá giagiá, wɔɔ́mbíyɔ́ŋímɛ́n yaŋuá gibembélídíe giég giá edúmébi.
Ɛɛ́ɛ, gugɔns dabdab, dunam gidigid dúɔ́nɔ́ya áneé nnyɛ asayán,
49gá giagiá, Uhaluá wa buŋaŋa gidigid wál biandá biá muand gámɛ gá busió, ɔhɛ́n huég húnyɛ gisámb.
50Waáguánan bandɔ ebédínenú yɔ́ bulɔ́b uguá binɛŋ bim.
51Weéhémíe bugaga buég buá ɔmbɔ́g gidigid, uwesélémendie bandɔ bá biandá biá idɛ́m,
52Woólónyé ifuŋ uguɔ́b guá mugɔ́y, weébúlúgényé bibembélídíe,
53Weébíhélényé bansansán na binɔ́g biá muand, weégúgényé nnuɛ́m imbɔ́g gudɔɔ́.
54Weésígígín edúmébi weg Íslayɛ́l ɔmbɔ́g haná weébídúmdényé bulɔ́b buég,
55hana úmadánɛ́n ndíndíl siásɔ, gá beseé wa Áblahám na inana siég gá ságásagá.»
56Malía uwagíga agá Ilísabida buand buá ihóli ídádɔ, uwobóduguond egég gá nihiá.
Gubíbíén na nuansana nuá Sáŋa Eyumínyi
57Ginɛŋ giá Ilísabida giá bíén igíésieg, uwebíén muɔ́n ɔnúmɔndɔ. 58Bandɔ bég bá ifág na duɔnd duég ɔbɔ́b áneé Ɔgúná weédíyé yɔ́ ɔdɛ́m huég huá beseé, abɛ́d gá balaga neéneg. 59Henyé, uguá buɔ́sɛ buá gánímanyɛ buá nubíényi, bandɔ abagányɛ oból gá nuansana nuá bugadiá, abámba gulɔg yɔ́ ɔhɛ́n huá síe weg Sakalí. 60Gɔgaá, noódíe uwɔgɔ́l nugálɔ uwɔyɛd áneé: «Ɛ́ɛɛ́, bɔ́gɔdɔ́ŋɔn yɔ́ áneé Sáŋa.» 61Ɔbɔ́yidɛn yɔ́ áneé: «Ta mɔndɔ uguánɔ guá niguili udigódi buɔhɛ́n ubugányɛ.» 62Abágálɛ́ɛd gɔg na imbɔ́g gá guóhún síe ɔhɛ́n uhuɔ́ wámbanɔ́ gulɔg muɔ́n. 63Sakalí uwɔŋɛn gigɔ́g, uwɔɔ́ŋ guɔ́ áneé: «Ɔhɛ́n huég húnye áneé Sáŋa!» Bámuanyɛ gidigid abáyíka buɔ́. 64Hɔ́nɔhɔ́, gilɛmb giá Sakalí igíálágúmɛd uwanduguɛ́d gá gálgal ugúmenye Uhaluá. 65Bafágfág bég gidigid ɔbɔ́b bugádɔ, bandɔ abɛ́d bɔ́ya moónyi amagányɛ uguá gibéyi giá guísi giá Yudé igínya uguá ɔŋuɛnyɛ. 66Bandɔ gidigid abámabá bɔ́bɔn moónyi amagányɛ, bábídígan mɔ́ uguɔ́b guá meéne bóbíóhon áneé: «Muúŋayɔ uyɔ wanábá naánanyá?» Hómohómue mbánan, buŋaŋa buá Ɔgúná búnyɛ neéneg.
Gilɛ́l giá Sakalí
67Sakalí síe wa muɔ́n, uwohón na Gileénde giá Budányɛ uwɛɛ́d gá gálgal hana ebunebúné wɔya áneé:
68«Ánaá Ɔgúná, Uhaluá wa Íslayɛ́l ubá asayán,
Gá giagiá wɔɔ́síyɔ́l buán buég uwedúgún buɔ́.
69Weédíbésínyé gigaga giá Osódie, uguá bunɔŋ buá edúmébi weg Dáfide.
70Búnyɛ buand ubuɔ́ úmodógie uguá niíd niá badányɛdányɛ bá bebunebúné bég bá nsuá.
71Umodógíe áneé wenédídúgún uguá imbɔ́g siá babɛlɛ́bɛl básɔ naá uguá imbɔ́g siá bandɔ abádíbinanɔ́. 72Umaán besíe básɔ bulɔ́b guond umésébiélidie gidányɛdányɛ giég giá nigál.
73Ɛɛ́ɛ, Uhaluá umadánɛ́n síe ɔgúna wasɔ Áblahám, wanádiádáabɛn buɔ́ súsɔ́n,
74gá gueleé egélém gá dihɔg uguá imbɔ́g siá babɛlɛ́bɛl básɔ, didiɔ́bɔ́n bugádɔ gá dúmába yɔ́,
75gá gueleé dibá gindényé, dibá súsɔ́n budányɛ egég gá eŋís uguá nusɔ́da nuásɔ gidigid.
76Gáhɔ gɔg, maná muúŋayɔ, bɔ́nɔ́dɔ́ŋɔn áneé ebunebúné wa Uhaluá unyaá hádɛ ugumɔn, gá
giagiá anánda uguá busió buá Ɔgúná gá guaŋanan ŋŋil siég,
77naá gá linsie buán buég áneé woóguólon wasiyibínɛ́n buɔ́ gɔg gá bilɔga wond udúgún buɔ́.
78Uhaluá wasɔ waáguánanɛn bulɔ́b, ɔdɛ́m huég húnyɛ yɛbyɛb nsesi, wanádídúmɛ́n Osódie
úwanádíbunyanɔ́ hana gise giá guɔ́m gubál guonoólónín ugumɔn,
79naá gá bunya bandɔ abánya uguá mbíne naá abánya uguá gilind giá nigué,
gá guendenye ambanɔ yasɔ uguá ŋŋil ya bumbénu.»
Budɛnd buá Sáŋa Eyumínyi
80Mmába hana gá muɔ́n, uwaguman uguá nuɔ́l naá uguá gileénde. Ugíga pɛ́ŋ agá uhambɛ, gueneg buɔ́sɛ ubuɔ́ úmebídíyé agá eŋís ya buán buá Íslayɛ́l.
ទើបបានជ្រើសរើសហើយ៖
Lúkas 1: EKM
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
