Lúkas 3
3
Magunsa má buóli má Sáŋa Eyumínyi
(Mat 3.1-6; Mál 1.1-6)
1Búmabá uguá nuɔŋ bunyo uguá ihiligine hiá ŋŋɔ́mɔna Tibɛ́l, Pɔ́ns Pilát ofuŋ huá gibéyi giá guísi giá Yudé, Helód ofuŋ huá Galilé, gisɔ́nd giég Fílibe ofuŋ huá gidɔŋ giá Itulé naá giá Tlakonitíd, Lisaniás úmuanyɛ ofuŋ huá Abilɛ́n, 2uguá ginɛŋ giáguɔ́, Hán na Kayíf, bɔ́ bámabá bagɔ́n bá bedúmbinusámb, Sáŋa uhaŋ wa Sakalí uwɔɔ́b nugálɔ nuá Uhaluá agá uhambɛ. 3Uwesieg uguá bibéyi biá guísi gidigid biá ŋŋɛnd ya Yuldɛ́ŋ, Sáŋa wɛɛ́d udógonye giyuminye giá bídun na núgie bilɔŋ gá biá giyibinina gá bilɔga, 4haná búmabá ubúɔ́ŋɔ́n uguá yubu hiá ebunebúné Esayí áneé:
Ugelu húáguánsan agá uhambɛ húɔya áneé:
Aŋánánánɔ ŋŋil ya Ɔgúná,
nuganuna duhuáŋ duég.
5Bibólóbóŋ gidigid bíénébígíde,
Iŋuɛnyɛ na binyɛ gidigid muánábísasa,
Ŋŋil siá bágálábágálá síánábíganuna,
Ŋŋil isídiabá beseé síénébíhíne,
6Agányɛ bandɔ gidigid bánánánɔ gisódie giá Uhaluá.
Gidóginye giá ilúnd ihíóloneé
(Mat 3.7-10)
7Sáŋa uwɔyɔn gɔg bandɔ abámabá bólón egég gá bíyumenye áneé: «Áháy, Baán bá mpɛ́nyɛ, ányá úmenúdíyé ŋŋil ya bínɔhɛn ilúnd ihíóloneé? 8Ánaá núala gɔg binɔ́g biá melélíe ibídíyenyeé áneé nuébídun unuenúgie bilɔŋ, nudíɔndɔbíɔyɔn uguánɔ guá idɛ́m áneé: “Áblahám únyaá síe wasɔ.” Gá giagiá yɔɔ́núɔyɔn buɔ́, búnyɛ hómohómue áneé, Uhaluá unyɛ wa guéye adányɛ ɔyɔ baán weéŋin Áblahám. 9Yaáh muɛ́d híganyɛ ansigina agá ndínyi ya budɛ́ gá bál buɔ́, gúu budɛ́ gidigid ubúdiéhúme binɔ́g biá bibɔg bánábálanɔ́ buɔ́ bédúm buɔ́ agá yoógi.»
Melélíe emedíyenyeé gunúgie guá bilɔŋ
10Bandɔ obóhún gɔg Sáŋa áneé: «Dial naánanyá gɔg?» 11Uwondinye bɔ́ áneé: «Mɔndɔ úmábia bisɔn bíandɛ, weéŋin mɔndɔ udiábiánán gímomi, mɔndɔ ubiananaá súsɔ́n gunyá, waba nɔ́ bilɔŋ bímomi.» 12-13Beduísilampɔ́ obónoól gá bíyuminye obóhún Sáŋa áneé: «Ehuínyihuínyi, basuá súsɔ́n dial naánanyá?» Uwondinye bɔ́ áneé: «Nudiɔ́hígɔ́n buand gudɔ́mb ubuɔ́ bɔ́mɔnúɔyídɛ́n.» 14Nsénsi isíóhún yɔ́ súsɔ́n áneé: «Basuá súsɔ́n dial naánanyá?» Uwondinye bɔ́ áneé: «Nudigényígényé bandɔ, nudifudényé bɔ́ gá gilé, nuɔ́bɔn beseé na bisuɛ́n biánɔ.»
Gidóginye giá mɔndɔ uwoóloneé
(Mat 3.11-12; Mál 1.7-8)
15Bandɔ gidigid bámasɛɛ́d gá gígan gulgúl, bónd bóbíóhon gá busió buá Sáŋa áneé: «Búdibá úmuanyɛ únyaá Bémeyíde a?» 16Sáŋa uwondinye bɔ́ gɔg áneé: «Yaŋuá yeénúyumenye na mimbi, uwoóloneé gɔg unyɛ ŋŋaŋa gundɔ́mb, ndibá ta na maná bugaga wa sulun nuoli nuég nuá gibɔ́gɔ́d. Úmuanyɛ wenénúyumenye uguá Gileénde giá Budányɛ naá uguá yoógi. 17Ugódi gifife giá fife agá ɔmbɔ́g, wond udándúna bihún na nsám, nsám ugíŋe egég gá nunsas, wenédúm bihún agá yoógi ihídiéhuén.» 18Anagányɛ Sáŋa úmabá ugínyiginye na giod giá dugálɔ wond udógonyinye bɔ́ Ginɔ́g giá Nsɔ́m.
Nsúgúdinye ya buóli buá Sáŋa
(Mat 14.3-4; Mál 6.17-18)
19Sáŋa umabá usumenin gɔg ofuŋ Helód gá bilɔg biá muand gidigid ibiɛ́ úmabá wala, súsɔ́n haná úmɔhɔg Helodiád, ugányɛ gisɔ́nd giég, 20uwendebíbísinye gɔg gá gimbin Sáŋa gá nɔh yɔ́ uguá giansɛ giá mbíne.
Giyuminye giá Yésuse
(Mat 3.13-17; Mál 1.9-11)
21Egélém gá bandɔ gidigid gubíyuminye, Yésuse uwebíyuminye súsɔ́n. Umoógóbísógólonyeé, gumɔn uguá bíbun, 22Gileénde giá Budányɛ igíásusɛn yɔ́ na nuɔ́l hana mbɛŋ ya nsɔŋ mbúlúa, ugelu uhúónoólín ugumɔn gɔg húɔya áneé: «Anyɛ muɔ́n wamɛ, hínen uyɔ mmébíén.»
Nugɔg nuá Yésuse
(Mat 1.1-16)
23Yésuse umabá ugányɛ wa bia buand hana duɔŋ nitín na dúad, uwabádagɔns buóli. Bandɔ bémegedényé áneé umabá uhaŋ wa Yɔ́sɛba, Yɔ́sɛba uhaŋ huá Elí, 24Elí uhaŋ huá Matát, Matát uhaŋ huá Léfi, Léfi uhaŋ huá Mɛlsí, Mɛlsí uhaŋ huá Yanáyɛ, Yanáyɛ uhaŋ huá Yɔ́sɛba, 25Yɔ́sɛba uhaŋ huá Matatías, Matatías uhaŋ huá Amós, Amós uhaŋ huá Nahúm, Nahúm uhaŋ huá Ɛslí, Ɛslí uhaŋ huá Nagáyɛ, 26Nagáyɛ uhaŋ huá Máat, Máat uhaŋ huá Matatías, Matatías uhaŋ huá Semeyín, Semeyín uhaŋ huá Yosɛ́k, Yosɛ́k uhaŋ huá Yodá, 27Yodá uhaŋ huá Yohanán, Yohanán uhaŋ huá Lésa, Lésa uhaŋ huá Solobabɛ́l, Solobabɛ́l uhaŋ huá Sealsiɛ́l, Sealsiɛ́l uhaŋ huá Néli, 28Néli uhaŋ huá Mɛlsí, Mɛlsí uhaŋ huá Adí, Adí uhaŋ huá Kosam, Kosam uhaŋ huá Ɛlmadám, Ɛlmadám uhaŋ huá Ɛ́ɛl.
29Ɛ́ɛl uhaŋ huá Yésuse, Yésuse uhaŋ huá Eliesɛ́l, Eliesɛ́l uhaŋ huá Yolím, Yolím uhaŋ huá Matát, Matát uhaŋ huá Léfi, 30Léfi uhaŋ huá Simeyɔ́ŋ, Simeyɔ́ŋ uhaŋ huá Yudá, Yudá uhaŋ huá Yɔ́sɛba, Yɔ́sɛba uhaŋ huá Yonám, Yonám uhaŋ huá Eliakím 31Eliakím uhaŋ huá Meléya, Meléya uhaŋ huá Mená, Mená uhaŋ huá Matata, Matata uhaŋ huá Natán, Natán uhaŋ huá Dáfide, 32Dáfide uhaŋ huá Yesé, Yesé uhaŋ huá Obɛ́d, Obɛ́d uhaŋ huá Bós, Bós uhaŋ huá Sala, Sala uhaŋ huá Nasɔ́n, 33Nasɔ́n uhaŋ huá Aminadáb, Aminadáb uhaŋ huá Admín, Admín uhaŋ huá Alní, Alní uhaŋ huá Ɛslɔ́n, Ɛslɔ́n uhaŋ huá Pɛlɛ́s, Pɛlɛ́s uhaŋ huá Yudá, 34Yudá uhaŋ huá Yɔ́kɔba, Yɔ́kɔba uhaŋ huá Isák, Isák Uhaŋ huá Áblahám, Áblahám uhaŋ huá Téla, Téla uhaŋ huá Nahɔ́l, 35Nahɔ́l uhaŋ huá Selúg, Selúg uhaŋ huá Leú, Leú uhaŋ huá Pɛlɛ́g, Pɛlɛ́g uhaŋ huá Ebɛ́l, Ebɛ́l uhaŋ huá Séla, 36Séla uhaŋ huá Kénam, Kénam uhaŋ huá Alpasád, Alpasád uhaŋ huá Sém, Sém uhaŋ huá Noé, Noé uhaŋ huá Lémɛk, 37Lémɛk uhaŋ huá Matusalɛ́m, Matusalɛ́m uhaŋ huá Hénɔk, Hénɔk uhaŋ huá Yelɛ́d, Yelɛ́d uhaŋ huá Malaleyɛ́l, Malaleyɛ́l uhaŋ huá Kénam, 38Kénam uhaŋ huá Énos, Énos uhaŋ huá Sɛ́t, Sɛ́t uhaŋ huá Adám, Adám uhaŋ huá Uhaluá.
ទើបបានជ្រើសរើសហើយ៖
Lúkas 3: EKM
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
