Sáŋa 15
15
Yésuse mbanda ya fínyi
1Yésuse uwɔyɔn bebinene bég áneé: «Nnyɛ mbanda ya bunimɛ́d ubuɔ́ bɔ́dɔ́ŋɔnaá áneé fínyi, Síe wamɛ úhándanɔ́. 2Núgasia gidigid unúnya uguámɛ, númánúdihúme bibɔg woólíe nuɔ́, núgasia unúhúmenú bibɔg uhánda nuɔ́ gá gueleé nuéndehúme giod. 3Nuganyɛ gínsínágínsiná na nugálɔ unuɔ́ mméndenúhuínyihuinye. 4Bílábánánɔ uguámɛ haná yaŋuá nnya alábánánɔ uguánɔ, bilɔŋ bímomi haná búnya áneé núgasia nuá fínyi númánudibá uguá ndínyi, núdibá nuá húm bibɔg, bilɔŋ bímomi súsɔ́n númánúdigíga uguámɛ núdibá nuá húm bibɔg. 5Nnyɛ ndínyi ya fínyi, núnyɛ dúgasia, mɔndɔ úmabá alábánánɔ uguámɛ yaŋuá uguég, weéhúme giod giá bibɔg gá giagiá, núdibá nua gual buand númánudibá naánamɛ. 6Mɔndɔ úmádigíga uguámɛ bɔ́nɔ́nɔh yɔ́ agá nígadá hana núgasia, ugúdan, dúgasia udugúdán bábáda duɔ́ bɔ́nɔh duɔ́ agá yoógi dúbiga. 7Númabá ababíládán naánamɛ, nugálɔ nuámɛ núgíga uguánɔ guá idɛ́m, ubuɔ́ núɔ́ŋɔnaá nuádáŋáaba buɔ́. 8Ubúálanɔ́ nigúmi niá Baba búbúnya áneé nuhúme giod giá bibɔg nuond nubá bebinene bámɛ. 9Haná Baba úŋɔyɔnɔ́, yaŋuá súsɔ́n yɔɔ́núɔya, gígánánɔ abábíládán uguámɛ, gá gueleé ndúmbenye na núɔya. 10Númégimbe bibídína biámɛ nuanágíga uguámɛ guá ginɔ́nɛ́n, haná yaŋuá ŋŋimbenú bibídína biá Baba, yaágíga uguég guá ginɔ́nɛ́n.»
11«Yɔɔ́núɔyɔn buɔ́ gá gueleé ibal hiámɛ híbá uguánɔ, núbá obóhónón na hiɛ́. 12Ndénu gibídína giámɛ igiɛ: Ánaá núnɔ́nɛ́nɛnɔnɛn haná yaŋuá nnúɔyɔnɔ́. 13Ginɔ́nɛ́n gímodi gídibánd giandá gudɔ́mb áneé mɔndɔ udóŋinye nusɔ́da nuég gá busió buá begúl bég. 14Núnyɛ begúl bámɛ númala ubuɔ́ nnúbídínanaá. 15Ndiɔ́ndɔnúdɔ́ŋɔn áneé bedúmébi, gá giagiá edúmébi udiényi buand ubuɔ́ ɔgúnɔ́gɔ́n weg wálanɔ́, ŋŋanyɛ gá núdɔ́ŋɔn áneé begúl bámɛ. Gá giagiá buand gidigid ubuɔ́ mmɔ́bɔn agá Baba yeéménénúhuínyihuinye buɔ́. 16Búdibá banuá numeéŋeyíd gɔgaá, yaŋuá mmeénúéyíd iyenúdélíminye áneé nuɛ́d, nuhúme bibɔg, bibɔg ibígíganɔ́, agányɛ gɔg buand gidigid ubuɔ́ núɔ́ŋɔnaá Baba uguámɛ guá ɔhɛ́n wanánúhuá buɔ́. 17Buand ubuɔ́ nnúbídínanaá búbúnya áneé: Nɔ́nínɔ́nɔ́nɔ.»
Mbina ya bandɔ bá guísi uguɔ
18«Mmába bandɔ bá guísi uguɔ bánúbina linsánánɔ áneé bémebue gumbina. 19Núámabá bandɔ bá guísi uguɔ, bandɔ bɔ́núɔya gá giagiá núnyɛ bɔ́b. Gɔgaá, mmenúéyíd uguá bandɔ bá guísi uguɔ núdiɔ́nduguɔ́bɔnɛn na guísi uguɔ, buand buáguɔ́ guísi uguɔ gúnúbinanɔ́. 20Bídúmúdényénu nugálɔ unuɔ́ mmɔ́núɔyídɛn: “Edúmébi udiádúmban ɔgúnɔ́gɔ́n weg.” Mmába bémeŋényigenyeé, bénénúgényigenye súsɔ́n. Mmába bémegimbe dugálɔ duámɛ, bénégimbe súsɔn duánɔ. 21Bánánúala muand umugányɛ gá giagiá nunyɛ bandɔ bámɛ, bédiényi umaándɔ́m. 22Búámabá áneé mmosúguól, búámaba áneé mmaságálgal gɔ́b bádiábábia gilɔga gɔgaá, dabdab bádibánd na buand buá guɔyɛd gá busió buɔ́b buá gilɔga. 23Mɔndɔ umbinanɔ́, waábina súsɔ́n Baba. 24Yámándial melélíe ɔmɔɔ́ ta mɔndɔ úmanyaá udial ɔgɔ́b gá ɔdɛ́m na ɔdɛ́m, késíe bádiábábia gilɔga gɔgaá, dabdab bábɛn Baba naánamɛ gágá. 25Gɔgaá, búmabá gá hónye nugálɔ unúnya unúɔ́ŋɔ́n uguɔ́b guá gigodi: “Bámambɛn kanda nɛɛ́m.” 26Uguá ginɛŋ igiɛ́ mɔndɔ uyɔɔ́ ŋŋanúdúmína gá núgígenin ɔmbɔ́g guonoólín agá Baba wónólésiegenú, unyaá Gileénde igíéndenyeé uguá hómohómue guonoólín agá Baba gíɔ́nɔ́ya gímuanyɛ mbánan buónyi ubuɔ́ gíényénú gámɛ gá busió. 27Banuá súsɔ́n núɔnɔya buónyi ubuɔ́ núényénú gámɛ gá busió gá giagiá, nunyɛ naánamɛ feké agá magunsa.»
ទើបបានជ្រើសរើសហើយ៖
Sáŋa 15: EKM
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
