Sáŋa 14
14
Yésuse ŋŋil iyídaninaá agá Baba
1Yésuse uwɔyidɛn bebinene bég áneé: «Ɔdɛ́m huánɔ húdibebín, ádáabánánɔ Uhaluá nuŋádáaban súsɔ́n. 2Giod giá indig gínyɛ uguá giansɛ giá Baba, búámábúdibá nɔ́ ndiɔ́núɔyidɛn áneé mmɛɛ́d yananúaŋanɛn indig. 3Yaánámánanúaŋánɛ́n siɛ́ yonónd yɔsinúgɔ́l gá gueleé hɔɔ́m ɔhɔɔ́ nnya nubá hɔ́ súsɔ́n. 4Mmába hana gá hɔɔ́m ɔhɔɔ́ yídanaá, nuényi ŋŋil.» 5Túmasia uwɔyidɛn yɔ́ áneé: «Ɔgúná, didiényi hɔɔ́m ɔhɔɔ́ idanaá, naánanyá gɔg dínya dia lɛns ŋŋil?» 6Yésuse uwondinye yɔ́ áneé: «Nnyɛ ŋŋil, nnyɛ hómohómue, nnyɛ nusɔ́da, ta mɔndɔ udibá wa guɛ́d agá Baba úmádidúmbɛ́n agámɛ. 7Núámánlinsan, núálinsan súsɔ́n Baba, gugɔns gɔg dabdab nuényi yɔ́, númaán yɔ́.» 8Filíbe uwɔyidɛn yɔ́ áneé: «Ɔgúná, dídíyé pɛ́ŋ Baba búéguegen gásɔ gá busió.» 9Yésuse uwondinye yɔ́ áneé: «Búganyɛ giandá giá ginɛŋ igiɛ́ nnya naánanɔ, Filíbe amanyɛ adinlɛns a? Mɔndɔ usáŋán tábɔ́ áneé umaán Baba, gá giagɛ ɔ́yɔnɔ́ áneé “Dídíyé Baba?” 10Adiáguádáaban áneé naánamɛ na Baba dinyɛ omoómi a? Dugálɔ uduɔ́ nnúɔyɔnaá ndiɔ́bíɔyɔn duɔ́ yaŋuá mbánan! Gɔgaá, Baba ugíganɔ uguámɛ úhónonyeé melélíe még amagányɛ gidigid. 11Ánaá nuŋádáab uguá ginɛŋ igiɛ́ yɔ́yɔnɔ́ áneé: Naánamɛ na Baba dinyɛ omoómi, ta búbá áneé nudiáguádáaban nugálɔ nuámɛ, ánaá núádáaban gá melélíe ɔmɔɔ́ núananaá. 12Ɛɛ́ɛ, uguá hómohómue, uguá hómohómue, yɔɔ́núɔyɔn buɔ́, mɔndɔ uŋádáabanaá wanála súsɔ́n bumelélíe ubuɔ́ yalanɔ́, wanánduguala muɛ́d biandá biá muand guandandɔ́mb gá giagiá, yaŋuá mmɛɛ́d agá Baba. 13Buá gidigid ubuɔ́ núɔ́nɔ́ŋinaá Baba uguámɛ guá ɔhɛ́n yanál buɔ́, gá gueleé Baba ubia nigúmi uguá Muɔ́n. 14Mmába nuɔ́guɔŋɔn buand uguámɛ guá ɔhɛ́n yanál buáguɔ́.»
Ndán ya Gileénde giá Budányɛ
15Mmába núɔŋɔya nuénégimbe bibídína biámɛ 16guond yaŋuá yonóbísógólonye Baba áneé unúdúmɛ́n mɔndɔ odoódi gá núgígin ɔmbɔ́g uwanágíganɔ́ naánanɔ gá ságásagá. 17Unyɛ Gileénde igíéndenyinyeé uguá hómohómue, igiɛ́ bandɔ bá guísi bádiábá bá gíndígɛn. Gá giagiá bádiáguánan yɔ́, bédiényi yɔ́ súsɔ́n. Gɔgaá, banuá nuényi yɔ́ gá giagiá, waágíga agánɔ gá buáyɛ, unyɛ uguánɔ guá duɔ́l. 18Ndianánúnihɛn hana ŋŋuinyi, yoóguólósiondón agánɔ gá buáyɛ. 19Búéménésién maná ginɛŋ bandɔ bá guísi bádianádaŋán. Gɔgaá, banuá nuanáŋánan nsɔ́dɔn, nuɔnɔ́sɔ́dɔn súsɔ́n. 20Uguá buɔ́sɛ ubugányɛ núánálinsanɔ́ áneé naánamɛ na Baba dinyɛ omoómi, naánamɛ naánanɔ dinyɛ omoómi. 21Mɔndɔ ugíndíganaá bibídína biámɛ wond ugimbe biɛ́ ugányɛ wɔ́ŋɔya. Mɔndɔ uŋɔyɔnɔ́, Baba wɔnɔ́ya yɔ́, yaŋuá súsɔ́n yɔnɔ́ya yɔ́, mbídíyenyinye yɔ́. 22Yudé, búdibá Yúdas wa Iskaliɔ́t, uwoóhún yɔ́ áneé: «Ɔgúná, giagɛ igíálanɔ́ áneé ebídíye agásɔ, edibídíye agá bandɔ bá guísi uguɔ?» 23Yésuse uwondinye yɔ́ áneé: «Mmabá mɔndɔ wɔ́ŋɔya, wenégimbe dugálɔ duámɛ, Baba wɔnɔ́ya yɔ́, dianɛɛ́d egég, dibíhágɛn uguég. 24Mɔndɔ udiɔ́ŋɔya udiégimbe dugálɔ duámɛ, henyé nugálɔ unuɔ́ núɔ́bɔnaá núdióguólonin agámɛ gɔgaá, nuóguólonin agá Baba umaándɔ́m. 25Yɔ́ndɔnúɔyɔn muand umugányɛ uguá ginɛŋ igiɛ́ mmanyaá naánanɔ, 26gɔgaá mɔndɔ ugenúgígineé ɔmbɔ́g, Gileénde giá Budányɛ igiɛ́ Baba wánádúmanɔ́ uguámɛ guá ɔhɛ́n gígiánábanɔ́ gínúhuínyihuinye buand gidigid, gíond gínúdúmenye buá gidigid ubuɔ́ mmɔ́núɔyɔ́n. 27Mmánúnihínɛn bumbénu, mmánúhuá bumbénu buámɛ ndiánúhúan buɔ́ uguá bilɔŋ biá bandɔ bá guísi uguɔ, nudibebin ɔdɛ́m nudibia bugádɔ. 28Númɔɔ́b yɔya áneé: “Yaáguídan gɔgaá, yonóndosinúondín.” Núɔ́mɔ́ŋɔya, nuábalaga uguá guɔ́b áneé yaáguídan agá Baba gá giagiá, unyɛ giandá gundɔ́mb. 29Yɔɔ́núɔyɔn buɔ́ dabdab uyɔɔ́ muand umugányɛ múmanyaá múdibíal gá gueleé, uguá ginɛŋ igiɛ́ múánábíalanɔ́, nuag ɔdɛ́m uguámɛ. 30Gugɔns dabdab, ndibánd na mayɔ giod má guɔya naánanɔ gá giagiá, ofuŋ huá guísi uguɔ húóguólon, húdibá huá ŋŋal buand. 31Gɔgaá, huóguólon gá giagiá, bandɔ bá guísi uguɔ bógódi áneé bálɛns áneé yɔɔ́guɔya Baba, buand gidigid ubuɔ́ yálanɔ́ yaáguala buɔ́ uguá bugaga ubuɔ́ Baba úmampuá. Adígínánɔ diólígie aga.»
ទើបបានជ្រើសរើសហើយ៖
Sáŋa 14: EKM
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
