Sáŋa 16
16
1Yésuse uwɔnduguɔyidɛn bɔ́ áneé: «Yɔɔ́núɔyɔn muand umugányɛ gidigid gá gueleé nudinímie guágɔdɛ́m. 2Bénénúhémenye uguá bigúl. Ginɛŋ gíóguólon muɛ́d igiɛ́ bandɔ bɔ́nɔ́núɔ́nɔnɔ́, bénégedenye áneé bádúmába Uhaluá anagányɛ. 3Bánála bilɔŋ ibigányɛ gá giagiá bámasálɛns ta Síe ta yaŋuá. 4aGɔgaá, yɔɔ́núɔyɔn buɔ́ gá gueleé, ginɛŋ giáguɔ́ gíénémésieg, nubídúmenye áneé mmɔnúɔyɔn buɔ́.»
Buóli buá Gileénde
4b«Mmɔsɔ́núɔyɔn buɔ́ agá magunsa gá giagiá mmabá naánanɔ. 5Gɔgaá, dabdab mmɛɛ́d agá mɔndɔ úmaándɔ́m, guond mɔndɔ uguánɔ guá ɔlɔŋ udiŋóhún áneé: “Hanyɛ agaá ídanaá?” 6Gɔgaá, mesígíl mómóhón agánɔ gá idɛ́m gá giagiá, mmɔ́núɔ́yídɛn buɔ́. 7Ta nɔ́ gɔg, nsɔnúɔyidɛn hómohómue, búnyɛ beseé gánɔ áneé yɛɛ́d, gá giagiá mmándiɛ́d nudianádáŋáab mɔndɔ uwenénúgígineé ɔmbɔ́g. Gɔgaá, yanánaguidéneg, nnúdúmɛ́n yɔ́. 8Uguég guá guól, wenédíye bandɔ bá guísi uguɔ bibínanía biɔ́b gá busió buá gilɔga, gá busió buá gindényé na nugélényi nuá Uhaluá. 9Mmába hana gá busió buá gilɔga, búnyɛ áneé bádiáŋádáaban, 10gá busió buá gindényé, yaáguídan agá Baba nudianándaŋán. 11Gá busió buá nugélényi, básamanasɔ́mb gisan giá ofuŋ huá guísi uguɔ. 12Mmanyɛ na giod giá muand gíɔ́núɔyɔn gɔgaá, núdibá nuá guɔ́d muɔ́ dabdab. 13Uguá ginɛŋ igiɛ́ Gileénde giá Budányɛ gíonoólonú, gíénénúendenye uguá hómohómue gidigid. Gá giagiá gígídíyenyeé hómohómue. Gá giagiá, gídiánagálgal uguég guá ɔhɛ́n mbánan. Gɔgaá, gíɔ́nɔnúɔyɔn buá gidigid ubuɔ́ gímɔɔ́b guond gíónónúdógonyinye buá gidigid ubúgódionu áneé búbíal. 14Gíénémbúlúgenye, gá giagiá gíánádáŋáab ubúnya buámɛ gíond gínúdúmbenyinye. 15Buand gidigid ubuɔ́ Baba úgódionú búnyɛ buámɛ. Buand buáguɔ́ mmɔ́núɔ́yídɛ́n áneé gíénénúdúmbeninye ubuɔ́ gíánádáŋáabanɔ agámɛ.»
Mesígíl mánáyɛ ibal
16Búmésién maná ginɛŋ nudigandaŋánan, egélém gá maná ginɛŋ súsɔ́n núandaŋán. 17Bebinene bég bómodi abábígálídɛn gɔg áneé: «Giagɛ igiɛ́ úmabá áneé udíɔyidɛn, ubúnya áneé: “Maná ginɛŋ nudigandaŋánan,” maná ginɛŋ súsɔ́n nuándaŋán, “ugúnya andá ana yaáguídan agá Baba.” 18Giagɛ igínya áneé: “Maná” didíɔ́guɔ́bɔn ubuɔ́ wámbanɔ́ guɔyɛd.» 19Haná Yésuse úmaálinsán áneé báguamba guóhún yɔ́, úmuanyɛ gɔ́b áneé: «Núáguamba gulɛns ndínyi ya nugálɔ nuámɛ unuɔ́ mmɔ́núɔyidɛn áneé: “ Uguá maná ginɛŋ nudigandaŋánan, súsɔ́n uguá maná ginɛŋ nuandaŋánan.” 20Ɛɛ́ɛ, uguá hómohómue, uguá hómohómue, yɔɔ́núɔyɔn áneé: Nuánábíbaŋa nuond nusiana, uguá ginɛŋ igiɛ́ bandɔ bá guísi uguɔ bánábalaganɔ́, núɔ́nɔ́bígɔn, gúu gɔg giɔ́bíga giánɔ gíánáyanɔ ibal. 21Uguá ginɛŋ igiɛ́ muɔ́n únúmanɔ́ ugándɔ wɔɔ́guɔ́bígɔn, gá giagiá ginɛŋ giég giá guɔ́bígɔn gísemenesieg. Gɔgaá, úmémenebíén, ubíélidie giɔ́bíga wɛɛ́d gá bálaga gá giagiá, umébíén mɔndɔ. 22Anagányɛ gɔg banuá súsɔ́n núnya dabdab uguá giɔ́bíga, gɔgaá, yanándanuán, gúu ɔdɛ́m huánɔ húónóhónónú na ibal, ibal ihiɛ́ tá mɔndɔ udiábá wa núhɔgɛn. 23Anagányɛ uguá buɔ́sɛ ubugányɛ, nudionóndoŋóhún ta buónyi búmodi. Uguá hómohómue, uguá hómohómue, yɔɔ́núɔyɔn buɔ́, Síe wamɛ wanánúhuá buand gidigid ubuɔ́ núɔ́nɔ́ŋɔnaá yɔ́ uguámɛ guá ɔhɛ́n. 24Guesieg na dabdab numanyɛ nudiɔŋɛ́n buand uguámɛ guá ɔhɛ́n. Ɔŋínɔ́nɔ́n gɔg nuanádáŋáab gá gueleé ibal hiánɔ híbádabá ihíhónón.
Yésuse weéhígin guísi uguɔ
25Yɔɔ́núɔyɔn muand umugányɛ gidigid uguá nsab, gɔgaá, ginɛŋ gíóguólon igiɛ́ ndíganda núgálgalinaá anagányɛ. Gá ubúbíyiganaá Baba gɔg, yonónúdóginye buɔ́ agá budányɛ. 26Ubugányɛ buɔ́sɛ nuɔnɔ́ŋɔn Baba muand uguámɛ guá ɔhɛ́n, ta anagányɛ gɔg ndíɔ́núɔyɔn áneé ŋŋobísógólonye Baba gánɔ gá busió, 27gá giagiá Baba mbánan ugódi ginɔ́nɛ́n gánɔ gá busíó, gá giagiá núɔ́ŋɔya, naá gá giagiá numaádáab áneé yoóguólonin agá Uhaluá. 28Mmoólín agá Baba, gúu mmésieg uguísi uguɔ, dabdab, yoóguólígonye uguísi uguɔ gá guond agá buáyɛ buá Baba.» 29Bebinene bég ɔbɔ́yidɛn yɔ́ áneé: «Ndé gɔg, dabdab ugányɛ, amáníhɛ́n dugálɔ duá nsab, aágálgal gásɔ agá budányɛ. 30Dabdab, diálinsan áneé eényi muand gidigid, adiáguádáaban áneé bóguóhon ŋŋóhúnín, buand buáguɔ́ diádáabanaá áneé oólín agá Uhaluá.» 31Yésuse uwondinye bɔ́ áneé: «Numádáab dabdab a? 32Ndénu ginɛŋ gíóguólon, gíméménésieg muɛ́d igiɛ́ núgaásálámandaá, sig mɔndɔ ugɔ́l yeg ŋŋil, nunihɛn yaŋuá omoómi aga, gɔgaá, ndibá yaŋuá omoómi, Baba unyɛ naánamɛ. 33Yɔɔ́núɔyɔn muand umugányɛ gidigid gá gueleé nubia bumbénu uguámɛ. Nugɔɔ́bígɔn giod eguísi aga, gɔgaá bígáyínánánɔ. Yaŋuá yeéhígín guísi uguɔ.»
ទើបបានជ្រើសរើសហើយ៖
Sáŋa 16: EKM
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
