Sáŋa 13
13
Yésuse waásuga bebinene bég dugɔ́nd
1Gá ɔmbɛ́d huá budɔ́mb buá Páska wa bayúdɛn, Yésuse umalínsan áneé gisigɛl gímesíeg gá gueleé wólígie eguísi agá gá guond agá buáy buá Síe weg, umabianán ginɔ́nɛ́n na bandɔ bég bá guísi giod uwɔya bɔ́ gueneg agá nsúgie. 2Bámaágányánán na bebinene bég, agányɛ, abɛlɛ́bɛl umabá uménébíŋín Yúdas Iskaliɔ́t uháŋ huá Símune uguá meéne áneé wenedué Yésuse. 3Yésuse umalinsan áneé úmuanyɛ mbánan umonoólín agá Uhaluá, gúu wónóndonú agá Uhaluá. Síe umasúgídɛ́n yɔ́ buand gidigid uguá imbɔ́g. 4Bámaágányánán, Yésuse uwadigɛn uwebídúgún gihuya giég, uwɔgɔ́l ndífɔn imodi uwabígágálɛ́ɛd uguá nidál. 5Uwaág mimbi uguá nusísinyi uwɛɛ́d gá suga bebinene bég dugɔ́nd, uhóne bɔ́ na ndífɔn iyɛɛ́ úmabígágálɛ́ɛd uguá nidál. 6Umeéméneg agá Símune Piéle, Símune Piéle uwɔyidɛn yɔ́ áneé: «Aŋuá Ɔgúná ánsuga dugɔ́nd!» 7Yésuse uwondinye yɔ́ áneé: «Piéle, buand ubuɔ́ yálanɔ́ adibá wa guɔ́b buɔ́ dabdab, gɔgaá enélimb gusién guɔ́b buɔ.» 8Piéle uwɔyidɛn yɔ́ áneé: «Ɛ́ɛɛ́, adibá wansúgɛd dugɔ́nd.» Yésuse uwɔyidɛn yɔ́ áneé: «Mmándisugɛ́ɛd dugɔ́nd didúmenin gélém.» 9Símune Piéle uwɔyidɛn yɔ́ áneé: «Ɔgúná adinsugɛ́ɛd pɛ́ŋ dugɔ́nd gɔgaá, na ɔduá na imbɔ́g gágá.» 10Yésuse uwɔyidɛn yɔ́ áneé: «Mɔndɔ usémenebídumb udiándabaŋa áneé bédumb yɔ́, pɛ́ŋ básugɛd yɔ́ dugɔ́nd gá giagiá, nuɔ́l nuég gidigid núnyɛ budányɛ, banuá gɔg núnyɛ budányɛ gɔgaá, búdibá banuá gidigid.» 11Umalinsan beseé na beseé mɔndɔ umaábá áneé ugoógió yɔ́, buand buáguɔ́ úmɔyɛ́d áneé: «Nudibá banuá gidigid budányɛ.» 12Umaámáman gusuga bɔ́ dugɔ́nd uwɔgɔ́l gihuya giég, uwendedugumin gá nyánan, uwoóhún bɔ́ áneé: «Numɔ́b buónyi ubuɔ́ mmáal gánɔ gá busió a?» 13Nuɔ́ndɔ́ŋɔn áneé «ehuínyihuínyi,» nundɔ́ŋɔn áneé «Ɔgúná» ɛɛ́ɛ, búnyɛ beseé gá giagiá nnyɛ buɔ́. 14Mmabá yaŋuá gɔg ehuínyihuínyi, ɔgúná umándánúsuga dugɔ́nd banuá súsɔ́n nugódie áneé nusuganɛn dugɔ́nd banuá na banuá. 15Gá giagiá búnyɛ nulinsa mménúdíye, ubuɔ́ mmanúal, alánánɔ nɔ́ súsɔ́n. 16Ɛɛ́ɛ, uguá hómohómue, uguá hómohómue, yɔɔ́núɔyɔn, edúmébi udiádúmban ɔgúnɔ́gɔ́n weg, ta mɔndɔ uyɔɔ́ básadɔ́m gá busɔ́m udibá giandá gudɔ́mb mɔndɔ usádɔ́m yɔ́. 17Dabdab uyɔɔ́ núlinsanaá muand umugányɛ, nuanábá beseé númala muɔ́. 18Nugálɔ nuámɛ unuɔ núdianúbíyigan banuá gidigid, yeényi ɔbɔɔ́ nsémenegueyid gɔgaá, búánigimanan áneé Ŋŋɔ́ŋɛ síbíhónye. Mɔndɔ uyɔɔ́ yábanɔ́ gilɛ́d giámɛ neéneg úmáŋáyɛn abɛlɛ́bɛl. 19Yɔɔ́núɔyɔn buand ubugányɛ dabdab búmanyɛ búdibíal, gá gueleé búánágábíálá nuádáab áneé: «Nnyɛ.» 20«Ɛɛ́ɛ, yɔɔ́núɔyɔn buɔ́, uguá hómohómue, uguá hómohómue, mɔndɔ usánágɛn uyɔɔ́ nsádɔ́m tábɔ́ áneé yaŋuá úsánágɛn, nɔ́ súsɔ́n unáganaá yaŋuá, waánágan mɔndɔ umaándɔ́m.»
Gidóginye giá gigió giá Yúdas
(Mat 26.20-25; Mál 14.17-21; Lúk 22.21-23)
21Yésuse umaámágálɛ́ɛd anagányɛ, ubúénímie yɔ́ meéne uwɔyɛd agá budányɛ áneé: «Uguá hómohómue, uguá hómohómue, yɔɔ́núɔyɔn buɔ́, mɔndɔ uguánɔ guá ɔlɔŋ uguɔ́g ugóŋió.» 22Bebinene bég abábíyiganɛn, bóbíóhon mɔndɔ uyɔɔ́ úmɔyá. 23Ebinene omodi, uyɔɔ́ Yésuse úmɔyá giod umabá mɔdɔg neéneg. 24Símune Piéle uwabásɛ́ɛd ebinene waáguɔ́ gá gueleé woóhún Yésuse mɔndɔ uyɔɔ́ úmɔyá. 25Ebinene ugányɛ uwagíŋíminɛn Yésuse gá guóhún yɔ́ áneé: «Ɔgúná búnyɛ ányá?» 26Uwondinye yɔ́ áneé: «Búnyɛ uyɔɔ́ ŋŋeédúménú gibéyi giá gilɛ́d gá guéŋin yɔ́.» Uguá dugálɔ udugányɛ Yésuse uwedúm gibéyi giá gilɛ́d uweéŋin Yúdas Iskaliɔ́t uhaŋ huá Símune. 27Yúdas umaámáhagɔn gibéyi giá gilɛ́d, Sátan uwebíŋín yɔ́ uguá nuɔ́l, Yésuse uwɔyidɛn yɔ́ áneé: «Al ubuɔ́ ógódionu áneé al gunsáns.» 28Ta mɔndɔ uguá ɔlɔŋ huá bandɔ abámabá hɔ́ umɔsúguɔ́b buand ubuɔ́ úmagálɛ́ɛd nɔ́. 29Hana Yúdas úmabá ugimbe nukólókóŋ, bandɔ bómodi bégedenye áneé Yésuse umɔ́yidɛn yɔ́ áneé wɛɛ́d wɔnɔɔ́nda gunyá gá budɔ́mb, ugúnya ana weneéŋin basúgasuga buand. 30Mbíne imasɛɛ́d guɔ́, Yúdas uwɔgɔ́l gibéyi giá gilɛ́d uwedúmbie guhám.
Gibídína igigɔ́sɛ
31Yúdas umaámáhám, Yésuse uwɔyɛd áneé: «Dabdab, nigúmi niá Muɔ́n wa mɔndɔ nímádambɔg, nigúmi niá Uhaluá níádambugan uguég. 32Uhaluá úmuanyɛ mbánan úgeégúmígie Muɔ́n uguég, uganyɛ mɔdɔg na gúmígie yɔ́.» 33Baán bámɛ, mmanyɛ naánanɔ gá maná ginɛŋ, núánáŋamba gɔgaá, buhɔɔ́m ubuɔ́ yiídanaá núdibá núóguól hɔ́, hana mmɔyɔn ihiligine hiá bayúdɛn, banuá nnúɔyɔnaá buɔ́ súsɔ́n dabdab. 34Yaánúhuán gibídína igigɔ́sɛ, ánaá núnɔ́nɛ́nɛnɔnɛn hana yaŋuá ŋŋódionú ginɔ́nɛ́n naánanɔ, ánaá núnɔ́nɛ́nɛnɔnɛn. 35Uguá ginɔ́nɛ́n igiɛ́ núánábianɔ́ banuá na banuá, bandɔ bánálinsanɔ́ áneé nunyɛ bebinene bámɛ.
(Mat 26.31-35; Mál 14.27-31; Lúk 22.31-34)
36Símune Piéle uwoóhún Yésuse áneé: «Ɔgúná hanyɛ agaá ídanaá?» Yésuse uwondinye yɔ́ áneé: «Hɔɔ́m ɔhɔɔ́ yiídanaá, adibá wa mbinidin hɔ́ dabdab gɔgaá, enésién embinidin egélém.» 37Piéle uwɔyidɛn yɔ́ áneé: «Ɔgúná gá giagɛ ndiabá wa binidin dabdab? Yeéguelimenye gugué gáhɔ gá busió.» 38Yésuse uwoóhún yɔ́ áneé: «Anyɛ mɔdɔg gá dóŋínye nusɔ́da nuáhɔ gámɛ gá busió a? Yɔ́guɔyɔn buɔ́, uguá hómohómue, uguá hómohómue, gidédi gígágánadádɛ́ɛd agaábá amámbísásɛ́ɛg iŋand ídádɔ.»
ទើបបានជ្រើសរើសហើយ៖
Sáŋa 13: EKM
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
