Melélíe 3
3
Gióndúgie giá giŋándúnyá uguá idúl
1Buɔ́sɛ búmodi, na Piéle na Sáŋa bámabúlígan uguá idúl gá gual mbísógóli ya bisigɛl bídádɔ biá ginɛ́ŋ. 2Mɔndɔ omodi, umabá giŋándúnyá guenebulín egég gá bíbíén. Bámabá bábídúgan yɔ́ mɔɔ́sɛ gidigid, bánabídúna yɔ́ agá nibíŋínín niá idúl iniɛ́ bɔ́mɔdɔ́ŋɔn áneé ginɔ́g giá nibíŋínín, gá gueleé wɔŋɔn bandɔ abámabá bébíŋen uguá idúl muand. 3Mɔndɔ ugányɛ umaámán na Piéle na Sáŋa, bébíŋen uguá idúl, uwɔŋɛn bɔ́ ŋŋúme. 4Piéle uwosólímin yɔ́ bilɔŋ bímomi hana Sáŋa, uwɔyidɛn yɔ́ áneé: «Díbíyɛ́g!» 5Mɔndɔ uwebídíbenye bɔ́ gá giagiá, umabígígan áneé bégeéguéŋin yɔ́ buand. 6Piéle uwɔyidɛn yɔ́ gɔg áneé: «Ndigódi ta ŋŋúme ta góol, gɔgaá, ubuɔ́ ŋŋódionu, mmáhuá buɔ́: Uguá ɔhɛ́n huá Yésuse Klístus wa Nasalɛ́d, adígɛ́n andá!» 7Umeémégimbin yɔ́ uguá ɔmbɔ́g uhunɛ́m, uwediginye yɔ́. Hɔ́nɔhɔ́, na dugɔ́nd na mugɔ́ŋɔ́l muá mɔndɔ umúálɔ́nd, 8uwehulug uwedélímin, uwɛɛ́d gá guanda, uwebíŋín ɔlɔŋ na Piéle ná Sáŋa uguá idúl, wanda, ufamanfaman, ubúlúgenye Ɔgúná Uhaluá. 9Buán gidigid ubúmabá hɔ́, ubúán mɔndɔ wanda, ubúlúgenye Uhaluá. 10Bámaámálɛns áneé úmaábá udugumen agá ginɔ́g giá nibíŋínín niá idúl gá guɔŋɔn muand, ɔbɔ́b bugádɔ obónd abáyíka buand ubúmegín yɔ́.
Nusaŋ nuá Piéle
11Mɔndɔ ugányɛ umasándasáyúgan uguá ɔlɔŋ huá Piéle na Sáŋa. Buán gidigid ubúólon na ɔdɛ́d ubúésigéŋélídíe bɔ́ na biyíkɛ́n agá hɔɔ́m ɔhɔɔ́ bɔ́dɔ́ŋɔnaá áneé: «Nibíŋínín niá umbámbál huá bilál na mugɔn muá adányɛ muá Salomɔ́ŋ.» 12Piéle umaámán buán ubugányɛ, uwɔyidɛn buɔ́ áneé: «Baán bá Íslayɛ́l, gá giagɛ núyíkanɔ́ úbúmábíal? Gá giagɛ núdíbíyiganaá hana nuáguamba guɔyɛd áneé basuá dimóndúgíe mɔndɔ uyɔ na buŋaŋa buásɔ, ugúnya ana dimóndúgíe yɔ́ gá busió buásɔ buá bá gindényé?» 13Uhaluá wa Áblahám, wa Isák na Yɔ́kɔba, Uhaluá wa ndíndíl siásɔ, úmeéŋín edúmébi weg Yésuse nigúmi. Banuá mbánan numasílɛ́ɛg yɔ́ agá bagɔ́n bá gidɔŋ, unuond unuabísásɛ́ɛg yɔ́ agá eŋís ya Pilát umaábá gá guég áneé unihɛn yɔ́. 14Numɔbíɔ́b unyaá gisámb na gindényé unuond unuádáab áneé bánúnihinɛn oŋónónyi. 15Ofuŋ uhúgódionu nusɔ́da uhuɔ́ númal áneé bɔ́n, Uhaluá waáhuɛ́nyɛ huɔ́ uguá ɔlɔŋ huá ebeguén. Basuá dinyɛ bamaáná. 16Búnyɛ uguá guágɔdɛ́m uguá ɔhɛ́n huá Yésuse, húhúmélúndíe mɔndɔ uyɔɔ́ núbíyiganaá, uyɔɔ́ núlinsanaá uyɔ. Ɛɛ́ɛ, búnyɛ guágɔdɛ́m ugúólonineé uguá Yésuse gúgúmal áneé wɔɔ́ndɔ́ɔg hana núbíyiganaá yɔ́ banuá gidigid. 17Gúu ŋŋanyaá gá linsan buɔ́, beliméen, áneé naánanɔ na bagɔ́n bánɔ numal yɔ́ buɔ́ gá kandalinsa. 18Gɔgaá, Uhaluá úmáal buɔ́ nɔ́, gá hónye nugálɔ nuég unuɔ́ úmódógíe feké uguá eŋíd ya bebunebúné áneé Bémeyíde weg wɔnɔ́bígɔn. 19Anaá núbídun gɔg nunúgie bilɔŋ, nuondin Uhaluá uguá mɔyɔ gá gueleé unúhónid biguá biánɔ. 20Agányɛ gɔg Ɔgúná wanábádanúdúmɛ́n ginɛŋ giá nihoge wond unúdúmɛ́n Klístus, Yésuse uyɔɔ́ úmenúéyídín feké. 21Yésuse waáguɔ́ uyɔ, ugagugíga ugumɔn gueneg haná Uhaluá wónóndúguondienú muand gidigid umugɔ́sɛ, haná úmebué guɔyɛd feké uguá eŋíd ya badányɛdányɛ bá bebunebúné. 22Henyé gɔg áneé, Mɔ́sɛsa umɔɔ́gɔguɔyɛd áneé: «Ɔgúná Uhaluá wanɔ wanánúdúmɛ́n ebunebúné uwanábánɔ́ hana yaŋuá, wanábá mɔndɔ wanɔ wa buán. Nugódi gɔg áneé nuɔ́bɔn ubuɔ́ wɔ́nɔ́núɔyɔnaá.» 23Mɔndɔ gidigid udiɔnɔ́bídɔ́lígɔnaá ebunebúné, bénéhémie yɔ́ uguá ɔlɔŋ huá buán buá Uhaluá bónd bɔ́n yɔ́. 24Gúu bebunebúné gidigid, guenebulín agá Samuɛ́l bómodógónyé gá omoómi omoómi muand umúánábíalanɔ́ uguá mɔɔ́sɛ ɔmɔ. 25Búnyɛ banuá nunyaá baán bá bebunebúné naá bá nigál niá Uhaluá iniɛ́ úmagɔ́d na ndíndíl siánɔ, uguá ginɛŋ igiɛ́ úmɔyídɛ́n Áblahám áneé: «Yanáfɔn eŋíd ya biansɛ gidigid ya guísi uguélém guá banana báhɔ.» 26Búnyɛ gánɔ gá busió Uhaluá úmeégégubesie, uwond uwadɔ́m edúmébi weg gá núfɔn gá gual áneé sig mɔndɔ udúm bifal gélém.
ទើបបានជ្រើសរើសហើយ៖
Melélíe 3: EKM
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
