Melélíe 4
4
Na Piéle na Sáŋa agá idɔg ihigɔ́n
1Uguá ginɛŋ igiɛ́ na Piéle na Sáŋa bámabá bámanyɛ gá gálgal gá buán, bedúmbinusámb bá Uhaluá, ɔgúnɔ́gɔ́n wa begígidúl na basadusiɛ́ŋ ebésiegín bɔ́. 2Ebésieg na gusugɛn haná na Piéle na Sáŋa bémehuínyihuínyé buán bónd bódógonyinye buɔ́ guhám guá bilɔ́ŋ uguá bibɛ́l hana Yésuse úmahám. 3Ebégimbin bɔ́ obónd ɔbɔ́nɔh bɔ́ uguá giansɛ giá mbíne gueneg méembélénye, gá giagiá ginɛ́ŋ gímasɛɛ́d gímágua. 4Ta nɔ́, uguá ɔlɔŋ huá bandɔ ɔbɔ́mɔbídɔ́lígɔnɔn nugálɔ unuɔ́ na Piéle na Sáŋa bɔ́mɔyá, giod gímabá gímádáab, gimbi giɔ́b igíágɔm igíeg bandɔ abámabá bá gueg duɔns dútánɔ.
5Méembélénye gɔg, ifuŋ siá ihiligine hiá bayúdɛn na bɔdɔŋdɔ́ŋ na belinsibigodi abámabá Yelusalɛ́m, bámabígúsɛ́ɛd. 6Án, ɔgúnɔ́gɔ́n wa bedúmbinusámb bá Uhaluá, Kayíf, Sáŋa, Alɛgsáŋdlɛ na bandɔ gidigid bá eŋíd ya biansɛ ya bedúmbinusámb bá Uhaluá abagɔ́n. 7Obódóŋinye bugaga áneé ból na Piéle na Sáŋa ɔgɔ́b gá eŋís obóhún bɔ́ áneé: «Uguá buŋaŋa búlúm, ugúnya ana uguá ɔhɛ́n huányɛ núálanɔ buɔ́? » 8Piéle umaábá ohónón na Gileénde giá Budányɛ, uwondinye bɔ́ gɔg áneé: 9«Ifuŋ siá buán na bɔdɔŋdɔ́ŋ, hínen bédígélenye gá giagiá dial giŋándúnyá beseé, gá gueleé dinúɔyidɛn hana búábíal. 10Banuá gidigid na buán buá Íslayɛ́l gidigid gɔg, linsánán áneé búnyɛ uguá ɔhɛ́n huá Yésuse Klístus wa Nasalɛ́d, uyɔɔ́ númɔɔ́ndɔ́n uguá nuag, uyɔɔ́ Uhaluá weéhémie uguá gibɛ́l, uguég guá ɔhɛ́n mɔndɔ ugányɛ únyaá agánɔ gá busió ɔŋɔ́ndúgɔ́n. 11Yésuse únyaá nidányɛ iniɛ́ banuá behégi númomb. Níáyɛ nidányɛ niá mbímba. 12Gisódie gímodi gídibánda hɔɔ́m hómodi esié uguég. Gá giagiá ta ɔhɛ́n húmodi húdibánda eguísi, uhuɔ́ Uhaluá úmeéŋín bandɔ, uhúnya húódísódie.» 13Bandɔ bá idɔg ihigɔ́n abábíyigan bunimadɛ ubuɔ́ na Piéle na Sáŋa bámagálgal na buɔ́ bónd bánan áneé búmabá bandɔ abámasúgual nuhɔ́nhɔ́n, bandɔ bá gilé, abáyíka buɔ́. Bámalinsán áneé bámabá biendienyi biá Yésuse. 14Gɔgaá, bábíyigan mɔndɔ umaábá delimine mɔdɔg nɔɔ́nɔb, ɔŋɔ́ndúgɔ́n, ta guandalɛns buand buá guondinye. 15Obódóŋinye gɔg bugaga buá hémie bɔ́ uguá giansɛ giá idɔg ihigɔ́n, ebésien gá isogi. 16Bɔ́ya bámuanyɛ na bámuanyɛ áneé: «Digaágual naánanyá na bandɔ ɔbɔ? Ɛɛ́ɛ, hómohómue bámuanyɛ abál giseyi giá guóndúgie mɔndɔ ugányɛ, bandɔ gidigid bá Yelusalɛ́m bálinsan nɔ́, basuá súsɔ́n dídibá diasáŋɔ́n buɔ́. 17Gɔgaá, nsɔ́m ya buónyi ubugányɛ idigódi áneé idúmbenye na bísesenye uguá buán. Digaásásídɛn bɔ́ gá gueleé, bódiondúguomidin Yésuse agá mɔndɔ ta ulúm.» 18Ɔbɔ́dɔ́ŋɛ́ɛn bɔ́ gɔg, ebénye bɔ́ áneé bódiondúguomidin ugúnya ana bédiendéhuínyihuinye uguá ɔhɛ́n huá Yésuse. 19Gɔgaá, na Piéle na Sáŋa obóndinye bɔ́ áneé: «Giagɛ igínya gindényé agá eŋís ya Uhaluá? Gunuɔ́bɔnɛn lí guɔ́bɔnɛn yɔ́? Ánaá núɔyɛd buɔ́ banuá muɛ́d! 20Mmába hana gásɔ, didibá diá guen guɔya ubuɔ́ dímán idiond idiɔ́b. » 21Bandɔ bá idɔg ihigɔ́n ebéndehiligin bɔ́ obónd abánihɛn bɔ́. Bámasúguán giásɛ giá gufudie bɔ́, gá giagiá, buán búmegúményé Uhaluá gá buand ubúmabíal. 22Mɔndɔ uyɔɔ́ bómóndúgie uguá giseyi, umabia duɔŋ gudɔ́mb edín áhandɛ.
Mbísógóli ya beédébi
23Bámaámánihɛn na Piéle na Sáŋa, ebénegégie bɔ́gɔ́b, ɔbɔ́yɔn bɔ́ buand gidigid ubuɔ́ bɔgúnɔ́gɔ́n bá bedúmbinusámb nuá Uhaluá na bɔgɔ́ga bɔ́mɔyɔ́n bɔ́. 24Ɔbɔ́bídɔ́lígɔnɔn bɔ́, egélém bámuanyɛ gidigid ugelu húmomi obóbísógólonye Uhaluá bɔ́ya áneé: «Ehuínyihuínyi, búnyɛ aŋuá amaálúŋá guísi, gumɔn, máŋ na muand gidigid umúnya guɔ́. 25Búnyɛ aŋuá amaál áneé Gileénde giá Budányɛ gíhónin ndíndíl yasɔ Dáfide, edúmébi wahɔ gá gueleé wɔyɛd áneé:
Gá giagɛ mɔnɔŋ mélumenú gɔg?
Maán máŋálan mudɔg gá gilé!
26Ifuŋ siá guísi Síébídídíd síábíaŋanan gá bidí,
gúu bɔgúnɔ́gɔ́n bá guísi bébídidid gá nusenye Ɔgúná na ofuŋ uhuɔ́ úmuanyɛ mbánan úmedénígínyé.
27Ɛɛ́ɛ, búnyɛ hómohómue áneé, na Helód na Pɔ́ŋs Pilát bémebídídíd agá tísɔna waáguɔ́, na bandɔ bá mɔnɔŋ módodi na bandɔ bómodi bá maán má Íslayɛ́l gá nusenye Yésuse, unyaá gidányɛdányɛ giáhɔ giá edúmébi igiɛ́ émedénígínyé. 28Anagányɛ gɔg bómohónyé uguáhɔ guá buŋaŋa, masɔ́m gidigid ɔmɔɔ́ ɔ́mɔyá feké. 29Gúu dabdab, Ɔgúná án hana bédíhiligenineé, ond eéŋin bedúmébi báhɔ gumán ɔdɛ́m uguá sesenye nugálɔ nuáhɔ kanda bugádɔ. 30Ganɔ́n gɔg ɔmbɔ́g gá díye buŋaŋa buáhɔ, gá gueleé na bióndúgie na biseyi na bilɛns, múbíala uguá ɔhɛ́n huá Yésuse, gidányɛdányɛ giáhɔ giá edúmébi.» 31Egéyib mbísógóli yɔb, hɔɔ́m ɔhɔɔ́ bámabá abábígúsígán ehéyiŋkimid, ohóhón na Gileénde giá Budányɛ bámuanyɛ gidigid, abɛ́d gá sesenye nugálɔ nuá Uhaluá kanda bugádɔ.
Beédébi báguaba bunɛ́m buɔ́b bámuanyɛ na bámuanyɛ
32Giod giá bandɔ igímáyan beédébi, gímabiá ɔdɛ́m húmomi na bɔndɔ búmomi. Ta mɔndɔ omoómi umesébígidid gisasɔ áneé bunɛ́m búnyɛ buég buá buéŋenyi, gɔgaá, buá gidigid ubuɔ́ bámabianán, búmabá bunɛ́m buɔ́b bámuanyɛ gidigid. 33Na giandá giá buŋaŋa medenyi mɔ́mɔyá ubuɔ́ ményénú gá busió buá hám uguá gibɛ́l guá Yésuse, gúu súsɔ́n Uhaluá úmabá waádáabanɛn bɔ́ bámuanyɛ gidigid giod giá magɔg. 34Mɔndɔ umasábá usúgsɔg uguɔ́b guá ɔlɔŋ. Ɛɛ́ɛ, bandɔ abámabianán mésige ugúnya ana biansɛ, bémeduénén muɔ́, bólon na ŋŋúme iyɛɛ́ básabia, 35bɔ́dɔ́bígɔn muɔ́ agá dugɔ́nd duá medenyi, béŋen sig mɔndɔ uguég guá nsan. 36Mɔndɔ omodi gɔg, umabá hɔ́ ɔhɛ́n áneé Yɔ́sɛba, uyɔɔ́ medenyi mámalɔg áneé Balnábas, anagányɛ gúnya áneé «mɔndɔ uwondonyinyeé ɔdɛ́m» umabá uguá niíd niá giansɛ niá Léfi, umebíbíén agá hɔɔ́m ɔhɔɔ́ bɔ́dɔ́ŋɔnaá áneé: Síple, 37umedué mesíge ɔmɔɔ́ úmabianán, uwɔsidɔ́bígɛ́n ŋŋúme agá dugɔ́nd duá medenyi.
ទើបបានជ្រើសរើសហើយ៖
Melélíe 4: EKM
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
