Melélíe 2
2
Guól guá Gileénde giá Budányɛ
1Buɔ́sɛ buá budɔ́mb buá Paŋtekót búmeémésieg, medenyi gidigid mámabá amabígúsígán hɔɔ́m hómomi. 2Hɔ́nɔhɔ́, gindɔmɔdɔm igíónoólín ugumɔn igíéhidin giansɛ hana giandá giá gihínyi, igíóhón guɔ́. 3Abán gɔg muand mpónyé na bilɛ́mb biá yoógi, umúónoól, umúábíaba, umúágílíman sig mɔndɔ. 4Obóhón bámuanyɛ gidigid na Gileénde giá Budányɛ obónd abɛ́d gá gálgal dugálɔ dúdodi hana Gileénde gímeéŋén bɔ́ bugaga buá gálgal. 5Henyé, bayúdɛn ɔbɔ́bɔninaá Uhaluá giod, bámabá mɔɔ́sɛ máguɔ́ Yelusalɛ́m, bómonólónín uguá maán gidigid amányá uguísi. 6Guɔ́b uguɔ́ bɔ́mɔɔ́b gindɔmɔdɔm igigányɛ, giod giá bandɔ igíábígúsɛ́ɛd gunsáns, igíónd igíéséhén, gá giagiá, gímɔɔ́bɔ́n sig mɔndɔ ugálgal na nugálɔ nuég nuá mbíénye. 7Bámuanyɛ gidigid ebéséhén obónd abáyíka, bɔ́ya áneé: «Bandɔ gidigid abágálgalaá ɔbɔ bádibá bagalileyɛ́ŋ a? 8Naánanyá búnya áneé sig mɔndɔ wɔɔ́bɔn bɔ́ uguásɔ guá dugálɔ duá mbíénye? 9Uguásɔ guá ɔlɔŋ, bómodi bómoólónín uguá gidɔŋ giá Pálte, giá Mɛ́dɛs, Elamít, bandɔ abágíganɔ́ uguá Mesopotamí, uguá gibéyi giá guísi giá Yudé, na Kapadós, naá uguá Pɔ́ŋ naá uguá gibéyi giá guísi giá Así, 10uguá Filisí, uguá Paŋfilí, uguá Egíbt naá uguá Silɛ́n unyaá uguá gibéyi giá guísi giá Libí, bandɔ obómonoólín uguá Lóm, 11bámuanyɛ gidigid, ta bayúdɛn ta bindiádába ta bandɔ bá gidɔŋ giá Klɛ́t naá giá Alabí, diɔ́guɔ́bɔn bɔ́ bɔ́ya bimué biá muand biá Uhaluá na dugálɔ duásɔ duá mbíénye.» 12Bandɔ gidigid ebéséhén na buɔ́, ta gulɛns buand buá gedie, bɔ́ya bámuanyɛ na bámuanyɛ áneé: «Giagɛ igiɛ́ búámbanɔ́ guɔyɛd?» 13Gɔgaá, bandɔ bódodi bɔ́hɔna bɔ́, bɔ́ya áneé: «Bémégué magɛ́b.»
Nugálɔ nuá Piéle
14Piéle uwadigɛn gɔg ɔlɔŋ na medenyi máad nomue, uwɔyɛd ugelu ugumɔn áneé: «Bayúdɛn, naánanɔ gidigid nugíganɔ́ Yelusalɛ́m, dámbánánɔ idú núbɔ́duguɔ́b ubúbídúmbanaá. 15Ɛ́ɛɛ́, bandɔ abagányɛ básasábíhuá magɛ́b hana núgedenyeé, dimanyɛ pɛ́ŋ uguá bisigɛl biánímanyɛ nomue biá giamádá, 16dabdab, nugálɔ nuá ebunebúné Yowɛ́l núbíhónonyeé:
17Uhaluá umɔyɛ́d áneé: “Uguá mɔɔ́sɛ má nsúgie gɔg,
yenésegidinye Gileénde giámɛ uguá mɔndɔ gidigid,
na binɔ́g biánɔ na ŋŋɔndɛ siánɔ bánábá bebunebúné,
bidɛnd biánɔ biá bandɔ bíánábia duénígie,
bilun biánɔ biá bandɔ bíánálimanan.
18Ɛɛ́ɛ, bedúmébi bámɛ, ta abagándɔ ta abanúmɔndɔ,
uguá mɔɔ́sɛ maáguɔ́, yeneéŋin bɔ́ Gileénde giámɛ
bánábá bebunebúné.
19Yenébesenye biseyi ugumɔn,
yond yala biseyi uguísi,
yenéhémenye na manɔ́ŋ na yoógi na nduge.
20Ɔhɛ́nyɛ húénéhílíg, ohóli húáyɛ hana manɔ́ŋ,
gá gueleé buɔ́sɛ buá Ɔgúná búésieg, giandá giá buɔ́sɛ na nigúmi.
21Gúu, mɔndɔ ubídáyanaá uguá ɔhɛ́n huá Ɔgúná wánábánɔ́ aháŋánɔ.” »
22«Bandɔ bá Íslayɛ́l, ɔ́bɔ́nɔ́n dugálɔ duámɛ: Yésuse wa Nasalɛ́d, mɔndɔ uyɔɔ́ Uhaluá úmadɔ́m agánɔ gá buáyɛ na guala na biseyi na bimué biá muand na bilɛns agánɔ gá gimbi uguég, hana núlinsanaá buɔ́, 23mɔndɔ ugányɛ, uguá guɔyɛd guá Uhaluá uguɔ́ úmagɔ́d uguég guá nugedie búmanyɛ nsuá, numedué yɔ́ uguá imbɔ́g siá bindiádába, ɔbɔ́n yɔ́ na guɔ́ndɔn yɔ́ uguá nuag. 24Gɔgaá, Uhaluá uméhémie yɔ́ uguá gibɛ́l na háŋ yɔ́ uguá gusugɛn guá nigué, gá giagiá nigué nímasábianan bugaga buá gimbe yɔ́. 25Dáfide gɔg wɔɔ́guɔya gég gá busió áneé:
“Mmabá yaánán Ɔgúná binɛŋ gidigid agámɛ gá busió,
unyɛ agámɛ gá buáyɛ gá gueleé bédiŋélídie.
26Ɔdɛ́m huámɛ súsɔ́n húnyɛ uguá ibal, gilɛ́mb giámɛ uguá mefunde,
nuɔ́l nuámɛ núónóhoge uguá nubídágídɛ́n,
27gá giagiá, Ɔgúná, edienébembelidie nusɔ́da nuámɛ uguá bunyɛ ebeguén,
adianánihɛn nuɔ́l nuá adányɛdányɛ wahɔ núyɛg.
28Emendíye ŋŋil siá nusɔ́da,
onómpónye na ibal uguáhɔ guá bá.”»
29«Beliméen, ánaá nnúɔyidɛn uguá hómohómue: Síe wásɔ Dáfide umegué, bámág yɔ́ uguá gibɛ́l, gibɛ́l giég gímanyɛ na behínen uguásɔ uguɔ. 30Gɔgaá, umabá ebunebúné guond úmalinsán áneé Uhaluá umabíliɛ́n yɔ́ na gilɛns áneé wenédúguminye unana huég húmodi agá ondig huá bufuŋ.» 31Búnyɛ guhám guá Yésuse uguá gibɛ́l guɔ́, Dáfide úmodógíe uguá ginɛŋ igiɛ́ úmɔyɛ́d áneé, bádianánihɛn yɔ́ uguá bunyɛ ebeguén naá gá gueleé nuɔ́l nuég núdianáyɛg uguá gibɛ́l. 32Yésuse waáguɔ́, Uhaluá úmehémíe uguá gibɛ́l, basuá gidigid dinyɛ bamaáná. 33Unyɛ dugumine ɔmbɔ́g uhunɛ́m huá Uhaluá, Síe umedéŋébíe yɔ́ Gileénde giá Budányɛ igiɛ́ úmadánɛ́n yɔ́, gúu úmadíhuá giɛ́ hana nuánanaá nuond nuɔ́bɔn. 34Dáfide gɔg, umasúguɛ́d ugumɔn, umɔyɛd úmuanyɛ mbánan áneé:
«Ɔgúná Uhaluá umɔyidɛ́n Ɔgúná wamɛ áneé: Dugúmín ɔmbɔ́g uhunɛ́m huámɛ.
35Gueneg haná yénéyenú babɛlɛ́bɛl báhɔ nidɔ́bígínɛ́n niáhɔ niá dugɔ́nd.»
36«Ánaá buán buá Íslayɛ́l gidigid búlɛns gɔg beseé na beseé áneé, Uhaluá umeéye Yésuse Ɔgúná uwond uweéye yɔ́ súsɔ́n Klístus, Klístus uyɔɔ́ númɔ́ndɔ́n uguá nuag.»
Bandɔ bá busió bá núgie bilɔŋ
37Bandɔ abagányɛ bɔ́mɔɔ́mɔndɔbídɔ́lígɔn dugálɔ duá Piéle, manɔ́ŋ mɔ́b amásúmbɛ́ɛg, obóhún Piéle na medenyi omólmóndeé áneé: «Beliméen, digal naánanyá?» 38Piéle uwondinye bɔ́ áneé: «Ánaá núbísómonye bigua biánɔ, béyuminye sig mɔndɔ uguá ɔhɛ́n huá Yésuse Klístus, gá bia giyibinina gánɔ gá bilɔga, nubádadáŋáab mpuán ya Gileénde giá Budányɛ. 39Gá giagiá, ndán inyɛ gánɔ gá busió naá buá baán bánɔ súsɔ́n naá buá bandɔ gidigid abánya hádɛ, ta ɔbɔɔ́ Ɔgúná Uhaluá wasɔ wɔ́nɔ́dɔ́ŋɔnaá, ta bábá gudeg naánanyá.» 40Giod giá dugálɔ gímodi gímabá hɔ́ igiɛ́ Piéle úmɔyá gá busió buá buónyi ubuɔ́ weényénú wond ugínyiginye bɔ́, wɔyɔn bɔ́ áneé: «Ólígiónón uguá ɔlɔŋ huá nunam unúnya unufumán unugányɛ.» 41Bandɔ abámagíndígɛ́n nugálɔ nuá Piéle ebéyumenye bɔ́. Ubugányɛ buɔ́sɛ, bebinene ɔlɔŋ na bandɔ ɔbɔ́mɔbíɔ́hígínɛ́n bɔ́, bámabá bá gueg duɔns dúdádɔ.
Gimbi giá beédébi giá busió
42Bandɔ abagányɛ bómobídóŋínye uguá nuhuínyihuínyi nuá medenyi. Bɔ́sɔ́dɔn uguá búlada hana beliméen, bányanan bónd bóbísógólonye ɔlɔŋ. 43Bandɔ gidigid ɔbɔ́b bugádɔ, gá giagiá medenyi mámabámála biandá biá biseyi. 44Bandɔ gidigid abámadáab bómond búmomi báaba muand muɔ́b mpónyé imoómi. 45Bémeduénén mesíge mɔ́b na muand muɔ́b muá beseé gidigid, gá guaba ŋŋúme yɔb bámuanyɛ na bámuanyɛ, béŋen sig mɔndɔ uguég guá nsan. 46Mɔɔ́sɛ gidigid bámabá biídan agá idúl ɔlɔŋ húmomi, bányanan uguá biansɛ uguá ibal na bísusie guá ɔdɛ́m. 47Bámabá bébúlúgenye Uhaluá, buán gidigid búgíndígan bɔ́ beseé, Ɔgúná wond wɔɔ́hígɔn bandɔ abámabia gisódie uguɔ́b guá gimbi.
ទើបបានជ្រើសរើសហើយ៖
Melélíe 2: EKM
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
