Melélíe 19
19
Póle uméneg Efɛ́s
1Uguá gínɛŋ igiɛ́ Apolós úmabá Kolɛ́ŋt, Póle úmuanyɛ uwayɔg uguá gibéyi giá guísi giá iŋuɛnyɛ siá Así, uweneg Efɛ́s, uwegégie nsánsáŋúlía siá bebinene bá Klístus hɔ́, 2uwoóhún bɔ́ áneé: «Numadáŋáab Gileénde giá Budányɛ uguá ginɛŋ igiɛ́ númaáyɛ bebinene bá Klístus a? » Gɔgaá, obóndinye yɔ́ áneé: «Dimɔsúguɔ́b guomidin Gileénde giá Budányɛ.» 3Póle uwonduguóhún bɔ́ áneé: «Numabia bugiyuminye bulum gɔg? » Bámuanyɛ gég áneé: «Giyuminye giá Sáŋa.» 4Póle uwɔyidɛn bɔ́ áneé: «Sáŋa umabá uyumenye bandɔ abámadáabán gunúgie bilɔŋ, wond wɔyɔn buán buá Íslayɛ́l áneé búádáab umaábá áneé woóguólon uguég guélém, anagányɛ gúnya áneé Yésuse. » 5Beédébi bá Efɛ́s bɔ́mɔɔ́mɔ́b dugálɔ udugányɛ, ebébíyumenye uguá ɔhɛ́n huá Ɔgúná Yésuse. 6Póle uwɔdɔ́bígɔn bɔ́ imbɔ́g, abádáŋáab Gileénde giá Budányɛ. Ebébul gɔg gugálgal megélígélíe módodi ɔmɔɔ́ bámábádihɔ́nhɔ́n, bódógonye Nugálɔ unuɔ́ bámabiá guónoólín agá Uhaluá. 7Bandɔ abagányɛ gidigid, bámabá bábá ala báad na báandɛ.
Póle weésesenye Ginɔ́g giá Nsɔ́m Efɛ́s
8Uguá ihóli ídádɔ, Póle umabá wiídan uguá gigúl giá bayúdɛn, ugálgal hɔ́ na nimadɛ gidigid. Umabá womon muand umúmabá múbíyigan gugilebe guá Uhaluá, wamba áneé bandɔ abámabá bɔ́bídɔ́lígɔnɔn yɔ́ bádáab. 9Haná giod giá bandɔ gímodi gímabá hɔ́ na ɔduá gulal bádiamba guádáab, béfénefénin muand muá ŋŋil ya Ɔgúná agá eŋís ya gimbi giá bandɔ gidigid, Póle uwɔbígɔ́gɛ́ɛd na bebinene bá Klístus, uhuínyihuinye bɔ́ mɔɔ́sɛ gidigid uguá giansɛ giá nuhɔ́nhɔ́n giá mɔndɔ omodi ɔhɛ́n áneé Tilanús. 10Póle uwehuínyihuinye bɔ́ anagányɛ uguá nnyɔ́m íhandɛ, ubúal áneé bayúdɛn na bandɔ gidigid abámabá bɔ́sɔ́dɔn uguá gibéyi giá guísi giá Así, bɔ́mɔɔ́b Nugálɔ nuá Ɔgúná.
Binɔ́g biá Séfa
11Uhaluá umabá wala bimue biá biseyi na imbɔ́g siá Póle. 12Gúu bámabá bídanɛn banúmanuma na muand ubúsɔ́bígɔ́dɛn nuɔ́l nuá Póle: Gibéyi giá gisɔn ugúnya ana gibíhónídín gibányɛ, bóbígódinye anúmanuma udúmbie guɔ́ndɔ́ɔg, bilɔg biá bileénde bíháman uguɔ́b guá duɔ́l. 13Gidám giá bayúdɛn gímodi gímabá gíbúlɛ́ɛg gísɔs, gá guɛ́d gugúŋa bilɔg biá bileénde uguá duɔ́l duá bandɔ, bámabá bómon súsɔ́n ɔhɛ́n huá Ɔgúná Yésuse gá buɔ́. Bɔ́yɔn bilɔg biá bileénde áneé: «Mmáhuá bugaga buá hám uguá ɔhɛ́n huá Yésuse uyɔɔ́ Póle usesenye.» 14Anagányɛ nɔ́ binɔ́g bítíndádɔ nomue biá ɔgúnɔ́gɔ́n wa bedúmbinusámb biá Uhaluá wa bayúdɛn, ɔhɛ́n áneé Séfa bímabá bíala. 15Gɔgaá, buɔ́sɛ búmodi, gilɔg giá gileénde igíóndinye bɔ́ áneé: «Yeényi Yésuse, yaálinsan unyaá Póle. Banuá gɔg nunyɛ baányá?» 16Gúu, mɔndɔ umaábia gilɔg giá gileénde umɔbíɔ́dígínɛ́n bɔ́ uwehéhélenye bɔ́, uwehigin bɔ́ bámuanyɛ gidigid. Uweméndimendie bɔ́ na megide gueneg haná bámahám uguég guá giansɛ na ɔdɛ́d nnúh gudɔɔ́, mege nuɔ́l gidigid. 17Bandɔ bá tísɔna wa Efɛ́s, bayúdɛn na bindiádába, bɔ́mɔɔ́mɔ́b buand ubugányɛ, ɔbɔ́b bugádɔ. Abɛ́d gá gúmenye ɔhɛ́n huá Ɔgúná Yésuse. 18Giod giá bandɔ uguá ɔlɔŋ huá abámáyan beédébi, gíólon gíbíbala bufal buɔ́b ubuɔ́ bámalá ugelu ugumɔn. 19Giod giá bandɔ igímabá mbuísi, igíólon na mub muɔ́b muá mbɔba siá manyɛ, bébegesenye muɔ́ agá eŋís ya bandɔ gidigid. Abáhana ŋŋúme iyɛɛ́ bɔ́mɔ́nda mub muáguɔ́, iyahám duɔns edín áhandɛ na dúad duá bikɔ́ŋ. 20Anagányɛ gɔg, uguá buŋaŋa buá Ɔgúná Nugálɔ númebísésényé giod, núbídíyenye áneé núnyɛ bugaga.
Gindɔmdɔm gímágígɛ́n Efɛ́s
21Egélém gá masɔ́m amagányɛ, Póle uwaán uguég guá nugedie áneé ugódi áneé wɛɛ́d Yelusalɛ́m, uwandɛn uguá gibéyi giá guísi giá Maseduán naá giá Akáyɛ wɔya áneé: «Mméneg Yelusalɛ́m, buá guamba súsɔ́n áneé yɛɛ́d Lóm. » 22Uwadɔ́m gɔg biendinyi biég bíandɛ, na Timoté na Elást uguá gibéyi giá guísi giá Maseduán, gɔgaá úmuanyɛ uwegegusíen agá gibéyi giá guísi giá Así. 23Uguá ginɛŋ igigányɛ, gilɔg giá gindɔmdɔm igíágua Efɛ́s gá busió buá muand muá ŋŋil ya Ɔgúná. 24Edúndun omodi ɔhɛ́n áneé Demetliyús, umabá udúne baán bá mudúl bá duayɛ mpónyé na idúl hiá uhaluá wa ugándɔ ɔhɛ́n áneé Altemís, búmabá búéŋen bedúndun giod giá ŋŋúme. 25Demetliyús uwagúsígan bedúndun abagányɛ na bandɔ bómodi abámabá bála bubuóli buáguɔ́, úmuanyɛ gɔ́b áneé: «Begúl bámɛ, nuálinsan áneé beseé wasɔ woóguólonin agá buóli ubuɔ. 26Gɔgaá, nuáguánan ugúnya ana nuɔ́guɔ́bɔn buand ubuɔ́ Póle wɔ́yɔnɔ́: Wɔɔ́guɔya hɔɔ́m gidigid áneé buhaluá ɔbɔɔ́ bandɔ bábíaŋaninaá na imbɔ́g siɔ́b, bádibá buhaluá. Usemenehigenin giod giá bandɔ na ŋŋɔyida yeg igányɛ, búdibá pɛ́ŋ Efɛ́s, gɔgaá uguá giandá giá gibéyi giá guísi giá Así. 27Búnyɛ buá lɔg buóli buásɔ, búond búnímie nigúmi niá idúl niá uhaluá wa ugándɔ Altémis, bandɔ bɔ́diɔnɔ́duguɔya áneé Altemís unyɛ giandá, henyé uguá gibéyi giá guísi giá Así na guísi gidigid bébúlúgenyeé yɔ́.» 28Bandɔ abámabá bɔ́bídɔ́lígɔnɔn yɔ́ bɔ́mɔɔ́mɔ́b nugálɔ unugányɛ, ebéhílíg na ilúnd, abɛ́d gá héhenye, bɔ́ya áneé: «Altemís, uhaluá wa bandɔ bá Efɛ́s, unyɛ giandá!» 29Gindɔmdɔm igíésegidinye uguá tísɔna gidigid, bandɔ ebéndegimbin biendinyi biá Póle: Na Gayús na Alistálk, bamasedoniɛ́ŋ abɛ́d nɔɔ́nɔb agá giɔ́mbɛ giá duɔ́ndɔnd giá tísɔna. 30Póle umɔyá gubíŋín uguá nibígúsa, gɔgaá bebinene bá Klístus ebénye yɔ́. 31Belibuóli bá ŋŋɔ́mɔna abámabá begúl bá Póle bá Así bómodi, abádúmɛ́n yɔ́ nsɔ́m áneé udiɛ́d agá giɔ́mbɛ giá tísɔna.
32Agá giɔ́mbɛ agányɛ, bandɔ bɔ́mɔsɔ́nduguɔ́bɔnɛn. Ɔbɔ béhéhenye gá guɔya buɔ́b buónyi, ebéné agá buáyɛ bɔ́ya buɔ́b, ombuŋíbuŋié uhúágua hɔ́, bandɔ giod ta guandalɛns buand ubúmagúsígan bɔ́. 33Uguá gimbi igigányɛ, bandɔ bómodi abásalunɛn mɔndɔ ɔhɛ́n áneé Alɛgsáŋdlɛ, uyɔɔ́ bayúdɛn bémedélímínyé uguá busió buand ubúmadúmbán. Alɛgsáŋdlɛ uwehédenye bandɔ na ɔmbɔ́g áneé ugálɛ́ɛd. 34Gɔgaá, bandɔ bámaámálɛns áneé unyɛ wa bayúdɛn, ebébul gunoginogie buand buá bisigɛl bíandɛ bɔ́ya áneé: «Altemís, uhaluá wa bandɔ bá Efɛ́s, unyɛ giandá!» 35Oŋóŋi uwehigin giíŋ, uwehédenye giɛ́, úmuanyɛ áneé: «Bandɔ bá Efɛ́s, kásɛ mɔndɔ unyɛ hɔ́ udiálínsan áneé tísɔna wa Efɛ́s unyɛ gidányɛdányɛ giá tísɔna giá giandá giá Altemís na giaŋana giég igímonólín ugumɔn a? 36Haná gɔg biondínyi biánɔ bídiábianan nségíe, ánaá núhádan, nubínúŋɔ́n bilɔg biá melélíe. 37Nuódiólín aga na bandɔ abásábádial gilɔg giá buand ta gufénífénin uhaluá wasɔ wa ugándɔ Altemís. 38Mmába Demetliyús na bandɔ bég ebébineneé yɔ́ bógódi buɔ́b buónyi na mɔndɔ omodi, biansɛ biá nugélényi bínyɛ hɔ́ na begéli na mɔɔ́sɛ má nugélényi. Bógódie áneé bɛ́d agá besúmbibisan. 39Guond, mmába nugódi mbíbaŋ imodi, ímuanyɛ igáabíáŋanan agá gimbi giá idɔg igínigimananaá na buɔ́. 40Bányɛ bádián hana bilɔg biá bandɔ gá nibígúsa niásɔ niá hínen, gá giagiá didigódi buand ubuɔ́ dínya diá guɔyɛd, buá bídímbíginin guɔ́. » Umɔɔ́mɔ́yɛd anagányɛ, uwesélémendie bandɔ bá gigɔ́s.
ទើបបានជ្រើសរើសហើយ៖
Melélíe 19: EKM
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
