Melélíe 18
18
Póle uméneg Kolɛ́ŋt
1Egélém gá guólígie Atɛ́n, Póle uwedúmbie guɛ́d Kolɛ́ŋt. 2Uwaádán hɔ́ na maná bayúdɛn ɔhɛ́n áneé Akilás. Umebíbíén uguá gibéyi giá guísi giá Pɔ́ŋ. Umabá guesieg na guólésieg guonoólín agá Italí, na ugányɛ weg ɔhɛ́n áneé Plisíl. Bómól Kolɛ́ŋt gá giagiá, ofuŋ uhugɔ́n Klód húmesesídie ŋŋɔ́ŋɛ gá gueleé bayúdɛn gidigid bólígie Lóm. Póle uwenegégíe bɔ́. 3Haná Póle úmabá wala bubuóli buáguɔ́ búmomi, guhága bilál na ndífɔn, uwenedugúmín nɔɔ́nɔb gá guala buɔ́. 4Sig buɔ́sɛ buá giíndía giá bayúdɛn, Póle umabá ugɔ́lɔn nugálɔ uguá gigúl, wamba áneé ugusinye bayúdɛn na baglɛ́k.
5Uguá ginɛŋ igiɛ́ na Timoté na Silás bémesieg, guonoólín Maseduán, Póle uwodóŋínye ginɛŋ giég gidigid gá sesenye Nugálɔ nuá Uhaluá, usilen bayúdɛn áneé Yésuse únyaá Bémeyíde. 6Gɔgaá, bayúdɛn bámabindimanɛn yɔ́, básiga yɔ́. Póle uweyiŋkidin bisɔn biég wɔyɔn bɔ́ áneé: «Núméním, búgabá uguánɔ guá gigua mbánan. Búdibánd buónyi buámɛ. Gubul dabdab, ŋŋɛɛ́d ɔmbɔ́gɔmbɔ́ga huá bandɔ abádiabá bayúdɛn.» 7Uwoólígie agányɛ gɔg, uwɛɛ́d agá mɔndɔ omodi ɔhɛ́n áneé: Titiyús Yustús, úmaábá ubúlúgenye Uhaluá, nihiá niég nímabá mɔdɔg na gigúl giá bayúdɛn. 8Ofuŋ huá gigúl ɔhɛ́n áneé Klispús, uwaádáab Ɔgúná na niíd niég niá giansɛ giá bandɔ gidigid. Giod giá bakolɛŋtiɛ́ŋ igímabá gíbídɔ́lígɔn Póle igíádáab súsɔ́n Yésuse, ebéyumenye bɔ́.
9Budúg búmodi, Ɔgúná uwɔyidɛn Póle uguá nuénígie áneé: «Adibia bugádɔ, dúmbényé na gálgal, adihádán, 10gá giagiá, nnyɛ naánahɔ, ta mɔndɔ udibá wa gimbin gá gényigenye, gá giagiá giod giá bandɔ gínyɛ agá tísɔna ugányɛ igíɔ́bɔninaá naánamɛ.» 11Póle uwagíga Kolɛ́ŋt nnyɔ́m na gibéyi, uhuínyihuinye bandɔ nugálɔ nuá Uhaluá.
Póle umédélímin agá busió buá ŋŋɔ́mɔna ɔhɛ́n áneé Galiɔ́ŋ
12Uguá ginɛŋ igiɛ́ Galiɔ́ŋ úmabá ŋŋɔ́mɔna wa Lóm, uguá gibéyi giá guísi giá Akáyɛ, bayúdɛn abábíladɛn Póle abɛ́d neéneg agá giansɛ giá nugélényi. 13Bɔ́ya áneé: «Mɔndɔ uyɔ weéhuínyihuinye bandɔ bilɔŋ bidódi biá búlúgenye Uhaluá, ibiɛ́ gigodi giásɔ gíényenyeé.» 14Póle umabá gá gɔ́l nugálɔ, Galiɔ́ŋ uwondinye bayúdɛn áneé: «Búámábá gá giɔ́na giá mɔndɔ, ugúnya ana gá gigaga giá gigua, yabá wa gɔ́l ginɛŋ giá núbídɔ́lígɛn, banuá bayúdɛn. 15Gɔgaá, haná búnya nségíe gá busió buá bimansɛ, buá ɔhɛ́n naá buánɔ buá bigodi mbánan, búánúbíyigan. Yaŋuá, mméen gubá esúmbibisan wa bilɔŋ biá moónyi ibigányɛ!» 16Uwagúŋa bɔ́ agá giansɛ giá nugélényi. 17Bámuanyɛ gidigid gɔg ebégimbin Sostɛ́n, ɔgúnɔ́gɔ́n wa gigúl, ebénúbe yɔ́ agá busió buá giansɛ giá nugélényi. Gɔgaá, búmasúgual Galiɔ́ŋ ta buand.
Póle umónd Antiós
18Póle uwandagígɛ́d giandá giá ginɛŋ Kolɛ́ŋt. Egélém agányɛ, uweédébie beédébi bá Klístus, uwayumɛn uguá sitíme gá guɛ́d Silí, ɔlɔŋ na Plisíl na Akilás. Umabá umámánábímua ɔduá Saŋkelé, gá giagiá umabá umadánɛ́n Uhaluá. 19Ebéneg Efɛ́s, Póle uwadándúgan na Plisíl na Akilás. Uwenebíŋín uguá gigúl gá nségíe na bayúdɛn. 20Ɔbɔ́yidɛn yɔ́ áneé ugígɛ́ɛd hɔ́ giandá giá ginɛŋ, uwen. 21Uweédébie bɔ́ na guɔyɔn bɔ́ áneé: «Ŋŋelimb guosiond uguánɔ uguɔ, Uhaluá úmɔ́ya.» Uwayumɛn uguá sitíme gá guóligie Efɛ́s. 22Umeéméneg Sesalé, uwagaguɛ́d Yelusalɛ́m gá bígélídie Gimbi giá beédébi bá Klístus. Egélém, uwɛɛ́d Antiós. 23Uwagígɛ́ɛd hɔ́ maná ginɛŋ, uwobóduguond. Uwadúmbɛ́n uguá gibéyi giá guísi giá Galát naá giá Filisí, wɛɛ́d ugúnínenye guádáab guá beédébi gidigid.
Apolós uméneg uguá gidɔŋ giá Efɛ́s naá giá Kolɛ́ŋt
24Maná bayúdɛn omodi ɔhɛ́n áneé Apolós, umebíbíén Alɛgsaŋdilí, uwesieg Efɛ́s, umabá egéli mbánan nsesi. Ulinsan Ŋŋɔ́ŋɛ beseé na beseé. 25Bémehuínyihuínyé yɔ́ ŋŋil ya Ɔgúná beseé, umabá uhuínyihuinye wond wɔya buand ubúmábíyigan Yésuse na ibal gidigid na gindényé. Gɔgaá, umabá ulinsan pɛ́ŋ giyuminye giá Sáŋa. 26Uwɛɛ́d gá gálgal na nimadɛ gidigid uguá gigúl. Na Plisíl na Akilás bɔ́mɔɔ́mɔ́bídɔ́lígɔnɔn yɔ́, ɔbɔ́gɔ́l yɔ́ gá salunanɛn yɔ́ muand muá ŋŋil ya Ɔgúná beseé. 27Egélém agányɛ, Apolós uwamba guɛ́d Akáyɛ. Bɔ́gɔ́b ebédiginye yɔ́ uguá binam, abádúmɛ́n beédébi bá Klístus bá gibéyi giá guísi igigányɛ mbɔba gá gueleé bágíndígɛn yɔ́ beseé. Umeéméneg, uwegígenin bandɔ abámáyan beédébi uguá magɔg má Uhaluá ɔmbɔ́g giod. 28Gá giagiá, na binɔ́g biég biá dugálɔ, umabá ugíde bayúdɛn abámabá bɔ́diɔ́bɔn agá budányɛ agá eŋís ya bandɔ eŋíd, wond udíyenye bɔ́ na ŋŋɔ́ŋɛ áneé Yésuse unyɛ Bémeyíde.
ទើបបានជ្រើសរើសហើយ៖
Melélíe 18: EKM
គំនូសចំណាំ
ចែករំលែក
ចម្លង

ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល