Melélíe 20
20
Póle umɛɛ́d Maseduán
1Gindɔmdɔm gímaámahádan, Póle uwagúsígan bebinene bá Yésuse gá gínyiginye bɔ́. Egélém, uweédébie bɔ́, uwɔgɔ́l ŋŋil ya Maseduán. 2Umaámáyɔg gibéyi giá guísi igigányɛ, na gínyiginye bebinene bá Yésuse abámabá guɔ́, uweneg uguá gidɔŋ giá Glɛ́s, 3uwabídímɛn guɔ́ ihóli ídádɔ. Uguá ginɛŋ igiɛ́ úmayumán uguá sitíme gá guɛ́d uguá gidɔŋ giá Silí, uwɔɔ́b áneé bayúdɛn bágálan yɔ́ idɔg, uwaán beseé áneé wondin ɔmbɔ́g huá Maseduán. 4Biendinyi biég gá uŋand uhuɔ, bímabá áneé: Sopatɛ́l, uhaŋ huá Pilús, mɔndɔ wa tísɔna wa Bélé, na Alistálk na Sekúndus bá tísɔna wa Tesaloník, Gayús wa tísɔna wa Dɛ́lb, na Timoté na Tisík na Tolofím, bandɔ bá gibéyi giá guísi giá Así. 5Ɔlɔŋ huá bandɔ uhugányɛ uhúébue guɛ́d gásɔ uhúánadígígán Tloás. 6Gásɔ gɔg, egélém gá budɔ́mb buá bilɛ́d biá kanda buanyɛ buá guedigenye oguŋ, idiayumɛn uguá sitíme agá tísɔna wa Fílibe, egélém gá mɔɔ́sɛ mátánɔ, idienegégie bɔ́ Tloás idiond idiagígɛ́ɛd hɔ́ gɛnyɛ gímomi.
Gihunya giá Etík uguá nigué Tloás
7Buɔ́sɛ buá busió buá gɛnyɛ, henyé dimabígúsígan gá nyá gilɛ́d giá búlada, Póle uwɔya mayɔ na bebinene bá Yésuse. Haná úmabá áneé waádúmban meémbélényi, uwɔya mayɔ nɔɔ́nɔb gueneg na ɔdɛ́m huá budúg. 8Giod giá mulámba gímabá uguá ndáŋia iyɛɛ́ dímabígúsígán guɔ́. 9Muúŋayɔ ginɔ́g, ɔhɛ́n áneé Etík, umabá dugumine uguá buáyɛ buá ogúnd. Uwagɔ́nd dunɔ́ uguá ginɛŋ igiɛ́ Póle úmabá uwɔya mayɔ. Etík uwenetúlúg uguá ŋŋɛŋɛl ya gádádɔ ya ndáŋia. Bémelé bédiginye yɔ́, umabá umémenegué. 10Póle uwasɔs gɔg, uwɔbíɔ́díginɛn yɔ́, uwasamb yɔ́, úmuanyɛ áneé: «Nudibígídé, unyɛ ɔgɔ́sɛ!» 11Bómoómóond gá búlɛ́ɛg, Póle uwabáya gilɛ́d giá búlada uwanyá. Egélém agányɛ uwɔnduguɔya mayɔ giod gueneg na guɔ́m gubál, uwadigɛn gá dɔ́mb. 12Obónd na muúŋayɔ ginɔ́g ɔgɔ́sɛ, ubúóbobie bɔ́ ɔdɛ́m.
Póle umólígie Tloás gá guɛ́d Milɛ́t
13Basuá gɔg idiebue guyumɛn uguá sitíme gá guɛ́d Asós, agá hɔɔ́m ɔhɔɔ́ dímabá áneé digɔɔ́gɔ́l Póle. Gá giagiá úmuanyɛ úmambɛd áneé wanda uguísi. 14Umeémésidígégíe Asós, uwayumɛn uguá sitíme gá guɛ́d Mitilɛ́n. 15Idianduguadigɛn agányɛ, méembélényi idiadúmbɛ́n Sió. Buɔ́sɛ ubúmɔdɔ́bígɔ́n, idiadúmbɛ́n Samós, uguá buɔ́sɛ ubúmɔɔ́ndɔ́dɔ́bígɔn idiohogid Tlogiliɔ́ŋ idiebédeneg Milɛ́t. 16Gɔgaá, Póle umabá umɔ́mɔnɔ́guɔyɛd áneé udiáguandan Efɛ́s, gá giagiá umasúguamba gunímie ginɛŋ uguá Así. Umambá gueneg Yelusalɛ́m gunsáns gá busió buá buɔ́sɛ buá budɔ́mb buá Paŋtekót.
Póle weéguédébenye bogógi bá Efɛ́s
17Uguá ginɛŋ igiɛ́ Póle úmabá umanyɛ Milɛ́t, uwadɔ́m bandɔ áneé bɔ́nɔdɔ́ŋɛ́ɛn bogógi bá Gimbi giá beédébi bá Klístus bá Efɛ́s. 18Bémeémésieg, uwɔyidɛn bɔ́ áneé: «Nuálinsan haná yaábá ŋŋiga naánanɔ mɔɔ́sɛ gidigid guenebul buɔ́sɛ ubuɔ́ mmésieg uguá gibéyi giá guísi giá Así. 19Mmalán Ɔgúná buóli na bísusie gidigid, na mosínye na meyú gá busió buá mudɔg muá bayúdɛn. 20Mmesébembelidie ta maná buand umaábá wa gueleé unúbɛ́n beseé. Henyé, mmonúdógonyinye Nugálɔ nuá Uhaluá, iyenúhuínyihuinye hɔɔ́m gidigid naá uguánɔ guá biansɛ. 21Mmɔdɔ́ŋɔn bayúdɛn na bindiádába gá gueleé bénúgie bilɔŋ bónd bádáab Ɔgúná wasɔ Yésuse.
22Dabdab, haná Gileénde gíŋúdanɔ́, guámɛ guɛ́d uguɔ Yelusalɛ́m. Ndiálinsan buand ubúgeŋegineé hɔ́. 23Gɔgaá, yaálinsan áneé uguá bɔtísɔna gidigid, Gileénde giá Budányɛ gímabá gímondógínyé áneé na bimbɔg na meyú múáŋígan hɔ́. 24Gɔgaá, ndiáguánan nusɔ́da nuámɛ giandá giá buand, búnyɛ pɛ́ŋ áneé yiídan na buóli buámɛ ubuɔ́ Ɔgúná Yésuse úmampuá, yeneg agá nsúgie: Gudógonye Ginɔ́g giá Nsɔ́m giá magɔg má Uhaluá.
25Yaálinsan buɔ́ beseé na beseé, gugɔns dabdab, guɛ́d uguá busió, banuá ɔbɔɔ́ yoódógonyínyé Niguili niá Uhaluá agánɔ gá ɔdɛ́m na ɔdɛ́m nudiganduguán busió buámɛ. 26Buand buáguɔ́ nnya wa bíbál niɔŋ hínen áneé: mɔndɔ omodi úméním uguánɔ guá ɔlɔŋ, búdiámbíyigan. 27Gá giagiá, mmasánúnambɛn buand búmodi, mmenúdíye gugisa guá Uhaluá gidigid. 28Gɔ́lɔ́nɔ́n gisigɛl naánanɔ mbánan nuond nugíga ɔlɔŋ huá bidúmbúa biá Klístus ibiɛ́ Gileénde giá Budányɛ gínya igínúhuánɔ gá guendenye. Nudédínye Giansɛ giá Uhaluá igiɛ́ úmabɔ́d na manɔ́ŋ má Muɔ́n weg mbánan. 29Yaálinsan áneé ŋŋaámádɔ́mb, bihánd biá manyam bígebíŋín uguá ɔlɔŋ huá bidúmbúa gá gual gilɔg. 30Ta uguánɔ guá ɔlɔŋ uguɔ́g bandɔ bánáháman guɔ́ na dugálɔ duá mbágía udúɔ́nɔ́gɔ́gída bebinene bá Klístus uguɔ́b uguá ɔlɔŋ. 31Ánaá núbila eŋís gɔg, núbídúmenye áneé uguá duɔŋ dúdádɔ, na budúg hana na buɔ́sɛ, uguá mosínye, mmɔ́sɔ́dɔg guéŋén sig mɔndɔ isɔ́ma. 32Gúu dabdab, yaánúsúgan uguá imbɔ́g siá Uhaluá na nugálɔ nuég nuá magɔg. Ugódie buŋaŋa buá núgúnúnenye uguá guágɔdɛ́m wond unúhuán muand muá béseé gidigid umuɔ́ úgíŋíganinaá bandɔ gidigid abánya bég.
33Mmásúguág eŋís yamɛ ta uguá ŋŋúme, ta uguá góol, ta uguá gisɔn giá mɔndɔ. 34Banuá mbánan nuálinsan áneé mmandugual buóli na imbɔ́g siámɛ, gá bíoye ɔlɔŋ na biendinyi biámɛ. 35Yeénúdíyényé binɛŋ gidigid áneé guala buóli gúgúnya guá gueleé nugígenin básúgasuga ɔmbɔ́g nuond nubídúmenye nugálɔ nuá Ɔgúná Yésuse unuɔ́ úmɔyɛ́d uguadá guég guá niíd áneé: “Guhuánɛn gúnyɛ bunɛ́m gudɔ́mb guhaguna.” » 36Póle umaámáman gugálgal, uwegunsig dunúnú ɔlɔŋ nɔɔ́nɔb uwobísógólonye. 37Bandɔ gidigid ebébul guségíme na niónyi, bɔ́gɔ́lɔn Póle ŋŋuindi. 38Mesígíl mɔ́b mómoólonin hómohómue uguá nugálɔ unuɔ́ úmɔyɛ́d áneé bádigandúguán busió buég, egélém agányɛ ebénelíe yɔ́ uguá sitíme.
ទើបបានជ្រើសរើសហើយ៖
Melélíe 20: EKM
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
