Melélíe 17
17
Na Póle na Silás Tesaloník
1Na Póle na Silás, abádúmbɛ́n uguá tísɔna wa Anfipolís naá wa Apoloní ebébédeneg agá tísɔna wa Tesaloník, agaá gigúl giá bayúdɛn gímabá. 2Haná Póle úmabá woól waálá, uwenegégíe bɔ́, uwondin uguɔ́b guá gigúl, uguá biíndía biá bayúdɛn bídádɔ, uwɔya mayɔ nɔɔ́nɔb ubídímbígenin uguá Ŋŋɔ́ŋɛ. 3Umabá usalunan bɔ́ wond udíyenye bɔ́ áneé Bémeyíde wɔnɔ́bɛ́ɛg, uhám uguá gibɛ́l. Umɔyɔn bɔ́ áneé: «Bémeyíde uyɔɔ́ nnúdógonyeé, búnyɛ Yésuse.» 4Gidám giá bayúdɛn gímodi igímɔbídɔ́lígɔnɔn na Póle na Sílas, igíéliminye, igíébinidin bɔ́. Nɔ́ súsɔ́n giod giá baglɛ́k igímabá gíbúlúgenye Uhaluá wa bayúdɛn gímal, na giod giá bigúmén biá bagándɔ. 5Gɔgaá, bayúdɛn obóhón na yaág. Ebédidid badabáldábál ɔbɔɔ́ bémegégie uguá gibala, abágúsa biíŋ obónd obóyogodonye tísɔna. Ebénebíŋín uguá giansɛ giá Yasɔ́ŋ gá guamba na Póle na Silás, gá guɛ́d nɔɔ́nɔb agá idɔg hiá buán gá gélenye bɔ́. 6Haná bémesédigégie bɔ́, abɛ́d na Yasɔ́ŋ na beliméen básɔ bómodi agá besúmbibisan bá tísɔna, bɛ́d bánsán bɔ́ya áneé: «Bandɔ ɔbɔ béyuŋkumenye guísi gidigid, dabdab, bébeényé báganyaá aga. 7Yasɔ́ŋ úwaágíndígɛ́n bɔ́. Bámuanyɛ gidigid bádiáguanda haná bigodi biá ofuŋ huásɔ uhugɔ́n bíɔ́yɔnɔ́, bɔ́guɔya áneé ofuŋ húdodi húnyɛ hɔ́, bɔ́dɔ́ŋɔn huɔ́ áneé Yésuse.» 8Ŋŋɔyida igányɛ iyedúmbie gubuŋulidie meéne má giíŋ, naá má bandɔ bá ihiligine hiá tísɔna. 9Bandɔ bá ihiligine hiá tísɔna ɔbɔ́yidɛn Yasɔ́ŋ na bɔsɔ́gá áneé bódóŋinye giod giá ŋŋúme, gá gueleé bánihɛn bɔ́.
Ginɔ́g giá gigíndígina Bélé
10Budúg búmaámágua, beliméen ebédúmbie na Póle na Silás Bélé. Bémeéméneg, abɛ́d uguá gigúl giá bayúdɛn. 11Bayúdɛn bá Bélé bámabianán idɛ́m gisínyi gudɔ́mb bá Tesaloník, abágíndígɛn Ginɔg giá Nsɔ́m na bídóŋinye. Mɔɔ́sɛ gidigid bámabá bánuna Ŋŋɔ́ŋɛ gá bide mmába síáguádánadan na nugálɔ nuá Póle. 12Giod uguɔ́b guá ɔlɔŋ igíáyɛ beédébi bá Yésuse. Uguá ɔlɔŋ huá baglɛ́k, bigúmén biá bagándɔ na giod giá banúmɔndɔ igíáyɛ súsɔ́n beédébi. 13Gɔgaá, bayúdɛn bá Tesaloník bɔ́mɔɔ́nɔguɔ́b áneé Póle wódógonye nugálɔ nuá Uhaluá Bélé, oból hɔ́ súsɔ́n gá buŋubuŋie na guedigenye idɛ́m siá giíŋ. 14Beédébi bá Klístus ebédúmbie gudɔ́m Póle uguá ŋŋil ya guɛ́d uguá máŋ, na Silás na Timoté ɔbɔ́lɔb Bélé. 15Bandɔ abámɛ́d gá guelie Póle ebéneg Atɛ́n, obóndin na Silás na Timoté na ŋŋɔyida ya gueleé bénegégíe Póle gunsáns.
Póle na bandɔ ɔbɔ́ndɔndaá na nugedie agá Atɛ́n
16Uguá ginɛŋ igiɛ́ Póle úmagígan na Silás na Timoté, ɔdɛ́m huég uhúébísígílid haná úmaán tísɔna wa Atɛ́n ohónón na biaŋana. 17Umabá uségenye uguá gigúl na bayúdɛn naá abádiabá bayúdɛn ebégúmenyeé Uhaluá, buɔ́sɛ gidigid uségenye súsɔ́n na bandɔ ɔbɔɔ́ úmabá waádánadan nɔɔ́nɔb uguá biɔ́mb biá gidɔŋ. 18Umabá ugálgal na bandɔ ɔbɔ́ndɔndaá na nugedie, bandɔ bá gimbi giá Epikúl na bandɔ bá gimbi giá Lenɔ́ŋ. Bómodi bɔ́ya áneé: «Ubuɔ́ ayálayálá uyɔ wɔ́yɔnɔ́ búbúnya giagɛ?» Bódodi bɔ́ya áneé: «Búnyɛ hana wɔɔ́díɔyɔn bienyébienyé biá buhaluá.» Ɛɛ́ɛ, Póle umabá udógonyinye bɔ́ Yésuse na hám uguá gibɛ́l. 19Ebégimbin gɔg Póle, abɛ́d neéneg agá ɔŋuɛnyɛ uhuɔ́ bɔ́dɔ́ŋɔnaá áneé Aliopáge, idɔg hímabá híbígusa hɔ́. Obóhún yɔ́ áneé: «Dinyɛ dialɛns bunuhuínyihuínyi ubugɔ́sɛ ubuɔ́ éhuínyihuinyeé ubugányɛ a? 20Ɛɛ́ɛ, eédígímbe idú, Ɔɔ́díɔyɔn bienyébienyé biá moónyi ibiɛ́ diámbanɔ́ gulɛns ubuɔ́ bíɔ́yɔnɔ́.» 21Na bandɔ bá tísɔna wa Atɛ́n gidigid na benyi abámabá bágíga nɔɔ́nɔb bámabá bédúmbenye ginɛŋ giɔ́b gá guɔya ugúnya ana gá bídɔ́lígɔnɔn biŋɔ́nsa biá muand. 22Póle, delimine agá ɔdɛ́m na ɔdɛ́m huá Aliopáge úmuanyɛ áneé: «Bandɔ bá Atɛ́n, yaáguánan áneé nunyɛ beédébi uguá ŋŋil gidigid.» 23Gúu gɔg, uguá ginɛŋ igiɛ́ mbígéŋélenyeé uguánɔ guá tísɔna, mbíyigan biansɛ ibiɛ́ núháganaá biaŋana biánɔ, iyoónd iyaán ahɔd ya nsíb ɔyɔɔ́ bɔ́mɔɔ́ŋ guɔ́ áneé: «Gá busió buá uhaluá uyɔɔ́ bádiálínsan.» Ɛɛ́ɛ, ubuɔ́ núbúlúgenyeé kandalɛns, búnyɛ úmuanyɛ mmoól gá núdóginye. 24Uhaluá úmaálɔ́ŋ guɔ́m naá buá gidigid ubúnya guɔ́, úmuanyɛ únyaá Ɔgúná wa guísi na gumɔn, udíágíga uguá mudúl umuɔ́ bandɔ báháganɔ́ na imbɔ́g siɔ́b. 25Udigódi nsan ya buóli buá imbɔ́g siá bandɔ hana waábaŋa buand, gá giagiá, úmuanyɛ úweéŋeneé mɔndɔ gidigid na nusɔ́da na gihínyi naá umúólmuóndeé gidigid. 26Agá gunsen agá mɔndɔ pɛ́ŋ omoómi, úmaŋán maán gidigid uweduguminye mɔ́ uguísi gidigid. Uwasúmba binɛŋ biá nnyɔ́m, uwadánda imbál siá bibéyi biá guísi ibiɛ́ bógódionu áneé bágíga guɔ́. 27Umal anagányɛ gá gueleé bámba yɔ́, ta naánanyá bányɛ bá guán yɔ́. Gá guán, Uhaluá udibá hádɛ na sig mɔndɔ.
28Gá giagiá:
«Búnyɛ uguég dísɔ́dɔnaá, dígélígelíe, dínya bandɔ.»
Buɔ́ boóŋi bánɔ bómodi bélimenyeé, bɔ́ya áneé: «Dinyɛ súsɔ́n bunɔŋ buég.»
29«Haná dínya bunɔŋ buég, didigedenyé áneé Uhaluá unyɛ mpónyé na giaŋana igiɛ́ bámal ná góol, na nuayɛ nuá ŋŋúme ugúnya ana na nidányɛ umuɔ́ bandɔ bómodi báŋananaá na nugedie nuɔ́b nuá iduá. 30Gɔgaá, Uhaluá udiándabíyigan ginɛŋ igiɛ́ bandɔ bámabá uguá mebúbe. Dabdab wɔɔ́dɔ́ŋɔn bandɔ gidigid, uguísi gidigid gá gueleé bénúgie bilɔŋ. 31Uhaluá usemenedéníginye buɔ́sɛ ubuɔ́ wénégélenyeé bandɔ gidigid uguá gindényé, uguá mɔndɔ uyɔɔ́ úmeyíd. Umeéŋin bandɔ nulinsa uguélém guá hémie mɔndɔ waáguɔ́ uguá gibɛ́l gá díye mɔndɔ gidigid áneé anagányɛ wánálanɔ́.»
32Bɔ́mɔɔ́mɔ́b Póle guomon guhám uguá gibɛ́l, bómodi abágɔns guhɔna yɔ́, bódodi bɔ́ya áneé: «Digelimb gubídɔ́lígɛn gáhɔ gá buónyi ubugányɛ buɔ́sɛ búdódi.» 33Anagányɛ Póle úmadándúgan nɔɔ́nɔb. 34Henyé, uguɔ́b guá ɔlɔŋ, gidám giá bandɔ igíébinidin yɔ́, igíádáab. Bámabá áneé: Denís umaábá uguá ɔlɔŋ huá bandɔ Aliopáge, ugándɔ omodi bɔ́dɔ́ŋɔn yɔ́ áneé Damalís naá bódodi súsɔ́n.
ទើបបានជ្រើសរើសហើយ៖
Melélíe 17: EKM
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
