2 Kɔlɛŋɛtiɛ́ŋ 3
3
Buóli buá giŋɔ́nsa giá nigál
1Diánduguamba áneé dibísúgídɛn básua mbánan a? Ugúnya ana diáguamba, haná bɔsɔ́gá bómodi, mbɔba isídídíyenyeé áneé dimabísúgídɛn gánɔ gá busió, gá núdúmɛ́n, ugúnya ana iyɛɛ́ númɔɔ́ŋá gá dísúgídɛn a? 2Banuá nunyaá mbɔba yasɔ, mbɔba inyaá iyɔɔ́ŋɔ́n uguásɔ guá idɛ́m, iyɛɛ́ mɔndɔ gidigid úlinsan wond wanuna. 3Ɛɛ́ɛ, búnyɛ agá budányɛ nuáyɛ mbɔba ya Klístus iyɛɛ́ bámadíhuá gásɔ gá buóli, idiábá iyɔɔ́ŋɔ́n na tínde, gɔgaá iyɔɔ́ŋɔ́n na gileénde giá Uhaluá unyaá ɔgɔ́sɛ. Búdibá uguá ɔkɔ́k ya adányɛ, gɔgaá uguá idɛ́m siánɔ siá bunyɛ bandɔ. 4Ndénu, bíbiódinyi ɔdɛ́m ibiɛ́ dígódionú uguá Klístus agá busió buá Uhaluá. 5Didibá dia bíhínenye basuá muɛ́d gásɔ gá bugaga, bugaga buásɔ búóguólónin agá Uhaluá. 6Úmuanyɛ úmaádíhuá bugaga gá bá belibuóli gá giŋɔ́nsa giá nigál, nídióguólonin uguá mbɔba gɔgaá, níóguólónin uguá gileénde, mbɔba yɔɔ́guɔ́nɔnɛn, gɔgaá gileénde gíéguéŋénin nusɔ́da. 7Gigodi gímabá igíɔ́ŋɔ́n na tínde uguá ɔkɔ́k ya adányɛ, nigúmi niá Uhaluá iniébídíye uguá ginɛŋ igigányɛ, busió buá Mɔ́sɛsa ubúábunya hana gise. Baán bá Íslayɛ́l bámasábá bábíyɛg yɔ́ uguá busió, henyé búmabá gise igídúmbanaá, mmába gigodi gímabá gá guídan na bandɔ gá nigué gímebídíye na ninam niá nigúmi inigányɛ, 8Naánanyá buóli buá Gileénde búdianábianɔ́ nigúmi gudɔ́mb inigányɛ? 9Mmába gigodi gíáguáganɛn bimbɔg gímabiá nigúmi, naánanyá gɔg buóli buá gindényé búdianábiánɔ́ nigúmi gudɔ́mb? 10Dinyɛ dia guɔyɛd áneé nigúmi inímábunya nsuá níasánɔg nídiband hana nigúmi niá dabdab iníbunyanɔ́ gudɔ́mb. 11Gá giagiá mmába ubúdúmbánaá búmabiá nigúmi, naánanyá ubúgiganɔ́ búdianabiánɔ́ nigúmi gudɔ́mb? 12Gumina guásɔ guá mɔgɔdɛ gúádíhuán giod giá nubídágídɛ́n. 13Didiáguala haná Mɔ́sɛsa úmébíhúge busió na gibéyi giá ndífɔn áneé baán bá Íslayɛ́l bádián nsúgie ya gise giá busió igídúmbanaá. 14Gɔgaá dugedie duɔ́b dúmaguɛ́n mbíne. Guasiám uguá buɔ́sɛ buá hínen uguá ginɛŋ igiɛ́ bánunanɔ́ mbɔba ya nigál niá nsuá, gibéyi giá ndífɔn igigányɛ gínyɛ guɔ́. Gímanyɛ gídiólígie gá giagiá, búnyɛ uguá Klístus gíságínanaá. 15Ɛɛ́ɛ, guasiám uguá buɔ́sɛ buá hínen ginɛŋ igiɛ́ bánunánɔ́ mbɔba ya Mɔ́sɛsa gibéyi giá ndífɔn gínyɛ uguɔ́b guá ɔdɛ́m. 16Esié ginɛŋ giá bídún agá Ɔgúná, hɔ́ ndífɔn igányɛ yoóligonye igua. 17Ɛɛ́ɛ, Ɔgúná unyɛ Gileénde, hɔɔ́m ɔhɔɔ́ Gileénde giá Ɔgúná gínya hɔɔ́m háguɔ́ buhélélé búnya. 18Basuá gidigid dimébíhúgún busió, diábunya na nigúmi niá Ɔgúná, dinyɛ ebénúgién uguá gineéŋun igigányɛ na nigúmi inínya uguá binɛŋ gidigid giandá uguá Ɔgúná unyaá Gileénde.
ទើបបានជ្រើសរើសហើយ៖
2 Kɔlɛŋɛtiɛ́ŋ 3: EKM
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល