2 Kɔlɛŋɛtiɛ́ŋ 4
4
Na bunɛ́m na giɔ́bíga gá buóli buá Klístus
1Haná Uhaluá úmadián bulɔ́b gúu úmadíhuá buóli ubuɔ, didiénímenye nimadɛ. 2Dímɔyɛ́d áneé dimén muand gidigid umúnya uguá ninamba na ɔduá gunɔ́h, diáguanda kanda mebéndi didiénúgenye nugálɔ nuá Uhaluá, gɔgaá diédíyenye meliŋ diond diamba áneé mɔndɔ gidigid ubia bíbiódínyi ɔdɛ́m agá busió buá Uhaluá. 3Agányɛ, mmába Ginɔ́g giá Nsɔ́m gímanyɛ igíhúgén, gínyɛ igíhúgén gá busió buá ebémením, 4gá bindiadába, ɔbɔ uhaluá wa guísi uguɔ úmág gɔg nulinsa nuɔ́b mehegu, gá gueleé bádián nubuɛnyɛ nuá Ginɔ́g giá Nsɔ́m gá nigúmi niá Klístus, úmuanyɛ únyaá gineéŋun giá Uhaluá. 5Ɛ́ɛɛ́, didiébísesenye basuá muɛ́d, gɔgaá Yésuse Klístus Ɔgúná yɔ́ disesenye, mmába haná gásɔ mbánan diɔ́bíɔya áneé dinyɛ bedúmébi bánɔ gá busió buá Yésuse. 6Búnyɛ Uhaluá waáguɔ úmɔyɛ́d áneé: «Ánaá gise gíbunya agá ɔdɛ́m na ɔdɛ́m huá mbíne!» Búnyɛ úmuanyɛ waáguɔ́ mbánan úmaábúnyɛ́d idɛ́m, umabá áneé udíbunyɛd gá díhuá nulinsa nuég nuá nigúmi, unúbunyanɔ́ uguá busió buá Klístus. 7Gɔgaá, diásamban bunɛ́m ubugányɛ uguá musínyi muá numua, gá gueleé buŋaŋa ubúdiabá na mpónyé búbá uguá Uhaluá, búdibá uguásɔ. 8Uguá maáyɛ, mem dinyɛ abadámbánán na meyú, gɔgaá didibá abaáŋásídán, ta uguá ginɛŋ igiɛ́ dínya uguá meyú didiésulugugenye imbɔ́g, 9bédigényigénye, gɔgaá Uhaluá udiádínihinan, bɔ́dínɔhɔ́n eguísi, gɔgaá bédiédíhígenin. 10Kanda nídɔgíná diásamban nigué niá Yésuse uguásɔ guá nuɔ́l, gá gueleé nusɔ́da nuég núbídíye uguásɔ guá nuɔ́l. 11Ságásagá basuá dimanyaá ɔbɔgɔ́sɛ, dinyɛ ginɛŋ gidigid abásílígan uguá nigué gá busió buá Yésuse, gá gueleé nusɔ́da nuég núbídíye uguásɔ guá nuɔ́l unuguén. 12Anagányɛ, nigué níáguala buóli uguásɔ, gɔgaá nusɔ́da núáguala buóli uguánɔ. 13#4.13 Gil 116.10Haná dígódionu gileénde giáguɔ́ gímomi giá guágɔdɛ́m hana búnya ubúɔ́ŋɔ́n áneé: «Mmaádáab buand buáguɔ́ mmagálɛ́ɛd!» Buand buáguɔ́ haná diádáabanaá dígálgalaá. 14Gá giagiá diálinsan buɔ́, úmeéhémíe Ɔgúná Yésuse uguá gibɛ́l, wenédíhémie basuá súsɔ́n wanádiág súsɔ́n mɔdɔg neéneg, naánanɔ súsɔ́n. 15Meyú gidigid ɔmɔɔ́ dígódionu búnyɛ gánɔ gá busió, gá gueleé magɔg má Uhaluá máguman uguá gimbi giá bandɔ. Giod giá bandɔ gíánáhuán yɔ́ giod giá mbíyigie na nigúmi.
Gusɔ́dɔn uguá guágɔdɛ́m
16Buand buáguɔ́ dídíéníményé nimadɛ. Anagányɛ gɔg, uguá ginɛŋ igiɛ́ mmegu yasɔ ibígadánɔ́ bugédébugédé, gileénde giásɔ gíɔ́gɔ́lɔn bugɔ́sia sig buɔ́sɛ. 17Ɛɛ́ɛ, meyú másɔ ɔmɔɔ́ dígódionu gá ginɛŋ igiɛ, mányɛ lágɔlágɔ mónd mágiga gá maná ginɛŋ, gɔgaá, mádiáŋánan gá giandá giá nigúmi. Nigúmi inigányɛ nínyɛ ságásagá guond nínyɛ giandá guandadɔ́mb meyú másɔ. 18Didiábíyígan muand umúáníganigaá, gɔgaá umúdianígánɛ́ɛg. Ubúáníganigaá búnyɛ buá maná ginɛŋ, gɔgaá ubúdianíganɛ́ɛg búnyɛ gá ságásagá.
ទើបបានជ្រើសរើសហើយ៖
2 Kɔlɛŋɛtiɛ́ŋ 4: EKM
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល