2 Kɔlɛŋɛtiɛ́ŋ 11
11
Buŋaŋa buá Póle agá eŋís ya babɛlɛ́bɛl bég
1Ahá! Mmába nunyɛ nuaŋáganɛn áneé mmabá maná buegu, búnyɛ nɔ́, ɛɛ́ɛ, ánaá núŋáganɛn. 2Ŋŋódi budɛ́m bilɔŋ bímomi hana biá Uhaluá gánɔ gá busió, mmanúlád na gisɔg pɛ́ŋ gimómi gá núsúgídɛn uguá imbɔ́g siá Klístus áneé nubá agá eŋís yeg budányɛ hana mpúge na mmeŋe. 3Ŋŋódi bugádɔ gɔg, hana nnyɔ́g ímɔ́nɔŋ Ɛ́fe na mebéndi még, dugedie duánɔ dúdínúgie gá guɛ́d hádɛ na yɛbyɛb uyɔɔ́ núbianínaá Klístus. 4Ɛɛ́ɛ, nuáguádáaban áneé mɔndɔ woól gá nusesenyínyé Yésuse odódi udiábá uyɔɔ́ dímenúsésényínyé, nunyɛ súsɔ́n mɔdɔg na gíndígɛn gileénde gidódi igídiabá igiɛ́ númabiá, ugúnya ana igídiabá Ginɔ́g giá Nsɔ́m igiɛ́ númagíndígɛ́n. 5Yeégedenye áneé ɔbɔɔ́ núdɔ́ŋɔnaá áneé mbanda siá medenyi bádiádídúmban ta gá maná buand. 6Búnyɛ búábá nɔ́, mmába mmanyɛ gá hɔ́nhɔn bugéli, gɔgaá búdibá nɔ́ gá nulinsa nuá Uhaluá, búnyɛ buand búdodi dimenúdíyényé nɔ́ agá budányɛ uguá ginɛŋ gidigid naá uguá guala gidigid. 7Mmeémébísusie gá núbúlúgie banuá na núsesenyinye Ginɔ́g giá Nsɔ́m giá Uhaluá gá gilé, búmabá giédíe a? 8Agaá mmanuálan buóli mmabiá bisuɛ́n biá Bimbi biá beédebi biá Klístus bidódi, ŋŋɔ́lɔn ŋŋúme yɔb gá núdúmába. 9Ginɛŋ igiɛ́ mmasádibia buand agaá mmédúmbenye medúg naánanɔ, mmasábá uguá ginɔ́h uguá ɔduá huá mɔndɔ gá giagiá beliméen básɔ guónoólín uguá gibéyi giá guísi giá Maseduán bámampuán buá gidigid, guond uguá buand gidigid mmabígɛ́n áneé ndibá ginɔ́h giánɔ, yenédúmbenye na bígíŋa nɔ́. 10Uguá meliŋ má Klístus amánya uguámɛ yɔɔ́guɔya, ta mɔndɔ udienéŋenye bidɔdɛn ibiɛ́ ŋŋódiónú uguá gibéyi giá guísi giá Akáyɛ. 11Gá giagɛ gɔg? Gá giagiá ndiɔ́núɔya a? Uhaluá waálinsan áneé yɔɔ́núɔya. 12Ŋŋiídan na busió na guala hana yálanɔ́ gá gueleé yoólie bilɔg biá dugedie ibiɛ́ bógódionu gidigid hana bámbanɔ gubídíyenye áneé dinyɛ udényi húmomi nɔɔ́nɔb. 13Bandɔ abagányɛ, bányɛ bilɔg biá medenyi, beébi ɔbɔ́gɔ́lɔnaá mosió ma medenyi má Klístus. 14Buand buá yíka búdibá agányɛ, gá giagiá Sátan úmuanyɛ mbánan wɔɔ́gɔ́lɔn busió buá gilúna giá gise. 15Búnyɛ gɔg maná buand gá bedúmébi bég, ɔbɔ́gɔ́lɔnaá mosió ma bedúmébi bá gindényé. Nsúgie yɔb yanábá mpónyé na buóli buɔ́b.
Biɔ́bíga ibiɛ́ úmabiá
16Yɔ́nduguɔya áneé ta mɔndɔ udigedényé áneé nnyɛ giegu, ugúnya ana núádáab áneé mbá buegu gá gueleé yaŋuá súsɔ́n mbíbúlúgie bugídígíd. 17Ɛɛ́ɛ, hana mmínanɔ́ mɔgɔdɛ gá bíbúlúgénye, ndiágálgal hana Ɔgúná wámbanɔ́, gɔgaá yaágálgal hana giegu giá mɔndɔ. 18Gúu haná giod gíbígɔ́lɔnaá uguɔ́b guá nɛɛ́m niá bunyɛ bandɔ, yaŋuá súsɔ́n yɔnɔ́bígɔ́lɔn. 19Uguánɔ guá guɔyɛd banuá nunyaá begedigédi, nuáguáganɛn bandɔ ebénímenyeé meéne. 20Nuáguáganɛn bɔ́ áneé bɔ́núgɔ́lɔn hana biɔ́lɛ, nualan bɔ́ buóli, bánúsaga, bánúsíŋa, bónd bánúbuman uguá mosió. 21Yɔɔ́guɔ́bɔn ɔduá gunɔ́h gá guɔyɛd áneé dimabá hómohómue bugué. Mɔndɔ úmabia nihadɛ gá buand, yaŋuá súsɔ́n nnyɛ wa bia ta ŋŋágálgal hana giegu. 22Bányɛ bebelé a? Yaŋuá súsɔ́n nnyɛ mɔndɔ wa Íslayɛ́l. Yaŋuá súsɔ́n nnyɛ uguá niólín niá Áblahám. 23Bányɛ belibuóli bá Klístus a? Ɛɛ́ɛ, Ŋŋaágálgal hana mɔndɔ umeénímíe meéne, yaŋuá nnyɛ nɔ́ gudɔ́mb bɔ́. Mmɔɔ́bɛ́ɛg gudɔ́mb bɔ́, mmabá uguá bimbɔg iŋand giod, iyabia megide guandadɔ́mb, guond iyabá ginɛŋ gidigid mɔdɔg na nigué. 24Iŋand ítánɔ, bayúdɛn ebésúndenye nsué nítín na bunyo na íníhi. 25Iŋand ídádɔ, ebénúbe na nsué, uŋand húmomi abándúdan adányɛ, iŋand ídádɔ iyahɔ́h, iyelik buɔ́sɛ búmomi na budúg búmomi uguá máŋ. 26Uguámɛ guá iŋand, iyaádánadan na bilɔg biá muand: ibíáhɔ́h uguá usaá naá uguá máŋ, bilɔg biá bá bahánd, bilɔg biá beliméen bámɛ bayúdɛn, bilɔg biá bindiádába, uguá bá tísɔna, agá uhambɛ, uguá ɔlɔŋ huá bilɔg biá beliméen, 27bidɔga na meyú, ginɛŋ gímodi ŋŋáŋɔ́l, nsan na niída, ŋŋenyi, gisínyi na kandabia bisɔn. 28Ta guhan muand múmodi umuólmuóndeé, masɔ́m mámɛ má mɔɔ́sɛ gidigid, mesígíl gá busió buá Bimbi biá beédebi bá Klístus gidigid. 29Mmába mɔndɔ unyɛ bugué, nnyɛ bugué súsɔ́n, mɔndɔ úmánihɛn guágɔdɛ́m, buáŋala meyú hómohómue. 30Búmabá áneé yɔɔ́bígɔ́lɔn, yɔɔ́bígɔ́lɔn uguámɛ guá bugué. 31Uhaluá Síe wa Ɔgúná Yésuse únigimanaá na mpínényi binɛŋ gidigid, waálinsan áneé ndiásúŋan. 32Agaá mmabá agá tísɔna wa Damás, medenyi má ofuŋ Altás, mémedélímínyé begíg uguá eŋíd yá tísɔna áneé méŋimbin. 33Gɔgaá, uguá ogúnd huá nimás ebénsusinye uguá idɛd na nuoli, nɔ́ mmɔbínɔ́hɛ́n bɔ́.
ទើបបានជ្រើសរើសហើយ៖
2 Kɔlɛŋɛtiɛ́ŋ 11: EKM
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល