2 Kɔlɛŋɛtiɛ́ŋ 10
10
Póle woóguondonyinye bandɔ ebéfudenyeé yɔ́
1Yaŋuá mbánan Póle nnuóhoneé buɔ́ uguá yɛbyɛb na ɔdɛ́m beseé huá Klístus, yaŋuá uyɔɔ́ bɔ́yɔnɔ́ áneé nnyɛ bihuɛ́yɛ gá ginɛŋ igiɛ́ nnya agánɔ gá busió, ginɛŋ igiɛ́ nnya hádɛ naánanɔ́ nnyɛ kuanyɛkuanyɛ. 2Yoónúbísógólonye, nudial áneé nlúndie ɔdɛ́m huámɛ uguá ginɛŋ igiɛ́ ŋŋabánɔ́ naánanɔ. Gá giagiá yaáguamba gubígɔ́l na nigég gidigid agá busió buá bandɔ ɔbɔ́yɔnɔ́ áneé diáguanda uguá guɔyɛd guá bandɔ bá guísi. 3Ɛɛ́ɛ, dinyɛ bandɔ gɔgaá, didiánuanan hana bandɔ bá guísi. 4Ɛ́ɛɛ́, malaŋ má bidí ɔmɔɔ́ dínuananaá na mɔ́ mádibá guaŋan guá bandɔ bá guísi, gɔgaá, búnyɛ malaŋ amánya na buŋaŋa buá Uhaluá, omógódionu bugaga buá gad igága, diágada bilɔg biá dugedie, 5guond diéníŋíse buŋaŋa buá bandɔ ebébíbúlúgenye, bánuanan gá gueleé bádilɛns Uhaluá, diébugenin anam ya dugedie gidigid gá gueleé dúɔ́bɔnɛn Klístus, 6guond uguá ginɛŋ igiɛ́ giɔ́bína giánɔ giánábánɔ gá muand gidigid, dianábá mɔdɔg gá sésídinye melélíe gidigid má idú.
7Nudibíyígán muand úmúnúbumanaá uguá eŋís, mmába mɔndɔ weéguelimenye áneé wɔɔ́guɔ́bɔnɛn na Klístus, ánaá ulɛns buɔ́ gómomi ana gá iŋand gidigid áneé úmuanyɛ úmabá wa Klístus, basuá súsɔ́n diɔ́guɔ́bɔnɛn neéneg. 8Ɔgúná úmadíhuá ihiligine hiá hagá gimbi giánɔ, gɔgaá búdibá gá gad giɛ́. Yeébíhínídié maná giod gá buɔ́, ndiɔ́guɔya gɔg gubia ɔduá gunɔ́h. 9Ndiáguamba áneé búbá hana yeénúlígíminye na mbɔba siámɛ isiɛ́ nnúɔ́ŋɔninaá. 10Ɛɛ́ɛ, ndénu ubuɔ́ bɔ́yɔnɔ́: «Bɔ́guɔya áneé dugálɔ udúnya uguá mbɔba siá Póle dúnyɛ gulal na bubɛ́, Udibá kuanyɛkuanyɛ ginɛŋ igiɛ́ únya agásɔ gá busió, ubuɔ́ wɔ́yɔnɔ́ ta guɔ́bɔn.» 11Ánaá mɔndɔ uwɔyɔnɔ́ buɔ́ anagányɛ ulɛns buɔ́ beseé áneé: ubuɔ́ mbɔba siásɔ síɔ́yɔnɔ́ basuá hádɛ, nɔ́ búánábánɔ́ uguá melélíe buɔ́sɛ ubuɔ́ diánádána. 12Ɛɛ́ɛ, didibá dia bia nimadɛ niá gueleé dibá udényi húmomi ugúnya ana dibígedie naá bómodi ɔbɔ́bíɔ́yɔnɔ́, bébídíyenye bámuanyɛ mbánan, bɔ́bígɔ́lɔn hana bámuanyɛ abánya nugedínyi nuɔ́b mbánan, bébígedenye bamúanyɛ na bamúanyɛ, gɔgaá bódigódi nugedie. 13Gá guásɔ, gubíɔya guásɔ gúdigadɔ́mb nugedínyi, dianála buɔ́ uguá imbál siá buóli isiɛ́ Uhaluá úmadídándɛn, buóli ubugányɛ búgal áneé diesieg uguánɔ. 14Ɛɛ́ɛ, didíáyalan imbál siásɔ hana dimabá hana dímanyɛ didiól uguánɔ. Hómohómue mbánan dimabá bandɔ bá busió bá guólesinuégín ná Ginɔ́g giá Nsɔ́m giá Klístus. 15Didiébígide gisasɔ na gibányɛ giá bɔsɔ́gá. Diámina gɔg mɔgɔdɛ áneé guágɔdɛ́m guánɔ guánáguman hana díbídáganɔ́, agányɛ dianála buóli gudɔ́mb uguánɔ guá ɔlɔŋ uguá imbál isiɛ́ bámadídándɛ́n. 16Guond digiídan uguá busió gá sesenye Ginɔ́g giá Nsɔ́m hádɛ naánanɔ. Didiáguamba guala buóli uguá mesíge má bɔsɔ́gá gá gueleé dibídíyenye na buóli buɔ́b. 17Bidányɛdányɛ biá Ŋŋɔ́ŋɛ́ bíɔ́guɔya áneé: «Mɔndɔ ubíhínenyeé ánaá wág gubíhínenye guég uguá Ɔgúná.»#10.17 Yél 9.23 18Búdibá mɔndɔ ubíhíneyeé únyaá beseé agá eŋís ya Ɔgúná. Búnyɛ gɔg uyɔɔ́ Ɔgúná Úhínenyeé.
ទើបបានជ្រើសរើសហើយ៖
2 Kɔlɛŋɛtiɛ́ŋ 10: EKM
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល