2 Kɔlɛŋɛtiɛ́ŋ 12
12
Duénígie na dambuna uguɔ́ Ɔgúná úmaádábɛ́n Póle
1Búáguamba gɔg áneé mbíbúlúgenye, ta hana búdiabá beseé. Gɔgaá, ŋŋaáguɛ́d gá guɔya duénígie na dambuna uguɔ́ Ɔgúná úmamdambúnɛ́n. 2Yaálinsan ebinene omodi uguá Klístus, bugányɛ duɔŋ dúad na dúníhi, mɔndɔ ugányɛ bómólie yɔ́ abánaág yɔ́ hadɛ́ ugumɔn guá gádádɔ, búmabá uguég guá nuɔ́l lí? Ndiálinsan, búmabá hádɛ na nuɔ́l nuég lí? Ndiálinsan. Uhaluá waálinsan buɔ́. 3Yaálinsan áneé mɔndɔ uyɔɔ́ bómólie ugányɛ, búmabá uguég guá nuɔ́l lí? Búmabá kanda nuɔ́l nuég lí? Ndiálinsan. Uhaluá waálinsan buɔ́. 4Mɔndɔ ugányɛ bómólie yɔ́ gueneg hadɛ́ uguá Paladís uwond uwɔɔ́b bienyébienyé biá dugálɔ ibiɛ́ mɔndɔ údiabia bugaga buá guɔnduguɔyɛd. 5Gá mɔndɔ ugányɛ yenébíbúlúgenye, gɔgaá gámɛ yanág gubíbúlúgenye guámɛ pɛ́ŋ guá bugué. 6Yɔ́mɔ́ya gubíbúlúgenye, ndiábá giegu, yɔɔ́guɔya hómohómue. Gɔgaá yeébídédínye áneé ndibíbúlúgenye, gá giagiá ndiɔ́guɔya áneé bandɔ bábia gilɔg giá nubídágídɛ́n gámɛ gá busió, igínya gía dɔ́mb ubuɔ́ báŋananaá yala ugúnya ana ubuɔ́ bɔ́ŋɔ́bɔ́naá yɔya. 7Gá gueleé mbísámb gubígɔ́lɔn gá muand umuɔ́ Ɔgúná umándábúnɛn umúnya hómohómue beseé, mmadáŋáab uguámɛ guá nuɔ́l hana gidúlie igiɛ́ edúmébi wa Sátan uyɔɔ́ bámadɔ́m úmaŋág, ubúéŋenye áneé ndibíbúlúgenye. 8Mmóbísógólónye Ɔgúná iŋand ídádɔ áneé únúŋúnɛn meyú amagányɛ. 9Uwoŋondinye gɔg áneé: «Magɔg mámɛ maánigimanan naánahɔ, buŋaŋa buámɛ búóbíhóŋonye uguá ginɛŋ igiɛ́ ányá bugué.» Gúu súsɔ́n yénésebenyeé guág gubíbúlúgenye guámɛ uguámɛ guá bugué, gá gueleé buŋaŋa buá Klístus búbá naánamɛ. 10Buand buáguɔ́ yɔ́bɔnaá beseé na bugué, na nsɛg, na giɔ́bíga, na bigaga biá dusésényi, na meyú ɔmɔɔ́ mbiananaá gá Klístus! Gá giagiá ginɛŋ igiɛ́ nnya bugué, gígiáguɔ́ nnya bugaga.
Póle na Gimbi giá beédebi bá Klístus bá Kolɛ́ŋt na ɔdɛ́m bágágá huég
11Ndénu hana ŋŋanyaá giegu, banuá nuéndídígen, banuá nuábá nuáŋáganɛn. Gá giagiá ta haná ndiabá buand, biandá biá medenyi ibigányɛ bídiándúmban. 12Melélíe emédíyenyeé áneé nnyɛ medenyi mámabíalá uguánɔ guá ɔlɔŋ, gumán guá ɔdɛ́m uguá yɔɔ́bídɛ́n gidigid, guala guá biseyi, biímúe biá muand, melélíe má buŋaŋa. 13Giagɛ igiɛ́ númasánudibia igiɛ́ Bimbi biá beédebi bá Klístus bímodi bímabia? Gámɛ gɔg, mmasábá ginɔ́h uguánɔ guá iduá, ánaá núnyibinɛn gɔg gá mbágiá yamɛ iganyɛ. 14Yaŋuá uyɔ ŋŋanyɛ andá mɔdɔg na guól uguánɔ gá uŋand huá gádádɔ, ta anagányɛ ndiganúnyánɛn. Gá giagiá ndiáguamba bunɛ́m buánɔ, gɔgaá banuá mbánan yámbanɔ́. Búdibá baán ebégíŋenú gá busió buá bebíényi, gɔgaá bebíényi bɔ́ bégíŋenú gá baán. 15Gámɛ, yɔɔ́guɔ́bɔn beseé mmémenye bunɛ́m buámɛ yond mbídóŋonye yaŋuá mbánan gánɔ. Mmɔ́núɔya gudɔ́mb haná búámbanɔ́, nunyɛ nua ŋŋɔya nudieg haná búámbanɔ́. 16Ɛɛ́ɛ, mmɔ́yɛd áneé mmasábá ginɔ́h gánɔ, gɔgaá haná mmabiá nugedie nuá núnɔŋ naá nuá guɛ́n uguámɛ guá mebéndi. 17Kásɛ uguá bandɔ ɔbɔɔ́ mmanúdúmɛ́n, mmanúnyánɛ́n na ɔhɛ́n huá omódi a? 18Yaágánganɛn Títe áneé woól uguánɔ na ndiméen [wasɔ uyɔɔ́ mmɔyɛ́d.] Títe, umanúnyánɛ́n a? Diásúguanda uguá ŋŋil yaáguɔ́ imoómi a? Guond uguá maban máguɔ́ mómomi a? 19Búganyɛ giandá giá ginɛŋ igiɛ́ nuól núgedenye áneé diébíségsegie agánɔ gá busió a? Ɛ́ɛɛ́, búnyɛ agá eŋís ya Uhaluá, uguá Klístus gúmuanyɛ dígálgalaá. Guond beliméen bá ginɔ́nɛ́n, ubugányɛ gidigid búnyɛ gá gueleé guágɔdɛ́m guánɔ gúguman, guídan na busió 20Ɛɛ́ɛ, Yɔɔ́guɔ́bɔn bugádɔ áneé gámɛ gá guólésieg ndinúgégié haná yɔ́yɔnɔ́, guond áneé nudiŋánaán hana núɔyɔnɔ́. Yeédíne áneé búbá uguánɔ guá ɔlɔŋ: Kanda giɔ́bína, na yaág, na bílúndulúnd, na bígédenye, na sáŋsáŋ, na musogi, na kendedínenine, na biyógód. 21Yɔɔ́guɔ́bɔn bugádɔ áneé gámɛ gá uŋand uhúóloneé, Uhaluá wamɛ udiŋág ɔduá gunɔ́h agánɔ gá busió, ndiosiól wa baŋa gá giod giá bandɔ igídúmbenyeé na guala bilɔga gisiósio, kendenúgie bilɔŋ gɔ́b gá biíle na gilɔg giá uŋand na gilɔg giá sɔ́d.
ទើបបានជ្រើសរើសហើយ៖
2 Kɔlɛŋɛtiɛ́ŋ 12: EKM
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល