1 Kɔlɛŋɛtiɛ́ŋ 4
4
Medenyi má Klístus
1Nugódi áneé nudiánan hana bedúmébi bá Klístus ɔbɔɔ́ bémedélímínyé bebídígínyi muand muá Uhaluá umúnya uguá ninamba. 2Ubuɔ́ bóhóneé bebídígínyi búbúnya ginɔ́g giá guendenye. 3Mmába hana gámɛ, ta nuŋélenye, ta besumbíbisan bá guísi béŋélenye búdiáŋala ta buand. Ta yaŋuá súsɔ́n ndiábísúmban gisan giámɛ. 4Manɔ́ŋ mámɛ mádiásɔ́mbɔsɔmb gá buand búmodi, búdibá búmuanyɛ gɔg nya wa guɔyɛd áneé ndigódi gigua, Uhaluá úŋélenyeé. 5Buand buáguɔ́ nnúɔyɔnaá áneé, ginɛŋ gímanyɛ gídieg, nudigegúmín gá súmba bisan biá bɔsɔ́gá, ánaá núgígan guesieg guá Ɔgúná, wenéhúgúne umúnya uguá ninamba niá mbíne, udambɔn dugedie duá bandɔ udúnya uguɔ́b guá idɛ́m. Agányɛ gɔg Uhaluá wéneéŋineé sig mɔndɔ mpínényi inyaá yeg. 6Beliméen bámɛ, gá buónyi ubuɔ́ mmɔ́ndɔ́núɔyɔn ubugányɛ, mmɔgɔ́l nulínsa gá Apolós naá gámɛ mbánan gánɔ gá busió, gá gueleé gásɔ gá nulinsa nuhúnhɔn áneé nudibídíyényé na guɔya áneé yaŋuá nnyɛ uguélém guá déné gígeli, aŋuá uguélém guá déné gígeli. 7Ányá uguhuánaá udényi huá dúmban bɔsɔ́gá a? Buand gidigid ubuɔ́ ogódiónú búnyɛ Uhaluá úguhuánaá buɔ́ mbuen? Mmába amadáŋáab, gá giagɛ igiɛ́ ányá wa bísómónye hana amasádáŋáab buɔ́?
8Nuganyɛ na buand gidigid ubuɔ́ núámbanɔ́! Nuganyɛ nnuɛ́m! Nuámánguáyan ifuŋ, basuá gɔg didibá ta buand búmodi! Núámábá nɔ́ hómohómue, késie basuá súsɔ́n dinyɛ ifuŋ ɔlɔŋ naánanɔ! 9Gá guámɛ guán gɔg, yaáguánan áneé Uhaluá umenédídúgúmínyé basuá medenyi agá ondig huá nsúgúdinye hana bandɔ abágíganaá nigué. Ɛɛ́ɛ, dinyɛ agányɛ hana boóndóndi agá eŋís ya guísi gidigid ya bilúna naá ya bandɔ. 10Basuá dinyɛ bɔduɔ́duá gá busió buá Klístus, banuá gɔg núnyɛ begedigédi uguá Klístus. Basuá dinyɛ beguégué, banuá nunyɛ bigaga. Bénúhínenye giod, bádisíŋa basuá. 11Basuá ɔbɔ na nsan na niída múmanyaá gá dínúma uguá gisigɛl igiɛ, dinyɛ nuɔ́l gudɔɔ́, bédígényígenyeé, didiédugumen hɔɔ́m hómomi. 12Diɔ́dɔgɔn na guala buóli na imbɔ́g siásɔ mbánan, bádísiga basuá gɔg disaya bɔ́. Bódióbígónye, basuá dilume gulume na buɔ́. 13Bádigálgalɛn, basuá digínyiginyeé bɔsɔ́gá. Guesiegén na badabdab uyɔ bandɔ bá guísi bádíbíyigan hana biguidi, hana bilɔg biá muand biá guod agá gindi.
Póle weésilen baán bég bá ɔdɛ́m
14Mmɔ́sɔ́núɔ́ŋɛ́ɛn buɔ́ gá núágan ɔduá gunɔ́h. Nunyɛ baán bámɛ ɔbɔɔ́ yɔ́yɔnɔ́ giod, yaáguamba gɔg gunúdógonyinye. 15Ta nubianan behuínyihuínyi bénig ebénúdíyenyeé gusɔ́dɔn uguá Klístus, gɔgaá nudigódi besíe giod. Búnyɛ yaŋuá mmaánúhuá nusɔ́da uguá Ginɔ́g giá Nsɔ́m giá Yésuse Klístus, na núɔyɔn Ginɔ́g giá Nsɔ́m. 16Gúu gɔg nnúgínyiginyeé áneé numbígedenye. 17Gá buand buáguɔ́ mmánúdúmɛ́n Timoté, muɔ́n wamɛ wa ɔdɛ́m úmuanyɛ súsɔ́n gilád giámɛ uguá Ɔgúná, gá guendenúdúmenye ŋŋil siámɛ siá nusɔ́da uguá Klístus. Buɔ́ yaŋuá mpuínyíhuinyeé uguá Bimbi biá Béedébi bá Klístus gidigid.
18Bandɔ bómodi bégédényé áneé ndigonduguól uguánɔ uguɔ́g, gúu bébígidenú gisasɔ naá buɔ́. 19Mmába Ɔgúná wɔɔ́guɔya gɔg, maná ginɛŋ ŋŋoól uguánɔ, gúu ndiɔnɔ́gɔ́lɔ́nɔ́ ginɛŋ na dugálɔ duá ebébídíyenyeé. Gɔgaá yanán ubuɔ́ bógódionu bugaga buá gual. 20Gá giagiá búdibá dugálɔ duá niíd dúdúnya uguá Niguili niá gumɔn, búnyɛ buŋaŋa. 21Giagɛ igiɛ́ núɔyɔnɔ́? Nnuólín na gifáfína lí, ugúnya ana na ɔdɛ́m huá ginɔ́nɛ́n na yɛbyɛb?
ទើបបានជ្រើសរើសហើយ៖
1 Kɔlɛŋɛtiɛ́ŋ 4: EKM
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល