1 Kɔlɛŋɛtiɛ́ŋ 5
5
Nusɔ́da nuá bidáŋa
1Bɔ́guɔya hɔɔ́m gidigid áneé nuɔ́sɔ́dɔn uguá bidáŋa uguánɔ guá ɔlɔŋ uguɔ́g, gilɔg giá nusɔ́da igiɛ́ ta bindiádába bídiábá bíɔ́sɔ́dɔn nɔ́, sɔ́gá wánɔ omodi wɔɔ́sɔ́dɔn na ugányɛ síe. 2Gá gueleé nubahɔn masiana, nudiábaŋa. Pɛ́ŋ núéhínenye mɔndɔ uwalanɔ́ bubuand ubugányɛ. Bumɔndɔ ubugányɛ, kásɛ nudibá nua hémie buɔ́ uguánɔ guá gimbi a? 3-4Gá guámɛ gɔg, ta haná nudiáŋánán geŋulugeŋulu, nnyɛ ɔlɔŋ naánanɔ uguá gileénde. Gúu, buɔ́sɛ ubuɔ́ núánándabánɔ́ gá nigúsa, uguá ɔhɛ́n huá Ɔgúná Yésuse na buŋaŋa ubuɔ́ úmpuánaá, nsamanasɔ́mb gisan giá mɔndɔ uwalanɔ́ buɔ́ hana nnyɛ hɔ́. 5Bumɔndɔ ubugányɛ búánigíman áneé béŋin yɔ́ gá Sátan gá gueleé ubegesie nuɔ́l nuég, agányɛ gileénde giég gíbádabá igiháŋánɔ buɔ́sɛ buá guól guá Ɔgúná.
6Búdibá ubugányɛ buand núnya nuébíhínenye naá buɔ́! Nudiálinsan áneé maná buanyɛ wa guóbonye oguŋ, woóguóbonye gidɔ́ba gidigid a? 7Bíóliónón gɔg gilun giá buanyɛ igigányɛ, gá bá gidɔ́ba igiɔ́n gá giagiá, nudigódi buanyɛ buá guóbonye oguŋ, gá giagiá básamanasɔ́mb Klístus unyaá muɔ́n wa gidúmbúa giá Páska wa bayúdɛn. 8Ánaá díbíne gɔg budɔ́mb buásɔ, búdibá na gilɛ́d igínya igínámbánɔ na gilun giá buanyɛ giá guóbonye oguŋ huá bufal na huá mamb. Gɔgaá na gilɛ́d giá kanda buanyɛ buá guóbonye oguŋ huá budányɛ na hómohómue.
9Mmenúényé guanda na biendéndi uguámɛ guá mbɔba ya busió iyɛɛ́ mmɔnuɔ́ŋɛ́ɛn. 10Mmasábíyigan biendéndi gidigid biá guísi, ugúnya ana bandɔ gidigid abánya bagágág, beébi, ugúnya ana ebébúlúgenyeé biaŋana, agányɛ gɔg búámbanɔ́ áneé nuólígie uguá masɔ́m má guísi. 11Dabdab yɔɔ́núɔ́ŋɔn áneé nudigúlénín na mɔndɔ ubídɔ́ŋɔnaá áneé eŋédébi, henyé unyɛ giendéndi, agágág, ubúlúgenyeé biaŋana, abánbán, gihuɔ́gíba, ugúnya ana uŋébi. Nudigódi muɛ́d áneé nunyánan na mɔndɔ ugányɛ. 12Búdibá buónyi buámɛ, kásɛ búnyɛ yaŋuá nnyaá wa gélenye bandɔ bá nígadá a? Banuá núgódionu áneé nugélenye bandɔ abánya uguadá a? 13Abánya bá nígadá, Uhaluá wenégélenye bɔ́. Óliónón uhánd uguánɔ guá ɔlɔŋ.#5.13 Det 17.7
ទើបបានជ្រើសរើសហើយ៖
1 Kɔlɛŋɛtiɛ́ŋ 5: EKM
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល