1 Kɔlɛŋɛtiɛ́ŋ 3
3
Bedúmébi bá Uhaluá
1Beliméen, mmába hana gámɛ, mmasánúgálgalɛn hana bandɔ obógódionu Gileénde igíhunígán, mmanúgálgalɛn gɔg hana bandɔ bá guísi uguɔ, hana biayɔ ibímanyaá bídigúnɛ́n uguá guágɔdɛ́m. 2Búnyɛ mabána mɔɔ́ mménúbúnsenyé, búámabá gunyá guá gulal késíe numɔsúguɔ́d guɔ́. Ta dabdab uyɔ nudibá nuá guɔ́d guɔ́. 3Gá giagiá numanyɛ gá sɔ́dɔn hana bandɔ bá mmegu, uguá ginɛŋ igiɛ́ númanyaá gá guala yaág na nségie banuá na banuá, ubugányɛ búédídíyenye áneé nunyɛ bandɔ bá mmegu, numanyɛ súsɔ́n gá sɔ́dɔn hana mɔndɔ wa guísi. 4Uguá ginɛŋ igiɛ́ mɔndɔ uguánɔ guá ɔlɔŋ wɔ́yɔnɔ́ áneé: «Yaŋuá yɔɔ́guɔ́bɔnɛn na Póle.» Omodi wɔnɔyɛ́d egéné áneé: «Yaŋuá nnyɛ wa Apolós.» Nudiáguala buɔ́ hana bandɔ bá mmegu a?
5Dímamba buɔ́ gɔg, ányá unyaá Apolós? Ányá unyaá Póle? Basuá dinyɛ pɛ́ŋ bedúmébi bá Uhaluá ebénúdíyenyeé ŋŋil ya guágɔdɛ́m. Sig mɔndɔ waáguala buég buóli ubuɔ́ Ɔgúná úmeéŋin yɔ́. 6Yaŋuá mmagɔ́n bunimɛ́d, Apolós uweyugen, Uhaluá úmeégúményé buɔ́ gɔg. 7Agányɛ, naá ugúnanɔ́ naá uyugeneé bányɛ agá gudɔɔ́, pɛ́ŋ Uhaluá únyaá buá gidigid, úgumenyeé bunimɛ́d. 8Na ugunánɔ́ na uyugeneé bányɛ buand búmomi. Gúu, sig mɔndɔ wanádáŋáab bisuɛ́n ibínigimanaá na buóli buég. 9Gá giagiá, diáguala buóli ubugányɛ ɔlɔŋ na Uhaluá, gúu banuá núnya gɔg mesíge má Uhaluá, nuhág nuég. 10Uguá magɔg ɔmɔɔ́ Uhaluá umámpuá, yaálá buóli hana abunda, iyabɔnd giansɛ. Dabdab sɔ́gá omodi úháganɔ́ hɔ́, búáguamba gɔg áneé sig mɔndɔ ubídédínye na buhégíe buég. 11Mmába hana gá bunda, mɔndɔ omódi udibánd wa guandabɔnd gímodi gudɔ́mb igínya hɔ́ áneé Yésuse Klístus. 12Uguá bunda ugugányɛ, ta uhága na góol, ta na sílíba, ta na bimenyimin biá adányɛ, ta na madɛ́, ugúnya ana na iŋɔ́ns, 13bénéhémie gɔg buóli buá sig mɔndɔ agá budányɛ buɔ́sɛ buá súmba bisan. Ɛɛ́ɛ, buɔ́sɛ ubugányɛ búénébídíye na yoógi, gúu yoógi híénébegesie buóli buá sig mɔndɔ gá díye hana búnya. 14Mɔndɔ uyɔɔ́ buóli buég búdianábíganɔ́, ubia bisuɛ́n. 15Uyɔɔ́ yoógi hiénébegesie buóli buég, waáyɛ́n, ta anagányɛ úmuanyɛ mbánan bánaháŋ yɔ́, búbá gɔg hana umébílíníd agá gilɛ́mb giá yoógi.
16Nudiényi áneé nunyɛ idúl hiá Uhaluá, gúu Gileénde giá Uhaluá gígigánɔ́ uguánɔ a? 17Mɔndɔ úmágad idúl hiá Uhaluá, Uhaluá wanágad yɔ́ súsɔ́n, gá giagiá idúl hiá Uhaluá hínyɛ budányɛ, gúu idúl hiáguɔ́ hínya banuá.
18Mɔndɔ udibínɔ́ŋ, mmába mɔndɔ unyɛ uguánɔ guá ɔlɔŋ wɔyɔnɔ́ áneé unyɛ egedigédi uguá bilɔŋ biá guísi uguɔ, ánaá wáyɛ ɔduɔ́duá ubádabia nugedie, 19gá giagiá nugedie nuá guísi uguɔ núnyɛ duduɔ́duá agá busió buá Uhaluá, búnyɛ ubúɔ́ŋɔ́n áneé: «Uhaluá weégimbenin begedigédi uguɔ́b guá mamb.»#3.19 Yɔ́b 5.13 20Ɔbɔ́nduguɔyɛd hɔɔ́m hómodi áneé: «Ɔgúná waálinsan dugedie duá begedigédi, waálinsan áneé dúnyɛ agá gudɔɔ́.»#3.20 Gil 94.11 21Agányɛ gɔg, ta mɔndɔ omoómi udibá wa guág ibal hiég uguá bɔsɔ́gá bandɔ, gá giagiá buá gidigid búnyɛ buánɔ. 22Na Póle na Apolós, ugúnya ana Sefas,#3.22 Sefas, bɔ́ndɔdɔ́ŋɔ́naá áneé Piéle. guísi, nusɔ́da ugúnya ana nigué, buá dabdab ugúnya ana ubúóloneé, umugányɛ gidigid múnyɛ muánɔ, 23nuɔ́guɔ́bɔnɛn gɔg na Klístus, Klístus wɔɔ́bɔnɛn na Uhaluá.
ទើបបានជ្រើសរើសហើយ៖
1 Kɔlɛŋɛtiɛ́ŋ 3: EKM
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល