1 Kɔlɛŋɛtiɛ́ŋ 2
2
Gudúgie guá nigué niá Yésuse uguá nuag
1Beliméen, agaá yaŋuá Póle mmólon uguánɔ, mmosúguólon na bugéli ugúnya ana na nugedie nuá ahadɛhádɛ gá dambɔn giséyi giá Uhaluá. 2Gá giagiá, mmasúguamba gulɛns buand búmodi uguánɔ guá ɔlɔŋ esíe hómohómue Yésuse Klístus, Yésuse Klístus uyɔɔ́ bɔ́mɔ́ndɔ́n uguá nuag. 3Yaŋuá mbánan mmonúólín, iyɔɔ́búlɔbɔ́l na bugádɔ na bilígímin. 4Na nugálɔ nuámɛ na sesenye guámɛ guá Ginɔ́g giá Nsɔ́m, múmasábá dugálɔ duá idɔ́nda, búmabá gɔg gá díye na buŋaŋa na Gileénde. 5Gá gueleé guágɔdɛ́m guánɔ gúdiólónín uguá nugedie nuá bandɔ gɔgaá uguá buŋaŋa buá Uhaluá.
Nugedie nuá Uhaluá
6Henyé gɔg áneé búnyɛ nugedie díhuínyihuinyeé bilun biá beédébi, nugedie unúdiabá nuá hínen ugúnya ana nuá ifuŋ siá hínen isíánasúlanɔ́. 7Diéhuínyihuinye nugedie nuá Uhaluá unuɔ́ bádiábábásalɔn na unuɔ́ úmanamb feké ta gudíye bandɔ, unuɔ́ úmebué gudídánɛ́n gásɔ gá nigúmi. 8Uguá ifuŋ siá hínen, ta huá húmomi húmasálɛns yɔ́, gá giagiá síámálɛns yɔ́, késíe símɔsúguɔ́ndɔ́n Ɔgúná wa nigúmi uguá nuag. 9Gɔgaá, búnyɛ ubúɔ́ŋɔ́n áneé, búnyɛ ubuɔ́ niís nísánídián, ubuɔ́ odú húsɔ́húdiɔ́b, ubuɔ́ ɔdɛ́m huá mɔndɔ húséhúdigedíe, buá gidigid ubugányɛ Uhaluá úmaŋán gá busió buá bandɔ ɔbɔ́yɔnɔ́ yɔ́.#2.9 Esa 64.4 10Búnyɛ ubuɔ́ Uhaluá úmédídíye uguá Gileénde, gá giagiá Gileénde gíɔ́sɔga buá gidigid, ta ubúnya uguá súluúm wa Uhaluá. 11Ányá gɔg unyaá uguá ɔlɔŋ huá bandɔ ulinsanaá ubúnya uguadá guá mɔndɔ? Bilɔŋ bímomi, ubúnya uguá Uhaluá ta mɔndɔ udiálinsan buɔ́ búmábúdibá Gileénde giég. 12Gásɔ gɔg, dimasádáŋáab gileénde giá bandɔ bá guísi, gɔgaá dimadáŋáab igíóloníneé agá Uhaluá gá lɛns mpuán yeg ya magɔg. 13Gúu dídiɔ́yá mpuán igányɛ na bugélígélíe ubuɔ́ nugedie nuá bandɔ núhuínyihuinyeé, gɔgaá, ubuɔ́ Gileénde gíhuínyihuinyeé na guɔya guá gileénde na nugálɔ nuá gileénde. 14Mɔndɔ ugedenyeé pɛ́ŋ uguá bilɔŋ biá bunyɛ bandɔ, udiáguádáaban ubúólonineé uguá Gileénde giá Uhaluá. Búnyɛ buegu gég gá busió udibá walɛns buɔ́, gá giagiá búnyɛ uguá Gileénde dilínsaninaá buɔ́. 15Henyé gɔg áneé, mɔndɔ únyaá na Gileénde giá Budányɛ weébide buand gidigid, úmuanyɛ gɔg ta mɔndɔ udibá wa bidid yɔ́. 16Gá giagiá anyaá umaámánalɛns nubídágídɛ́n nuá Ɔgúná gá guéŋin yɔ́ isɔ́ma? Basuá gɔg digódi nubídágídɛ́n nuá Klístus.#2.16 Esa 40.13
ទើបបានជ្រើសរើសហើយ៖
1 Kɔlɛŋɛtiɛ́ŋ 2: EKM
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល