Maliko 14
14
Nzila ya kumkomela Yesu
Matayo 26:1-5; Luka 22:1-2; Yohana 11:45-53
1Zikala zisigala siku mbili ili ifike siku nk'hulu ya Pasaka na ya migate haigeligwe hamila. Walava nt'hambiko wakulu na wafunza Malagilizo wakala wakulonda nzila ya kumgwila Yesu kwa mbuli za kumziga ili wamkome. 2Mbali wakalonga, “Chisekumgwila muna isiku nk'hulu ya Pasaka, want'hu wasekwiza kugala timbwayaya.”
Mwanamke akumuhaka Yesu mavuta
Matayo 26:6-13; Yohana 12:1-8
3Yesu ivo akalile Besania muna ikaya ya Saimoni mnt'hu akalaga na utamu wa mbuza. Ivo akalile akudya ndia akeza mwanamke imwe atozile nshupa ikalile ina mavuta yakunukia mp'homvya idamane, nayo yauguligwa kwa hela nyingi, akifungula ila nshupa na kumgidila Yesu mmutwi. 4Want'hu wamwenga wakalile hant'hu hala wakapata maya, wakawa wakuiuza, “vino hangi akuyaza bule mavuta yano? 5Mavuta yano ingi yaguligwe kwa hela nyingi na hela kuwenk'ha wachiwa! Kamala wakambwakila nk'hani ila mwanachike.”
6Mbali Yesu akawalongela, “Mlekeni! Vino hangi mkumgaza? Yeye kanitendela mbuli idamane nk'hani. 7Wachiwa munao siku zose, mkudaha kuwataza chipindi chochote icho mkulonda. Mbali nie sekeniwe na mweye siku zose. 8Kwa vila mwanamke ino katenda vila adahile, kauhaka mavuta mtufi wangu kwa ajili ya kuwika tiali kwa kuzikigwa. 9Huwalongela kweli, hant'hu hohote muna isi, hakulonda kulongigwa mbuli Idamane, mbuli ino aitendile mwanamke ino nailongigwe kwa ukumbuso wake.”
Yuda akutogola kumbiduka Yesu
Matayo 26:14-16; Luka 22:3-6
10Kamala Yuda Isikaliyote, imwenga wa wala wanahina kumi na waidi, akaita kwa walava nt'hambiko wakulu ili ambiduke Yesu. 11Walava nt'hambiko wakulu ivo wahulike mbuli izo wakadenk'helela, wakamulongela Yuda nawamwink'he hela. Ivo, Yuda akaandusa kulonda nzila ikulonda kumtenda Yesu agwilingwe na walava nt'hambiko.
Yesu akudya ndia ya Pasaka hamwenga na wanahina wake
Matayo 26:17-25; Luka 22:7-14; Luka 21:23; Yohana 13:21-30
12Muna siku ya mwanduso ya siku nk'hulu ya migate haigeligwe ugwadu, chipindi chila Mwanangoto wa Pasaka akuchinjwa, wanahina wake wakamuuza, “Ukulonda chite chikakusasalile kwani ndia ya Pasaka?”
13Kamala Yesu akawatuma wanahina wake waidi kulawa mwa wala wanahina wake, akawalongela, “Gendeni kuna dibululu uko nammuone mwanamulume kapapa biga da mazi. Mweye mkoleni, 14hadi muikaya akulonda kuingila, na mkafika mulongeleni mwenye kaya iyo, ‘Chikwani chumba changu cha kudila Pasaka hamwenga na wanahina wangu?’ 15Nae naawalagise chumba kikulu kuchanya mdilingo kiikigwe goya. Ivo sasaleni chidile Pasaka umo.”
16Wanahina wakahalawa na wakaita kuna dibululu, wakafika kila kint'hu gesa vila Yesu awalongele, na ao wakasasala ndia ya Pasaka.
17Ivo ifikile dihungile, Yesu akeza mui kaya ila hamwenga na wala wanahina wake kumi na waidi. 18Ivo wakalile haukudya, Yesu akawalongela, “Kweli huwalongela, imwe hagati yenu nae akudya hamwenga na nie, naanibiduke.”
19Aho wanahina wake wakaingila chiholo, kila imwe akamuuza Yesu, “Vino, ni nie?”
20Yesu akawalongela, “Ni imwe kulawala mmwenu mweye wanahina kumi na waidi, nae akuchofeka mgate hamwenga na nie mdibakuli. 21Nie Mwana wa Mnt'hu nanidanganike gesa vila yandikigwe muna ichitabu cha Mulungu, mbali naaluone mnt'hu ila akunibiduka nie Mwana wa Mnt'hu! Saingi iwile goya mnt'hu iyo asekuelekigwa.”
Ndia ya Mndewa
Matayo 26:26-30; Luka 22:14-20; 1Wakolinto 11:23-25
22Ivo wakalile wakudya, Yesu akasola mgate na akamwik'ha hewala Mulungu akaumegula mgate na kuwenk'ha wanahina wake akawalongela, “Soleni mudye uno ndo mtufi wangu.”
23Kamala akasola chikombe cha divai, akamwik'ha hewala Mulungu, akawenk'ha wanahina wake wose wakaking'wila chikombe icho. 24Yesu akawalongela, “Ino ndo damu yangu ikulagisa Lagano da Mulungu na want'hu wose, damu ikutika kwaajili ya want'hu wengi. 25Kweli huwalongela, seke ning'we kaidi divai hadi siku ila hulonda kuing'wa divai idamane muna Umwene wa Mulungu.” 26Kamala wakaimba wila wa kumtunya Mulungu, ivo wakomeleze kuimba wakahalawa wakaita kudi Gamba da Mizeituni.
Yesu akulotela Petulo naambele
Matayo 26:31-35; Luka 22:31-34; Yohana 13:36-38
27Ivo wakalile muinzila Yesu akawalongela wanahina wake, Mweye mose namnisumke na kunileka nidumwe, gesa vila iyandikigwe muna mandiko ya Mulungu, Mulungu akalonga, “Nanimtoe mdima, na wanangoto nawapwimwiluke. 28Mbali nikabwela muna ugima naniwalongole kwita Galilaya.”
29Kamala Petulo akamulongela Yesu, “Leka wamwenga wakusumke mbali nie sekenikuleke mbwi!”
30Yesu akamulongela Petulo, “Kweli hukulongela, ichilo chino, nzogolo hanalila lwa kaidi, weye naunibele mala nt'hatu.”
31Mbali Petulo akagendelela kulonga, “Hata nikalondigwa kudanganika hamwenga na weye, seke nikuleke mbwi.”
Na wanahina wamwenga wakalonga ivoivo.
Yesu akumulomba Mulungu uko Getisemani
Matayo 26:36-46; Luka 22:39-46
32Ivo wakaita hadi hant'hu hakutangwa Getisemani. Yesu akawalongela wanahina wake, “Kaleni hano chipindi nie hwita kumulomba Mulungu.” 33Kamala akawasola Petulo na Yakobo na Yohana akaita nao hatali kidogo na akaandusa kugazwa na kuhenyeka muumoyo, 34akawalongela, “Usungu niwile nao muumoyo wangu ni mkulu nk'hani ukudaha kunikoma. Kaleni hano na chelezeni.”
35Yesu akaita halongozi chidogo, akaigwisa kingubingubi akamulomba Mulungu, akalonga, “Ikadahika nisekufosela mahenyeko yano.” 36Akalonga, “Tati yangu kumwako mbuli zose zikudahika, hukulomba unisegezele chikombe chino cha mahenyeko, mbali isekuwa gesa vila hulonda nie, mbali iwe gesa ivo ukulonda weye.”
37Kamala Yesu akabwela kwa wala wanahina watatu, akawafika wagona. Ivo akamuuza saimoni kwazina dimwenga akutangigwa Petulo, “Saimoni, vino kugona? Kupotwa kucheleza hata disaa dimwe?” 38Kamala akawalongela, “Chelezeni na kumulomba Mulungu msekwiza kuingila muna magezo ya mbuli zihile. Mweye mkulonda kufinyiliza magezo mbali mitufi yenu haikulonda.”
39Yesu akaita kaidi kumulomba Mulungu, na akaibwelela kuilonga mbuli ila ila. 40Kamala akabwela kaidi akawafika wanahina wake wagona. Wakala na nt'hongo nk'hani, ivo hawamanyile mbuli ya kumulongela Yesu.
41Ivo ezile kumwawe lwa katatu, akawalongela, “Vino munk'hali mgona na kuhumula? Elo inukeni! Chipindi chifika nie Mwana wa Mnt'hu kugaligwa kwa want'hu wehile. 42Ivo timalaleni chiteni. Loleni, ila mnt'hu akulonda kunibiduka nie ahaguhi.”
Yesu aKugwiligwa
Matayo 26:47-56; Luka 22:47-53; Yohana 18:3-12
43Yesu ivo akalile ank'hali akulonga, ahoaho akeza Yuda Isikalioti, imwe wa wala wanahina kumi na waidi, akeza hamwenga na want'hu wengi, wana mapaga na mabalango. Want'hu ao wakala watumigwa na wakulu walava nt'hambiko na wafunza Malagilizo na vilongozi. 44Ila Yuda Isikalioti akawenk'ha vilagiso, “Ila hulonda kumulamsa kwa kumkumbatila ndo yeye mgwileni.”
45Yuda ivo afikile, akaita dimwe kwa dimwe kwa Yesu, akamulamsa, “Mfunza!” Kamala akamkumbatila. 46Ivo, wala want'hu wakamgwila Yesu na kumtatiliza. 47Kamala imwe wa want'hu wakalile watimalala hant'hu hala hamwenga na Yesu, akadisomola panga dyake akamuhambula gutwi mtwana wa Mlava nt'hambiko Mkulu.
48Yesu akawauza, “Vino hangi, mwiza na mapanga na mabalango kunigwila gesa vila nie mbavi? 49Siku zose nikala hamwenga na mweye huwafunza kui Kaya ya Mulungu wala hamunigwile, mbali yano yakulawila haluse ili mbuli ziandikwe muna chitabu cha Mulungu yafikile.”
50Kamala wanahina wose wakasumka na kumuleka Yesu adumwe.
51Kukala na mbwanga imwe akalile kavala golole, kakala akumkola Yesu. Ivo wamuonile wakalonda kumgwila. 52Mbali ila mbwanga akapulusuka akauleka ula mgolole wake, akasumka kuno akimbwigili.
Yesu akugalwa muna chitala
Matayo 26:57-68; Luka 22:54-55-63-71; Yohana 18:13-14-19-24
53Kamala wakamgala Yesu kui kaya ya Mulava Nt'hambiko Mkulu. Walava nt'hambiko wakulu wose na vilongozi na wafunza Malagilizo wakala waifika hant'hu aho. 54Petulo akamkola Yesu kwa kutali, akeingila mgati muna ua wa mlava nt'hambiko mkulu, akakala hamwenga na waamizi wakuotela moto. 55Wakulu wa walava nt'hambiko hamwenga na want'hu wose wa chitala wakalonda mbuli ikulonda kumtenda Yesu akomigwe, mbali hawapatile. 56Want'hu wengi wakalonga mbuli za uhuni kuhusu Yesu, mbali mbuli zawe wazilongile hazilingane.
57Kamala wakatimalala wamwenga. Wakalonga mbuli za kuhuna kuhusu Yesu, wakalonga, 58Chimuhulika mnt'hu ino akulonga, “Naibanange Kaya ya Mulungu izengigwe na want'hu, na kwa siku nt'hatu naaizenge imwenga ambayo hadikuzengwa na want'hu.” 59Mbali hata ivo mbuli zawe wazilongile hazilingane.
60Ivo, mulava nt'hambiko mkulu akatimalala hagati yawe akamuuza Yesu, “Vino, una mbuli yoyote yakulonga? Vino hukuona want'hu wose wano wakulonga mbuli zino kuhusu weye?” 61Mbali Yesu akanyamala tulu, halongile mbuli yoyote. Mlava nthambiko mkulu akamuuza kaidi, “Vino, weye ndo Kilisito, Mwana wa Mulungu akufugamalalilwa?”
62Yesu akalonga, “Ena, ni nie. Mweye namnione nie Mwana wa Mnt'hu nidundumala ubanzi wa kulume wa Mulungu mwenye nguvu, nanize muna mawingu.” 63Aho mulava nt'hambiko mkulu akaidega nk'hanzu yake kwa kulagisa maya, akalonga, “Hachikulonda want'hu wamwenga weze kugendelela kuchilongela mbuli zake. 64Wose muhulika vila akumdukana Mulungu! Elo mweye mkulonda chimtendeze?” Want'hu wose wa chitala wakalonga akomwe. 65Ivo, want'hu wamwenga wakaandusa kumtemela mate, wakamgubika meso na kumtoa kamala wakamulongela, “Lotela niani akutowile!” Waamiizi wakamsola na kumtowa mank'huwa.
Petulo akumbela Yesu
Matayo 26:69-75; Luka 22:56-62; Yohana 18:15-18-25-27
66Petulo ivo akalile ank'hali mgati muuwa, akeza mtwana wa chike wa mulava nt'hambiko mkulu. 67Ivo amuonile Petulo akuotela moto, akamulongela, “Vilavila na weye kukala hamwe na Yesu Mnazaleti.”
68Mbali Petulo akabela akalonga, “Simmanyile na simanyile icho ukulonga.” Kamala Petulo akasegela akaita kunze ya uwa. Aho zogolo dikalila. 69Ila mtwana ivo ezile kumuona kaidi Petulo, akandusa kaidi kuwalongela want'hu wakalile watimalala hant'hu hala, “Ino nayo ni miyao.” 70Petulo akabela kaidi. Kamala want'hu wakalile watimalala hala wakamulongela Petulo, “Weye ni miyawe kwa vila ni mnt'hu wa Galilaya.”
71Mbali Petulo akaandusa kuiduila na kuiapiza akalonga, “Mnt'hu iyo mkunisimulila mbuli zake nie hata simmanyile.” 72Ahoaho zogolo akalila lwa kaidi. Ivo, Petulo akakumbukila mbuli ila alongilwe na Yesu zogolo hanalila lwa kaidi, weye naunibele mala nt'hatu. Petulo akalila nk'hani.
ទើបបានជ្រើសរើសហើយ៖
Maliko 14: DBV
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The New Testament in Dowe @The Word for The World International and Dowe Language translation. All rights reserved.